營養師黃凱詩的生活點滴

2010年6月29日星期二

即食麵vs燕麥片

原來果個節目,都有咁多人睇!由噚日到今日這一刻為止,我接二連三聽到有戰友問:『點解1碗燕麥片嘅熱量會高過1碗即食麵?』

首先,我無睇,唔知佢有無交代點煮,但據昨晚喺節目中steven話我知,咩背景資料都無講,所以,我忍無可忍,點都要再講下,如果唔係大家真係走去朝朝食即食麵就死得人多喇!

如果大家份量相同,都係一碗咩都無加的食物,只有一個原因,碗燕麥嘅熱量會高過即食麵,原因係,碗燕麥片係未煮囉! 1平湯匙的燕麥,約等於34kcal,如果要盛載1碗的話,最少都要加15湯匙,即是510kcal,而1個即食麵,唔同牌子的熱量分別如下:

辛辣麵509kcal
公仔麵454kcal
一丁麵463kcal
福字麵510kcal

記住,以上的資料是以1個計算,佢哋大小不一,所以唔好以為公仔麵熱量低D。
咁...大家明啦! 三色台呀!邊有人淨食15湯匙未煮嘅麥片架,用6湯匙煮都大大碗啦,咁取巧,你就解釋下啦!知唔知有幾多人信以為真,問我D同事應唔應該再食燕麥呀?!?!?!?!?大家知點解我今朝要降火啦!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!


2010年6月28日星期一

黃詩詩帶你買餅乾

睇完今日份專欄,希望大家都會有少少明白,點樣去選餅乾,其實說回來,營養標籤是要根據每個人的需要有不同的著眼點,而我教大家的,就主要根據一位減磅戰友嘅需要去分析,希望大家明白。

作為一位戰友,選不同類別的食物時,需注意的地方各有不同,舉個例,選飲品時,主要是看糖份的多寡,而不是看脂肪的,有些人誤會飲品沒有脂肪就是健康,但大部份飲品都係衰多糖,所以不要只看單一營養素。

好...說回餅乾吧! 選餅乾,主要看什麼呢?當然是卡唔里、脂肪、糖及鈉質了,點解?大部份餅,都會用很多脂肪整餅,仲會用棕櫚油,所以知道餅中熱量是從何而來很重要啊! 上次blog的文章講過,應有不多於3成的熱量是脂肪帶給餅乾的,所以在今天的專欄中,我建議大家最好選430kcal以內的餅,而脂肪就不要多於14克,即430kcal的30%以下了。我看過很多餅,特別是大家經常以為好健康的梳打餅,大部份都有超多脂肪,100克的熱量高達500多卡,有了食物標籤,很多問題都會現形!

好啦!我都知好複雜架喇!所以打算同大家做D練習...

產品1號:

個樣都好健康吖!反轉個背脊先...
首先,佢用100克去標示營養資料,比較同類型產品時會好用d,睇下熱量先,100克有399kcal,根據我今天在專欄建議的430kcal低,符合第一個要求,跟住再睇下脂肪先,嘩!得7克脂肪,比我建議的14克低,非常好,不過除了我今日建議大家的簡易方法,喜歡自己計下數的朋友,可以再計這條數,上次篇網誌提過,產品的熱量,最好不多於30%來自脂肪,這盒餅,100克有399kcal,脂肪的熱量是7g,那麼7g x 9kcal =63kcal來自脂肪,63/399=15.8%的熱量來自脂肪,又合格喇!識唔識計糖份呢?糖份提供的熱量,不應多於總熱量的10%,這個是2.2克糖,2.2g x 4 =8.8kcal,8.8/399=2.2%,ok哂!
產品2號:
它是較少有的唔多油梳打餅,點睇呢?又練習一次!


佢的標示係每次食用份量,所以比較前,係要先計算,100克的餅有多少熱量呢?75/18.5 x 100=
405kcal,脂肪呢?2/18.5 x100=10.8克,最後糖份0.5/18.5 x 100=2.7克,合格,最後,係鈉質,102/18.5 x 100=551毫克,梳打餅中,佢算低喇!
最後,係佢,這兩天睇波的良伴,BB餅!個盒係咪好可愛呢?同我一樣^"^

但係我相信佢未準備好個標籤,又或者佢係銷量少於3萬件的豁免產品,不過唔緊要,因為日本晨早就有標籤法例,用住日本個標籤先啦~但佢無分開寫糖份,所以評估唔倒糖。
100克的熱量是428Kcal,脂肪是8.8克,鈉質呢? 680毫克,都算ok啦! 大家都試下計算自己身邊的餅乾啦!但記住,作為小食,每一日最好吃不多於150-200kcal啦!因為就算合乎健康要求,吃得多同樣會脂架!

