跳至主要內容

文章

顯示從 3月, 2009 起發佈的文章

薯仔蘿蔔煮青瓜

薯仔,當然新鮮係最好啦!但係我發現,一種叫新薯的薯仔超級好食,昨天,用佢煮肉片、青瓜、蘿蔔同薯仔,都唔知幾好食,做法非常簡單,首先將薯仔同蘿蔔去皮切成一嚿嚿,青瓜切片,瘦肉切片用豉油胡椒粉醃好,先用1茶匙油加蒜粒油起鑊,先炒肉片再加入薯仔及蘿蔔,然後加水煮,後加青瓜,焗約10分鐘,薯仔及蘿蔔煮便可以了。

更方便的薯蓉粉

見大家咁鍾意薯蓉,同我志同道合,就介紹另一牌子的薯蓉俾大家,這種仲方便,一小包相等於1份五穀,又係加水就食得。問題係,比較早前介紹個牌子仲難搵,係SOGO同部份大百佳有售。

雪櫃裡常備的沙律醬

既然有讀者問,用邊隻沙律醬好,我就將我個雪櫃嘅存貨帶俾大家睇吓。 排哂隊有4枝,左起第1、2二枝,是我覺得自己肥咗少少嘅時候用嘅,因為佢哋減咗肥,即是低脂啦,一次用2湯匙都可以。第3、4枝是我的摯愛,是日式芝麻醬,但就比較多脂肪,一次只可用1/2-1湯匙,我間中都會用佢,因為超好味,包你唔停得口,我有friend,原本好憎食沙律,但自從有這枝百搭沙律醬後,佢就愛上咗沙律了。 另外,昨天話會介紹盒薯蓉比大家,這盒薯蓉,每1/3(乾)碗,相等於1份五穀類食物,一般成年人,一份午餐可以食1碗,製作方法好簡單,加熱水或者熱奶就可以了,當然要加d綠葉襯吓個薯蓉啦!

薯不簡單

佢緊係唔簡單啦!三十多年前,唔小心跌咗落d油度,變成炸薯條,唔知吸引咗幾多少男少女。但三十年後嘅今日,健康大哂,自從有人話薯仔好肥之後,大家聽到佢個大名都驚,於是呆等大家食佢食等到發哂芽(記得發咗芽就唔好食),佢好彩,碰到我尼個營養師同佢翻案,佢先可以清白,原來薯仔唔只唔肥,仲可以幫大家控制體重添! 我最鍾意用佢整薯仔沙律,簡單都極,最適合我d懶人,烚好薯仔將佢切粒,將粟米、雞蛋同吞拿魚入個小碗,再加2湯匙沙律醬就ok哂! 有時再懶d,就去超市買盒加水就食得嘅薯粉,1/3碗(乾)相等於1份五穀,再加d切碎嘅西蘭花同茄汁焗豆,簡直一流,有焗爐的話,放片芝士,慢慢溶入d薯仔,yummy....:) 多d時間的話,煮個薯仔雜菜湯都唔錯,1個紅蘿蔔,2個番茄,半個洋蔥、4兩豬肉同1個薯仔,煮佢1小時多分兩餐食,男士就最好食多1碗飯添,小姐們就唔駛喇! 如果唔想飲湯成肚水,將上述材料轉用牛肉粒,用1-2茶匙油再煮,做個菜塗飯也不錯! 薯仔仲可以點整,多不勝數,只要你記住,佢知所以可幫大家減肥,唔係因為佢有咩特異功能,只係因為佢脂肪少,又有飽肚感,所以食得太多都係會肥架! 想知薯粉個樣同邊度有得買,明天話你知,因為唔記得同佢哋影張靚仔相!

百分百的全麥包

仲記唔記得點先算係全麥包呢?上星期係專欄同電台都講過,要睇吓佢哋張身份証(成份排列),千奇唔好淨係睇個樣。 不如溫習吓啦!成份表中的小麥粉及麥粉,只表示白麵粉的份量,所以若排得比全麥粉前,即表示成份以白麵粉居多! 但是若全麥粉排第一,即表示其成份有大部份是全麥粉了。 希望大家有用啦!

3月24日的約會

又完成一個講座喇!第170場... 昨天到脊醫診所覆診,姑娘一見到我就問:『你好似好忙喎!小心身體!』我就話:『係忙D!但好滿足!每次一知道有講座,唔知點解,原來疲累不堪,都變成可以打死100隻老虎!相信這個動力,是由其他人俾我!』 昨夜,完成講座,見到大家嘅支持及鼓勵,令我頓時叉了電,有朋友問,幾時再有講座,想介紹朋友聽,當時我說多謝...真是由衷的感謝! 生命中,我們每天都在付出,有機會付出,有幸...付出了,就不應希望回報,見到一位又一位會員完成計劃,恭喜他們之餘,亦真的盼望他們不要忘記我在減肥路途中,叮囑的每一句話。 曾有人問及,是否每一位你負責的個案,都是成功的,我會如實相告:『當然不是!』,因為你努力遊說,給予支持,別人聽而不做,最後體重只會沿地踏步,但只有你努力配合,隅有失手時,我應可及時將你拯救。 好些接觸過我的會員,會覺得我兇巴巴的,沒辦法,我性格較慢熱,而且當我工作時,過份認真的樣子,確實頗黑人憎,但是希望你明白,那是我緊張你的進度吧!哈哈!打者愛也! 又有讀者問:『專欄中,你經常說笑,生活像是開心的,你有沒有失落的時候呢?』當然,生活也有樂與怒,我當然也有失落的時候,但我希望大家看稿件時,可以輕鬆地看,將一天的壓力暫時放低。 下星期的講座日程如下,有時間的話,留個位啦! 3月24日--中央圖書館地下一號活動室 3月30日--柯士甸道童軍中心1030室 電話:2891 0920

