營養師黃凱詩的生活點滴

2009年12月31日星期四

Happy Two Thousand and Ten...

一年又過喇! 係一年就快開始嘅時候,你有無計劃下2010呢! 如果未,就幫你計劃下啦! 2010年第一個願望,就係要同大肚腩呀...大碼衫呀...講Bye Bye,仲要戒咗句口頭禪,即係:『食埋哩餐先減囉!』明白啦!

好啦! 見2009年最後一日,畫咗幅畫送俾大家,Happy Two Thousand and Ten!



2009年12月30日星期三

肚腩...非減不可

個廣告有無令你嚇咗一跳呢?你無呀?但係我就有啦!睇完即刻笑咗足足3分鐘,好耐之前,我睇過一篇報導,話笑多D可以令一個人瘦,係咪真都好啦~成日笑又開開心心可以令一個人長壽,所以Keep住笑啦!

休息..或者叫叉電啦,都已經半個月,係時候同大家見面喇! Mark住d日期,俾個2010年嘅新年瘦身成功嘅願望俾自己啦! 個講座內容有八成係新嘅,大家一齊玩番晚啦!

A) 6/1 (三)7:15-8:45pm銅鑼灣中央圖書館地下1號活動室
B) 12/1 (二)7:15-8:45pm佐敦柯士甸道童軍中心1030室
C) 14/1 (四)7:15-8:45pm銅鑼灣中央圖書館地下1號活動室
D) 18/1 (一)7:15-8:45pm佐敦柯士甸道童軍中心1030室
記得呀!報名就有希望,咩希望?自己諗啦! 2891 0920 搵金美靚女啦!

另一hea點...

兩日無寫Blog,有D手痕,原先諗住有D疲倦,想早D瞓,但係都係敵唔過Blog嘅威力,好啦~就分享下這兩天的傑作啦!

相片係咪好靚呢?近排去街,都會帶新玩具一齊去,見倒咩都影,這兩天,過大海教了兩堂書,放學之後,就獨個兒周圍逛,好relax架,我都好鍾意澳門,因為我係葡國建築嘅lovers,所以特別喜愛這個地方。今次揀咗個好古式古鄉嘅地方飲咖啡,這裡是聖地牙哥古堡酒店,我坐咗成個幾鍾,下次去澳門又多一個好去處啦!

其實佢係一間5星級酒店,有D剛剛結婚嘅朋友,暫時無時間到外地,這裡是很浪漫的選擇呢!澳門其實都有很多好值得遊覽嘅地方。睇下我幾Relax,簡直係另一hea點!

去澳門又點少得食呢?雖然我知道大家戰友們正積極減肥,我唔係好應該引誘大家,但係我就係知大家俾我訓練有素,應該知如果真係要去嘅話,要點選擇,老實講,去旅行,又唔可以咩都唔食,好似我咁,好彩喉嚨痛已剩下3級的痛,已經可以正常食嘢,這家餐廳我必去的,好多人也認識,叫海灣餐廳,裝修好靚架,你睇下...係咪好聖誕呢?


我最鍾意係哩堆唔駛$$嘅豬仔包,都唔明點解澳門D包咁好味,我次次都食2-3個架!



雖然我唔係好酒之徒,但這一瓶酒,我係唔會錯過,佢叫Sangrio,係葡萄牙特色cocktail,真係好正,因為只有係澳門先有人做得咁出色,所以點可以錯過吖!


仲有佢,白烚菜,唔知大家同唔同意,如果d菜夠甜,白烚已經好得,如果炒的話,仲浪費咗d菜!

最後仲行咗去my favourite嘅澳門酒店,MGM,因為我知道Christmas嘅主題係熊貓,所以去咗影相,都幾得意啦!

如果放假悶悶地,去澳門行下啦!無香港咁急促,去hea都唔錯啦!

2009年12月27日星期日

Memories from party...

