營養師黃凱詩的生活點滴

2010年8月31日星期二

少甜吖...

有時都唔知點解,香港話哂都係一個大都會吖! 點解有D嘢成日都慢幾拍。

話說10多天前,過大海食大餐,明知自己會食得較多,唯有喺某D地方慳D熱量啦! 於是去到這間咖喱全果陣,諗住叫杯凍檸茶少甜啦! 點知...個侍應指住我面前枝白色樽話:『我哋D糖自己加嘅?!』當時真係想鑽個窿走入去。

其實咁咪好囉! 唔駛大家叫少甜又變咗超甜囉~


又到九月了...免費講座詳情

這個九月,對我尼講,將會是極之充實,因為徒弟仔今個月休息,所以我就要包起今個月的所有講座了。除咗之前同大家提過嘅營養標籤講座之外,當然還有那個《肚腩...非減不可》講座啦! 係呀係呀!又有星期六的講座喇! 多次經驗話我知,好鬼快滿架,要聽就快喇!

8/9 (三) 佐敦柯士甸道童軍中心1030室 / 晚上7:15-8:45
14/9(二) 銅鑼灣中央圖書館地下1號活動室 / 晚上7:15-8:45
18/9(六) 佐敦柯士甸道童軍中心1030室 / 下午2:45-4:30

要報名都係果個電話啦~2891 0920 找金小姐就可以了。


2010年8月28日星期六

雀粟之外...還是它

營養標籤嘅出現,食品商不希望較不健康的食物被淘汰,都開始研究新產品,希望能滿足一眾『營人』的要求,這就是推行營養標籤制度的長遠效益了。

這盒麥麩片,就是新產品,長久以來,當某些戰友被便秘苦纏下,我多建議她們進食右手面這盒全麥維,原因很簡單,因為它是市面上較容易買倒而又方便進食的高纖食物,但它有一個問題,個人認為有D難食,所以雖然它對舒緩便秘,萬試萬靈,但每次我建議戰友進食時,都不忘說多句:『俾D心理準備,佢有D難食!』但好奇怪,我每次咁講完,戰友都會同我講:『唔係好難食啫!』所以話呢?無咩期望,就有驚喜...

不過,這個新產品,真係好好多,除咗味道之外,佢嘅糖份同鈉都比全麥維少,自己睇下啦!記住比較時,要睇右手面果行。

仲有,戰友們,換算方法是1/2碗=1份五穀~
個食物標籤講座已經準備咗俾大家,記住報名喇! 因為我就快會公開俾其他朋友報名喇!



2010年8月27日星期五

香蕉也有弧度

上星期六,行超市時,見倒佢(香蕉盒),忍唔住同個朋友講:都唔知話D日本人無聊、定係話佢哋太有頭腦,竟然設計一個盒,專用來裝香蕉。朋友就話,邊會有人買架?我就話,買嚟玩吓唔係問題,但問題係,隻隻蕉弧度不同,唔一定擠倒。
你哋睇吓喇~
點知事隔4日,剛剛見完一位剛到澳洲探親的戰友,佢就拿出一隻蕉盒送俾我,我第一個反應係有D愕然,點解咁啱架,跟住我心諗:唔通佢覺得我個人咁無聊會鍾意這些東西?!邊知佢俾我嘅時候就話:一見倒隻蕉就諗起你,咁無聊嘅嘢應該啱你,死啦!原來我喺D戰友心目中真係咁無聊...

