營養師黃凱詩的生活點滴

2009年2月25日星期三

掃街的成果

唔知點解,今日心情欠佳,成日都悶悶地,但最大問題,仲要無哂胃口,頭先落樓下行咗幾個圈,都唔知食咩好,最後決定掃街...
這是戰利品...
估唔估倒我食咗D咩呢?

咪就係黃心番薯一大個、5隻鵪鶉蛋同半磅栗子囉,由於無買菜的緣故,我唯有飲一枝菜汁,補充蔬菜的需求啦!


這個午餐唔錯,又好食又有營養,最重要係好鬼飽,值得一試。

2009年2月21日星期六

很可愛的牛奶販賣機

這是牛奶機,仲要係枝裝的牛奶販賣機,值得一試!

經常有朋友問:『D牛奶脫脂與否,有多大影響呢?』

簡單來說,減肥前同減肥後囉,未減肥嘅牛奶,每杯250毫升的,已含有8g脂肪,即有72kcal都來自脂肪,佔整杯熱量的47%,而且這種脂肪含高飽和脂肪,所以還是選成功減肥的脫脂奶好!1杯250毫升的脫脂奶,約有0.2-0.4g脂肪,熱量只有80卡,所以還是脫脂的好。

話時話,上次日本伊豆之旅影咗好多得意相,同大家分享啦!

為了試下操作,我買咗一枝... ...yummy!

2009年2月19日星期四

昨天的傑作

好眼瞓!昨晚同同事做到凌晨1點,以下就是成果,同大家分享吓啦!

點整,哈哈!賣個關子先,因為有位減磅戰友等緊同我訴心聲!睇住相先。





2009年2月14日星期六

香蕉減肥,小心增肥


我有個Friend,聽說吃香蕉可以瘦身,於是早、午兩餐只嚐香蕉,點知因為太肚餓,清咗屋企盒藍色曲奇,後來仲肥咗!其實水果的確對減磅十分重要,因為它又甜又飽肚,但係唔好濫用囉!有d水果熱量好高,需留意份量,提子、香蕉就要小心注意。

奉上一生果熱量資料,參考參考啦!

西柚1個(82kcal)
奇異果1個(46kcal)
橙1個(65kcal)
蘋果1個(53 kcal )
芒果1個(135 kcal)
西梅1粒(30kcal )
香蕉1隻(105 kcal )
火龍果半個(56 kcal )
士多啤梨1粒(4 kcal)
香梨1個(86 kcal)
木瓜1杯(55 kcal )
番石榴1個(37kcal)
提子10粒(34kcal )
車厘子1粒(5 kcal)
西瓜1杯(46 kcal)
牛油果1個(322 kcal)

2009年2月13日星期五

200蚊有找的情人餐


最憎就係情人節出街食飯,人又多,又貴,最慘就是無得揀,記得有一年,同舊男同學出街食飯,咩餐都無,只得那個溫馨情人餐,都唔知幾老土,攪到對方誤會就唔好啦!最大鑊係,最後個甜品有個心型蛋糕,都唔知幾尷尬!

今年為咗大家荷包著想,我準備了一份有4道菜的溫馨情人餐,最緊要係,由我同事Thomas 研制成功的低糖低脂木糠布甸更同時於情人節前成功,所以不如大家都係在家煮飯仔啦!

溫馨情人餐 (2人份量)

前菜--柚子大蝦雜椒沙律
湯--低脂蘑菇忌廉湯
主菜--奧米加魚柳蘆筍伴天使麵
甜品--低糖低脂木糠布甸

柚子大蝦雜椒沙律

材料:

碌柚6片
三色椒2碗
中蝦6隻
指天椒1隻
青檸1個
多士1片 (切粒)

製法:
1.先將三色椒及中蝦烚熟;
2. 將多士剪成小粒;
3. 伴入柚子肉、三色椒、蝦及多士粒;
4. 最後伴入青檸及指天椒絲即成。
低脂蘑菇忌廉湯
材料:
啡蘑菇兩盒 (1盒放入攪拌機,1/2盒切片,1/2盒即粒)
脫脂奶125毫升
低脂忌廉300毫升
雞湯250毫升
調味料: 黑胡椒粉碎
製法:
1. 將1盒蘑菇、脫脂奶、忌廉及雞湯放進攪拌機;
2. 攪拌後,中火煮,再加入蘑菇片及蘑菇粒即成。
奧米加魚柳蘆筍天使麵
材料:
三文魚240克
泰國蘆筍1盒
天使麵(熟)2碗
蜆肉12隻
調味料:
蒜頭少許
辣椒少許
黑胡椒
製法:
1. 先烚熟天使麵及蘆筍,
2. 將蒜頭加入1茶匙油起鑊,再放入蜆肉,加入半杯水煮天使麵;
3.將三文魚加進少許黑胡椒調味,用易潔鑊煎熟魚柳,伴以天使麵及蘆筍即成。
低脂低糖木糠布甸
材料:
低脂忌廉200克
淡忌廉100克
瑪莉餅10片
代糖3茶匙
白糖3茶匙
製法:
1. 用打蛋器將忌廉、白糖及代糖打至軟滑;暫時放進冰箱內;
2. 將瑪莉餅弄碎;
3. 將打好的忌廉及餅乾碎以一層層的方法放進小杯內;
4. 放入冰箱內2小時即成。

3分鐘就食得


今日實在太忙,連落樓下食飯的時間都無,咁點算?

好彩公司經常有食物存貨啫!前日行惠康時,見倒有新野,所以今日做咗隻白老鼠,這是我今日嘅午餐囉!

