營養師手記

好啦!等咗咁多日，寫吓嘢先! 咁不如開估先啦! 上回題到，我在秩父吃過一件很特別的東西，這到底是什麼呢! 左望望，右望望，白雪雪的，我抱住一試的心態，指著那件波波型蛋蛋，接著，嬸嬸竟然拿起把刀仔，原來這件東西是給一層薄膜包著的。 跟著，這又是什麼，黑色的糖漿，即是大家以為佢好健康的黑糖啦! 加完黑糖，仲有黃豆粉，好似幾好味的東西。 這是完成品，咁!佢究竟係咩呢? 估中...無獎! 我當時都唔知抱住咩味覺去吃這個東西，加黑糖吃的，會是甜的東西嗎?想了一會，試試看吧! 原來，他是一件蛋型的豆腐，日本人實在太愛黃豆製品了，什麼枝豆、納豆、不同種類跟形狀的豆腐，都是他們愛吃的食物。 人人說吃豆腐健康，除了因為同樣提供蛋白質而不含膽固醇外，其抗氧化物異黃酮就是其健康的奧秘，外國人看到亞洲人較長壽也走來研究一下我們的飲食文化呢？原來黃豆就是重要的長壽秘密。當然，不是叫你吃豆腐卜及炸豆腐啦! 黃豆對女性尢其健康，特別是舒緩月經週期不適呢?親身試過，週期前一星期前飲用，經痛大大大減少，但月經來臨時就不要再飲了。 這件蛋型豆腐，真的很美味!有緣到日本，碰面的話，試一試啦!

今天來到一個距離東京市區只有1個半小時車程的地方，他...名叫秩父，由於是芝櫻滿開的時間，所以決定來這兒看花。今天，人多得很，沒辦法吧!5天的日本假期，日本人也來這兒放鬆一下，老實說，假期就是要找個地方Hea...懂得放鬆，人也健康長壽，希望大家早日明白。 這張照片，有花、樹及雲，我才覺得是一幅完美的照片，或許因為太愛樹及白雲了，所以你會看到，每一幅，也有小樹及白雲。 藍天及濃密的樹林，久違了，地球人或許應開始欣賞自然，愛護地球。 唔講...慢慢欣賞。 沒有了這兩株筆直的小樹，這幅圖畫，就不同了。 這天，影了過百張相，你看...扮專家! 這麼美的芝櫻之丘，主角就是他...芝櫻小姐! 給你一個close up! 要健康長壽，懂得放鬆，是心理健康的第一步，當然還有生理健康。 連街頭小食，也是這般健康的，沿途所見，10個日本朋友經過，有一半朋友也買來吃，我... 當然也湊湊熱鬧啦! 還有這個，估到是什麼嗎?我買的那一刻，也是估估下，什麼也看不懂，但我就是愛這種旅行。 你們也來猜! 不難發現，正餐份量也較少的，這個不是下午茶，是午餐，但肉類的份量是異常少的，除了這個，拉麵也只有兩片肉呢!但是五穀的份量也剛好，所以還是那句，飯桶是不易肥的，吃得健康，也是長壽的方法呢!相信日本是最長壽的國家，是有原因的。 這是花絮3則: 我愛的電車... 參觀秩父神社時攝下的，祝大家身心健康。 明天還是假期，來個徹底的放鬆吧!

大家睇吓上面張相先...架飛機確實係飛咁快，早咗成35分鐘到，即是佢只係飛咗3小時，亦即係話如果我瞓倒都只係瞓咗3小時，更何況...我完全瞓唔倒!所以對於一個成日無瞓兼且太開心飲大咗嘅人嚟講，而家寫嘢只係會胡言亂語，所以今日大家淨睇相，我個飲食日記! 係呀!這就是涉谷的早晨，我今朝在這裡睡了一小時... 俾埋我個樣大家睇! Good Night!