自從有咗隻空心膠蕉之後,3分鍾熱度嘅我足足帶咗3日香蕉返公司,不過大家記住,一日唔可以食咁多香蕉,因為一隻已經是兩份水果,就是一天的Quota~

2010年8月23日星期一

加開兩場...看標籤,學減肥

有咗標籤之後,從前要估估下的東西,現在可謂一目了然 (如果你真係識睇),好似我今日喺專欄講嘅水餃一樣,未有標籤之前,為安全起見,營養師大都不建議戰友食雲吞水餃,主要原因係,大部份會加肥豬肉,如果唔係豬肉,就是醃製材料時加入的花生油、芝麻油等等...可以有幾肥?我今日舉例那種已不是最肥了,但5粒的脂肪量就已經有差不多3茶匙油(15g脂肪),一個漢堡包都係得9g,所以揀嘅時候,多留意標籤就唔會肥咗都唔知咩事。
都係入番正題先,較早前舉辦過兩場的《看標籤,學減肥》由於反應太熱烈,所以最終都決定加開兩場,貴為我的番薯,你當然可以優先訂飛,仲唔快D打尼?
以下時活動詳情:
免費講座: 《看標籤,學減肥》
日期:16/9(四) 及 20/9 (一)
時間:晚上7:15-8:45
地點:16/9-銅鑼灣中央圖書館地下1號活動餐
20/9-佐敦柯士甸道童軍中心1114室
留座電話:2891 0920 (金小姐)
快D喇,一星期後,就會招收其他朋友。

餓你唔死快速煲(用多拉A夢把聲講一次)

唔知大家有無試過餓到死,諗住煮個麵...唔係都係煮烏冬食,但係等煲水滾,等到發脾氣?如果你有這個經驗,這個餓你唔死快速煲一定啱你。

話說兩個星期前,想換個屋企個煲,無意之中,行citysuper時,俾我見倒佢,試過之後,超正,連任何一位朋友到我家用佢之後,都讚不絕口,所以決定同大家分享。總之,包你煮嘢時有好暢快的感覺啦~重有,最緊要係唔算貴,日本仔嘢,真係有D唔同。

仲有佢,如果你經常睇我個Blog應該見過尼隻鑊,好用到爆,可以用極少油煮,總之要健康飲食,都唔少得佢啦~

事先聲明,我同佢無咩關係,這只係一個會肚餓又想健康D嘅用家心聲,我只在沙田CitySuper見過佢啫!

2010年8月22日星期日

隨心...左影右攝

生活在本世紀最強勁的壓力煲下,任何人該學會如何令自己放鬆,要不然,問題便會跟著你來,揮之不去。我的方法是怎樣,最簡單直接的,我會選運動,因為運動時,最會令自己什麼也不想 (但我相信你們會胡思亂想,想什麼呢?咪就係幾時先跑完囉!),另一方法,便是跑到別處,得一兩天,我選這裡,因為我愛這兒的建築,你看?他們懂得如何保育,一磚一瓦,都在告訴我們歷史,香港政府?!唉!就是喜歡拆拆拆...街道的盡頭,就是舊樓房,前面的,就是翻新了的葡國建築。

轉個頭,就變了新的建設,喜歡這裡的設計,但不愛這兒的嘈吵,人...真的太多。

這個月來,突然喜歡看雲,這張相的主角,其實是蔚藍的天空及幾朵小雲。

吖!還有這些很可愛的街道名...肥膩?!亞美! 原來還有個地方叫肥胖圍及美女巷,下次有機會找一找跟大家分享。明天是大家的假期,好好享受,叉多點電,明天的我,要工作啊!是時候準備我份MC稿,老實說,對自己有點要求所以有點緊張,不過...我一定會努力!

2010年8月16日星期一

大快樂早餐

唔知大家有無發覺,每朝當大家去快餐店或者茶餐廳食早餐果陣,大家都會望住個牌望好耐,又或者將茶餐廳個牌翻來翻去,但睇完一大輪,其實你咪又係揀返噙日、前日同大前日果餐~

今日,我去咗這個地方,順便想同大家溫故知新一下,去大快樂時,有咩選擇?講真!有蛋蛋的都一定唔食得,因為大部份餐廳都鍾意炸蛋,即用大量油去煎蛋,所以最住的選擇,除咗叫佢走油嘅三文治之外,仲有...湯粉麵餐囉!

有邊款食得呢? 火腿湯通粉、雪菜肉絲湯上海麵/米粉、鮮茄火腿通粉都得,可能你會問,點解牛排同豬排都唔得? 原因咪因為係煎囉! 好多油架! 知唔知我今朝食咗咩呢?

唔駛估喇!因為大家無辦法估倒,因為...我睇完個餐牌後,去咗第二間店囉!哈哈!都話估我唔倒啦!


2010年8月13日星期五

每天都是挑戰...

一位是財經專家、一位是曾帶大家跳出香港看天氣的主播、另一位就是活躍於民主運動的少女民主女神,3位知名女作家,卻與我這個只懂教人揀飲擇食的小薯仔走在一起,能夠擦出什麼火花呢?

