跳至主要內容

文章

顯示從 11月, 2009 起發佈的文章

BBQ...都可以瘦

瘦住尼燒,仲要好食,其實好簡單! 上星期,我已經透露過,為咗慶祝我的面子簿(Facebook)Fans人數突破200,我決定約大家一齊食我最鍾意嘅BBQ,地點未定(大家俾d建議),仲研究緊,但日期就應該係19/12下午,有咩活動,緊要囉!減肥都BBQ喎,夠哂精彩啦! 睇下D食物先啦!但當然唔止咁少啦! 仲有仲有,我非常歡迎尚營坊會員甚至非會員參加,但係入場費就有少少分別...都係唔好,話明係慶祝面子簿人數突破200,如果你唔係尚營坊會員,但係加入咗面子簿成為咗我Fans,就一樣俾個折你啦!但係老實喇!人數真係有限,50人啫,場面太大控制唔到,由哩分鐘開始,登入 nutsdiary@gmail.com ,寫低你個大名同聯絡電話,仲有人數(歡迎你的姨媽姑姐小朋友),偉大的康樂組組長金美就會聯絡你,先到先得呀~我好公平架! 係呀仲有仲有!我已經好番6成喇!非常多謝大家用不同嘅途徑送上關心,我完全收到!多謝!好喇!開始報名喇!

好痛x N次

唉!行又痛、企又痛、坐仲痛! 有無人可以話可知仲可以點會無咁痛??!! 搞咩鬼!話說今朝一起身,條腰劇痛...痛到唔識形容,成條腿好似發軟咁,於是慢慢lan去睇醫生,跟住唔駛講啦!俾咗一大堆消炎藥我,跟住就去搵物理治療師啦!佢哋兩個異口同聲都問我有無呤重嘢?我諗都唔駛諗就即刻答:14磅算唔算重嘢?咁梗係算啦!如果呤嘢姿勢唔正確,ligament會好易受傷,咁我明喇!平日我都好重視拿重物嘅姿勢,但近幾日,米路仔日喵夜喵,仲用個好可鄰嘅眼神望住你,咁你就會急不及待抱起佢,睇尼那件重物,應該係佢... 醫生叫我stay in bed三日,唉!個人頭腦清醒瞓係張床仲咩呢??而且我仲要係一個無時停嘅人,唉!愈寫愈痛,要痛到幾時架!

好抵呀...買唔買喼呀!

今朝返工個陣,見到好多朋友拉住個喼!吖!唔通咁多朋友去旅行,真係開心喇! 唔係?!睇清楚D先,個喼全部一式一樣,仲有大大個(已售)嘅貼紙,啊!原來係一田大減價,D喼好抵! 我諗極都唔明,其實係而家D喼咁唔實用,用一兩次就爆,定係大家真係成日去旅行,次次都要換喼當潮流呢? 最搞笑係當我返到公司時,同事問我:你頭先有無經過一田呀!多唔多人? 我就話:D香港人唔駛返工咩,中午十一點都人山人海,梗係多啦!做咩呀?你有興趣?有咩想買? 同事話:買喼囉! 我好奇問:你無喼咩?! 同事理直氣壯答:有呀!大中細各有一個! 我再問:咁仲買! 佢就話:好抵喎!唔買呀!舊年我都有買!!! 唔通!大家間屋真係有3000尺!!有用先得架,唔通當衣櫃咩! 見大家明天放假,同大家輕鬆下啫:)

超好味又瘦身的...大番薯

大番薯...唔係講緊老父子個Friend,日本番薯也! 俾大家睇下,係咪好靚呢? 我話個碗係咪好靚呀!唔係d番薯!哈哈哈...個碗係sogo減價掃架,個碗前面有條貓尾,好搞笑:) 講番正經嘢先,由於近日天氣涼涼地,經常叫戰友食下番薯,所以就諗住教下大家點做美味番薯片,材料當然緊要啦!所以都係買日本番薯,噚日係citysuper買咗兩大個,15大元,好正! 好...準備好未,首先烚熟個番薯先,15-20分鐘啦!8成熟可以了,如果唔係太稔,跟住用條乾毛巾或者kitchen paper『索一索』佢,接住哩一步好重要,就係用把鋒利D嘅刀切片,專家話(即係我)最好係0.4厘米,跟住用好少好少油(少於1茶匙)再用中火煎或者叫做烘,金黃色後就落少少海鹽,1/4茶匙好喇,嘩!真係好味都極!試過你就知...

