薯不簡單

佢緊係唔簡單啦！三十多年前，唔小心跌咗落ｄ油度，變成炸薯條，唔知吸引咗幾多少男少女。但三十年後嘅今日，健康大哂，自從有人話薯仔好肥之後，大家聽到佢個大名都驚，於是呆等大家食佢食等到發哂芽（記得發咗芽就唔好食），佢好彩，碰到我尼個營養師同佢翻案，佢先可以清白，原來薯仔唔只唔肥，仲可以幫大家控制體重添！

我最鍾意用佢整薯仔沙律，簡單都極，最適合我ｄ懶人，烚好薯仔將佢切粒，將粟米、雞蛋同吞拿魚入個小碗，再加２湯匙沙律醬就ｏｋ哂！

有時再懶ｄ，就去超市買盒加水就食得嘅薯粉，1/3碗(乾)相等於1份五穀，再加d切碎嘅西蘭花同茄汁焗豆，簡直一流，有焗爐的話，放片芝士，慢慢溶入d薯仔，yummy....:)

多d時間的話，煮個薯仔雜菜湯都唔錯，1個紅蘿蔔，2個番茄，半個洋蔥、4兩豬肉同1個薯仔，煮佢1小時多分兩餐食，男士就最好食多1碗飯添，小姐們就唔駛喇！

如果唔想飲湯成肚水，將上述材料轉用牛肉粒，用1-2茶匙油再煮，做個菜塗飯也不錯！

薯仔仲可以點整，多不勝數，只要你記住，佢知所以可幫大家減肥，唔係因為佢有咩特異功能，只係因為佢脂肪少，又有飽肚感，所以食得太多都係會肥架！

想知薯粉個樣同邊度有得買，明天話你知，因為唔記得同佢哋影張靚仔相！