激鬼死人! 其實我有時見倒這些宣傳品都會好嬲! 成日同人講可以依賴某種食物去減肥，攪到普羅大眾就以後只要食吓佢，咩人都可以減到磅!係就係會輕，但只係水同肌肉呢!間中一兩日食少d當然無問題啦，但係廣告成日話要keep住兩星期，如果大件d嘅朋友或者男孩子跟住食，隨時都會頭暈眼花。 再同大家深入研究下啦! 佢叫人一日兩餐食粟米片+脫脂奶+生果1份，計下數先，1份生果45kcal+45克粟米片約150kcal+1杯脫脂奶80kcal，即是一餐275kcal，跟住叫人另一餐照常食，你估你會點食? 第一種人，食完兩餐咁悶咁餓，晚餐仲唔有咁大食咁大咩，好!食個干炒牛河，1300kcal，食完咸再食甜，1碗芝麻糊400kcal，咁一日就係2200kcal，唔好笑呀!!好多朋友都係咁，於是乎，愈減愈肥! 鬼咩，你會成日覺得早午兩餐好辛苦，晚上咪獎勵自己囉! 第二種人，已走火入魔的，人哋話其中兩餐用粟米片，兩星期瘦4磅，佢覺得太少，於是就三餐都用粟米片代正餐，於是275x3=825kcal，我話你知，實輕，但係可能有生命危險囉，如果你而家180磅或男性就仲危，而家唔係食一日半日，係兩星期呀!好彩俾你執番條命，但係這樣極速瘦，俾10萬個信心你，你一定肥返!鬼咩，主要瘦肌肉減水，好快回吐!最重要係新陳代謝都減低埋，之後手尾好長架，我見過很多胡亂減磅的戰友，肥返之後，很難減的! 真正的永久瘦身，係唔鼓勵你依賴某種食物，仲有熱量絕不能長期過低，當然要有運動啦!但係最重要係你嘅飲食態度有否改善，所以營養師通常都好鬼長氣，無辦法啦，要改善一個人的習慣非 一朝一夕的事嘛! 嗱!講多一次，唔好亂咁減肥，唔好經常吃過少食物，仲有飲食係要多元化同均衡，即唔可以依賴任何一種食物呀!係咪呢?都話我長氣架啦!

生命中，總有挫折，遇過困難，每一天總被無情的壓力偷襲，令我們洩氣；但我們所經歷的，相比遠方的災民，只是微不足道。 家園失去了，親人被無情的天災帶走，他們的傷痛，不是我們能夠體會。 多年前看過一部著作《唐山大地震》，每一個故事，我仍牢牢記著，『活著的比死去的更難受!』災後要重建的，豈非家園這麼簡單，還有那顆創傷的心。 在苦痛的時間，團結更是力量，雖然我不知青海玉樹在中國版圖的那裡，只知道他們正等待大家伸出緩手。 昨天，在Facebook已作出呼籲，我將會於明天開始直至下星期二(27/4)義賣我較早前的三部著作，是次義賣不設任何上限，總之所有在這5天出售的書籍均會全數透過『香港紅十字會』捐助青海地震災民。以下是這三部著作的售價，當然捐款是不設上限的。 《以營補營》$50 《吃出形態》$60 《瘦得有營》$60 你可以到我們的兩間分店購買，開放時間為星期一至五12-8PM；週六11-4PM 尖沙咀分店：九龍尖沙咀堪富利士道 8 號格蘭中心 1005-6 室 銅鑼灣分店：銅鑼灣謝斐道482號信諾環球保險中心1201室 此外，由於這5天期間將會舉行3場講座，分別是： 24/4(六)2:45-4:30 佐敦柯士甸道童軍中心1030室 26/4(一)7:15-8:45 荃灣大會堂展覽館 27/4(二)7:15-8:45 銅鑼灣中央圖書館地下1號活動室 我們亦會在會場進行義賣書籍活動，同時我們亦會將以上3場講座中，所收取的首次營養師諮詢費用全數捐出。 天災無情，人間有愛，是時候發揮愛的力量。

等咗一個多星期，個有獎問答遊戲終於完滿結束喇! 有片睇架! 這個小食檔，位於深圳一個地方，我見倒好得意，咪影俾大家睇囉!係咩尼! 燒鵪鶉囉! 噚晚個講座，唔知點解好多朋友都問我其實可唔可以食蛋黃，其實如果沒有膽固醇問題的，一星期可以食5隻，就算膽固醇高，都可以食3隻，另外大家成日以為鵪鶉蛋膽固醇超高，其實一隻只有76毫克膽固醇，是雞蛋的1/3，所以唔好怕咗佢，只係一次唔好食咁多隻啫!仲有呀!好似這個小食檔咁，用咁多油煮，就少食喇! 所以是次遊戲得獎朋友係Hube Lui，麻煩你在我email留低電話，我會有專人聯絡你領獎!其他朋友，唔好失望，陸續有來!

星期一晚，在電台節目裡面，Steven講嘅三角形粟米片就是它，我以前也介紹過，但怕部份新來的朋友不認識，就post多一次吧~ 佢嘅味道，算是眾減肥零食中最好味的，戰友們，唯一要留意的就是佢是特大包裝的，10塊=1份五穀類食物，所以取出10塊後，就要立即放回不在視線範圍的地方，以免吃得多減磅變增肥呀! marketplace及260有鬼得賣! Share