營養師黃凱詩的生活點滴

2010年4月29日星期四

胡言亂語....?!?!?!

大家睇吓上面張相先...架飛機確實係飛咁快,早咗成35分鐘到,即是佢只係飛咗3小時,亦即係話如果我瞓倒都只係瞓咗3小時,更何況...我完全瞓唔倒!所以對於一個成日無瞓兼且太開心飲大咗嘅人嚟講,而家寫嘢只係會胡言亂語,所以今日大家淨睇相,我個飲食日記!

係呀!這就是涉谷的早晨,我今朝在這裡睡了一小時...








俾埋我個樣大家睇! Good Night!

2010年4月25日星期日

豈有此理!!!

激鬼死人!

其實我有時見倒這些宣傳品都會好嬲! 成日同人講可以依賴某種食物去減肥,攪到普羅大眾就以後只要食吓佢,咩人都可以減到磅!係就係會輕,但只係水同肌肉呢!間中一兩日食少d當然無問題啦,但係廣告成日話要keep住兩星期,如果大件d嘅朋友或者男孩子跟住食,隨時都會頭暈眼花。

再同大家深入研究下啦! 佢叫人一日兩餐食粟米片+脫脂奶+生果1份,計下數先,1份生果45kcal+45克粟米片約150kcal+1杯脫脂奶80kcal,即是一餐275kcal,跟住叫人另一餐照常食,你估你會點食?

第一種人,食完兩餐咁悶咁餓,晚餐仲唔有咁大食咁大咩,好!食個干炒牛河,1300kcal,食完咸再食甜,1碗芝麻糊400kcal,咁一日就係2200kcal,唔好笑呀!!好多朋友都係咁,於是乎,愈減愈肥! 鬼咩,你會成日覺得早午兩餐好辛苦,晚上咪獎勵自己囉!

第二種人,已走火入魔的,人哋話其中兩餐用粟米片,兩星期瘦4磅,佢覺得太少,於是就三餐都用粟米片代正餐,於是275x3=825kcal,我話你知,實輕,但係可能有生命危險囉,如果你而家180磅或男性就仲危,而家唔係食一日半日,係兩星期呀!好彩俾你執番條命,但係這樣極速瘦,俾10萬個信心你,你一定肥返!鬼咩,主要瘦肌肉減水,好快回吐!最重要係新陳代謝都減低埋,之後手尾好長架,我見過很多胡亂減磅的戰友,肥返之後,很難減的!

真正的永久瘦身,係唔鼓勵你依賴某種食物,仲有熱量絕不能長期過低,當然要有運動啦!但係最重要係你嘅飲食態度有否改善,所以營養師通常都好鬼長氣,無辦法啦,要改善一個人的習慣非
一朝一夕的事嘛!

嗱!講多一次,唔好亂咁減肥,唔好經常吃過少食物,仲有飲食係要多元化同均衡,即唔可以依賴任何一種食物呀!係咪呢?都話我長氣架啦!

2010年4月22日星期四

青海加油

生命中,總有挫折,遇過困難,每一天總被無情的壓力偷襲,令我們洩氣;但我們所經歷的,相比遠方的災民,只是微不足道。

家園失去了,親人被無情的天災帶走,他們的傷痛,不是我們能夠體會。

多年前看過一部著作《唐山大地震》,每一個故事,我仍牢牢記著,『活著的比死去的更難受!』災後要重建的,豈非家園這麼簡單,還有那顆創傷的心。

在苦痛的時間,團結更是力量,雖然我不知青海玉樹在中國版圖的那裡,只知道他們正等待大家伸出緩手。

昨天,在Facebook已作出呼籲,我將會於明天開始直至下星期二(27/4)義賣我較早前的三部著作,是次義賣不設任何上限,總之所有在這5天出售的書籍均會全數透過『香港紅十字會』捐助青海地震災民。以下是這三部著作的售價,當然捐款是不設上限的。

《以營補營》$50

《吃出形態》$60

《瘦得有營》$60

你可以到我們的兩間分店購買,開放時間為星期一至五12-8PM;週六11-4PM

尖沙咀分店:九龍尖沙咀堪富利士道 8 號格蘭中心 1005-6 室

銅鑼灣分店:銅鑼灣謝斐道482號信諾環球保險中心1201室

此外,由於這5天期間將會舉行3場講座,分別是:

24/4(六)2:45-4:30 佐敦柯士甸道童軍中心1030室

26/4(一)7:15-8:45 荃灣大會堂展覽館

27/4(二)7:15-8:45 銅鑼灣中央圖書館地下1號活動室

我們亦會在會場進行義賣書籍活動,同時我們亦會將以上3場講座中,所收取的首次營養師諮詢費用全數捐出。

天災無情,人間有愛,是時候發揮愛的力量。

2010年4月21日星期三

唔好誤會D鵪鶉蛋啦!


