跳至主要內容

文章

顯示從 11月, 2010 起發佈的文章

蝦餃皮

放心,咁嘅題目,唔係想話俾大家知只係食得蝦餃皮,而係因為我太鍾意食蝦餃皮啫!同親我飲茶嘅朋友都會好開心,因為大部份人都唔鍾意D皮囉!於是咪將佢D皮剝哂,放哂入我個碗! 好啦! 我都知好多朋友都鍾意食叮叮點心,所以都測試咗一D品牌,不過叮叮點心形象一直都唔好,所以我一直都較少留意,直至有佢出現,這個是這品牌聲稱全新配方的,唔好買錯,是晶瑩蝦餃,那些蝦餃王...係肥D架,我就唔係太建議喇! 總之,睇清楚每一隻字『晶瑩蝦餃-全新配方』! 好多人都知叮叮點心衰咩!咪係鈉質高囉! 但這個是可以接受的,食哂8粒538毫克鈉,每天建議的約1/4,算係咁啦! 你都唔會日日食啩! 1包8粒=1.5份五穀+ 0.5份肉+1份脂肪,如果真係好掛咗D蝦餃,都可以試吓!

對心臟好一點

『好大壓力呀! 放鬆D對我好D得唔得?』別以為這是都市人的怒吼,其實這亦是心臟對你的申訴。經常都聽到戰友無奈說:『已實施戒鹽多年,血壓總是高企,絲毫也沒進展!』研究已指出,要控制血壓,已不只是戒鹽這般簡單,我們仍需注意其他營養素之配合,如果你亦想知道當中的竅門,2010年度最後兩場『不藥而癒的降血壓減膽固醇餐』免費講座將是為你而設的,講座將由我位小徒周詠苑營養師主講,活動日期如下: 30/11(二) 銅鑼灣中央圖書館地下1號活動室 晚上7:15-8:45 6/12 (一) 佐敦柯士甸道童軍中心1030室 晚上7:15-8:45 要打電話報名架! 2891 0920 大家多多支持佢啦~

低脂煎蛋

昨天,記者登門造訪,所為何事?煎蛋也!數天前,收到這個邀請,的確有點擔心,別看少這隻煎蛋,的確看似簡單,但就是最講技巧的,平日也會動手煎,但這麼多人看著我煎,加上攝影師會影下每一個步驟,怎不緊張呢? 無辦法吧!硬著頭皮,幸好,有超級助手幫助,他就是那隻超級易潔鑊,平日他可以全不用油幫我做出一隻煎蛋,但今天需買個保險,所以加了半杯匙油,但這半杯匙油,已叫記者及攝影師看得出神,嘩!咁少油都煎倒咩!我就話,實煎倒架,不過唔知靚唔靚啫。 好彩,如有神助... 個樣都睇得吖! 戰友成日話唔食得煎蛋,其實如果自己煎,控制油份在1茶匙內,是可以接受的。 睇吓阿蛋幾叻,係今日嘅主角! 當我哋差不多影完嘅時候,輪到為食貓出場, 聞吓先,咩尼架主人,我平日都未食過嘅,佢聞咗一陣,發覺唔係佢平日食開嘅食物,轉頭就走開咗。而攝影工作就完成。 跟住,我就送記者朋友去搭車,10分鐘後,我回來,行入廚房,見倒這個情景, 我離開咗嘅10分鐘發生咩事,我相信大家應該好清楚,我即刻走去尋兇手,於是在櫈底見倒佢,你哋睇吓! 主人:隻蛋好好味,而家仲回味緊,明天早餐可唔可以再食煎雙蛋呀? 我打開佢個口,仲見倒佢D牙染了些黃色呢!!!! MILO你知唔知你唔食得雞蛋架!真係激死人呀! 你哋在Facebook見倒果張相,就係佢給我罵的樣子了。