吃過多少聖誕餐,開過多少次派對呢?心情該是時候重拾了,因為假期將要暫時結束,說是暫時,因為不到幾天,2009年又是時候說再見,也意味著,2010年及另一個假期又要開始。
當一項事情將要終結的時候,你會想起過去,過去數天的假期,你做過什麼呢?又或者,過去的361天,你又做了什麼,為工作忙,你仍記起你的生命,除了工作,除了一班與你狂歡的朋友外,還有你的家人嗎?過去的361天,你又有幾天與他們一起,講起你的種種呢?一個電話,一句簡單的問候,是何其重要呢?每年,這個時候,總會令我想起...
講完喇!轉個話題,喂!你哋又點呢?開過多少個Party呢?除了收拾心情返工外,重要重拾那顆減磅的心,又是上戰場的時候了,因為我深信,你們不會像我,開了個健康party派對。所以明天是時候--全包宴!!!
唔知從幾時開始,無論親戚朋友開這些派對,都是由我一手包辦的,其實也是好事,最起碼大家不會對我準備的健康食物抗拒吧!曾想過找1個私人地方,由我一手包辦開一個Fans Gathering,但遲一點吧!相信是可行的。
這次自製的食物不太多,畢竟還是半個病人吧!做了一個超勁多菇菇的白汁天使麵,另外還有芝士呀...藍青口、沙律等等,相信朋友仔也吃得開心。
Party不可少的,當然還有遊戲,下面那個,似唔似藝術品呢?非也...是叠高櫈仔遊戲,這是激戰後的結果
當然還有抽獎活動啦!
我好好彩,竟然抽到相架...相架?係咪聽到都怕怕呢?我個叫電子相架,感覺完全不一樣,大滿足,可放大細毛相。

明早要起程過大海工作,要早點睡了,byebye!!

2009年12月26日星期六

食物+服務=優質食肆


唔知大家有無同感,就算一間食肆嘅食物有幾好食,若果啲服務員態度麻麻,間餐廳嘅整體評分都即時減分。
香港一般餐廳都有收服務費,成10%,有時真係唔覺得俾過D咩服務,相反我記得係日本,係無任何所謂服務費,因為令你有賓至如歸嘅感覺,係每一家餐廳該給客人的感覺嘛,你說對不對,點解仲要有貼士or服務費呢?我好記得第一次自己係日本食飯,結帳時習慣俾tips,個日本朋友仲追出來俾番d零錢我!

今個聖誕假,我食嘅食物一般都比較腍,淡味d,無辦法啦,喉嚨還有8級的痛,係你無睇錯,係8級,比昨天又少了一級,唉!咁計落,咪要2010年1月2日先好番哂!我明早約了朋友食bunch buffet,點算?咁好唔抵嘛!

今日午餐去咗皇府,這家店都好適合戰友食,有幾多選擇,我揀咗瀨粉,貪佢滑d快d閃入個喉嚨嘛,病人係咁架喇!

2009年12月25日星期五

黃詩詩@舞台劇090110

唔好誤會,演舞台劇者,非黃詩詩也...

而係我的朋友仔兼好拍檔蔡煇煇,老友鬼鬼再戰舞台,點都要支持下。個舞台劇叫做黐膠花園,講咩?唔係好知,總知如果你仲係年輕人,就唔可以錯過,我都約咗陳思思1月9日一齊去支持佢。

Merry Christmas from Moo and Milo

Hahahahahaha! You Better watch out... watch out D 咩呢?

唔好食得咁過份呀?如果唔係日日"全包宴"都瘦唔番嘅時候,唔好呱呱嘈呀!!!!你哋知啦!仲有星期六同星期日...唔係唔係...放緊假大家都唔係好知星期幾,係仲有26號同27號俾你食,唔好咁放縱呀!

都知大家好掛住Milo同Moo,佢哋話同大家講聖誕快樂,希望大家開開心心啦!

路人甲影路人乙...