一星期前,社長找我幫幫手,我說: 講講座,沒問題! 想也沒想,殺佢! 點知,佢話: 找你做司儀! 司儀?!??!?!?! 唔係啩! 連一個婚禮司儀也沒當過的我,你竟敢找我當個這麼重要的活動主持,而且,我只懂教人飲飲食食...好像有點大纜都扯唔埋,我想了一天,最終我的決定是怎樣,大家看到啦!

既然應承了,就盡力做吧! 還可以藉這次機會,向這三位成功的女性學習學習,你也可以跟我一起學習,這是學習的途徑...http://www.am730.com.hk/amSeminar_20100825.html

2010年8月11日星期三

愈食愈Fit料理初班--更新版

料理,其實是一種創作,同樣的食材,但將創作者的心意加上後,就變成一頓使人垂涎三尺的美點,有時總覺得,食物就像繽紛的顏色,而餐碟就是畫紙,這一幅圖畫,有否給你涼快的感覺呢!食物也在說話。

作為一位營養師,就是想藉著食物,告訴大家,如何正確地利用他,令大家充滿活力。較早前曾告訴大家,將再一次舉辦料理班,可是舉行時間將更改了,這是最新版本。

愈吃愈Fit料理初班(第二班)-更新版
日期:25/8;1/9;8/9;15/9 (星期三)
時間:6:30-7:30(A班) 7:30-8:30 (B班)
人數:每班10人
地點:尚營坊銅鑼灣分店--銅鑼灣謝斐道482號信諾環球保險中心1201室(地下鐵銅鑼灣站C出口步行1分鐘即達)
料理秘笈:
泡菜海鮮湯飯、冰冰月餅、餃餃鎮仲有一個神秘甜品 (我黃詩詩會教其中一個架~)
報名期限:13/8
學費方面:$200(會員) $250 (非會員)-包括材料費
會員登記方法:尚營坊會員或你只需登入我的facebook,成為我的番薯就可以了。
這個Link是你成為會員的方法,登入後,接『讚好』or『like』就可以了。http://www.facebook.com/pages/Nutsdiary/168200145689
想報名的話,請到尚營坊兩間分店交學費報名就可以,好快D報喇! 因為現只得很少很少位,報名前,致電先問問有位剩餘學額先啦! 查詢電話:2891 0920

2010年8月10日星期二

坐霸王車?!

今日,突然想同大家講一則趣事。題目係八達通...

唔好誤會,我唔係想講佢偷咗大家d嘢又唔認果件事,不過首先我想問大家一個問題。有幾多朋友知道,由尖沙咀搭MTR去銅鑼灣要幾多錢呢?自從有咗八達通之後,大家對佢,已經有咗依賴,每次搭車,順手嘟一嘟就上車,佢嘟咗你幾多?!唔知喎!

有咗佢之後,大家亦唔再習慣準備零錢搭車,有一日,我如常搭上一輛78號小巴,點知一上車,就見倒這張紙,我想問,若果你當時,一蚊都無,你會點做,但係個司機已經開緊車....

當時,我好坦白咁話俾司機知,唔好意思,我真的沒有零錢,跟住個司機就自言自語咁話: 死啦~心神恍惚添,都無人上車做咩停車呢?如是者...每個客上車,同佢講無零錢,佢都會講尼句,大家話佢係咪好可愛呢?於是,我就坐咗一次霸王車了。

如果大家都多D幽默感,相信這個世界,一定會更美!

2010年8月5日星期四

又玩煮飯仔...仲有冰皮月餅~

我相信好多朋友仲記得兩個月前,我哋舉辦咗一個可以瘦身的煮食班,由於上次參加的朋友太投入太高興的關係,我決定再來一個,今次有咩煮?

夏日炎炎,當然有消暑冷盤啦!這個湯飯是其中之一,另外,由於就快係月圓之夜,仲有好冰的冰冰皮月餅,這是海鮮泡菜湯飯,好開胃架!

