跳至主要內容

文章

顯示從 10月, 2009 起發佈的文章

嘩鬼節祝大家樂而忘返

聰明人就會見到張相有D咩?嘩鬼節無咩送俾大家,送大家一隻好鬼Cute嘅阿Jack啦!

講座是免費的...但健康卻要自己爭取

你估下我剛才去咗邊,睇下張相,咁浪漫...燈黃色的街燈,隱隱約約,見唔見到有個鬼影呢? 開估喇! 再睇下第二張相,見我咁嘅裝扮,唔駛講都知去完跑步啦!剛才一落樓,係大堂撞到D鄰居,佢哋就話:黃小姐,咁Fit仲跑步??其實次次見倒鄰居呀...看更伯伯呀都係哩句開場白,但係如果唔係經常做運動,點可以成日食咁多嘢又咁fit,主要原因係要保持健康嘅生活習慣,運動當然係重要一步啦! 有d戰友會話運動好辛苦,老實講辛唔辛苦睇下你點衡量,我從來無講過減磅同運動係唔辛苦,但係這種辛苦只係短暫嘅,有朋友曾經同我講,你要現在短時間的辛苦定係將來的痛苦呢?我會選擇前者。 我主講嘅講座,轉眼間已是242場,曾經有好多朋友同我講,唔好開咁多啦!老實講我亦講咗好多次,係辛苦但值得,如果參加的朋友聽到你講嘅其中一句,即時令佢醒覺健康飲食的可貴,我已經好開心,我經常都會話,雖然講座係免費嘅,但如果你聽完後唔改變自己嘅習慣,健康唔會自己飛埋尼架!健康係要自己爭取的,願每位網友早日明白這個道理。 有時間就聽下講座啦...一次聽完我打動唔倒你要坐言起行不打緊,你可以聽第二三四次,只要你願意,總不希望改得太遲啦!當然如果你唔驚我個講座會悶親你的話! 6/11 (五) 銅鑼灣禮頓道第一商業大廈601室 10/11(二)佐敦柯士甸道童軍中心1030室 打電話28910920俾我隻右手金美留位啦!

遍地南瓜

東京街頭周圍都係南瓜 去完日本充電之後,我決定要慢慢學懂係適當時候休息同hea,希望可以成功...最少可以維持1個月咁多啦! hea完之後,第一個感覺係...暢快,暢快通常用來形容d咩呢??唔好諗衰嘢!我係講緊今日寫稿的時候嘅感覺,所以想第一時間同大家分享。噚日,唔知大家有無時間望下個天呢!我就係office望咗個天一陣,藍色天空,好靘,不過多咗d高樓大廈啫! 今日係公司食午餐果陣,竟然一邊睇八卦雜誌,平日我一定把握每一分鐘做嘢! 哈哈@@今日又成功咗一步,無辦法啦!離開咗成個禮拜,要update吓自己,如果唔係好容易同d戰友無話題點算! 點知俾我一邊揭,睇到一個護膚品廣告,個廣告話因為乾燥要保濕,所以品牌產品加入了脂肪酸、維他命A、維他命E,都講得好正確全部都係防止乾燥嘅營養素,弊就弊在哩D營養素要食落肚呢?! 所以想保濕,倒不如應下節,用1茶匙油煮個南瓜海鮮炒飯,再加1茶匙芝麻,仲保濕啦!不過最緊要就飲多D水啦!

認真...堅持,就是愛

今日真係好好.....好趕,晚上9點又完全一場講座之後,就變咗一枝箭,飛咗去睇9:50pm 嘅MJ THIS IS IT,等咗幾個月,終於到今日啦:> 睇完之後,心情有D奇怪,好開心但又好唔開心,開心嘅原因係,D Footage真係好精彩,你可以見倒佢對自己工作的堅持同熱誠,係值得每一個年輕人去學習,但同時,唔開心係MJ準備得咁辛苦,最終都唔可以將這一次最後的舞台演出帶俾每位支持佢嘅人,唉!難道生命中總有遺憾! 前幾日佢隻新碟出街,都等唔到返香港送,買了這隻日本版的,唯有繼續回味啦!今個週日,無論你係咪佢fans,這一位舞台王者的最後演出,值得你送張飛去戲院欣賞!