好鍾意這張相...因為那個感覺,酷似路人甲,在人來人往的街道上,一個美少女靜悄悄的坐下,跟住仲有我這個路人乙將其影低。

唔知大家仲記唔記得我兩個月前係日本,投訴見唔到原裝正版嘅紅色東京鐵塔,最終,竟然俾我係銅鑼灣見到!


明天大家有咩節目呢?我就打算同個玩具周圍去影相喇! Good Night!!

2009年12月24日星期四

I am back...


哈哈哈哈!是否等得叫苦呢?

其實我只是康復了7成,唯一未痊癒的地方就是我最想快些痊癒的喉嚨...現在的我腦袋異常清醒,但喉嚨是十級的痛,什麼美食在我面前出現,我也提不起興趣,千萬別叫我多飲水,現在喝水就像酷刑,醫生給我那堆藥丸,粒粒像杏仁般大,叫我怎能吞下,唉!只能用一個字形容現況...苦!!

不過我都幾識得苦中作樂架,有幾快樂,首先我這幾天就好似偷咗2日半假期一樣,從未試過同張床咁Friend,不過最開心就係大細毛,佢哋好有性架,見我病,就乖乖地坐係我身邊陪我,不過最過癮就係俾我發現一樣嘢,原來我無寫blog,就會輪到你哋係我個blog寫嘢...哈哈...咁我寫少d,你哋咪會寫多d囉!!!!

我最唔明白嘅係,點解d病毒總係咁可惡,次次都係襲擊我條聲帶或者喉嚨,好彩講座收爐,電台節目又錄咗音,都算係咁喇!

今日係平安夜,即silent night啦...我相信今晚係真係silent night...如無必要,喉嚨仍是休息中,無咩送俾大家,只有一包勁勁勁薑嘅薑茶,比之前果包更薑,又係citysuper買,on your mark...set...go...好快d去喇,網友經驗,手快有手慢無!

還有...你們的祝福,實在太感動了,我決定......送多3個大細毛月曆啦,抽獎方法,等下啦!!

Merry Christmas :>

2009年12月21日星期一

休息中...

是日病魔來襲,撐過上半天,原來還是不行,還是與大小毛一同抱頭大睡,希望明天會更好啦!

海綿豆腐...冰冰冰豆腐也!

海綿有咩特質,內有小孔,吸力超強。
咁豆腐又點可以變成海錦狀,原來好簡單。

準備好材料同器皿先,一盒豆腐,仲有一個有兩層的食物盒。將件豆腐切開先啦!自己睇就明!
跟住放入一個食物器皿裡面,最好有兩層,因為之後溶雪時可容易流走水份。
之後就進入最重要的環節,急凍也,將豆腐放入冰箱,我就放咗一晚,嚿豆腐入咗冰箱之後,佢因為凍親,所以就將裡面的構造破壞哂,形成網狀的小孔。
之後就攞番出尼係室溫解凍約一小時,又或者我尼嚿係之後再放入雪櫃,唔係冰箱呀...大約半日,等嚿豆腐入面嘅冰溶雪,就會變成咁嘅樣,成件白雪雪海綿咁,但記住,佢吸力超強,千奇唔好同肥牛一齊烚,如果唔係,你知會有咩後果啦~
係咪有D似高級火鍋店嘅水準呢?

燒烤大會實錄

唔知大家有無發覺,原來意志力可以戰勝感冒...