食唔肥BBQ私人派對

又一年了,去年,又是這個時候,我們一同燒烤去。 人,是要向前走的,也要進步吧! 所以今年,我們的BBQ活動更勝舊年,將會有更多又低脂又健康的美食準備給大家,餐單詳見下表; 是次活動詳情: 日期: 2010年12月11日(星期六) 時間: 約5時開始至晚上9時 費用: BBQ活動連車費 $180 地點: 白鷺湖互動中心--新界大埔紅林路 2 號天台燒烤花園 活動: 聖誕幸運抽獎 報名方法: 即日開始至30/11,名額只有50人,先到先得,你可以幫朋友一齊報,報名地點兩個,尚營坊尖沙咀及銅鑼灣分店,詳細地址去網頁睇 www.nutracare.com.hk 行程安排: 當日將會有專車將大家由尖沙咀堪富利士道格蘭中心送到燒烤場地,請準時3:45集合,不見即散,活動後,那輛豪華專車亦都會將大家送回尖沙咀或**附近港鐵站 (**這個在當天決定吧!) 知唔知點解會食唔肥吖!? 因為我會出席囉! 戰友成日話一諗起我就食唔落,所以應該唔會肥! 很精彩的餐單如下: 中蝦、青口、扇貝、番薯、粟米、秀珍菇、茄子、豬牛羊都有、仲有魚蛋牛丸等....仲有我黃詩詩的私房菜,係秘密到時先知。

麻煩哂^^

同事剛剛告訴我,明天...應該係明晚的講座仲有十幾廿個位咁啦! 你都知我貪心架啦! 所以呢麻煩哂大家,明天,即是2010年11月23日,在銅鑼灣中央圖書館地下1號活動室有一個叫『肚腩...非減不可』的免費講座,時間係7:15PM開始,話就話8:45PM完,不過我從來都OVERRUN,所以你都係預咗9點先走得啦! 唔該幫我請多少少朋友尼啦~ 要留位的,電話是2891 0920,記住! 是明晚的...明天見!

瞓唔醒必食之選

如果你每個星期一早上起來,總是眼朦朦的,我強力推廌你買這種原味乳酪,刷牙洗面後就食佢,包你成個人都醒哂!吖!唔係,講得全神D,學婆婆話齋:『真係酸到盲咗都開眼!』 續雲吞之後,我又試咗乳酪,因為有戰友問如果選原味的乳酪有咩建議,其真你只要選低脂或脫脂的,另外再睇下有沒有添加的糖,就可以了。上下兩種品牌都符合要求,但個人其實唔太鍾意食,我都係選食開果兩種了,介紹俾大家係因為應該有朋友喜歡酸的,是嗎? 就係這個好朋友了,都是有LIVE acidophilus 即是咩,咪係好活躍的乳酸菌囉! 講個貼士俾大家聽,噚晚硬著頭皮要完成個乳酪,我用咗兩個方法,方法一:切咗提子放入去食,方法二:用來塗麵包,咁先食得哂......

辛味泡菜包包

知唔知咩嘢吸引我去介紹這個包包給大家呢?我諗你一定估唔倒!! 其實係因為佢個袋好可愛呀!另一個原因當然係因為佢嘅辛味啦!這個產品,不算得好低脂,但對於已經減完磅嘅戰友尼講,是一個不錯的午餐選擇,點解唔太建議俾減磅戰友呢?因為佢嘅脂肪含量剛好是整體熱量的29.7%,大家仲記唔記得一種食物最好有少於30﹪來自脂肪呀! 個換算就比較麻煩,5粒剛好是2份五穀+1份肉+1份脂肪,點解麻煩?因為仲有一粒都唔知點好囉,但既然已成功減磅,那一粒又不緊要吧!仲有,所有叮叮食物都有那個老問題,食足一包,已攝取688毫克鈉了。這個在SOGO超市買的!

繼續餃餃鎮

今晚的任務終於完成了,除了準備好明天TVB週刊的食物外,還繼續試餃,參與試味的除了我兩位好同事外,仲有佢... ... 唔知大家見唔見倒,個煎餅有個小小的角被小毛咬了一小口呢? 好啦!講返正題先,今日試餃時有D喜出望外,因為估唔倒除了上次的淘大鮮蝦雲吞外,佢嘅水餃都令人驚喜,都真係幾好味,點計呢?5隻=1份五穀+1份肉,俾個樣大家認住先...... 但係,若果要講比較『抵食』同健康,我會揀佢,因為佢有好多菠菜同魚柳,熱量同脂肪都較低,如果我無記錯,佢應該係今次測試中的NO.1,9粒=1份五穀+1份肉類,這個水雲餃,又是Citysuper的貨品。 加埋之前介紹的CP雲吞、韓國餃子及淘大的鮮蝦雲吞,大家已經有五種選擇啦!但再多一期之後,我會試其他東西,但我要休息一陣先,因為我想話俾大家知,一種食物就算幾健康,食得多一樣肥,因為我真係覺得自己肥咗,所以都係休息吓先! 差D唔記得俾張相大家睇!

食住先啦!