完滿的旅程

我絕對係一個完美主義者,點解?例如你哋平日成日見倒嘅專欄那份稿件,可能已經係我那星期寫的第二份甚至第三件稿,無辦法啦,覺得寫得唔好,又再寫過咁囉! 但當然,而家又都見得係好好囉,哈哈!所以,雖然昨晚太累,沒有時間post,諗諗下,雖然已經返咗香港,但個遊記寫咗咁多日,點可以無咗最後一天嘅行程呢? 昨天,食完個morning dog之後,就去咗搵佢哋...可愛的小貓,這個博物館,係一位畫家筆下的貓咪,佢畫到d貓好傳神,所以決定去拜訪下係河口湖的博物館。 都係講番個morning dog先,這家cafe,係我的摰愛,咖啡做得出色,而且個morning dog仲非常好食,有機會去日本,可以試下。 離開日本之前,食咗一份非常極之好味嘅壽司,真係超好味,不能不試。7天的東瀛遊,完滿結束,多謝收看。

雨後陽光

昨天落了一整天的雨,令今天的陽光更覺可愛,你們看...蔚藍天空,萬里無雲,難得的好天氣。 黃昏時的原宿街頭,天空真的很美。 這是今天的午餐,本來只係諗住食魚生,行過沙律吧,竟然俾D沙律叫住咗,一於殺你! 食飽飽之後,行下行下,俾我見到佢哋,其實上一次去完日本之後,我已經話過如無必要,唔好行入電器舖,點知今日隻腳好唔聽話行咗入去,好大件事係俾個見倒個可以自己配搭顏色的相機,唉!好吸引...點算! 今個trip最重要嘅任務,係見下我係日本的戰友,越洋同佢整型,瘦了30磅,今日在車站見到佢嘅時候,真係嚇了一跳,哈哈!今日戰友宴客,我享受了一頓最豐富最喜悅的晚餐! 香港的戰友,我要收拾行裝同心情喇!我回來了,等著見下叉飽電嘅我啦! 激死!個電腦病了,打完的東西都沒有了,這個blog,我花了1小時寫,細心d睇啦!

Cold,windy and rainy day

下雨天,攝氏14度的氣溫,特別易令人多愁善感,數年前,看過一部叫東京鐵塔的書籍,今天,第一次來到這裡,感觸特別多。 今天的東京鐵塔,與平日的不同,裝上藍色的小燈泡,令它添上一絲神秘,在觀光塔停了1小時多,喝了1杯咖啡,感覺不錯,東京鐵塔,我一定會再來。 很喜歡來日本的書局打書釘,或許喜歡看書吧!更欣賞他們的書刊設計,令人忍不住買下來,唉!又買了5本,希望行李不會超磅啦!很多戰友常問我,點解你咁鍾意日本,原因很簡單,我是一個不能在香港放鬆的人,這裡令我很放鬆,因為言語不通吧!另一個原因,這裡很靜,令我有更多空間思考,不竟我是一個胡思亂想的人吧!還有他們的要求及執著,就算看一張poster,一份很簡單的宣傳資料,食物裝飾,都很吸引,我認為人係應該有要求的,要進步的。在這裡看什麼,都令你很舒服。 有時候,他們的幽默感更會令你會心微笑,這張相攝於tokyu hands的鐘錶部,這是一個修理鐘錶的櫃檯,但是卻寫上時計的病院,更將鐘錶的每項問題,分為不同科目,例如:打磨就叫美容外科,電池修理就是消化系統科,看後,我笑足半個鐘,現在寫blog時,仍在大笑呢!其實大家生活壓力咁大,社會真係要有這些幽默感呢?