點解咁講,原因係幾日前,我已經發覺自己有D作病,所以狂隊三冬茶,日日奇蹟地瞓足8個鐘,仲做埋幪面超人,以防交叉感染,做咁多措施,一來想挑戰下自己的抵抗力,二來約咗大家去BBQ,病咗點算,點知個BBQ一完咗,咩嘢咳嗽呀...失聲呀...鼻水呀...頭痛呀,成個家族一次過尼探你,所以噚晚就罕有地無Update個blog囉,瞓咗半日。有時D嘢真係好奇怪,好日都唔病,講座聖誕收爐先發哂出尼!
好喇!講番噚日先,說實話,有點像小學生去旅行的感覺,你哋睇下張相就會明。(去相...)黃巴士!
另外,為咗令大家玩得開心D,我仲自己揀咗8份禮物俾大家,當然要夠幸運先有禮物啦! 知唔知我買咗D咩呢?我揀嘅禮物,一定係食得或者好實用嘅,首先我知大家聖誕節交換禮物,可能有機會會收到水杯,所以我決定同大家襯埋一套,所以有1個很可愛的甲蟲杯蓋同1個Bear bear熊杯墊,另外就係D戰友都食得嘅零食...
要健康咁BBQ,一定要有尼一袋調味料,係燒烤8寶,試過嘅戰友都讚架!
尼班朋友烤咩呢?大眼雞呀...我食咗3個紫心番薯呀!
見大家咁緊張,唔通中六合彩,原來玩Bingo啫!

一個活動,又點少得尼張相,好多謝大家嘅參與,只要大家再想玩,我都會再安排,經一事長一智,下次可以同多D朋友一齊玩。我記得細細個阿媽成日話唔好玩得咁顛,如果唔係小朋友會發夢或者病,哈...唔通我仲係小朋友,所以就病咗喇!

2009年12月18日星期五

保護自己,免受傷害

非常感謝大家對我嘅關心,自從果日飲咗鼎鼎大名嘅三冬茶之後,已經無咩事喇!不過好多戰友會見到我變咗幪面超人,全因為我哩一超叫做『保護自己,免受傷害!』無辦法啦! 流感高峰期,我一日又見咁多人,以免交叉感染,所以都係做好安全措施啫!

好喇好喇!!等咗咁耐,明天就係BBQ Party,頭先去咗sogo買咗好多又好味又健康嘅調味料,大家明天有口福了! 好...明天見!

全身暖哂...仲好過雞仔嘜


12度的氣溫,令人想起一杯熱飲,放在掌心,倍添暖意,但是...阿華田、好立克、杏霜;等等等等,全部均是超高熱能的飲品,隨便係餐間添飲,如同添多碗飯!咁點呀!

唔駛驚,有我係度,問題必能解決,今日行開citysuper,揀咗佢,當然自己做咗白老鼠先啦!飲咗1杯,真係全身暖哂,好過雞仔嘜囉!最重要係無糖,濃郁嘅薑味,好正架!30多元有20包,都好抵啦!你知啦!citysuper 嘅產品,好少可以用個抵字形容架!

2009年12月17日星期四

Thoughts after my Last Show in 2009...


今天發生的事,實在有點怪怪的...

6時30分,我習慣預早一點到達講座場地,讓自己平伏一下心情,重溫一次將要說的種種,或許你會說,已舉行了250場,還要重溫...我告訴你,當你以為自己已對每一句講詞記得滾瓜爛熟時,其實是最危險的,因為這代表你開始輕視這次...那些腦海空白一片的景象,就會發生,所以Rehersal是十分重要的。
到達後,當然是set up器材,我如常的準備電腦及投影機,當我以為一切順利之際,突然我發現投影機的電線不翼而飛,那一刻,當然是不知所措,難道最後一場講座真的要變成楝篤講,什麼螢光幕的visual效果也沒有...就在這一刻,我發現另一部投影機瑟縮在panel房內,原來天無絕人之路,實在太奇妙了!

最戲劇性的是,會場原先只安排60個座位,由於我們overbook了,所以預計部份朋友只有企位,但最奇怪是,會場內突然多了10張櫈出來,剛剛好...
今晚,你們令我太感動了,已是第250次,仍有你們的參與,你們的投入,就連不是預先安排的笑位,你們也開懷地笑,你們給我的支持鼓勵,我全部聽到亦能看見。

朋友告訴我,講座其實不需變更內容,繼續說下去,問題該不大,現在的已是不錯!沒錯,我也同意,因為人有時候很害怕改變,因為改變會令人增添壓力。但人畢竟也需要進步,老實說,壓力真的很大,要做得比以前好,那種無形的壓力,不能用筆墨形容,但我相信壓力是一股推動力,再加上你們在背後的支持,我深信,我會做得更好!