米路偷食

你哋千奇唔好以貌取貓,以為Milo傻吓傻吓,其實佢係一隻超聰明嘅貓,有片為證,慢慢睇啦! Milo覓食記 Milo: 吓!咁快就食哂喇?咪住阿哥個兜好似仲有,等我伸隻肥手仔囉兩粒先!(伸手入大毛個兜) Moo:仲有幾粒等我慢慢嘆先,喂!你做咩呀??食埋人哋D嘢,肥死你呀! Milo:鬼叫你食得咁慢咩!好味~ Moo:(拍一拍milo個頭仔)你好俾番我食喇! Milo:我食食食,食埋個碟底... Moo:(再拍一拍Milo)你仲食,你又話要減肥,你個肚腩就快到地喇! Milo:得喇!你同主人一樣囉唆,食埋哩餐先,聽日先減啦! 你哋知點解Milo咁肥啦!咪因為佢成日偷食囉!乖乖地努力啦...大家:)

尖咀戰友...今日好介紹

『戰友版開飯喇』又同大家見面,今日介紹咩呢?? 上星期係電台節目度俾陳美思同蔡展煇話我好掛住鄉下,我諗咗一陣...唔通我潛意識流露咗出尼?! 噚日食Lunch嘅時候,同事問食咩?我隻腳就好奇怪咁,行咗去食烏冬,我叫咗牛肉湯烏冬,好有牛肉味,最重要係牛肉都唔算肥,同事呢?就食咗韓風海鮮烏冬,賣相唔錯,D海鮮都算新鮮啦!值得推介俾一眾戰友。不過去之前,記住留番個quota食隻糖心蛋囉!! 這就是韓風海鮮烏冬...3份五穀+2份肉...$45 我就食哩個,都係3份五穀+2份肉...抵到爆$30 我都識整嘅糖心蛋,8大元一隻啫!

又唔係成日食...

你估下如此一份簡簡單單的小點,會為你增加多少熱量呢? 我剛剛計算過,410卡,即是兩碗飯...或者4隻香蕉...又或者7隻蛋的熱量囉! 唔緊要啦!做多D運動消耗番先,咁就唔該跑多50分鐘步先講啦! 我唔係想嚇大家,但係經常都聽到D未下定決心但經常想想想減磅嘅朋友同自己講:『又唔係成日食!』係...你係唔係成日食甜品,但間中整舊豬手、有時又菠蘿包、朋友有台灣手信鳳梨酥又話食少少,咁咪即係成日食!! 俾個目標自己啦!又唔係以後唔食得,減30磅都係6個月啫,人生仲有好多個6個月食啫!

童心未泯...是減壓良方

這個週未,你有否在崇光掃貨呢?我就有啦! 掃咗森林家族一個生果檔! 經常有讀者同戰友這樣問:『點解你Office咁多玩具嘅?』原因很簡單,你要明白,歲月催人,這是鐵一般的事實,但你就可以將心境保持年輕,而且我個人認為,經常保持那種孩子氣,我才可以用一種更輕鬆的方法將我腦海中嚴肅嘅營養資訊帶俾大家,而且那顆童心未泯的心更可令創作空間加闊,更是不錯的減壓方法呢? 共勉之--

小腿…放鬆D啦!!