2010年6月25日星期五

營養標籤小法寶


嘩!一塊小小的杏仁餅,竟然有80卡,即是食3塊,已經是一碗飯的熱量了!真係犀利,有了營養標籤,就是有這個好處,大家可以知道吃了什麼進肚子裡。
那麼,怎樣選擇呢?當然唔只看熱量吧!以這個杏仁餅為例,我們希望脂肪所提供的熱量應低於總熱量的30%,但當然愈低愈好啦!這塊餅,1塊是80卡,脂肪是3.7克,1克脂肪提供9卡,所以從脂肪攝取的熱量便是(3.7x9)=33.3卡,那麼,脂肪佔整體熱量的百份比就是(33.3/80) x 100%=41.6%,所以脂肪量太高了,另外,當然要注意糖份,糖份最好不應多於總熱量的10%,這個食物,糖份含5克,1克糖=4卡,即是有20卡來自脂肪吧! 20/80 x 100%,即是25%的熱量又是來自糖份,即是說,它是高糖高脂小食了,明白嗎?
還有6日,營養標籤法就推行了,很多食物已做好準備,食物安全中心,也準備了一個很有用的<營養標籤小工具>,你可以輸入你常吃的食物資料,比較幾款食物的營養素,以及我知道那種食物佔你每天需要營養素的百分之幾,大家都試下玩啦!我剛剛用過,都幾好用架,不過你一定要清楚知道食物中每種營養素嘅資料先用得到~

2010年6月23日星期三

7月份齊齊減肚腩

轉個頭,原來已經就嚟7月喇! 5月糭都食埋,即是夏天已經正正式式嚟到! 近這個星期,多咗戰友好興奮咁同我講,原來真係瘦咗好多,點解近幾日先知自己瘦呢?好簡單,因為搵返D夏天衫出嚟,鬆哂囉! 老老實實喇! 減磅...咪就係為咗咁!

但係,如果你近日搵小背心、短衫衭出嚟,發現全部都又窄又緊,你千奇唔好以為件衫縮水,放喺衣櫃大半年唔會縮水架,其實真係肥咗,過重唔怕架,好緊要盡快處理佢,沒有事情是解決不來的啊!唔好等喇,這個免費講座,你唔聽唔得,這是7月份4場講座的時間,仲鮮有的有星期六講座,快D報喇!經驗告知,星期六的位很快滿架!

10/7(六) 14:45-16:30 佐敦柯士甸道童軍中心1030室
20/7(二) 19:15-20:45 銅鑼灣中央圖書館地下1號活動室
22/7(四) 19:15-20:45 佐敦柯士甸道童軍中心1030室
27/7(二) 19:15-20:45 銅鑼灣中央圖書館地下1號活動室

留座電話: 2891 0920 (找金小姐啦!)

2010年6月22日星期二

多多仔仔少咗甜...但都係甜

可能有d戰友都留意倒,佢...出咗light的產品,係咪好想知如果你減緊磅,飲唔飲得呢?查實我都搵咗佢好耐,最終星期一晚做節目之前,俾我喺吉之島遇到佢~吖!都唔算係撞倒,應該係我專登去搵架!

一排有5枝,每枝100毫升,比日本的份量大d,除咗我這個飲益多多大的試飲外,仲有我兩個同事,仲有電台兩位拍檔試過,大家飲咗一啖之後,都異口同聲眉頭皺咁話:咦!好甜呀?!

睇下個標籤先,原味的那枝,約有3茶匙糖,現在減了糖的,就微調減少1茶匙,即100毫升都有兩茶匙糖,所以都係甜啦~舉個更簡單的例子,平日大家於茶餐廳飲奶茶,1杯奶茶通常有200毫克,你都唔會落2茶匙糖啦,但而家100毫升就有2茶匙喎!有幾甜,可想而知。

如果大家想飲d益菌落肚,可以選圖中右手面的兩款低脂乳酪,而另外,中間那枝日版的乳酸飲品,係zero架,都幾好飲,有一次在尖咀間sogo無意中見倒!