等咗一個多星期,個有獎問答遊戲終於完滿結束喇!


有片睇架! 這個小食檔,位於深圳一個地方,我見倒好得意,咪影俾大家睇囉!係咩尼! 燒鵪鶉囉!


噚晚個講座,唔知點解好多朋友都問我其實可唔可以食蛋黃,其實如果沒有膽固醇問題的,一星期可以食5隻,就算膽固醇高,都可以食3隻,另外大家成日以為鵪鶉蛋膽固醇超高,其實一隻只有76毫克膽固醇,是雞蛋的1/3,所以唔好怕咗佢,只係一次唔好食咁多隻啫!仲有呀!好似這個小食檔咁,用咁多油煮,就少食喇!

所以是次遊戲得獎朋友係Hube Lui,麻煩你在我email留低電話,我會有專人聯絡你領獎!其他朋友,唔好失望,陸續有來!


就是它...

星期一晚,在電台節目裡面,Steven講嘅三角形粟米片就是它,我以前也介紹過,但怕部份新來的朋友不認識,就post多一次吧~

佢嘅味道,算是眾減肥零食中最好味的,戰友們,唯一要留意的就是佢是特大包裝的,10塊=1份五穀類食物,所以取出10塊後,就要立即放回不在視線範圍的地方,以免吃得多減磅變增肥呀! marketplace及260有鬼得賣!

Share

2010年4月20日星期二

忙裡偷閒

俾個背脊大家睇吓先,D熊貓係咪好Cute呢?但係件衫唔係我架,係我其中一位減咗50磅嘅戰友嘅!佢今日返嚟Follow up,竟然著住件熊貓衫,我緊係唔放過佢啦! 試下先! 我著嘅時候,佢話:你咁fit,實太大啦! 我就話,你身型咪同我差唔多,哈哈!我講完之後,佢都唔知幾開心! (我都話我把口都幾口甜舌滑架~)

其實今日真係忙碌的星期一,但係有這些戰友開心吓!都幾爽~

見完一陣戰友之後,攝影師同編輯就同我哋昨晚的大作影沙龍,鏡頭前,張相好靚,這是鏡頭後一團糟的樣子,成地都係玩具。

這是一個森林的畫面,這是試造型的,千萬別誤會,不是攝影師影的~

知唔知這是什麼呢?小小小攝影機一部,用來做什麼?拍東西給你們看吧!例如:黃詩詩下廚的video啦! 大毛大戰細毛啦!仲有好多好多,但密切留意啦! 要賣個關子先...抱歉!

不過想介紹這位朋友給大家認識,吳鎮宇先生~話哂佢介紹個DV都介紹得好清楚,最緊要佢無叫我自己睇說明書吖!仲有我最鍾意佢最後果句:部機有咩唔識用就搵我啦!我個名...好易記!


好喇!要開估喇!剛才在Facebook放了這張相,caption咗my light dinner! 大家就好奇怪點解食得咁少,講真!間中...即係一個星期一兩次食少dd無咩問題,但係我唔係食得少,而係因為今晚要喺電台做live,節目完咗差唔多10點先有時間食晚飯,所以為免太餓令大家喺電台聽倒怪聲,又以免血糖低而導致語無倫次,所以咪食咗多士先囉!各位要返夜學的戰友也可以這樣做,咁咪唔駛餓住上堂囉!


跟住就再食埋part 2...


還有到附近生果店買水果,咁一日就完美喇!

返到屋企,自己磅下之餘,仲想睇吓佢嘅減磅成績,嘩!勁...一個月輕咗0.8磅,Milo你真叻仔!!!又俾10個叻你!佢係咪瘦咗d呢?

2010年4月19日星期一

這個5月份...可以見倒你嗎?

免費講座--肚腩...非減不可,我相信這是一個非一般的減肚腩sHow!


從沒想過,講座會有這般大的迴響,4月份餘下的講座,已經全滿,唔知5月份可以見倒大家嗎?

6/5(四) 晚上7:15-8:45pm 銅鑼灣中央圖書館地下1號活動室

17/5(一)晚上7:15-8:45pm銅鑼灣中央圖書館地下1號活動室

18/5(二)晚上7:15-8:45pm佐敦柯士甸道童軍中心1114室

要報名的2891 0920(金小姐)

如果你聽咗,可以再聽,仲可以

Share

2010年4月18日星期日

BBQ減肥餐

減磅進入第六天,來到最大考驗的日子,因為是日餐單是BBQ。

上面這碟四彩繽紛的,很明顯是我指定Order的,四種顏色之中,最愛當然是黃色的。

怎樣調味都是健康BBQ中,最重要的環節,平日大家愛用很濃味的調味料,令所有食物頓時變成只有一種味覺,把食物原有的味道就給遮蓋,可用胡椒、香草外,還有洋蔥及蒜泥,還可以根據自己的口味,自行選擇,就是度身訂造的美食了,人人也是小廚師呢!