哩位小姐隻左腳小腿肌肉正鬆弛中... 雖然很難接受,但這是千真萬確的事實。 世上是沒有局部瘦身的方法 (除左手術…但唔建議呀!!!!!),特別是小腿。剛過去的一週,當我準備稿件期間,我嘗試在搜尋器找尋坊間一些瘦小腿的秘方,但被我發現,那些所謂方法,例如:用腳尖企等,絕不能令小腿變得纖幼,更會愈來愈粗,聽到那個粗字,是否很害怕呢!但幹嗎會粗,用整個身體的力量鍛鍊小腿肌肉,肌肉纖維變粗,唔變甲組腿就怪! 咁點呢!如果你真係有好多脂肪令小腿粗,唔駛擔心,要做的是帶氧運動 (不好多戰友都由買唔倒BOOT到日日著BOOT),但如果你已經好瘦,或者都唔滿意自己條腿,就只好做多D伸展動作,令小腿肌肉長D長D,睇起上尼咪修長D啫!由於用文字好難講,所以準備咗短片示範(但質素較差,希望你哋明啦!大家都係醒目仔女),得閒無聊係公司個抬底就叫隻小腿放鬆D啦!但係記住記住,各OL去GYM嘅時候,就(千奇 X N次)唔好再用器械鍛鍊隻小腿,如果唔係就後悔莫及喇!

捨不得...但最後5場了

不經不覺,這個講座...都唔知講咗幾耐,應該是兩年了,我很記得參加第一場講座其中一位小妹妹,已經由180磅減至110磅,到現在她的減磅歷程已完成了半年...還有很多很多...由一開始認為沒可能減下去的,已變成possible!! 2009年,尚有1個月就完成了,這幾天我在進行工作回顧,嘗試給自己1個分數,最後我給自己70分,總認為還有很多事想做,想做得更好,人是要有要求的,要不然只會退步,壓力是有的,但若然一個人長期活在無壓的環境下,工作動力也沒有了。 回顧...反思...展望,我決定那個講座是時候作結,是最後的5場,2010年將會以另一個講座...或另一個形式跟大家見面,這是最後5場的日程,有時間沒時間也好...需要不需要減肥也好,我深信聽過這個講座後,你應該會是開心地離開! A 23/11 (一) 7:15pm- 8:45pm 九龍佐敦柯士甸道童軍中心1030室 B 27/11 (五) 7:15pm- 8:45pm 九龍佐敦柯士甸道童軍中心1030室 C 2/12 (三) 7:15pm- 8:45pm 銅鑼灣禮頓道33-35號第一商業大廈301室 D 9/12 (三) 7:15pm- 8:45pm 銅鑼灣禮頓道33-35號第一商業大廈601室 E 16/12 (三) 7:15pm- 8:45pm 九龍佐敦柯士甸道童軍中心1114室 想報名就打2891 0920俾金小姐啦!!

忙碌的一天...完成了

我今日其實無咩做過嘢! 瞓到10點半先起身,寫好星期一份稿,跟住去咗個私人聚會講咗個講座,轉頭就返番銅鑼灣出席另一個減肚腩講座,但係唔知點解,今日返到屋企後...唔係,應該係搭緊車期間,我已經覺得自己粒電著哂紅燈,都幾嚴重,我諗今個星期六都要好好叉電。 雖然真係好鬼...累,但係今日又好想同大家分享下自己食咗D咩,D戰友成日見完我之後都會問:今日想出街食飯,有咩好介紹,其實遠比我剛剛入行嘅時候,而家係外面食嘢,已經多咗好多選擇,好啦...既然大家當咗哩度係減磅戰友嘅Open Rice,我今日就介紹我哩間飯堂,佢就係x翠拉麵,(我唔係想x個字,但係諗唔到個字點打,體諒下,平日有車厘子做打手),我覺得佢個拉麵唔錯,我今日揀咗紅燒牛肉拉麵,有時我鐘意食嫩雞燴麵,仲有個清燉雞湯麵都適合戰友啦!我今晚同朋友share,所以仲可以食醉雞,大家戰友可以試下,減磅唔係淨係屋企食飯,間中出下街都要啦!話時話,有無發覺我近排無教大家自己煮嘢食呢?原因好簡單,我日日都唔係屋企食,下個禮拜啦!因為tvb嘅食譜又要趕趕趕喇!唔得喇又要叉電又要同milo做運動,byebye!!

