營養師黃凱詩的生活點滴

2010年2月28日星期日

買袋送書?

話時話,由台北返咗香港剛剛先一個禮拜,我就忍唔住去打書釘,今日我行咗去買日本雜誌那邊,就聽到一段好鬼好笑嘅對話,其中一位少女問身邊朋友:個agnis b袋好似靚D喎,佢個朋友就唔係好同意咁,跟住佢話:好似個Bathing ape milo袋得意D喎,講真,如果我閉上眼睛,我真係以為自己係時裝店而唔係書局囉!究竟係買書送袋定係買袋送書呢?

哩個仲犀利,買飯盒有書睇,不如我今年本新書都諗下,有咩送先...

2010年2月26日星期五

尚營坊烹飪大賽


昨天,是尚營坊烹飪比賽的大日子,有咁多好嘢食,點少得大家一份呢?你哋睇吓我個為食樣,係咪同我隻肥貓MILO好似呢?

雖然你見我個開飯喇成日介紹外出進餐嘅好餐廳俾大家,但都要照顧下鍾意玩煮飯仔嘅戰友啦! 作為營養師,點都要有幾味私房菜傍下身,所以我就決定攪個烹飪比賽俾大家切磋一下,這一味是蘆筍百合炒牛肉片,最重要係有時大家都好炒下菜,唔通成日烚下烚下咩!


跟住尼個...我相信大家同我一樣,一睇落去就一定會話,佢個樣...好似...會唔會好嚡口呀?瘦肉點做肉餅呀?當然,營養師都有D竅門嘅,好簡單...就係將馬蹄同冬菇切粒,跟住加1.5包燕麥糠,佢哋就可以將水同肉汁吸吸吸吸住係肉餅裡面,咁就唔會嚡啦!


哩個簡直係這幾天濕濕熱熱嘅良伴,最重要係個竽絲+和風汁,絕配。


最後這個是闊太之選,又大蝦又帶子仲有蟹柳,咁高貴嘅海鮮冷烏冬仲唔係闊太之選。


仲有要加這個汁,酸酸辣辣,柚子黑胡椒汁也,Taste有售。希望大家鍾意啦!

2010年2月24日星期三

溫馨提示一則

想問吓大家,你哋今日去過小解未? (你傻咩!成5點,仲未去過)

當你哋辦完事之後,相信一定會洗手啦!(嗱!唔好話我知你哋唔洗呀?!)


咁行去洗手嘅時候,你會A. 先攞梘液 定係B. 先用水洗手呢?

俾幾分鐘大家回憶下...順便俾隻企鵝仔大家睇下先!


如果你嘅答案同我一樣係A,咁我諗你一定要改下你個壞習慣,話說我剛才去洗手間,準備去洗手嘅時候,我就唧咗D梘液啦,點知...個水喉竟然...無水,吓! 唔係啩!咁大整蠱,於是我唯有滑住滑住咁飛返公司打水囉! 所以故事告訴大家,洗手嘅程序應該係先打水,後唧梘,再洗手!

2010年2月23日星期二

仲有5日,準備好未...

昨晚在電台講過,星期日同我個Friend出街嘅時候,見佢好興奮咁Ling住個馬拉松福袋,我先知佢參加咗10公里,於是我問:『準備好未?』佢竟然話:『有咩準備?』我就拍一拍佢膊頭話:『不如你都係放棄啦!』跟住佢叫我放心,因為佢都無諗過去跑,都唔算放棄,攞咗福袋,目的達到!唉!都唔知點解我d friend咁可愛...
不過咁,我相信大家唔會好似我個friend咁,應該準備好哂。但係尼5日,大家...尢其是唔係我啲戰友,就記緊要進食足夠的五穀類食物,你知啦! 仲有好多OL朋友同澱粉質係仇人咁啦! 另外,比賽前3-4日最好減少D咖啡奶茶之類,以免增加水份流失,仲有星期日朝唔好空肚跑,最好有1份水果及1-2片多士,水份攝取更加重要,賽前2小時要有2-3杯水,15分鐘前都要有1杯,記住喇! 祝大家『跑』回終點...

仲有仲有...