hea...hea tokyu tour day 4

箱雕刻之森藝術館的主角...太太購物狂 仲有一日假喎,唔知大家hea成點呢? 我就去咗一個戶外的藝術館,都好值得去,d雕塑好特別,有d仲好cute,我最鍾意係隻蛋...你哋睇下,日本人真係無蛋不歡,1..2..3..4數數手指,係日本hea咗4日,我竟然已經食咗6隻蛋,就連個雕塑都以蛋為題,係咪激死。 行行下見到佢哋兩個係草叢上hea...爽!! 仲有1pair小朋友,hea得幾開心hahaha! 這是今天的午餐,大家見唔見到,又有1隻蛋,唉!返公司真係要check下膽固醇?! 睇咗我個blog咁多日,有無發覺,撞鬼咩,去旅行都咁清淡,好戲在後頭嘛!你估吓我今晚食咩? 食菜?!唔係啩!係前菜啫!哩間串燒店好正架,次次去新宿我都會去,佢d串串,有好多蔬菜選擇,咁當然唔係淨菜啦!有片豬肉包住,好似金菇卷咁:>..yummy 有時想hea得開心d,有杯酒幫助下,hea的程度會滿分,不過戰友們就暫時唔好飲住喇!我幫你哋飲啦...enjoy 間串燒屋係新宿有好多分店,睇下就知,講住咁多先,明天最後一日假期,enjoy啦! bye...

製毒工場一日遊

最鍾意這隻哈囉咪咪,蠻可愛呢? 唔好誤會,製毒工場就係我今日遊覽的一站,大涌谷...硫黃蒸氣泉,點解叫佢做製毒工場,因為硫黃的味道,正正就是所謂的嗅蛋味... 哩隻黑溫泉蛋,相傳話食咗會延年益壽,但係個人覺得,1包蛋有6隻,而賞味期限只有兩日,如果食哂,肯定膽固醇高,所以最好都同人分享。 這是今天的午餐,昨天吃得太油膩了,今天吃了素...個蕎麥麵好好味,唔知大家仲記唔記得呢?我經常建議大家食蕎麥麵,點解??因為有一種叫蘆丁(Rutin)的抗氧化營養素,仲有纖維高好飽肚,所以我2點食完佢之後,飽到8點! 今日仲有一個強勁推介,低熱量蘋果白桃茶,100ml先得7kcal,最緊要係好好飲,熱量低,簡直抵到爛!唔知幾時香港有得賣呢? 講到哩度先,又要計劃明天的行程,大家今個禮拜有個long weekend,同我一齊relax吓啦!這幾日開始學習點樣去hea....

Hea...原來感覺良好

放假之前那種忙忙.....忙忙,真係無辦法用筆墨形容,接住講完個講座就飛去機場,原本好地地諗住好似個廣告咁講,瞓醒覺就同東京講Good morning!唉!瞓到咪係囉,但係原來太疲倦係會眼光光,我諗道理同餓過飢一樣,你哋睇下我個樣就知.. 今日,hea得好緊要,去咗邊,漫無目的係東京街頭hea吓hea吓,保守統計,去過3間coffee shop,望住d日本人係我前面行來行去都好過癮。 今日食咗哩d,同飲咗佢...新產品,白桃蔬果汁+乳酪 之後仲無聊到同隻小狗傾偈 ! 講住咁多先,要準備明天的箱根遊,good night!

外國的天空

有人話,外國的天空特別靚,是真有其事定係我哋從未停過,仰望一下自己所擁有天空呢? 這是我一踏進家鄉,第一個感覺,共勉之^^ 外國的天空特別藍,定係大家從未停下來,望一望香港的天空呢? 清晨6時半的新宿街頭 放鬆下啦香港人!

每日一篇

哩兩日發覺,原來當D電淨番1格嘅時候,真係會唔知自己做緊咩!個腦又便秘,唉!一言難盡! 雖然我會去充電,但係我打算唔會唔記住大家,所以我決定,同大家一齊往外跑,為大家個大腦充下電,所以我將會每晚一篇Blog,將往外地的所見所聞,大小事物都同大家分享,有時間就上吓尼啦! 次次執行李大細毛都霸住個喼,為免佢哋唔開心,我都已經同佢哋講咗我要去叉電喇!仲會買好多嘢俾佢哋食,各位戰友,你哋d衫呀,化妝品,面膜嘅清單已經帶咗,唔駛擔心,希望這次充電後,有更多寫作靈感啦!將更多精彩文章帶俾大家!