其實益力多公司可以試下出款100毫升只有5克糖的產品吖,仲可以叫自己做低糖產品,大家應該會接受架!而且,原來英國都有低糖的益多多,100毫升只有5.6克糖,到英國時,可以試下啦!

所以,戰友們,暫時唔好飲住,如果想放d菌落肚,可以選低脂低糖乳酪,1枝多多light版有60多卡,我寧願你吃多一個蘋果,熱量相約又有纖維,仲飽肚d嘛!

做運動的正確方法

2010年6月21日星期一

偏見與誤解

很多朋友,對食物均有很多誤解,最常聽見的,當然係食飯會肥這個話題,是與非,相信你來得這裡,應該會很清楚;但另一個誤解,應當是香蕉很肥很肥這個傳聞吧?

在減磅過程中,我經常鼓勵戰友,選吃香蕉,特別是一些慣性早起做運動的戰友,因為香蕉又飽肚又含有糖份,最重要係方便嘛,但是,每次我建議完之後戰友都會話:『吓!香蕉都食得咩~會唔會好肥呀?』我話:『只要每日不多於1隻是可以的!』戰友1號再懷疑:『真係得架!好驚呀!』我就當然無佢咁好氣啦,就話喇:『唔通我整蠱自己咩!你肥咗咪要幫你再減返!』咁佢先放心咋!

每一年,坊間都會有很多好有Gimmick嘅減肥餐,標榜食某d食物可以減肥,曾經一度好紅嘅西柚減肥餐,就紅遍整個香港,後來又有一個香蕉減肥餐推出,但後者就無咁多人跟,點解?呢D咪叫偏見囉,因為始終覺得香蕉肥嘛!一隻7吋香蕉=105於,與兩個小型加拿蘋果的熱量,係差不多的!(補充講多句,這些gimmick餐,熱量過低,不建議使用呢! )

註:相中的香蕉係咪好靚呢?佢係一個Cake,攝於文華酒店cake shop


2010年6月18日星期五

吃泰菜吃得瘦

經常有戰友抱怨:死啦~朋友約了吃泰菜,點算呀?肥死咩! 老老實實,身為佢嘅營養師,我比佢更驚啦! 點解?因為若大家定力唔足,隨時俾D炸蝦餅、呃咗好多人嘅豬頸肉吸住,咁就隨時重兩磅喇!

既然大家次次去食泰菜都咁頭痛,我就介紹下我噚日同兩位朋友食飯食咗D咩!上面這個係咪睇到都辣呢?佢好正,酸酸辣辣的生蝦刺身,仲回味緊!

跟住出場,係泰式鹽燒魚,係咪好健康呢?但係大家記得,千奇千奇唔好以為魚肉食多多都無問題,這是大錯特錯的,魚肉跟其他肉類一樣,同等份量的熱量是相約的,只是脂肪酸的比例不同啊!情況就好像花生油和橄欖油一樣,熱量相約,脂肪酸不同吧!

仲有呀!魚片的脂肪也較高,緊記...還是記得去皮好!

好!仲有甜品食,大家可以嘗試下芒果糯米飯,椰汁另上吖!因為佢主要肥係個椰汁度,自己選擇用的份量,可以減少脂肪嘛!不過,我果日唔記得問下個廚師,唔知D糯米飯有無加糖水煮過呢?

仲未諗到父親節食咩,可以選這個啦!我同小妹就決定咗,去黃媽媽私房菜,找黃詩詩同黃霖霖兩位行政總廚泡製愛心爸爸節大餐,祝天下爸爸!父親節快樂~


2010年6月15日星期二

世界杯小食

上星期一,有位朋友同我講,佢話要買定D世界杯小食返屋企,點知我星期三去佢屋企食飯,世界杯都未開始,佢就已經食哂所有零食,你估下我尼位朋友一個月後會變成點?

好彩,又有新嘢介紹俾要睇波嘅戰友過下口癮,其實佢09年中都出現過,家陣又返嚟啫! 計完之後,食12片=1份五穀+1/2份脫脂,佢有好多種味,我試過芝士味同酸洋蔥味,芝士味較濃,鍾意食以前隻芝士圈的朋友可以試下,相反,酸洋蔥味酸溜溜的,味道相對較淡,其實佢係糙米同粟米做的,有纖維架,但當然有少少油啦!所以換算上就要多計1/2份脂肪了。

但戰友話我知,只係吉之島有得賣,如果大家見過佢喺邊出沒,就話俾大家知啦~

2010年6月13日星期日

關於...糭

節日,令你想起什麼? 五月糭、月餅還是年糕... ...