我諗未來嘅3個月,我應該唔會再食雲吞水餃之類的東西,但阿姨水餃例外(HEHE...賣口乖都要啦!) 其實個POST諗住噚晚寫,但係由於要服侍兩隻大爺,所以UPLOAD完相之後就沒有時間寫了。 平日成日同大家推介CITYSUPER的產品,今次我先會介紹這個水餃成績表中,其中一種比較大眾化的產品,大家都見倒啦~就係上圖的淘大鮮蝦雲吞。 其實一般鮮蝦雲吞,好多時出現嘅問題都係有太多肥豬肉,這是部份雲吞唔合格的原因,我先前介紹過的CP鮮蝦雲吞,都係因為只得「皮包蝦」所以入選,但這個呢?4粒先得1.3g Fat,所以脂肪算是正常的。 戰友們,若果正跟餐單要選這個的話,是6粒=1份五穀+1份肉,好唔好味...當然係無我阿姨整嘅咁好味啦~(表弟表妹,麻煩睇完後FORWARD俾阿姨睇!)但個人認為,10分滿分都有7分啦!但最重要,佢在今次分析報告中,算是較低脂了。 以下是我昨晚的宵夜!但都係要提提大家,佢跟咗個高鹽湯包,最好唔好落啦,因為雲吞已經有調味了! 入圍名單陸續有來,續... ...

等多陣啦~

講得好聽D叫謹慎,講得衰D我認為係麻煩或者執著,雖然我知大家好心急,但係大家真係要等多陣,我講個『雲吞水餃成績表』,因為我個人真係好鬼麻煩,我都係想自己煮過、食過、而且仲要攞咗上手,我先真係會介紹俾大家,而且仲要計一輪好複雜嘅數字,先可以俾戰友食而唔影響大家嘅減肥進度嘛! 都好,不如講吓俾大家知測試過程係點吖! Step 1: 同事要鬼鬼祟祟去各大超市偷影,你千奇唔好睇少這個程序,因為又要影d矇哂同反光嘅食物標籤,仲要唔俾各大超市嘅經理知係極困難。 Step2: 抄低營養標籤嘅資料。 Step3:做好一個table,比較比較。 Step4:確定邊種有機會合格,就要買佢番尼,再睇吓個配料表,仲要幫佢過磅,計一大輪... Step5:最後當然係食啦! 咁樣,先可以發佈給大家,現進行到Step4,所以希望大家耐心同諒解。 好喇! 今日星期五,希望大家有個快樂weekend,我要趕星期一份稿喇~ (初步睇,相中雲吞是合格的,在citysuper售出,但換算份量就要等吓喇!)

雲吞水餃成績表

為咗令大家減磅減得開心D,有多D食物選擇,我同一班同事們,努力地去分析吓市面上有無其他牌子的雲吞水餃可以介紹俾大家,而家做緊最後審閱,日內會公佈,密切留意這個網誌啦!

簡易煲仔蒸飯

經常出街食飯,都真係幾悶... 剛剛是午飯時間,公司同事都在叮屋企飯,陣陣屋企飯獨有的香氣,撲住撲住埋尼,真係呢...羨慕死人囉~~ 無辦法啦!公私兩忙,每晚無11點都唔會踏入屋企,都唔知幾時有屋企飯食... 為咗大家都可以在家自製一個簡易屋企飯,跟住個食譜做,都好簡單架。 材料: 瘦牛肉80克、金菇1/2碗、靈芝菇1/2碗、車厘茄6粒、白米1/2碗、雞粉1/2茶匙、生抽2茶匙 牛肉醃料: 生抽1茶匙、黑胡椒1/2茶匙 做法: 1. 將瘦牛肉洗淨,瀝乾,切成小粒,用醃料將牛肉粒醃好,備用。 2. 金菇及靈芝菇切去根部,洗淨、瀝乾,備用。 3. 車厘茄洗淨,切半,備用。 4. 洗淨白米,放入飯煲中,加入適量開水,再加入雞粉拌勻,調好米水後,放下牛肉粒、金菇及靈芝菇,按飯煲買,待飯煲至湧出蒸氣時再加車厘茄,煲熟所有食物後,可根據口味,加入1-2茶匙生柚,即成。 唔好喇! 都係而家去買材料,明天帶飯,就算11點先返屋企,應該半個鐘都做完啦~

開飯喇! 健康版...