星期一又是減肥天

唔知大家有無同感,星期一經常為大家帶來兩種感覺,第一種感覺是剛起床時,總是懶洋洋的,腦海裡,總會有這個願望:『不如請病假囉!』不曾進行非正式統計,星期一請假的朋友較多。第二個感覺是減肥的衝動,週日大吃大喝後,星期一總要減少下負磅,所以星期一決定減肥的人較其他日子為多。 今日,我都決定食得清淡,準備了芝士火雞卷同沙律,這份餐美味之極,唔講喇!多士爐叮一聲,再唔食,就變...炭燒火雞卷!

乳酪果凍

昨晚在電台介紹過乳酪,就有朋友電郵問詳細製法,其實材料好簡單,2盒Yoplait低糖低脂乳酪(綠色盒)的,仲有脫脂奶及兩包代糖,當然唔少得最重要嘅魚膠粉啦!魚膠粉對做低脂甜品好有用傢! 首先準備好一個大碗,放入兩盒乳酪,將切好的士多啤梨放入,然後用1:5的比例開魚膠粉,再伴入脫脂奶及乳酪,放入雪櫃3小時即成。

新品上市--好好味

今日是列行行超市日,又俾我發現新產品,大家覺得佢似咩呢? 我攞住個新產品,周圍去問人知唔知佢係咩,有人話佢個樣似李子、又有人覺得佢似泰國茄子...你話呢?唔好偷睇答案住,估吓先啦! 俾D貼士先,佢係外國長大,而家移民香港,有D人覺得佢甜,有D人食完覺得佢酸溜溜,但我就覺得好好食,仲一次食咗5粒添!話時話我覺得佢係混血兒囉! 開估喇!佢係BB版嘅無毛奇異果,好方便,因為可以連皮食,佢嘅營養價值呢?就同普通奇異果差唔多,但係每一盒就有96卡,所以1盒,即9-10粒已相等於兩份生果。 有緣見到的話,就試吓啦!

美食的魔力

大小Moo語錄: 主人都唔知去咗邊,電視個新聞姐姐都出尼講嘢,佢都未返,好肚餓呀! 細佬,我聽到叮叮聲,應該係主人返尼喇!快d去門口等啦!喵喵!主人呀!好肚餓呀!快d整宵夜啦! 有得食喇!大哥,我聞到有蝦仔同吞拿魚,好香呀! 主人呀!快d啦!唔好掛住影啦! 於是大小毛就聲嘶力竭地喵!係咪未聽過佢哋把聲呢!慢慢欣賞宵夜前傳!

Moo與Milo的地盤爭鬥

千奇唔好以為Moo同Milo好似好Friend咁!其實佢哋一日一小打,三日一大打,打完交之後,最慘係我,要幫佢哋善後,因為打倒d毛成屋都係,上個禮拜,見佢哋打得咁過隱,咪囉個手機影俾大家睇吓,d攝影質素係差d,但係都好cute,你估最後邊個贏呢?慢慢欣賞啦!

兩隻貓皇帝

昨天完成講座,好滿足,因為遇見好多讀者朋友... 返到屋企,一入房,就見到大小毛係我張床玩,唉!怪不得成床貓毛啦! 隻Milo超級百厭,係張床跳來跳去,你哋睇吓佢個百厭樣。 見倒佢哋開心哂!希望大家同我一樣,見到佢哋開心d啦!

我keep fit 成功

MOO語錄: 各位朋友,有無掛住我呢?近幾日主人忙到飛起,每日放工返屋企個樣好似我個朋友熊貓仔咁,但係佢好勤力,仲晚晚同我及細佬跑步,所以我個身型幾fit,唔知大家既減磅進度點呢? 主人成日話,只要努力,好多原先覺得無可能的事都會有成功的一日,但未開始前就判斷自己失敗,目標只會越來越遠。 這幾天,主人認識了多位新的減磅戰友,佢哋都對主人寄予厚望,所以佢都有好大壓力,可能你會覺得,都入行十年啦!有咩『大場面』未見過,但是主人實在太『上身』喇!佢好鍾意諗嘢,於是放工又諗,返工又諗,壓力就是這樣產生,但唔緊要啦!壓力是推動力嘛,好彩有我同細佬,得閒同佢減吓壓,好好多架!所以千奇唔好以為我哋成日攪住主人做功課,其實我哋D喵喵對主人好重要架! 大家努力啦!將困擾你哋D肥膏交俾主人就得喇!我同細佬都係咁架!

好好味的蠔仔意粉

今個星期提過,海鮮的熱量低,所以是煮減肥餐最佳的材料,這個意粉製作方法十分簡單,只需準備1/3碗蠔仔,1碗意粉,蒜及黑胡椒,仲有少許菜就可以了,今晚唔知食咩嘢,就試下啦!