尼個是加送的,唔會詳細講,因為太簡單,教湯飯那天會講下製作方法。

好啦! 詳情在這裡...
愈吃愈Fit料理初班(第二班)
日期:28/8;4/9;11/9;25/9 (星期六)
時間:2:30-3:30(A班) 3:30-4:30 (B班)
人數:每班10人
地點:尚營坊銅鑼灣分店--銅鑼灣謝斐道482號信諾環球保險中心1201室(地下鐵銅鑼灣站C出口步行1分鐘即達)
料理秘笈:
泡菜海鮮湯飯、冰冰月餅、餃餃鎮仲有一個神秘甜品 (我黃詩詩會教其中一個架~)
報名期限:13/8
學費方面:$200(會員) $250 (非會員)-包括材料費
會員登記方法:尚營坊會員或你只需登入我的facebook,成為我的番薯就可以了。
這個Link是你成為會員的方法,登入後,接『讚好』or『like』就可以了。http://www.facebook.com/pages/Nutsdiary/168200145689
想報名的話,請到尚營坊兩間分店交學費報名就可以,好快D報喇! 上次好似4日已滿額!



2010年8月4日星期三

愈食愈Fit在譚仔

俾個餐牌大家睇下,順便教下大家減肥先!

近幾個月,很多朋友都好喜愛到這家譚仔過橋米線,既然係咁,就睇下大家知唔知要點食先健康D。見唔見倒有咩配菜揀呢?

其實有時候,揀配菜時,都要多發問,我剛才就食咗...又係雞肉冬菇囉! 但係我同時都幫大家問咗D問題,首先,我問過佢D魚蛋係白魚蛋,唔係炸過嘅白魚蛋,所以算佢過關;第二個問題我就問佢,你D牛肉係咪肥牛尼架,佢就話係一片片的鮮牛肉片,咁就好囉~又多一個選擇! 我問完之後,阿姐就話:『咁你係咪叫牛肉魚蛋米線?』我話:『唔係! 我要雞肉冬菇墨丸米線!』我講完之後,佢面容有點像阿珍,可能佢覺得我運吉啦~問長問短又唔係叫果種配菜!

除咗以上兩款之外,雞肉、冬菇、竹笙、牛丸、火腿、九菜、芽菜、豬肉及豬潤都OK,不過選湯底要小心,最好要清湯啦! 但如果你的減肥進度不錯,都可以要10小辣嘅~

這是我今天的選擇,係咪好大碗呢?因為佢米粉太多,我今日同同事Share,所以你見倒嘅食物,係一開二的。




2010年8月2日星期一

黃詩詩料理秘笈(一)

連續30多小時高燒不退,香港熱爆了。炎炎夏日,胃口真是差勁,但又不能不吃,唯有做些酸溜溜又消暑的美點,既健康又開胃,今天,就動手幹吧!

素麵雜菜消暑拼盤
材料跟專欄寫的一樣,日本素麵、日本甘筍、青瓜、雞柳、靈芝菇;當然還有最重要香草蒜蓉汁/意大利汁,想吃辣的,加點黑胡椒也不錯。

這兩枝就是我介紹的汁汁,大約用兩湯匙,鈉跟熱量也低,夏天常備一枝看門口啦!

準備嘅過程都好簡單,因為我不喜歡做麻煩的事,而且這個多星期,經常要照顧仍在醫院的小毛,時間就像被偷了一樣,所以簡單方便,非常重要。

雞肉是這個料理的重點,選了雞肉只得一個原因,我愛吃,而且愛貓大毛也愛,我們可以分甘同味,另外,這個多用途無鹽調味料,同雞肉最夾,所以隻雞唔好彩喇!

1.將雞肉切絲,用多用途調味料醃好,即係尼枝;然後用1茶匙油煎熟,煎的原因,因為較香口,更美味也;

2. 青瓜同紅蘿蔔切絲,靈芝菇洗淨,同紅蘿蔔絲一齊烚熟,備用;
3. 輪到素麵,素麵是日本麵食的一種,熱量低,而且較幼身,個人認為做冷盤較佳;
4. 都係烚熟啦!但之後放入冰水冷卻,咁包佢同你都熱氣全消;
5. 最後步驟當然係Mix and Match,想凍D可以放入雪櫃,2小時後先食,當然要加汁汁啦!
6. 但千奇唔好好似我個Friend咁亂咁加...我仲會加黑胡椒,香好多架!