我都知夜媽媽唔應該Post啲咁美味嘅食物引誘大家,但係由於佢係我成個台北之旅嘅三大最美味食物之一,所以點都想講多一次,佢係台灣牛肉麵囉,這家不是大家慣常去的永康牛肉麵,而是在附近的另一家老店叫老張牛肉麵,我更愛這家麵食係因為佢有辣的,總覺得永康的少了一點辣吧! 台北市愛國東路105號見~
今日見咗大部份尖沙咀嘅戰友,大家都好叻,大多都是重了1磅,算是不錯了,經我囉唆後,都食得聰明咗,估都估唔倒,重得最多的,竟然係我,在台北與麻辣火鍋、牛肉麵、胡椒餅等等激戰後,今日體重驚見113.5,重咗足足3.5磅,榮登增磅榜首,所以...我要減肥喇,暫時唔好再俾朱古力我食喇,仲有你哋啲曲奇餅呀!千萬吃以為我唔會肥,係會架,但最緊要,有始有終,你要識得停,咁樣先可以Fit一世架!
好...明天減肥第二天!!一齊努力啦!

2010年2月22日星期一

黃詩詩專欄網誌版


運動後進餐 不會增磅

自從得知好友Jenny因相士贈言,要於虎年保持窈窕身段,才能百事順景,這個月內,為了支持她,我間中亦會相約她一同運動。這天,我約了老波友打羽毛球,想起了Jenny,便致電給她:「今晚有空來湊熱鬧,打羽毛球嗎?」Jenny說:「為何你好像停不了的,不是跑步就是游水,現在還轉攻球類運動?你是否過度活躍?」我補充:「若果我是過度活躍,你便是過份懶惰,快來吧!我們三缺一!」為免她有機會再說逾千次不做運動的藉口,我立即掛斷電話,再用手機將地址及時間以短訊傳送給她!

晚上九時,相約於球場外,Jenny穿起一套整齊的Y牌子運動服,我上下打量她說:「嘩!看來蠻專業呢!運動服是新買的嗎?」她說:「得知要打波,午飯時間買回來的,但你怎知道呢?」「運動衫上的摺痕告訴我的!」我指著Jenny的新衣。突然,我聽到「咕嚕」一聲巨響,我問:「你還未吃晚飯嗎?」Jenny搖搖頭:「當然沒有!七時才放工,便立即趕過來,而且運動前不能進餐嘛!」「那麼,你就是空著肚子做運動嗎?」我問。她點頭,我給她一包餅乾及一枝水說:「若於晚間進行運動,我建議在運動前先吃小點,例如:吃一包餅乾或一個水果,當然不宜過飽吧!」

激戰15分鐘後,Jenny氣喘地跑到自動販賣機,買了一枝運動飲品跑過來,我說:「這些飲品熱量很高,剛做完運動便放進肚裏,那麼,剛才所努力的豈不是白廢!」她反駁:「我見運動員也是這樣做的!」「你不是運動員嘛!」我沒好氣地說。

進行球類運動的時間過得特別快,轉眼間就已經一小時,我們決定一同吃晚餐,休息約30分鐘後,我們選了一家越式飯店,我選了一客生熟牛肉湯粉絲,Jenny見我點得如此高興,她這樣問:「剛做過運動便進餐,不是很吸收嗎?」

我告訴她:「放心吧!你只要按照平日所吃的份量進食,是不會多吸收的。可是部份朋友會因運動後,胃口增加了而較難控制食慾,又或者有些人做完運動後,為了獎勵自己而添食,才會令體重上升。的確,於運動後,也不宜立即進餐,以免影響消化,最少也應休息30分鐘呢!」我想了一會再問:「你不是已開始減肥嗎?那麼你平日怎樣安排運動前後的飲食呢?」Jenny咬著一件米紙卷回答:「就是因為我弄不清該如何安排進食時間,所以我的處理方法就是 – 什麼也不做!所以還沒開始運動呢!」

唉!有時面對這些老友,都不知如何是好!

2010年2月21日星期日

我粒電...著哂綠燈喇!

我粒銀霸王電芯,開動咗個快速叉電mode,用咗4日,我已經充滿力量喇! 叉電叉到連個blog都休息咗兩日。

上面個胡椒餅,係咪好鬼吸引呢?佢係我咁大個人,第一次食嘅胡椒餅,講個秘密俾大家知吖,本來我諗住試多少少唔同嘅食物,留啲quota,以免太肥,所以打算同個朋友分咗一半嚟食,點知咬一口後...佢外脆內軟,肉汁奇香,於是,我就話:不如食多一個share囉!跟住佢就講:都話一人一個啦!又扮細食,於是我最終食咗一大個。

佢係淡水出沒的,聽講好出名,係中正路同三民街交界,很易找的。看看下面那張相--炭錢胡椒餅。

去得淡水,當然會行下公明街啦!周圍都係街邊小檔,行行下撞到我個friend--阿菇...佢今次就慘啦!變咗熱油上的老菇,可鄰的給炸了,睇下個檔仔個宣傳牌仲攪笑,佢話: 健康低卡,100%全素...哈,我無咁易俾你呃倒架!