你估唔估倒邊枝係我架? ...就係一對蝦! 不過只吃了一隻! 與小妹分享了!

還有這個,吃了1大隻...

都是鍾情大眼雞,秋刀魚...魚味太重。

這個串燒三兄弟都唔錯吖!在樂園買的。


咁啱又係燒粟米,五穀類食物,我唔食唔安樂!


但要數全晚食得最多的,就是她...阿菇,有大燒烤蘑菇、鮮冬菇、金菇、蟹味菇...即個菇Family放哂落肚!

仲要,又食又拎...知唔知外賣俾邊個,當然係我兩隻愛貓大細毛啦!


一頓豐富晚餐之後,我的句號絕對唔係甜品,係咖啡,選了灰色的roma,很香,滿足的一天,明天你們放假,我要工作,所以睡了。

2010年4月17日星期六

由小兔早餐開始

話都無咁快,又到星期六,即是我的極速減肥第五天。


由於今天要完成兩份稿件,誓要令自己輕鬆而且叉足電,今早選了這份早餐。知否早餐對減磅有多重要呢?當然,早餐沒有了,上午工作時必會雲遊四海,而且11時許便禁不住四處找食物,那時候找來高糖高脂肥餅就不得了。另外,一份飽足的早餐對腸臟有發施號令的作用,是建立良好排便習慣的方法呢?

今天有大考驗,BBQ大餐,想知怎樣吃BBQ也可享瘦,密切留意啦!


P.S. 相中添了些外國朋友,頓時以為自己飛到外國...

2010年4月16日星期五

意志的鍛鍊

或許就是因為一次的失敗,令我的性格徹底的改變過來。或者,要不是那一次,我不會這麼了解自己。

香港的教育就是這樣子的,考試考試再考試,求學就是求分數,不知是自己倒楣,或者真是懶惰作怪,那一次的會考,沒想過的成績,竟然就在我的手上,更不幸的是,我遇上她,一位老師,這位負責升學及就業的老師,她竟然對一個極度失落的學生說:你這個成績,沒可能考得上了,就算勉強升得上中六,大學是沒可能的。

老實說,成績是比想像中差,但也合乎上中六的資格,那一次只是失手吧! 安慰沒有了,但也不需多踏兩腳吧! 就是因為她的冷漠,那一天,我告訴自己,我不會被你看扁的,你說沒可能,我就要做得更好!

自從那一天開始,我潛在的鬥心就這樣激發起來,Nothing is Impossible!

今天與大家分享我的故事,只是想告訴你們,世上無難事,只怕有心人,戰友們,有時候,你會看見我板著臉,告訴你們一些道理,因為我希望我的性格會令你們改變對某些事情的看法,我希望我的說話能激發起你減磅的動力。今早游水期間,另一位泳客在我身傍極速游來游去,你知否我當時在想什麼?我告訴自己,我要游得更快,怎能給你比下去,我就是這樣的一個人,簡單來說,我要被人刺激的。戰友們,運動除了燒脂減肥外,還可鍛鍊意志,人是需要有目標的,所謂目標為本吧! 下次跑步時,看倒另一位朋友超越你時,加把勁吧!運動hea著做與積極幹,大有不同呢!

或許,我該向那位老師說一聲--多謝!

2010年4月15日星期四

有大茶飯...記住叫我

我知大家想見倒我D食譜同餐單,多過想見倒我,不過...有好嘢,當然要同大家分享啦!

好明顯,見我個樣咁興奮,都知我手上嘅當然係返鄉下張機票啦! 靜靜雞講俾大家知,我噚日用港幣625大元換佢返尼架! 係咪好令人興奮呢?

其實好簡單啫! 去大新銀行啦! 相信好多朋友都知,現時有好多銀行都提供積分換飛行里數的計劃,你知啦!以前D分儲下儲下,成日換埋哂D唔等駛嘅嘢,所以咪專一D,簽死一張有里數換嘅卡囉! $8 就有1里數,low season 17000里數就有1張來回東京嘅機票,即是每$136,000就有1張,講真,如果要1年內自己簽,1個月要用差唔多$11,500,點用呀?但係你只要朋友仔比較多,佢哋又有酒席呀、裝修、買電腦影音等等呀...總之有大茶飯就簽,好快就夢境成真啦! 不過d分可以儲兩年架,仲有第一年免費送你5000里數,咁就好快免費飛去日本啦! ($625是機場稅等等)自己去了解下啦! 其實我已介紹咗俾非常非常多個戰友喇! (似唔似大新銀行廣告呀~)

仲有這張相,很久前已經想放上來,但忘記了,太可愛喇!唔係我,係大小魔怪等食個樣~

喵!主人快d啦! 我哋肚餓呀!

