見到我這個笑哈哈的樣，應該知道我有D新攪作。事緣係Bonnie同我講見網上有一個人氣極高的小甜點，叫我試下， 唉！見佢咁有興趣，咪滿足下佢，如果成功，戰友又有多一種食物選擇，我就抱住一試無妨的心態，況且個食譜鬼咁簡單，就試下。 網上大熱的香蕉鬆餅的材料係： 一根蕉兩顆蛋的，如下圖。 首先當然係將香蕉壓成蓉啦！ 跟住打蛋，要兩隻。 然後將香蕉蓉混入蛋漿之中，但問題來了，以我做鬆餅／Pancake的經驗看來，實在太稀，難做出成形的鬆餅，所以我膽粗粗加多一根蕉，改良個食譜，效果唔錯。 好！煎得。千奇咪落油，放一大湯匙香蕉蛋漿至鑊中央，記住用中至細火。 掂咗！都好似樣吖！我意思係同一般Pancake。 我這個份量，剛好煎到7片，共286卡，即一片約40卡，作為減肥時的甜品，都算唔錯。 你一定會問，甜品，你都無落糖，咁夠唔夠甜架。因為香蕉有糖份，都可以啦！你可以選較熟的香蕉，效果會更好。味道又點呢！當然，有麵粉的Pancake會好食D，我食完，講咗一句，味道都好特別～而Bonnie呢！佢話：嘩！個味好得意，哈哈！大家明啦！ 我後來開雪櫃，找到我枝珍藏無糖糖漿，加咗落去，嘩！正100倍。如果今個星期六，大家得閒，都試下啦！畢竟佢係一個年度最多人瀏覽的食譜。