營養師黃凱詩的生活點滴

2012年2月28日星期二

Cranberry Cookie Monster

兩星期前,已經想將整過做曲奇的步驟放上來,但因為要搬屋,忙到唔知點形容,所以現在才偷少少時間放上來。

準備好材料先:(可做約20塊曲奇)
低脂牛油40克
砂糖25克
Splenda 2湯匙
雞蛋17克
低筋麵粉40克
泡打粉1/4茶匙
快熟燕麥片25克
小紅莓15克

這張相,一眼睇哂~
有兩個預備動作的 1)預熱焗爐180度 2)將牛油放在室溫軟化

步驟逐格睇
1)幫牛油同糖過磅,唔好唔記得落代糖,這是令曲奇餅變得低卡很重要的一步;


知唔知點解糖變咗50克,因為上次訂單大,要做好多~
2)下一步,就你打打打,用電動打蛋器,因為我相信大家隻手嘅 速度無咁高,要打到奶白色先好停。
奶白色混合物的完成圖~
3)然後分兩次落蛋,確保牛油同蛋完全混合;
4)打到均勻,好似這個狀況;
5)篩粉及泡打粉;
麵粉混合前的樣子~
6)用膠刮伴入麵粉及蛋漿;唔好太粗魯,拌勻就可以;
7)再加燕麥及小紅莓;
又是混合前的樣~
8)完全混合放入雪櫃冷藏10分鐘前的樣子;
9)在雪櫃取出後,放上牛油上,準備放入爐約15分鐘;10)出爐了,你會發現曲奇餅腍到唔似曲奇餅,正當你以為自己失敗之際,希望在人間的,只要有放涼架~哈哈,痴線架,我話自己。
11)成功了~我記得,我話咗做給向CC BAKERY 落了單的番薯,我無開空頭支票的,但係剛搬好屋的我,忙於慰貓同還完間屋,有拖無欠啦~

2012年2月14日星期二

送給你們的情人節禮物



健康浪漫情人餐

頭盤:煙三文魚海撒沙律
主菜:安格C黑椒牛粒粒/香茜香煎鱸魚 伴香草新薯
甜品:低卡布朗尼

情人節小提示:牛奶朱古力跟黑朱古力的熱量相約,同樣致肥,小心小心~



祝情人節甜甜蜜蜜!

2012年2月13日星期一

教你親手做500卡的瘦身餐

又是我們的廚神湯馬士先生來教大家做瘦身餐的時候了,這回又是親手做的,做完真係仲可以帶回家。

親手做營養師的500卡瘦身餐(第二課)
日期:2012年2月20日(星期一)
時間:晚上7:00-8:30
菜式:香滑薯蓉咖哩雞及白汁海鮮意大利飯(一人一爐自己親手做)
上課地點:九龍尖沙咀河內道18號 K11, 2/F, Shop 221 (尖沙咀港鐵站 D2 出口)Easy123 Cooking Studio
費用:每位$ 290歡迎任何人參加-只收現金
報名辦法:即日開始接受電話留位,報名後1個工作天內到尚營坊任何一間分店交費即可。
留位電話:2992 0148

這次的菜單--1號瘦身餐 (香滑薯蓉咖哩雞)

2號瘦身餐-白汁海鮮意大利飯


快快致電報名了。

2012年2月11日星期六

台北遊記

從台北回來後,未有時間跟你們分享,今天就偷一點點時間吧!

這埋食物,是否很吸引呢?這全是我這4日3夜放進肚子的東西,但只是1/3吧!沒看錯,我也有放鬆的時候吧!只要懂得收拾大吃大喝的心情,偶然一次,是可接受的,知否這幾天我增了多少磅呢?

戰友問我到台北休息,會選那家酒店,就是這一家,環境不錯的。

換一個角度看。

酒店的大門口,這家酒店吸引我的地方,是它的位置,我不愛人多人來人往的,所以不太愛台北車站附近的酒店,老爺大酒店座落旺中帶靜的中山區,鄰近捷運的中山站,門口也有機場巴士直達,很方便啊!

送上它的名片~


工作有多忙,我總會抽時間到台北走走,就是因為這兒的咖啡店,大概是因為她們地方大租金平,可讓你閒來坐三數小時也不會騷擾你,我很喜歡這家店,在師大附近的,讓你飲咖啡之餘,也找來喜愛的拼圖消磨時間,平日在香港這個匆匆忙忙的社會,卻是很的奢侈的事。


大家也在拼拼貼貼呢!在香港,只有拚拚命命吧!


那天,我找了數張拼圖,跟友人比賽,最後還是輸了,下次我一定上演復仇記。




休息完,再食...這是我到台北寧夏夜市必食的胡椒蝦,實在太難忘,這次買了兩客,是活生生的大頭蝦。



很多時候到外地,均會遇到排便困難的問題,到台北,你可以一試這個釋迦,我們稱之為番鬼佬荔枝,這先的是XL版,推介。

還有芭樂,即番石榴。


行夜市,你該見過這車厘子,夾著酸酸甜甜的梅子,不錯啊!