度稿的日子

死啦~今日用咗咁多腦汁,D白色嘅頭髮一定快高長大。 明天係好忙碌的一天,一日竟然有兩場講座,最大件事係其中一個講座係一間私人公司邀請嘅,所以我安排咗一個為佢哋行業度身訂造嘅新題目,咁咪又要度新稿囉~你知啦!我個人古靈精怪,都想個講座生動D,唔想大家釣魚,所以每次都做好多資料搜集,如果唔係自己係度講笑,大家又唔識笑,感覺好難受架! 係呀!俾個最新消息大家,個減肚腩講座會進入最後倒數階段,唔計星期五同下星期一那場,會係最後4場喇~如果你或者朋友未聽過,就快D報名啦!講住咁多先,我要努力背書,準備明天的挑戰,大家一齊加油啦!

同事們的心血...與你們分享

每一日,我公司一班營養師,都希望透過唔同渠道將營養資訊帶俾大家,除咗我嘅專欄、電台節目外,我哋每一季都會為大家準備一份會員通訊,將一D大家都好想知嘅資訊帶俾你哋! 秋季刊出咗喇!(雖然哩幾日唔似秋天)如果都想攞一份,麻煩大家SEND一個電郵去 nutsdiary@gmail.com ,註明索取『營營樂樂』,咁樣我d左右手就會於兩星期內會電郵俾大家,環保d唔會再郵寄喇! 索取會訊的截止日期係11月30日!

攝氏10.7度...跑步中

運動前的我 攝氏10.7度,夾著呼呼北風,想阻我...無咁易!你今晚做咗咩運動呢? 我就繼續...步照跑,又完成3公里! 這個溫度下跑步,有咩感覺,只可以用一個字形容...爽...點爽法好難形容俾你哋聽,自己去跑下你就會明,有D類似我有一次,係零下10度下著雪時,在韓國浸露天溫泉嘅感覺囉,外面很凍,裡面熱騰騰!唉!都係自己Feel 吓啦!不過想提一提大家,在寒冷天氣下做運動,需更加注意熱身,如果唔係,好易受傷。 另外,我今日做了一件大家一定會做的事,就係打邊爐! 放工前,打電話返屋企,爸爸就話不如打邊爐,我哩個邊爐王兼菇王一定舉腳贊成啦!所以今日食咗佢哋!其實仲有田雞,不過我知有d朋友好驚田雞,所以唔打算放張相出尼! 好好味的清遠雞肉片 靚菜...唐生菜也 有無發覺無五穀呢?我係飯桶,所以其實仲有碗飯,雖然凍...唔好食咁多呀!

這是今天的成果!

都唔知點解,見一日戰友都無今日咁辛苦,攪咩呢! 咪就係影相囉!對一個有鏡頭恐懼症嘅人尼講,影相絕對係好苦,我今朝好奇怪咁8點鐘自然醒,好似小學生去旅行咁,怕D咩,咪因為要影相囉!影咗3個鐘,成個人硬哂,總之就怕怕啦! 好彩今朝食咗一個好滿足嘅早餐,減磅戰友都食得,哩間店係重慶大廈附近開咗間分店,我就食咗客細細粒通粉,仲有好好味嘅多士,剛好3份五穀+1份肉,諗唔到食咩就試下啦! 今晚最滿足嘅收穫,就係同好多朋友一齊分享減磅心得,多謝今晚一班好投入的觀眾,我同Candy兩位講者都好滿足,更多謝你們的讚賞及那一陣熱烈的掌聲,我同Candy完全收到,但這是不足夠的,我們希望見到你哋真係將我哋所講的tips坐言起行,真正擁有快樂同健康,這個講座才算成功!今個星期很忙,還有兩場,希望我週末叉嘅電可以用多幾日啦!

Nutsdiary on Facebook

攪咗幾日,可以叫做完成了,實在太多戰友問我有無Facebook,所以就完成了這個專頁。 有咩用,好簡單,因為大家成日想要Moo moo嘅靚相,所以我就開咗本相簿,大家就可以入去download啦!除咗moo之外,為咗大家係減磅過程食得開心d,所以我會將d簡單食譜,減磅美食嘅沙龍都會放在相簿入面,當然唔少得我個講座嘅日程啦!不過,哩個blog依然係我同大家分享心得同我嘅心聲嘅地方,所以當我一update個blog,你係facebook都會知,咪唔駛成日refresh囉! 點樣可以睇到我個專頁,首先你要click右手面個facebook名片,入到我個專頁之後,無facebook戶口就要登記啦!有的話就要sign in,跟住你會見到個box寫住加入擁躉群/become a fans,click入去就ok哂!