一口糉,令我想起的,是上一長輩對你的關顧及無條件的愛。在這個日子,就讓我們記起,人生裡面,除了工作、上網、另一半外,還是那個在背後永遠無條件為你付出的老爸跟老媽!

這個週日,沒什麼事幹的話,跟著這個食譜及步驟,快到街市買好材料,做你人生第一隻糭吧!完成後,在端午節,與家人一同分享,我相信,那一隻咸肉糭,該是甜的。




材料(4隻分量):
做法:
糯米 1碗
綠豆 1/2碗
鵪鶉蛋 2隻
雞肉 80克
冬菇 2隻
瑤柱 2粒
大蝦米 4隻
竹葉 16片
咸水草 10條
油 2茶匙
鹽 2茶匙
水 1碗
蒜蓉 2茶匙

雞肉醃料:
五香粉 1茶匙
豉油 1茶匙

做法:
1. 將鹽加入水中,製成鹽水。
2. 用鹽水浸糯米半小時;用清水浸綠豆半小時,備用。
3. 把雞肉洗淨,瀝乾,切絲,用醃料將雞肉醃好,備用。
4. 瑤柱及蝦乾浸至軟身,撕細,備用。
5. 冬菇浸軟,去蒂,切成四角,備用。
6. 鵪鶉蛋烚熟,去殼,切半,備用。
7. 燒熱鑊,下蒜蓉及油,炒熟雞肉、瑤柱絲、蝦乾粒及冬菇絲,盛起,備用。
8. 將竹葉及咸水草灼30分鐘至軟身。
9. 將4片竹葉鋪開成十字形,再弄成圓錐形,放上糯米、綠豆、鵪鶉蛋、炒好的雞肉、瑤柱及冬菇包好,將葉尾收口,用水草扎實,放入熱水中烚1個半小時,即成。



昨天,他們也做了人生中的第一隻糭,跟大家一起包糭,除了想告訴大家,減磅也可以吃糭外,亦希望大家記起,人與人之間,仍有著那份關顧之情。

好喇!做傻子喇~~

2010年6月10日星期四

日本版vs中國製

仲有幾分鐘就星期五喇!近週末,應該要Relax吓!知唔知我又攪咩呢?

話說上個星期,咪好多百貨公司大減價嘅,由於我的小細佬很喜歡飲Lemon CC,於是我就同佢講,Sogo特價,問佢入唔入貨,佢就問:家姐,特價的是日本版定係台灣版呀?我就話:有咩分別呀!咪又係LemonCC,佢就話,唔同架! 有日本字會好味D... ...啊!明白哂!

其實除咗我細佬之外,我知道好多朋友(包括我)都有這個感覺,總覺得日本版,好似好D,於是,我打算做一個測試,如果大家睇唔倒D日本字,又會點揀...

這枝是什麼,相信大家有留意我個Blog都知,其實佢來自日本,後來在中國設廠,所以香港常見的都是中國製的,為咗測試下日本版係咪好飲D,我找來3個同事+2個戰友測試...

左手面那枝,是中國製的,右手面就是日本版,好!準備好,唔俾佢哋偷睇,可以試喇!

你哋知唔知專業的Food Tasting活動,是要矇眼的,點解一陣話俾大家知,另外,試完一次,要rinse your mouth的,以免影響另一次的測試嘛!你估下結果係點,結果係3:2,較多人愛中國產的,所以口味嘅嘢,其實很個人的。
講番點解要矇眼,睇下這張相,聰明的朋友或者會明,左手面這杯,色澤較鮮艷;右手面,較啞色,於是一般人會覺得,特別係現時大家都多關注健康,就會覺得鮮色代表加了色素,所以會選右手面的,所以有時候顏色也會影響大家的選擇。(左:中國產 右:日本版)

其實,這兩種蔬果汁,都是沒有添加鹽同糖的健康飲品,他們的分別,只是產地不同,另外,日本版的是由20多種蔬果做出來的,中國的就只有9種,但他們同樣營養豐富吧!但當然,不可天天用來代替新鮮蔬果,因為汁就是汁,纖維含量極少呢! 仲有佢有豐富胡蘿蔔素,天天飲,會變黃面婆架!
最後,知唔知我揀咗邊杯,咪又係右手面那杯^^



黃詩詩在亞視談瘦身(第一集)




黃詩詩在亞視談減肥餐(第二集)




2010年6月8日星期二

仲有雲吞麵呀!