今次去台北,講到明係去hea...所以,我總共去咗5間cafe,這間都很舒服的,唉!老實講,間間都咁舒服,無辦法啦!人哋地方大,生活節奏又無咁緊張,行步路都慢D啦!


同杯是日特飲影相相先~


跟住下一間,人龍cafe,上次已經想介紹,但唔知點解唔記得咗,個大名叫米朗其咖啡館melange cafe,地址係中山北路二段16巷23號,但係大家要記住,佢超受歡迎,你最好先去攞ticket,最少最少都要等一個小時,記住,如果等一個鐘你已經算好彩喇!
佢受歡迎嘅原因,我相信有3個,服務+美味+超值,慢慢解釋俾大家知,先睇下我叫咗咩先。

相信大家都知台灣朋友很愛茶,但這個不是茶這麼簡單,這是一個非常非常非常x 無限好味的水果茶,這個實在太棒喇! 但當我一邊飲,飲得好滋味嘅時候,我個friend竟然問: D水果煲熟咗咪無哂維他命C囉... ... 唉!我望住佢,講咗一聲Come on...放鬆D啦! 我經常同大家講,健康飲食,是一個習慣,不是叫你任何食物都唔可以食,間中食下D甜少少同肥少少的食物係無傷大雅的,更何況是旅行中呢!太緊張會走火入魔架,記住喇! 但戰友們就努力減磅先,成功之後就可以間中食下!
佢都好靚架,你哋話係咪!我都係想講多一次,個水果茶真係好正,點正,一路睇落去你哋就知...

還有這個燒牛肉三文治。
但最出名都係佢,士多啤梨鬆餅,你入到去會見倒每張枱都有佢嘅芳蹤。我另外仲叫咗一杯Latte,你估下成餐幾多錢港幣吖??

俾張單大家自己睇,用下個腦,心算下...

多謝哂...150蚊港幣啫!咁靚嘅餐廳,食一份三文治+咖啡都唔止尼個價啦!

好喇!我相信每個朋友去旅行,夜媽媽行便利店都係指定動作啦!又有好介紹,溫泉蛋也,仲好味過我鄉下果隻蛋呀!戰友都食得!


好啦!開估先,剛才講過個水果茶咪好好味嘅,好味到我臨上機,買咗個水果茶外賣啫!唉!最衰都係拉登啦!如果唔係的話我一定帶埋佢上機,哈!我初初真係有諗過飲淨100mL攞上機回味下架!


一個茶壺有兩大杯,Yummy到極!


好啦!明天大家都要努力工作喇! Play Hard and Work Hard 嘛! 這是我粒Fully Recharged 嘅銀霸王電芯呀!


仲有,差D唔記得同大家講,明天星期一應該是我個專欄出街的日子,但係唔知點解,又可能係份稿想早少少同大家拜年的緣故,所以原先明天出街那份稿,偷偷地係上星期四出咗街喇,所以明天份am730將會找不到我個專欄,不過咁好睇嘅報紙我相信大家應該有日日睇架啦! 不過可能有讀者好似我咁出咗外叉電,睇唔到上星期四份報紙,所以我明天會破天方將個專欄post上blog,錯過了就上來看一看吧!

2010年2月17日星期三

再來到台北

再來到這裡,原來感覺很不一樣,因為這次真的純粹叉電,沒有定下來的行程,沒有預定的節目,左逛逛,右坐坐的,原來就是真的放下。

早上的航班,令人昏昏欲睡的,但最辛苦也就是靚女空姐們,1小時15分鐘的機程,既要準備咖啡熱茶,還有那個飛機餐,這個算是不錯了!但最可愛的,是右手邊那個曲奇餅膠袋,你們看...機艙壓力的影響,是脤脤的...


這隻獅子,是我今天的甜品,它不是一個冬甩這般簡單,是一個類似麻糬波波的東西,沒有那種很油的感覺,下一次來台,真的要試,我經常說,要是在外旅行,真的要選高卡食物的話,真要選最好的,這個沒介紹錯的,mister donut,日本也有呢!

心水清的朋友,應該看過這碗菜肉雲吞湯,來多一碗,只有一個原因,實在太太太太好食,我這個銀針試過,不油不膩,大大粒,我這個悶人決定明天再來一碗,哈哈哈...食咗你!

我知道大家想問我間店在那裡,忠孝敦化站2號出口向左轉,1分鐘就到,好易搵啫!


好...明天台北cafe一天遊,再介紹給大家啦! 香港很冷呀! 戰友們緊記多穿衣,還記得你們的米芝蓮已走了!