今日...有佢陪

hea...咗一日,睇咗3本書,不過本本都睇咗一半,一本係inside steve's brain,仲有猶大商人筆記本的秘密,仲有當然係無咁serious嘅高木直子新作啦! 不過hea之中,好重要有佢哋陪,我今日左擁右抱,左面瞓住大毛,右面仲有米路,都唔知幾溫馨,但仲有佢... 新產品,都幾好味,減肥梗係食得啦!但由於我無磅係屋企,只可以話俾大家知1/7包=1份五穀,但無磅計唔到幾多條,佢減咗鹽,但都好好味,今日就係佢陪我睇書囉!點度買,馬莎囉!試下啦!

今日打算hea住睇書

知唔知咩叫做貓似主人型,你睇下moo個蠱惑樣,同我有幾分住架! 今日無咩計劃...原來無咩計劃個人會輕鬆好多,我諗我嘅hea功又邁進一大步。 最耐都未試過12點先起身,游咗個中午水仲要sauna咗,成個人精神哂!番屋企食咗噚晚介紹嘅烏冬就玩咗個相機一陣,當然要用大細毛試啦!俾大家睇下喇! 好...又有嘢想問,我今朝咁遲先起身,跟住又去咗做運動,你估我個早餐幾時食呢?另外,我究竟有無食咗嘢先去游水呢?睇咗相先...一邊睇一邊諗! 我d影相技術都有d進步...唔係應該話個枝鏡(定焦鏡)功能唔錯!1個人同佢哋影好困難架! 好開估,我飲咗杯奶,食咗隻香蕉,再飲咗1大杯水就去游水,返屋企食嘅係午餐,4點幾先當下午茶食番個早餐嘅份量囉! 係呀!細心嘅朋友,會留意到我放咗個Facebook嘅名片係個blog,如果想睇下大細毛寫真,仲有...(都係賣個關子先),就成為我嘅fans,最簡單啫,click 一 click右手面個facebook box,入咗去之後係我嘅facebook專頁,當然要有facebook account 啦! 跟住click成為擁躉/become a fans就ok哂!自己玩啦!我仲學緊,不過要睇書喇!Byebye!

烏冬篇

哩碗就係我最愛嘅稻庭烏冬,有時都唔駛餐餐食飯嘅! 我個人都幾奇怪,對D食物嘅製作過程都幾好奇,唔知係咪職業病呢!成日都好想知D嘢點做出尼。日本就特別多這種活動,很多食物製造廠也有所謂的見學,即係參觀活動,我覺得幾有趣吖!上次去年日本就參觀咗醬油製造,上上次又去咗拉麵的見學,好特別架! 今日行行下街,去到一間烏冬店,見到D廚師做烏冬,都吸引我睇咗一陣,好多朋友都知我好鍾意食烏冬,但係讚岐同稻庭,我就較愛後者,烏冬作為減磅食材都唔錯架,有時我覺得食得太肥膩嘅時候,我都會煮1個小烏冬+冬菇金菇同娃娃菜+3粒魚蛋/黑椒牛丸,咁就又飽又滿足啦!不過最重要就係加1隻指天椒,嘩!正哂! 這個製麵機我讀書年代都玩過...好過癮架...

由夏天變冬天

我記得以前讀書,我講細細個嘅時候呀,教科書話香港係一個四季分明嘅地方,有春夏秋冬,但係今時今日,我諗個地球病得好緊要,一日嘅溫差可以有12度,這種改變係提緊大家環保D啦!仲提緊大家要保重身體,因為咁嘅溫差改變,好容易中招,所以一定要鞏固下D抵抗力! 所以今日想提下大家,揀下維他命C豐富嘅生果同菜,唔駛多架,足夠就得,有好多朋友都以為剩係水果例如:橙呀、奇異果、木瓜先有維他命C,但有D蔬菜都有架,仲好勁添! 佢咪係我最鐘意嘅三色椒囉!但佢哋三個D維他命C都好大分別架! 以一個大碼三色椒計算: 綠色=132毫克維他命C 紅色=209毫克維他命C 黃色=341毫克維他命C 記得煮佢要用少D水,因為D維他命C係水溶性,好易受傷架!同我把聲一樣!!點解? 唉!我今日無咩講嘢,維持咗1日,攪咩!咪講得太多嘢囉!噚日講完個講座就覺得把聲怪怪地,中醫大人俾咗仙丹我,我諗都係要搵Miss Chan Chan教下我用丹田氣講嘢先得,如果唔係遲d要用畫畫寫字溝通呀!