驚喜簡直係陸續有尼! 話說剛剛食lunch,諗住去樓下間7仔睇下有無CP淨雲吞啦! 點知俾我發現佢
...鮮蝦雲吞麵一碗,各位戰友,係咪好高興呢?7仔終於都有D健康小食喇~
再睇睇個營養標籤,對換是2份五穀+2份肉=250kcal,最重要係個湯包是獨立包裝的,所以落半包好喇! 我剛剛問過知情人士,佢同我講全港約有400多間7仔都有,去大間少少果D啦~就會見倒佢!



瘦身雲吞

每日一Blog,又帶來一個瘦身美食驚喜,佢就係...瘦身大雲吞!

喂!千奇唔好誤會我嘅意思,唔好以為食咗佢會瘦,而係,佢真你一粒減完肥,無咗肥膏嘅雲吞,平日我經常同大家講,有時D雲吞會好肥,因為正式的雲吞,是加有肥膏的,但這個就只有薄薄的雲吞皮包著大大粒蝦,以上這個,是懶人版,加水叮就食得,不過佢都幾鹹,千奇唔好飲D湯,因為味粉不是獨立包裝的。內有5粒,只是1份五穀1份肉的換算,算係好抵,我在CitySuper買的,那天減價,只賣10蚊,同事話7仔都有得賣,我昨天吃過,非非非常好味,值得推介。

另外,佢都有家庭裝架!!


2010年6月7日星期一

希望愈少,驚喜愈大

今日,攪攪震做了很多東西,你哋睇下,有無諗起新加玻無得食嘅星洲炒米呢?

睇真D,佢係咖喱海鮮炒飯...吖!唔係,好似最終只係用咗青口同青瓜,這個雙青炒飯唔錯,又俾多個Idea大家,炒飯時,想佢香D,可以落少少咖喱粉同紅椒粉,熱量好低咋~不過俾個溫馨提示大家先,記住記住,立即洗鑊,如果唔係,你以後炒嘅嘢,都好似食緊咖喱咁啫!

另外D海鮮材料,做了個炒意粉...

都要有D甜品架! 就係...焗咗大家,超甜番薯片。

不過我覺得今日的驚喜,應該係佢,芋絲豚肉卷,起初,我話要做這個東西時,同事們就議論紛紛: 邊會好食架?係...佢個外表係唔討好,但好有內涵架,芋絲其實係一樣沒有味道的東西,但加入薄片豬肉,豬肉的肉汁在煎煮過程會被芋絲Soak...當然豬肉要調味,而在煎煮過程中,我加了香草及美極,所以出奇的好吃,又或者係因為外表影響,希望愈少,驚喜愈大,我總共煎咗7件,現在被為食鬼偷食,只剩下3件,咁明天TVB個攝影師影相時,點影呢?真係要考考佢。




2010年6月4日星期五

煮飯仔班...常滿

我都知得10個位滿足唔倒大家,所以決定...開多一班B班,上課時間地點...總之所有嘢一樣,只係B班的上課時間改為星期六3:30-4:30PM。

尚營坊明天開到4點鐘,要報名的話,火速上尼交低兩條紅衫魚就可以了。

但記住,會員先有優惠價,所以你快D入我們Facebook做會員啦!

www.facebook.com/pages/Nutsdiary/168200145689

今次個活動唔啱你唔緊要,不久的將來,我仲會有好多好多活動同大家一齊學習、一齊食同一齊玩,總之,做咗會員,隨時都有驚喜。

圖中的木糠布甸就是其中一堂的製成品了。

2010年6月3日星期四

黃詩詩的瘦身Show

今天,黃詩詩的免費瘦身Show首次登陸荃灣,新界區的朋友,留了位入場嗎?