每年到台北嘅目的,其中一個原因,是為了麻辣火鍋,很多朋友也知我很喜歡到太和殿,除此之外,也會到一家吃到飽的火鍋店,很便宜的,叫馬辣,麻辣湯不太辛辣呢!下面黃色那包王子麵是他們馳名的公仔麵,一定要試。


最吸引的地方還有任食的八款口味的雪糕,想到的口味也有。


這是價目表,這家是在公館的,人較少,忠孝敦化也有,緊記致電預約。


吃喝玩樂過後,就要修心養心性了,想永久KEEP FIT,就是要能收能放,這才是生活的平衡,共勉之。這個旅程也令我增了3磅,我用了一星期便收復了。

2012年2月6日星期一

情人節小禮物

唔知大家準備好情人節禮物未呢?如果未,考慮吓這一個吧! 首先去買齊材料先啦~知唔知我準備同大家做咩呢?哼! 你個專欄咪講咗囉! 無錯,係布朗尼!

今日在專欄提過,在傳統的布朗尼食譜中的朱古力份量減少,換成極低卡的可可粉,咁個布朗尼公子就可以成功瘦身,再加上代糖同低脂牛油嘅協助,都減到一半肥膏架。

放入焗爐前的模樣~

焗 25分鐘就可以了。之後細心D用個小袋或者小盒入住佢,就可以送俾你哋嘅摯愛啦!


話過送個食譜俾大家我唔會講大話的,放大睇啦~



更多精彩食譜係放咗喺這本書內,此乃小子跟兩位同事合著的全新著作,即將在各大書局同大家見面,快D去書局帶佢返屋企啦~仲趕得切做情人節禮物的。



減肥都可以食甜品係咪天大喜訊呢?預祝大家,情人節甜甜蜜蜜。

識飲識食減肚腩之最後四場

每一年,我都會嘗試用不同方法,令大家輕鬆地獲得更多營養知識,去年,這個識飲識食減肚腩講座已成功舉行到50場,而曾參與過的朋友,也達到3000多人。

最後4場講座,亦會在這個月完成,感謝所有曾參加的朋友外,未曾參與過的,亦希望你把握這4場的機會,跟我一起輕鬆地學習怎樣健康地減肚腩。以下是最後4場的日程。留座辦法,致電28910920 即可。


期待在最後4場的時間跟你們遇上。

2012年2月3日星期五

2012渣打馬拉松活動花絮

仲有兩日就係一年一度的馬拉松大日子,我相信各位跑手都準備好啦! 不如咁,俾D小提示大家之餘,都同大家分享吓一個在新年假期前參加過的活動,活動主題,當然同馬拉杓有關啦~

這項活動係一個小小廚師的比賽,比賽主題係想小朋友設計同烹煮給跑手的營養食物,這班未來的主人翁真係好犀利,除咗好清楚跑手的營養需要外,仲好有創意。

特別是這兩位小朋友,比賽過程中,各位評判都會去睇下佢哋的製作過程,我當然會偷睇佢哋用幾多油啦!因為如果太肥令跑手增咗磅,係會影響表現的。而這兩位小朋友嘅作品,除咗創意十足外,份營養餐真係好營養的,因為大家都知道對跑手而言,碳水化合物的需求是很大的,所以他們需了薯仔。



這個就是他們的作品,在介紹過程中,他們更提到薯仔中的鉀質有助身體的水份平衡,另外,薯仔中加有雞蛋及芝士,都係用來幫跑手復原,畢竟跑步後也要修復肌肉組織呢!而且他們是用烤焗方法來製作,這樣就能減少油份便用。


點解D評判咁唔專心?! 知唔知我哋傾咩傾得咁開心呢?大家應該知道鄭欣宜嘅男朋友是馬拉松好手,佢同我一齊研究緊應該煮咩俾男朋友食啫~


做得評判當然要試食啦~不過好似食得唔係好專心喎~



俾多個專心樣大家睇下喇!其實都好困難架,因為佢哋都做足功課,不過咁,當日我俾分時都有一個標準,就你睇下份餐有無注重水份補充,因為好多人以為只要留意比賽前中後的水份補充就足夠,但係比賽前那星期的水份攝取都重要架!所以這都是的給分的部分,距離馬拉松仲有兩日,都記住多喝水,多吃蔬果都係另一個補水的方法。



放在我們前面的那份餐,就是中學組的得獎學校,睇吓!那杯果汁雜飲好正架!

活動完滿結束,來一個大合照啦!


仲有當日的4位評判。當然還要感謝大會之邀請,那天,過了一個很開心的下午。


跑手們記住,馬拉松之前的晚上早點睡,比賽前2-3小時就要補充水份,最緊要唔好飲含咖啡因的東西,而且唔好食D古靈精怪食物,平日自己慣常吃的就可以,例如一份三文治+1個水果等。


比賽過程當然要飲水啦! 對於10K的跑手,比賽後就飲2-3杯水就可以了。祝大家順利完成賽事但緊記量力而為。