選擇障礙

今次,我終於明白咩叫選擇障礙... 一個星期前,我同大家玩咗個心理測驗,問大家生日嘅時候會揀咩餅?身邊的朋友都異口同聲話,原來都唔知點揀好。我都好明白,有時無得揀又唔高興,但當有得揀就仲煩,但當選擇多到成100種嘅時候,更加唔知點算?! 有睇我個Blog嘅朋友應該知道,一個月前,我係日本睇中咗一部單鏡反光機,但最後都無買,番到香港,d戰友紛紛問我,吓?!無買呀!做咩唔買呀!個相機咁cute!!唉!你哋真係好鬼衰,明明好辛苦先放棄咗,而家又攪到我囉囉孿! 好彩!我有個好好好好人嘅戰友係日本啫,仲咁啱有個friend月尾會去日本,哩d係咪叫緣份呢!但第二個問題又難到我,成100種配搭,我而家有好嚴重嘅選擇障礙,點攪呢! 個網頁好好玩,幫你襯色慢慢揀,幫下手啦! www.camera-pentax.jp/k-x/#/simulator/120101

我的減肥餐

晨咁早俾人肉鬧鐘嘈醒:大毛呀! 8點半咋,跟我咁耐你連主人幾點起身都唔知?好彩,一早決定今朝去游水,如果唔係...你今晚就知!!! 游完45分鐘早水,食咗哩個早餐,係呀!提下大家,之前同大家講過,係連鎖咖啡店有Skimmilk同代糖供應,所以減肥都飲得,但提提大家,最好叫店員幫你落代糖唔好自己落,特別係飲latte嘅朋友,因為latte有層泡泡,落咗先d甜味會均勻d。 見完上半日嘅戰友,就有午餐會議,食咗佢,都好好味,滿足...跟住飛去同出版社開會,傾下下年嘅書,唉!!又開始過俾人威迫嘅生活喇! 唔講喇!又要出發去講座會場!

Plan B

激死人喇!原本諗住今晚跑3公里減下肥,點知,天有不測之風雲,無端端落大雨,不過幾滴雨唔會阻我嘅減肥計劃,決定用Plan B,今晚一於早D瞓,明天一早起身做魚,游多幾個塘,仲唔瘦! 你哋一定會話,你仲有咩可以減呢?已經好FIT...唔係...係好瘦!唉!你哋有所不知喇!下個星期,公司影全家福,所以全公司瀰漫著強烈嘅減肥風,個個同事又話要跟D咩咩餐單咁,無辦法啦!都唔知點解D鏡頭好黑人僧,明明係110磅就影到人變120磅,我就仲慘,出咗名唔上鏡,最怕就係個鏡頭,次次都影到我...唉!唔講喇,大家明啦!其實我真人比較好...睇:)大家一齊努力啦! 又無得去跑步,唯有陪下隻傻毛睇電視啦!吖!係呀!知唔知一邊睇電視一邊做咩好???唔係食卡樂C,係一邊做運動呀!因為時間會快D過嘛!唔好掛住睇我個Blog,要做運動喇!下次見我嘅時候,唔好同我講星期三晚因為落雨無做運動,我唔收貨傢!!!你一定有Plan B嘅!世上無難事,只怕有心人呀!

Inspiration...

