Plan B

激死人喇!原本諗住今晚跑3公里減下肥，點知，天有不測之風雲，無端端落大雨，不過幾滴雨唔會阻我嘅減肥計劃，決定用Plan B，今晚一於早D瞓，明天一早起身做魚，游多幾個塘，仲唔瘦!

你哋一定會話，你仲有咩可以減呢?已經好FIT...唔係...係好瘦!唉!你哋有所不知喇!下個星期，公司影全家福，所以全公司瀰漫著強烈嘅減肥風，個個同事又話要跟D咩咩餐單咁，無辦法啦!都唔知點解D鏡頭好黑人僧，明明係110磅就影到人變120磅，我就仲慘，出咗名唔上鏡，最怕就係個鏡頭，次次都影到我...唉!唔講喇，大家明啦!其實我真人比較好...睇:)大家一齊努力啦!

又無得去跑步，唯有陪下隻傻毛睇電視啦!吖!係呀!知唔知一邊睇電視一邊做咩好???唔係食卡樂C，係一邊做運動呀!因為時間會快D過嘛!唔好掛住睇我個Blog，要做運動喇!下次見我嘅時候，唔好同我講星期三晚因為落雨無做運動，我唔收貨傢!!!你一定有Plan B嘅!世上無難事，只怕有心人呀!

Inspiration...

剛完成講座，有點餓，吃了這個作為晚餐，雲吞麵。或者因為太肚餓，碗麵特別好吃。

有時候，我經常同減磅戰友講：在減磅過程中，雲吞水餃並不是最理想的選擇，嚴格地說，若將食物分為紅黃綠三個等級，她最多只是黃色食物，點解，若果你仔細留意，雲吞內，有2-3成的肉類是肥豬肉，所以不能勝任最理想的減磅拍檔囉!

但係今日唔係淨係想同大家講粒雲吞，而係想同大家分享一段片，昨天沒有寫blog，就是因為他，睇完之後，我深信你會有一番體會，本來想將youtube條片放係個blog，但做不來，有時間上youtube打man with no legs and arms-inspirating story，看完之後，你或許會認同，在這個世界，沒有事是不可能的，問題是你容許這事變成可能嗎?希望看完後，你同我一樣，有這種啟發吧!共勉之!!

唔記得同大家講

忙到差D唔記得同大家講，星期四係銅鑼灣區有一個降膽固醇降血壓嘅講座，當然係免費啦!有時間就拖男帶女上尼聽啦!要留位，電話係2891 0920金美小姐，時間晚上7:15-8:45係禮頓道33-35號第一商業大廈501室。到時見啦!

續...

睇完今日個專欄，你好期待嘅，係那個內服的美顏保濕食譜，定係想知我個貪靚旅伴，行咗唔知幾多間藥店搵嘅外用化妝品叫咩名呢????

老實講，一定要雙管齊下嘅，當然若果你天生麗質就更好啦!好似我咁...hehehehe!

講咗內服先啦!顯得好似比較重要!!今日做一個番茄豆腐肉片湯飯(二人份量)。

準備好材料先啦!
番茄兩大個(切件)
肉片160克(用少許豉油，鹽，生粉同胡椒粉醃好先)
清雞湯125毫升
豆腐1磚(切細件啦!)
白飯兩碗

做法:
1. 先將D肉片同番茄炒好先，記住落1-2茶匙油，咁先有脂肪酸同維他命E架，而且維他命A會吸收得更好，
2.炒完之後加清雞湯同水約2杯，最後加豆腐，大火煲約20分鐘，
3.跟住要加飯，做成湯飯，OK哂!
4.最好有一個維他命C好高嘅飯後果啦!即係士多啤梨呀，奇異果呀，木瓜呀等等啦!FINISHED...

我諗大家好心急想知咩牌子化妝品咁緊要啦!日本朋友話好多人都讚，叫做CANMAKE，最緊要係好平囉...實不相瞞吖，真係好正，如果唔係我一定唔會同大家講，另外，仲有好介紹，下次去日本，記住記住買埋哩枝SPRAY，日本朋友又話每個日本人，無論男男女女，一定有一枝看門口架!不過講樣好激氣嘅嘢俾大家知吖，上個禮拜，我無意間行過Citysuper，俾我發現竟然有那個化妝品牌子，等我仲係日本行咗幾條街幫個friend搵!不過未見到枝SPRAY嘅蹤影!見到唔該話我知!

最後，都係個句啦!飲多D水，皮膚就會健康D啦!係咁先，好眼瞓喇!