3分鐘後,好香,味道不錯,記住唔好落包油,1盒=3份五穀,就試吓啦!

2009年2月11日星期三

踢完波之後...

Moo Moo語錄:
主人話,前日有個哥哥問,我同細佬點樣減肥,跟住主人就話,『戒零食、減少正餐份量同多做運動囉!』個哥哥就即時笑咗出尼,就話:『點解同佢用嘅方法一樣!』

喵喵!我就認為唔同喇!D人減肥自己做運動就可以了,但係我同Milo減肥,要主人同我哋一齊做,你睇吓我個筋疲力竭的樣子幾可愛。

各位朋友,大家一齊努力啦!

2009年2月9日星期一

報咗名未

如果你發現自己過了一個『肥』年的話,就唔好錯過新一年的減肚腩講座喇!

A
10/2 (二)
7:15pm-8:45pm
佐敦柯士甸道童軍中心1114室


B
17/2 (二)
7:15pm-8:45pm
銅鑼灣禮頓道33-35號第一商業大廈301室


C
23/2 (一)
7:15pm-8:45pm
佐敦柯士甸道童軍中心1030室

A班及B班已滿,只剩下C班的10個吉位,唔好等喇!快D參加啦!

撲飛熱線:2891 0920

2009年2月7日星期六

來一客減肥鍋物


靈感來自東瀛遊時,零晨12點去便利店掃街時吃的關東煮,材料有芋絲、白蘿蔔、雞蛋等,但最重要是那個美味湯底。

後來發現,湯底的煮法十分簡單,只需有一包名叫紫魚片的魚乾,可在日式超市購買,利用30克的紫魚乾及白蘿蔔1碗,加約5杯水,煮10-15分鐘,隨後拿起紫魚,只用剩下的湯底用來煮鍋物了。

材料中,必定要加芋絲或魔芋麵條,他的熱量奇低,1碗麵或7扎芋絲,才是20卡,我愛拌以半個稻亭烏冬、2兩薄豬肉片2棵娃娃菜,進食時加上一條指天椒,嘩!寫完都想再煮...唔講喇!好肚餓呀!

最重要是這一餐只得280卡!但包你飽到第二朝。

2009年2月6日星期五

有菌的野菜汁

唔好俾個標題嚇親!這種菌是益菌來的,是腸臟的好朋友,但最重要係,這枝飲品不另加糖,既有蔬果成份,又不加糖及鹽,仲要有乳酸菌添,簡直是一次滿足3個願望呀!係邊度買,沙田友有福喇!一田百貨超市也。

2009年2月4日星期三

揀豆漿,要小心


很多亞洲人,會有奶類敏感的煩惱,所以無奈對一切牛牛製品敬而遠之,所以唯有轉投豆漿的懷抱,一箱情願地,希望可從豆漿攝取鈣質,做牛奶代替品,但是很多朋友均誤解,認為只要買部豆漿機,天天自家製新鮮豆漿,便萬無一失。

其實,無論自家製的豆漿,還是普遍市面上買回來的(沒有加鈣的),只有微量鈣質,不足以媲美奶製品,可是絕大部份加鈣豆漿,糖份極高,如同糖水一樣,最可怕是部份聲稱低糖的,最每杯(250毫升)更有2茶匙糖份,更有某某牌子,喝1杯已有18克,即達3茶匙半,你話這是否糖衣陷阱呢?

這兩個牌子,既沒有加糖又添加鈣質,是不錯的代替品呢!Pearl那個牌子,價格較合理呢!1公升15元多,大部份大百佳有得賣!

喵喵!我已開始減肥


米路仔語錄:

2009年2月10日

好開心呀!自從3日前主人幫我減肥之後,我已經瘦咗0.2磅,由11.6變成11.4,你哋唔好笑我住,0.2磅對一隻貓已經好多喇!

想唔想知我點減呢?首先,主人慢慢幫我戒零食,跟住將我的食量減少1/8,但最重要的當然是運動啦!主人知我只係鍾意踢波,所以每日都同我踢15分鐘架!

起初我都覺得有D辛苦,好慘係無得食零食嘛,但係主人成日係我耳邊囉囉唆唆,話如果唔減肥,有個肚腩好容易有糖尿病,所以為咗自己健康同唔駛主人擔心,我會努力架!

其實唔好講我哋D貓貓啦!人都係一樣,有時見到主人返屋企時,好似有好多心事啦咁,佢話我知很多朋友都好怕改變,唔想改變自己的飲食習慣,認為暫時唔食高脂食物是天掉下來的事,其實當時間過去了,你只會記起減磅成功的喜悅。

各位朋友,不要再給自己藉口,維持健康體重,不只對得起自己,還有你的親人及朋友呢!健康的喜悅,比什麼也來得珍貴。

週末好去處


這個假期,為了香港的經濟著想,決定留港消費,毗方的威尼斯人實在太貴,所以選了有香港威尼斯之稱的大澳。

大澳有咩出名?蝦膏也,但鈉質太高,不宜多吃,但亂碰亂撞下,找到一個放鬆心情的好去處,這間是由棚屋改建成的咖啡廳,名叫蘇蘆,環境簡直一流,咖啡也不錯,遙望遠處的棚屋及穿梭在小河上的遊覽船,一邊嘆香濃的意大行咖啡,若你想像力同我一樣豐富,你會以為自己身處意大行威尼斯呢!


點去,只要搭港鐵到東涌站,再於站旁的大嶼山巴士,乘搭11號巴士,到總站便可以了。下車後,到吉慶街尾,很容易見到這棚屋,有興趣來嘆下啦!