知唔知我喺邊呢?Pokka cAFE囉... 這個開飯喇健康版好一陣子沒有運作了,今日重開,就帶大家到這裡啦~ 剛剛見完一位減磅新丁,佢同我講,跟據我俾佢個餐,佢前日去食壽司總共食咗8件魚生壽司,之後仲食咗多一碗烏冬,叫完之後竟然俾佢D Friend話佢仲咩減肥食咁多嘢! 所以最後俾d friend食咗佢個烏冬,真慘! 我成日都講,如果減磅,真係唔可以keep住食得太少架,如果太少的話,營養唔夠熱量低,餓吓餓吓食返零食咪仲死,正如我今日喺專欄講,一個蛋撻都340多卡啦! 好似這個餐,都好健康,件牛肉是grill的,仲有個湯烏冬,好飽架! 但肉類份量較多,晚餐食番少d啦~ 唔想食咁多肉這個泡菜烏冬都可以,減肥...唔一定要自己煮架,多d留意個menu,買下d侍應哥哥,了解吓煮法就ok啦!

燕麥圈圈

近日, 經朋友介紹,愛上了這種燕麥圈圈,但是來路貨,極貴,一大盒60多元,下次都係叫住在美國的朋友帶給我,應該會經濟D。(我在marketplace買的) 經常都有朋友講,想降膽固醇,可唔可以唔食麥片,點解咁抗拒麥片?原來,部份朋友會覺得病先食佢,無辦法啦! 心理問題好難衝破,咁食其他囉! 這種Cheerios,同香港品牌那種是不同的,唔好買錯,香港的,有很多很多糖,這個呢?自己試下睇... 佢係用燕麥做的,1碗有2克非水溶性纖維同1克水溶性的,雖然無麥皮咁高,都好過無啦! 其實,仲有其他食物都有水溶性纖維的,燕麥糠、橘子類生果、大麥、豆豆啦!不過唔好覺得我煩都提多次,要有效控制膽固醇,同時需配合低脂、低飽和脂肪、反式脂肪及膽固醇的飲食習慣,唔好唔記得多運動是增加好膽固醇的最佳方法呀!你知啦!有d朋友誤以為朝早食咗麥片,午餐食得肥膩,都可以一筆勾銷。 戰友們,換算方法為1碗=1.5份五穀,控制體重角度,都算抵食啦!好飽架,而且味道都唔錯。都係講清楚d,云云高纖食物來說,佢嘅味道,都是容易接受的,聰明人應該明白啦!

酸酸地的雪糕

講明先,我絕對唔係想介紹圖中的乳酪雪糕,唔好走上去Open rice search 呀!只係想幫個post襯張相啫!不過今日都真係想講吓佢。 其實香港人都真係幾三分鐘熱度,果頭食完台灣麵線同珍珠幼茶,前後唔夠一年,又換畫,成個街頭都係froyo,即係乳酪雪糕啦!但係面對這些新到產品,作為營養師,有時都幾懊惱,因為這些街頭小食,是沒有營養標籤的,最慘係佢哋成日以健康招徠,於是戰友就當然信以為真啦!肥咗都唔知咩事! 當然如果要比較乳酪雪糕及普通雪糕,前者一定優勝D,因為佢哋都加有活性乳酸菌,對腸臟都健康D啦,仲可以增強抵抗力,但問題係,乳酪是由牛奶經乳酪菌發酵而成的,所以都幾酸,就係因為佢酸,大部份人都較難接受,所以好多時會加糖囉! 所以呢,佢哋好大機會陰D陰D甜死你。 我就親身用我個銀針口試過兩間,一間是上圖那間,另一間是自助服務的,自助服務那間是由美國來港的,美國的網頁,就有原味的熱量,每100克75卡,脂肪是0的,但有兩茶匙糖,如果Keep Fit朋友要食,1次食100-150克尚算可接受,不過佢都幾奸架,網頁只有原味的營養資料,其他口味呢,都沒有顯示,聰明人應該知點解啦! 但我頭先同車厘子講,佢就話唔鍾意這間,點解?好簡單...好酸囉,我食完都酸到震咗一震,但我都幾鍾意。 那間yogo,就沒有營養資料,但我的銀針口話我知因為唔酸,所以有機會多加了糖... 其實外國有一間叫pickberry,佢個網頁的營養資料都好詳細,可以參考吓,100克的綠茶froyo,110卡,糖份已有20克,即4茶匙糖,都好高糖架,其實大部份都係咁,仲要記住,大家一次唔只食100克呢?所以,量力而為啦! 戰友們少食少食為佳。講真,真金不怕紅爐火,如果真係低糖低脂,就話俾大家知佢嘅營養資料,咁大家咪可以做個聰明選擇囉! 忠告大家一句啦! 酸酸地...會好D!