2009年12月16日星期三

燒粟米前攻略

話時話,我唔係自己讚自己,但我真係覺得自己準過天文台囉!兩個幾禮拜前預早知道星期六會凍,叫定大家圍全住個火爐BBQ,真係犀利。

好多戰友同我講,星期六要造冬尼唔到,問我幾時再攪?! 講真,我個人鍾意心血來潮玩即興,搵日啦啦啦啦啦!!!其實而家仲有5個名額啦!星期六...無節目...就陪下我啦!

適逢係聖誕節,點少得聖誕老人派禮物呢?所以當日有遊戲玩,D禮物係我揀架,算係咁啦!

不過記住,星期五或者星期日,營養師應該幫戰友們安排了特別嘅餐單,另外記住俾多D心機,努力D做運動,星期六玩得開心D啦!

仲有仲有,張相裡面個玩具係咪好襯BBQ嘅主題呢?個森林家族購於台北,相中人好明顯係我啦!星期六見!

原來真係會小氣


今日剛剛同個戰友講開感冒嘅問題,我仲話:今年都幾好,總算無咩病過,點知...講完都唔夠3個鐘,就開始頭痛,又有D疲倦嘅感覺,唉!哩D係咪叫小氣,下次講完,都係搵嚿木Touch下!

嗱嗱淋飲杯三冬茶感冒配方先,經驗話我知而家同大細毛一齊大覺瞓,明天就無哂事!早抖!喂喂!明天著多件衫呀!同自己講先!

2009年12月15日星期二

當內置羽絨失靈之後


今日唔打算同大家講飲講食,打算教大家掃平貨。

係邊?當然唔係去工展會啦!尼D師奶仔掃平貨嘅問題,你當然問我隻右手師奶金啦!! 我今日打算教大家買衫。

有鑑於香港個唔係太準確嘅天文台話星期三會凍,而我又知好多戰友減咗磅,脂肪少咗令內置羽絨失靈,所以見到件好正嘅羽絨梗要介紹俾大家啦! 有幾正,你去到一攞上手就完全明白哂! 超超超超超超輕,最重要係399咋! 真係信不信由你!

老實講我知大家可能一屋都係羽絨,但係尼件....簡直千奇唔錯過得囉~唔買都去睇下,包你難忘~話時話真係手快有手慢無,特別係D好大路嘅黑色...灰色...卡奇色咁...uniqlo呀!自己去睇啦!唔好揀錯,有1個款係超輕!!

戰友們,天氣先生話Temperature is Falling,小心保暖呀!

2009年12月14日星期一

聞到都肥兩磅!

去完台灣,都未有時間講吓個Trip,今次去台灣,俾咗一個好濃烈嘅返鄉下(即係日本啦)嘅感覺俾我,有時驟眼睇,仲以為自己去咗日本,點解?周圍都係mos burger同mister donut,仲有afternoon tea,小街又有好特色嘅coffee shop,週末去hea下,都不失為幾好嘅選擇。最重要係台灣朋友真係好好,好有禮貌。

但係台灣最大嘅問題就係樣樣食物都肥,除咗今日係專欄同大家講嘅珍珠奶茶之外,仲有尼個地方...

你知啦!有D唔怕肥嘅損友係都要食鳳梨酥,就唯有幫佢買啦!嘩!一入到間舖頭,果一陣油味都唔知幾勁,好似聞到都肥咁,著緊件衫返到酒店都有牛油味,佢(即係唔怕肥嘅Friend)原本話要20個鳳梨酥,最終我只係散買咗5個俾佢,佢仲話我孤寒,喂!你自己睇下個營養標籤啦!1個已經係300卡,仲要有2茶匙油,仲有d糖呢?成碗半飯嘅熱量,做好人仲俾人話,肥咗唔好呱呱嘈又話要減肥呀!!!!!