以下是6月份餘下的講座日程,九龍及港島區的朋友,可以開始留位了。

23/6(三) 銅鑼灣中央圖書館地下1號活動室 19:15-20:45
29/6(二) 佐敦柯士甸道童軍中心1030室 19:15-20:45

留座電話: 2891 0920 金小姐


2010年6月2日星期三

黃詩詩同你煮飯仔

噚晚話有好嘢介紹俾大家,不過係咪好嘢,自己諗啦!

簡單尼講,尚營坊6月-7月份將會開一個小型煮食班,課程有4堂(兩堂示範課,兩堂DIY),12/6、19/6、3/7及10/7,逢星期六下午2:30-3:30,費用係...2條紅衫魚 $200 (會員價) $ 250 (非會員),點先係會員,好簡單,尚營坊會員或你只需登入我的facebook,成為我的番薯就可以了。

黃詩詩同你煮咩?老實講,我會教其中一堂,另外幾堂,當然有尚營坊的靚仔煮神湯馬士先生主理,仲有一位神秘導師添...

係咪好想知煮咩呢?

(一) 免肥腫健康稯
(二) 食唔肥你咖哩雞
(三) 意想不到低卡木糠布甸
(四) 百變炒竽絲

上課地點:尚營坊銅鑼灣分店--銅鑼灣謝斐道482號信諾環球保險中心1201室(地下鐵銅鑼灣站C出口步行1分鐘即達)

話時話,人數確實有限8-10人,所以先到先得,你可以到尚營坊尖沙咀及銅鑼灣分店報名,只接受現金報名,快d喇! 哈! 你估我教邊堂呢?

這個Link是你成位會員的方法,登入後,接『讚好』or『like』就可以了。

http://www.facebook.com/pages/Nutsdiary/168200145689

製成品...雙層雞肉芝士鹹鹹圈


兩片雞肉、一片芝士、兩個中番茄、幾粒芝麻;仲有一大個鹹鹹圈,再加上一個多士焗爐,5分鐘內,就做出這個雙層雞肉芝士鹹鹹圈。

好喇! 講一講個換算方法先,一個嘉頓比高包,由於佢較細小,一個是1份半五穀的,所以若果你個餐單是3份五穀的話,就吃兩個了。

俾個close-up相大家睇下先,我星期六在百佳買的,但剛才到過market place都無這個產品,但係我發現佢個食物標籤有個問題囉!



佢已經有個合乎7月要求嘅營養標籤,但問題係我反轉佢幾次都無見倒佢個淨重量,如果唔係我公司齊備量度儀器,都唔知點話俾大家知個換算囉!




無炸過的...水泡

這就是我明天的早餐了,幾豐富!大家睇清楚D,見唔見倒有新產品呢? 右上角的佳麗--無炸過嘅水泡。佢叫Bagel,又係我個Friend,以前香港人唔係太認識佢,但今時今日,大家都會間中在三文治店見倒佢。

我好鍾意在三文治之類加番茄,因為好多時候,三文治的配料就是鹹鹹的,添加番茄以後,感覺更Fresh,而且仲加多D維他命C,想睇下製成品,明天來這裡吧!

仲有,明天有東西要宣佈,應該幾好玩,但名額真係有限的(我講真架,先到先得!),所以話呢?一日一Blog,一定有精彩東西給大家。

2010年6月1日星期二

唔係汁咁簡單囉!

好喇!今日,又係廚房睇真D嘅時候喇! 你估下,這碗是什麼呢? 俾D貼士大家吖! 十個香港人,九個都飲過...

可能唔係好清楚,Zoom埋DD再睇清楚DD,仲估唔估倒!

佢咪就係燒味飯D色囉!? 反哂光,仲唔叫肥,營養師經常同戰友講,燒味...減磅期間都食得,但你記住,走汁囉! 唔明白嘅戰友會話:你哋都好地獄啫,汁都要走,豉油咋,都唔肥! 加咗落去D飯你就唔覺得肥,分開睇,你就明哂啦! 佢...唔係汁咁簡單囉!


佢係!上面果碟無汁嘅叉燒飯,點食呀!可以咩都唔加當然最好啦!畢竟,叉燒已經調咗味,如果真係想有D食,食館枱面應該有豉油,加1湯匙啦!但記住,最多最多都係1湯匙,因為已經有1000毫克鈉質喇! 如果你都想身邊嘅朋友健康D,Send張相俾佢哋睇啦!真係好多人都唔知果D唔係汁咁簡單架!