剛完成講座,有點餓,吃了這個作為晚餐,雲吞麵。或者因為太肚餓,碗麵特別好吃。 有時候,我經常同減磅戰友講:在減磅過程中,雲吞水餃並不是最理想的選擇,嚴格地說,若將食物分為紅黃綠三個等級,她最多只是黃色食物,點解,若果你仔細留意,雲吞內,有2-3成的肉類是肥豬肉,所以不能勝任最理想的減磅拍檔囉! 但係今日唔係淨係想同大家講粒雲吞,而係想同大家分享一段片,昨天沒有寫blog,就是因為他,睇完之後,我深信你會有一番體會,本來想將youtube條片放係個blog,但做不來,有時間上youtube打man with no legs and arms-inspirating story,看完之後,你或許會認同,在這個世界,沒有事是不可能的,問題是你容許這事變成可能嗎?希望看完後,你同我一樣,有這種啟發吧!共勉之!!

唔記得同大家講

忙到差D唔記得同大家講,星期四係銅鑼灣區有一個降膽固醇降血壓嘅講座,當然係免費啦!有時間就拖男帶女上尼聽啦!要留位,電話係2891 0920金美小姐,時間晚上7:15-8:45係禮頓道33-35號第一商業大廈501室。到時見啦!

續...

睇完今日個專欄,你好期待嘅,係那個內服的美顏保濕食譜,定係想知我個貪靚旅伴,行咗唔知幾多間藥店搵嘅外用化妝品叫咩名呢???? 老實講,一定要雙管齊下嘅,當然若果你天生麗質就更好啦!好似我咁...hehehehe! 講咗內服先啦!顯得好似比較重要!!今日做一個番茄豆腐肉片湯飯(二人份量)。 準備好材料先啦! 番茄兩大個(切件) 肉片160克(用少許豉油,鹽,生粉同胡椒粉醃好先) 清雞湯125毫升 豆腐1磚(切細件啦!) 白飯兩碗 做法: 1. 先將D肉片同番茄炒好先,記住落1-2茶匙油,咁先有脂肪酸同維他命E架,而且維他命A會吸收得更好, 2.炒完之後加清雞湯同水約2杯,最後加豆腐,大火煲約20分鐘, 3.跟住要加飯,做成湯飯,OK哂! 4.最好有一個維他命C好高嘅飯後果啦!即係士多啤梨呀,奇異果呀,木瓜呀等等啦!FINISHED... 我諗大家好心急想知咩牌子化妝品咁緊要啦!日本朋友話好多人都讚,叫做CANMAKE,最緊要係好平囉...實不相瞞吖,真係好正,如果唔係我一定唔會同大家講,另外,仲有好介紹,下次去日本,記住記住買埋哩枝SPRAY,日本朋友又話每個日本人,無論男男女女,一定有一枝看門口架!不過講樣好激氣嘅嘢俾大家知吖,上個禮拜,我無意間行過Citysuper,俾我發現竟然有那個化妝品牌子,等我仲係日本行咗幾條街幫個friend搵!不過未見到枝SPRAY嘅蹤影!見到唔該話我知! 最後,都係個句啦!飲多D水,皮膚就會健康D啦!係咁先,好眼瞓喇!

與飛行機的約會

你哋今日去咗邊呢??我就去咗哩度! 咪係政府飛行服務隊個開放日囉,但係醉翁之意不在酒,在乎佢個基地傍邊嘅機場跑道,哈哈!!!咁就可以俾我近距離同D鐵鳥接觸囉,所以影咗好多相,同大家分享下先! 影完飛機之後,仲有佢,咸蛋黃1個,但係佢唔會令大家膽固醇高嘅,唔駛擔心,但係唔知大家覺得張相似日出定日落呢??其實我覺得似日出,你認為呢????

蟹宴+朋友牛一+預祝毛毛生日

噚晚,很高興,簡直係一次過完成3個任務...因為咁,屋企迫滿咗20個幾朋友。 又係朋友仔生日,仲有預祝愛貓毛毛兩歲生日,但我相信主角應該係佢... 不過噚晚最精彩嘅活動,應該係哩個遊戲,真係超超超好玩,玩到我喊哂!開Party真係必備,玩完包你興奮到瞓唔著囉! 不如同大家玩下吖,你估下我畫緊咩?估地名...(註:我係瞇埋眼畫架!!!!) 俾24小時大家估,明天開估!