營養師手記

有時去街市買嘢，一定要抱住一種心態--忍忍忍... 話說兩日前，行經旺角，諗住買D水果，一行去個生果檔，見到一堆堆紅噹噹，明顯有勁多原花青素嘅車厘子向我招手，跟住檔主就話：『收工平賣，50蚊3磅！』當時我心諗，3磅?點食呀？其實我原先諗住買1磅，但係又唔好意思淨係買1磅，於是我又問：『咁兩磅幾錢？』檔主提議：『兩磅就40蚊，買三磅啦！抵D，俾多10蚊有多成磅！慳得1蚊得1蚊啦！』唉！好似好吸引咁...點算...唔得，1粒車厘子成5Kcal，食20粒已經係1日嘅quota，買3磅返屋企，隨時肥咗都唔知咩事。 最後忍忍忍...買咗兩磅，應該要食3日，好彩，車厘車係my favorite!

下個星期三，係咩日子，七一囉... 除咗七一之外，仲係我同同事本兒童食譜出街喇！這本是我的第二本小朋友食譜，係過去一年係TVB週刊食譜嘅結集，售價絕對係超值...2個硬幣就買到喇...1個$10同1個$5。所以手快有手慢無... ...周圍都會見倒，因為梗有一間係左緊囉！ 近日好多戰友同我講，D小朋友停課，日日你眼望我眼都唔知點算，仲有兩個月，唔通日日做補充練習咩，其實家長可以試下同小朋友一齊煮飯仔啦！烹飪過程中，可以促進親子關係，同時當小朋友多接觸健康食物，佢哋就可以同有營養食物做好朋友啦！ 健康飲食習慣是從少建立的，好似我咁，小朋友的年代，唔準食甜品，大咗就對甜食提不起興趣啦！(哈根大師雪糕例外，1個月都同佢做1次朋友:) ) 又完成一本...仲有一本，賣下關子先，總之俾多24小時我就好喇！ 差D唔記得多謝兩位辛勞的編輯林小姐，多謝佢哋成日催我交稿，仲有借咗好多玩具俾我哋襯相(雖然我公司已經有好多玩具)

放工已經係9點幾，有時太疲累，霎時間真係諗唔到食咩？ D戰友成日話我尖沙咀office附近有好多人氣食店，但係放工時又想唔起。原來有譚仔啦、和越..牛肉粉，仲有我間日式飯堂，板仔壽司。 諗諗下發現好似唔記得幫個心臟補充d奧米加3，於是我昨夜就入咗板仔壽司，睇下我胃口幾好... 相信大家都知道，為咗個心臟好，應該定時定候(每星期每少兩餐)食d魚，尢其是深海魚，最常見是三文魚，好多研究都指出佢可以減低三酸甘油脂同減低血液凝固，所以對預防心血管病舉足輕重。 但係大家一定要留意，多選不代表要大量食，因為份量過多，令脂肪增多，到時肥咗，都係影響健康，仲要記得去皮，可以減低脂肪。 另外，含有豐富甲型亞麻油酸(alpha-linolenic acid)的食物，例如大豆製品、芥花籽油、合桃及亞麻籽，可在體內轉化成EPA及DHA(奧米加3的成員)，所以大家可以留意，但都係果句─多吃傷肚皮呀！ 水浸三文魚的新成員，John west 外的好選擇

唔知係咪這幾天太熱呢？多咗戰友問個涼粉點整，其實大家可以去買百佳或者鷹金錢的涼粉，成罐食哂都係1份五穀，跟住說加自己鍾意的生果，昨天靜悄悄係超市偷影，認住佢啦！

頭先食飯時間，去搵咗有多年養貓經驗嘅朋友兼寵物美容店老板求助，我問：『Innova成日無貨點算？』我哋一齊研究貓糧成份，佢介紹咗d脂肪低d嘅貓糧俾大細毛試，我跟住問咗個好低能嘅問題：『d味道同食開嘅是否相似？』佢笑笑口話：『咁我又未食過？！』 我又問：『但係而家我一粒舊糧都無，點溝？』佢就話有d貓腸胃無咁敏感，都可以，但問題係，我唔知佢哋係咪腸胃敏感呢？

有無覺得佢哋個樣有咩唔同呢？一個可鄰樣囉！ 點解？因為無哂乾糧囉，全個香港D Innova 乾糧缺貨，要6月尾先有，唯有食住罐罐先，但係一般嘅貓仔，見倒罐罐會好開心，無乾糧咪仲好，但問題係，佢個主人每日早出晚歸，d罐頭又唔可以開定俾佢哋，因為會變壞，所以佢哋每朝10點食早餐，晚上11點先有晚餐食囉，所以而家一返到屋企，佢哋兩個竟然好似狗仔咁歡迎我，一反高竇貓嘅性格，無他嘅...咪因為肚餓囉！ 可能有朋友問，咁多牌子貓糧，買其他咪得，最主要問題係，貓貓腸胃敏感，如果要轉糧，一定要兩溝，如果唔係一定肚痀，但而家我一粒糧都無，點溝呢？ 情況就好似有d朋友，平時食開白飯，突然想健康d轉糙米飯的情況一樣，一定要兩溝先，如果唔係就會肚谷谷，好辛苦傢！

今晚返屋企同朋友一齊玩煮飯仔，準備好做雞皇焗飯及蒜蓉炒雜菌的材料，點知買少咗一樣，咪就係焗飯嘅主角--芝士囉，於是我諗到一個方法，d電視劇好興有一幕鄰居借豉油，我今次就去借芝士啦！但當然，唔係鄰居，而係住係同一座的減磅戰友，點知突激家訪，都係借唔到，唯有照煮，這是製成品...