哈哈!今日個專欄講果杯『完美曲線』就係佢,差d攪到我老貓燒鬚呀!

糯米香茶的誘惑

唔知大家有無發覺,當你去一間可以俾你稱為飯堂嘅食店食飯時,你都會好自然咁再次再次又再次去翻閱個好熟悉嘅餐牌,但係再睇咗幾次之後,最終都係叫番果樣...

其實我就係一個咁悶蛋嘅人,可以成日食同一樣食物都得,哩間食店,絕對係我的假日飯堂,想介紹好耐,但成日唔記得,佢叫咩名,自己睇啦! 係連城廣場,即新城市一期沙田港鐵站樓上,好鍾意尼碗,皮蛋芫茜魚片米線,最重要係個糯米香茶,好特別好好味,講起都想食,最重要係我仲可以加辣,好yummy...

這兩天都很忙,未有時候帶個新玩具去影相,公司附近開了很多商場,聖誕裝飾也不錯,試了機,都不錯吖!

2009年12月12日星期六

9個臭皮匠>3個諸葛亮

人哋話:『3個臭皮匠勝過1個諸葛亮!』我哋有9個臭皮匠咪即係有3個諸葛亮囉!

淨係得我一個腦又點得呢?前幾日,公司同事一齊腦震盪,為下一年嘅新講座構思,我哋一齊哈哈笑咁,一邊食一邊傾囉! 成塊板都寫滿哂新點子,仲要加多張紙,經我哋D小宇宙研究過後,我哋決定... ...都係賣過關子先,總之大家都係認為,減磅鬥士仍然對瘦身減磅存在很多誤解,所以都唔會離開尼個題目,但裡面的細節,即係希望大家開心笑嘅部份,會180度變,唯一希望唔變嘅,都想大家輕輕鬆鬆,開開心心咁聽。

經過2年來這200多場講座後,我發現香港人一般太收埋自己,經常都放唔開,亦缺少了幽默感,有時見到大家想笑又唔笑個樣都好搞笑,做咩啫!好笑咪笑囉,開懷地笑,係放鬆心情嘅一部份,就當逗我開心囉,人哋安排咗個笑位你又唔識笑,我都好慘啫!

星期三那場,是那個舊講座的最後一場了,老實講,滿咗好耐,不過而家加設企位,如果你都想同我哋開心咁玩噃一晚,又唔介意企的話,就Call金美報名啦! 2891 0920呀!

2010年新一輯講座已預定了時間,如果你唔理我講咩都尼支持,都可以book咗先... ...

2010年1月6日(星期三)-晚上7:15-8:45-銅鑼灣中央圖書館地下1號活動室
2010年1月12日(星期二)-晚上7:15-8:45-佐敦柯士甸道童軍中心1030室

草蜢比食物更吸引

家有肥貓的貓奴們,你們的貓咪終於有望修身成功!

昨天,簡直是開心大發現,放工後,去寵物店Shopping,諗住揀件玩具俾大細毛,等佢哋多做運動,減下個肚腩,最後揀咗佢!一隻草蜢!



千奇唔知睇少隻草蜢,米路仔一見倒,異常興奮,我第一次目睹咩叫做咬住唔放,足足咬住15分鐘,驚死大毛搶佐,後來為咗測試吓佢點先肯放,我攞住包佢最鐘意嘅零食係佢面前揚來揚去,佢竟然繼續咬住唔放,於是再將引誘升級,俾1湯匙乾糧一試,依然唔肯放,唉!都好,件為食貓減肥有望喇!所以今日再用草蜢同佢係屋企狂跑,竟然跑咗10分鐘,milo好叻仔,應該可以減肥成功!

俾條片大家睇,等大家輕鬆過weekend啦!我今個星期就要努力閉關寫書喇!

video

今晚揀咗哩本書,Good Night!