2010年2月16日星期二

很熱鬧的新年

如果你發現香港的新年愈來愈沒氣氛的話,我建議你到新界的圍村走走,你會發現這個新年真的不一樣。

今年應邀來到這裡,屏山村的鄧氏祠堂吃盤菜宴,是不是很像電視台古裝街呢?舞獅點睛當然是主要節目,但今天還看到小朋友在放孔明燈,很特別呢!

等食期間,我同個公雞碗影相!


這個是頭盤,陳皮老鴨煲瘦肉 (不過我諗應該唔係太老,因為D肉很腍很香),未飲都知道很好味:)

這個當然是主角盤菜啦~


點少得佢呢?非一般靚仔咁簡單,裡面有雞的!

這一夜,很滿足很興奮,但很肥,不得了,明天要開始減肥,但...明天早機,都係聽日先算啦啦啦...

2010年2月15日星期一

愛回家

無論是韓國人、日本人還是中國人,大家的新年都是有著同一目的,一家人聚首一堂,閒話家常,相信是一年中最溫馨的時候。還記得小時候的節日氣氛比現在的更濃,濃的原因,是周圍的商店總是關門大吉,而更令人興奮的,就是街邊的車仔流動小販,新年就是拿正牌在街邊掃街的日子。

昨天回到家,竟然看見牠,牠叫年年有(魚)餘,很久沒見面了,今年還有兩條。

當然還要步步高陞啦~上星期在電台說過,它很高卡,所以一件起兩件止,但戰友們,若真的要步步高陞,選芋頭糕或蘿蔔糕更Light呢? 當然越少臘味越好啦! 還要記住少油!

吃過小食,當然少不了新年的意頭菜,這個新年的例湯--章魚蓮藕湯,我已飲過兩次,說起蓮藕,它是不錯的高纖美食,10片才是60卡,已有2.8克纖維,別少看它吧!

這味一看便知是笑哈哈啦! 寓意日日開心笑哈哈,送俾大家啦!

很明顯,這味清清淡淡的,當然是我點的菜吧!


還有這個,我個人比較貪心,所以鍾意叫拼盤,雙拼滿足不了我,所以是三拼的。


知唔知這是什麼呢?牛肉?當然不是啦!係駝鳥肉,鐵質含量與牛肉一樣豐富。


這味菜任何一位朋友也愛點的,點解?佢個名改得好,一年只有這段時間大家才會記起它,發財好事呀~


這味又知唔知寓意D咩呢? 好簡單,純粹是我鍾意食所以叫,不需要寓意,一見開心就是意頭菜啦!

條魚就唔駛多介紹啦!


好喇!最後一張,又有咩意思呢?

一睇就知啦! 咪係...相片右手邊嘅...莎莎朱古力囉,唔好食咁多,一粒成70幾Kcal架,仲睇到d咩呢? 聰明人先睇倒架!講完!瞓喇!

2010年2月14日星期日

新年好!

中國人新年的習俗有時間真係好有趣,剛才11點半左右,同朋友行商場,走到去鞋部嘅時候,見倒一班年輕人正在揀緊鞋,阿A同阿B講:試快D啦! 仲有半個鐘咋,新年唔可以買鞋架~跟住佢哋就一個箭步跑去俾$$,點知有10幾人排隊,最後點...我無再八卦喇!

跟住我又去咗一間Coffee Shop,坐隔離有pair男女,又傾緊運程等問題,佢哋話佢哋個老細好鬼迷信,話今年紅色對佢有利,所以將全公司嘅file都轉哂紅色,我聽到後,唔知點解笑咗好耐。

講開迷信,有睇我個專欄嘅朋友應該知道,我有個friend,又係超迷信,因為個相士話佢今年要窈窕D健康呀財運呀先會好,所以佢決定減肥,唉! 尼句說話我講咗10年佢都無理我呀!

好啦!見今日大年初一,黃詩詩都贈大家幾句,今年屬鼠、牛、虎、兔、龍、蛇、馬、羊、猴、雞、狗及豬的朋友,今年保持標準體型便會健健康康,而且,今年大利與水有關的活動,只要每天出點汗水,就會百事順景。Hahahahahaha! 最重要係...笑口常開!

不過我都係恭祝大家心想事成或者從心所欲啦! 你知啦! 有些朋友想增磅、有些想減肥、有些想fit一世,各有所需嘛!

仲有呀! 今年係milo and Moo嘅年,你哋睇真d吖,佢哋係虎紋架,所以佢哋都想同大家拜年,milo話希望大家好似佢一樣成日都咁得人鍾意!

毛毛就恭祝大家成日都咁醒醒目目啦! 生生猛猛!