與飛行機的約會

你哋今日去咗邊呢??我就去咗哩度!
咪係政府飛行服務隊個開放日囉，但係醉翁之意不在酒，在乎佢個基地傍邊嘅機場跑道，哈哈!!!咁就可以俾我近距離同D鐵鳥接觸囉，所以影咗好多相，同大家分享下先!

影完飛機之後，仲有佢，咸蛋黃1個，但係佢唔會令大家膽固醇高嘅，唔駛擔心，但係唔知大家覺得張相似日出定日落呢??其實我覺得似日出，你認為呢????

蟹宴+朋友牛一+預祝毛毛生日

噚晚，很高興，簡直係一次過完成3個任務...因為咁，屋企迫滿咗20個幾朋友。

又係朋友仔生日，仲有預祝愛貓毛毛兩歲生日，但我相信主角應該係佢...

不過噚晚最精彩嘅活動，應該係哩個遊戲，真係超超超好玩，玩到我喊哂!開Party真係必備，玩完包你興奮到瞓唔著囉!

不如同大家玩下吖，你估下我畫緊咩?估地名...(註:我係瞇埋眼畫架!!!!)

俾24小時大家估，明天開估!

心理測驗

一日之計在於晨，所以一早起歎過杯卡巴仙奴，又開始工作。我知道好多朋友今日放假，不如輕鬆D同大家玩個心理測驗吖。

問題係：如果你今日生日，同事問你想食咩蛋糕，你會揀...

A.一個大大的生日蛋糕

B.很多件不同味道的小餅，如圖示。

諗下先，一陣先開估答案。其實無端端點解會同大家玩哩個遊戲，事緣前日同事生日，我問佢想食咩蛋糕，佢就揀咗B囉!

跟住我就話，你揀多多多種餅係因為你貪心又為食，種種款式都想試，另一個原因好簡單，好多人都有選擇障礙，唔知點揀；相反有D朋友就好鬼重視禮節，總認為生日要切餅先算圓滿囉！唔知你又會點揀呢?

話時話，我都有好嚴重嘅選擇障礙，下一個post先同大家講點解!

Close upssss...

收到喇...你哋d電郵話睇唔清楚枝沙律汁個樣嘛! 無辦法啦~哩排用iphone download咗個Lomo apps好好玩，咪用佢尼影相囉!

好啦好啦!就俾一堆close upppppsss俾大家認清楚佢個嘜頭。

1號佳麗--有油嘅青紫蘇汁

2號佳麗(左)-芝麻醬 3號佳麗(右)-無油的青紫蘇汁

4號佳麗-又係芝麻醬

其實大家唔一定要搵哩個牌子，如果芝麻那種，你只需要認住哩個日文字『ごま』就得喇，另外青紫蘇就係『青じそ』，唔好誤會，我真係唔識日文，只不過我有兩個日文好勁嘅細佬同細妹啫!但點解會識食D咁好味嘅食物?因為有一次去日本食過，當然唔識問人啦，於是影低咗個字去超市搵囉，先有得同大家分享，佢哋係Citysuper、吉之島、sogo都有出現過!

豎起條尾...

哩幾日，這段對話經常發生；當我正安排餐單俾D戰友時，我會問下週末有咩節目，佢哋會陰陰嘴對住我笑，於是我就好聰明咁問:『點呀?約咗人食大閘蟹呀!』戰友二號會話：『你又知!』我就答：『識咗咁耐，你豎起條尾都知啦~』戰友們:『-食1隻好喇! 對換番2份肉同2茶匙油呀!』

咁你又知唔知Moo Moo豎起條尾想點呢?

佢有咩好嘢^^唔係食就想我同佢玩囉!

我的午餐

唔知今日大家得唔得閒望下個天空呢?藍天白雲，好靚，如果無，唔緊要...因為明天仲有。

哩個係我今日個飯盒，好明顯噚日做咗乖乖女返咗屋企食飯啦!但係發覺唔夠菜，於是剛剛去電台錄音時，行過吉之島決定加餸!

我相信部份新來的朋友無聽過我介紹哩兩枝沙律伴侶，1枝係芝麻沙律漿，另一枝係紫蘇沙律汁，哩個牌子嘅紫蘇汁仲要係無油架，1湯匙先得14kcal，如果用1湯匙1次就唔需要計份量啦!但係如果用芝麻那枝，就要對換1湯匙=1份脂肪! 點解要介紹佢，因為佢真係超好食，連一d唔鍾意食菜嘅朋友一食咗佢之後，竟然會愛上食菜，你話係咪好勁呢?