又煮咖喱雞...唔關我事架

唔知係咪編輯小姐好想食咖哩雞,定係佢想幫我谷多D人流入尼哩度,今日個專欄隻註腳相信係自己無端端爬咗出尼,不過唔緊要啦!錯有錯著,咁我哋就一齊重溫個低脂咖喱雞嘅做法啦! 當然要準備下D材料先: 脫脂雞湯500毫升;脫脂奶125毫升;洋蔥1個;新薯3個;去皮雞脾肉160克;番茄1個 當然仲要準備調味料啦! 咖喱粉2湯匙;黃薑粉少許;辣椒粉少許;醃雞肉(1茶匙咖喱粉+1/3茶匙鹽+少許多用途調味香草);生粉1湯匙 好啦!可以開始喇! 1. 半個洋菇切碎,另一半切角;連皮薯仔先切件,再出水; 2. 番茄去皮切碎,將雞肉用醃料醃好; 3. 為了令食物的脂肪量減少,可先用焗爐焗熟雞肉,15分鐘180度; 4. 將洋蔥碎用極少油炒香,收慢火再加咖喱粉、辣椒粉及黃薑粉;(小心咖喱粉燒焦呀!) 5. 再將切角的洋蔥炒香; 6. 將番茄、(4)及(5)的材料及薯仔加入雞湯;細火煮20分鐘; 7. 最後將焗雞肉加入,慢火多煮20分鐘; 8. 再加奶及生粉水多煮5分鐘即成。 記住唔好煮咁多飯,減磅戰友唔想鹽份過高積水,就用2-3湯匙汁好喇!畢竟雞湯也有鹽。 好啦!今日個天悶悶地,令人無咩胃口,就今晚一齊煮啦!

最佳的手信

今日,收到一籃水果,係戰友從泰國帶回來的手信,我一邊拆禮物,佢一邊呱呱嘈:你知唔知揀尼份禮物俾你好辛苦呀!D生果我自己揀架!當時我心諗:做咩咁辛苦呢?! 點知佢就話:你知啦!又唔敢揀個榴槤俾你,驚你話唔健康!哈!原來揀禮物俾我壓力咁大,唔通我真係咁惡! 唉!大家成日都誤解,以為營養師成日話哩樣唔食得果樣唔食得,對D又肥又甜嘅食物避之則吉,其實我經常都話,只要唔係減肥進行中,一D高糖高脂嘅食物,間中都可以食架,所以營養師都一樣,有時都食哈根大師雪糕啦!減肥過程只係短暫,成功了,咪可以著起一件靚靚衫間中去食大餐囉! 去旅行唔駛買手信俾我喇!其實你哋去完玩,都Keep 到個磅數無肥到,對我尼講,已經係一份好大嘅禮物啦!Anyways,C小姐,多謝你,你份咁健康嘅禮物,我很喜歡呢!謝!

減肥IQ題

今日想同大家玩一個減肥常識IQ題,問題係:如果你正在減肥,有一朝,你老細同你講,今朝一齊食早餐啦! 你沒有選擇的情況下,你只可以去茶餐廳食早餐,面前的,只有ABC餐,全部都附送雞蛋一大隻,你明知係茶餐廳食蛋咪即是增肥,但係老細面前,又唔想唔食,係減肥交叉點的情況下,你會揀: A. 太陽蛋 B. 煎蛋 C. 炒蛋 答案: 3種蛋的肥胖程度,最肥嘅係C.炒蛋,跟住就係B.煎蛋,較為可以接受嘅,就當然係太陽蛋啦! 點解,好易明啫,太陽蛋只煎一面,吸油都少D啦! 煎蛋就兩面都要煎,多一倍機會吸油,但最慘就係炒蛋,Surface Area表面面積咁大,吸油機會多咁多,最肥嘅蛋,非佢莫屬啦!明白無!? 當然,最好就唔好成日食啦!若果真係無辦法,而家知點做啦! 另外,提一提大家,雞蛋都唔係咁可惡,1隻蛋255毫克膽固醇,無高膽固醇朋友,一星期5隻,都ok,但若果高膽固醇的話,就一星期唔好多過3隻蛋黃喇!

眾裡尋我

剛才係同學仔個Facebook度搵到張陳年舊相,發覺原來細細個嘅時候興冬菇頭,俾5秒鐘大家搵下,知唔知三年級嘅我係邊呢? 搵唔到都好,證明女大十八變,越大越靚囉!哈哈哈! 弊!掛住玩!差D唔記得交稿!