為咗方便大家,俾條Link大家自己睇喇!
www.anacardhongkong.com

2010年4月13日星期二

手板又係肉,手背又係肉

攪咩黃詩詩咁懊惱呢?

事關好鍾意講嘢嘅我,已經收到公司、同事,仲有活動場地嘅最後通牒,要將個講座Cut短D,因為我次次起碼超時15分鐘,但係手板又係肉,人背又係肉,點Cut呢?

我望咗15分鐘都落唔倒手...講個秘密俾大家知吖!我決定...唔cut,佢哋唔知架!!唔好嘈呀!過咗今晚果關先再算啦~

小雞不見了

唉!高估咗自己...

個遊戲點解要有兩個回合,最主要原因係,我以為好多讀者都知我小時候有養小雞,所以如果只得一個回合,咁快有人答中咪有好多朋友玩唔倒個遊戲囉,點知...

好!講返隻雞先,小雞的確係我第一隻養嘅小動物,絕對係住喺18樓嘅雞仔,但細細個好可愛嘅雞仔,隨住一日一日嘅長大,佢由一隻披住米黃色毛毛嘅小雞,變成一隻街市裡面嘅肥雞。有一日,我放學返到屋企,感到異常寧靜,跟住打開雪櫃攞汽水飲,點知...雪櫃裡面有隻雞....?!!??!!??!!你哋知唔知我喊咗幾多日幾多夜呀!

都係唔講喇! 寫完都眼濕濕咁囉... ...

公佈吓昨晚的入圍Fans名單先:
Angel Chang
Sheri Leung
Mandy Chan
Joseph Leung
Hube Lui
May Yam
Lau Tak Yee
Yuki Dai
Karen Kwan
Ng Wai Yan

密切留意第二回合遊戲啦! 終極大獎...全自動體重脂肪測試機,簡稱『測肪機』乙部!

又換包裝?!

我真係唔係好明,點解D食物成日轉包裝,攪到我D戰友認唔出佢哋,最大問題係,我總唔可以買哂全部架,肥死我咩! 就唯有偷影啦! 你哋知唔知,我次次都鬼鬼祟祟咁影,成個漢堡神偷咁,都唔知幾驚?!

以下3個是昨天偷影的傑作,戰友都食得,計一大份五穀啦! 1個星期1-2包好喇!

我鍾意食Sour Cream味道~

這是新發現的,1片=1份五穀,仲有呀!佢纖維都幾高1片有2克,又多一個選擇啦!

介紹吓這兩位朋友先~記者1號同攝影師2號,今日雖然好忙,做了2個小時的訪問,不過都有時間同大家玩咗個遊戲啦! 係咪好好玩呢?好玩的有獎遊戲會陸續有來,stick住我個fans page 或者 Blog啦!係呀!個訪問不日送上,暫時要賣關子先~

2010年4月12日星期一

芒果...原來可以咁

好熱...今日無端端又變夏天,又熱又凍,都唔知想點!

我都知夏天一到,大家就好掛住D甜品,所以今日打算教大家一個似易非易的芒果沙冰涼粉杯。
3種材料(一個芒果、大半杯冰、半碗無糖涼粉),一部小家電就OK。

第一步,將芒果個頭同底切開,再切成粒粒,如上圖,備用。

跟住,準備好大半杯冰塊,然後將芒果核附近的部份起肉,再放入攪拌機,如下圖:

嗱!任何牌子攪拌機都OK,唔係特別要賣廣告,攪呀攪呀!1分鐘,等D冰變哂沙冰就OK喇! 跟住將D芒果粒粒、涼粉粒粒放入靚靚碗,再倒入沙冰作為汁汁,咁咪唔駛加糖水又唔駛加花奶都好味囉!我冒住咳死的危險試過(其實我唔係好食得芒果架),好正!
這是完成品! 那裡有無糖涼粉,百住Select牌and鷹金錢牌(惠康有售)都得,涼粉熱量很低很低,用半碗,不用計份量了,但1個芒果是3份生果,約135kcal。

咁簡單,我用了15分鐘就完成。如果你平日無甜不歡,這個是熱量較低了。

Share

2010年4月9日星期五

點只個餐咁簡單

這個post原先想昨天post上來的,但是,太累了,什麼也不想做,只想躺下來,睡個夠,可惜...周公找不到,輾轉反側,真的閉上眼,已是五時多。

昨晚,講座完成後,各同事放下行李,金美小姐問:今日幾多號? 車厘子答: 4月8 日囉! 我同金美立即說: 今日換漢堡神偷同滑嘟嘟呀?快D落去食麥當當啦!集齊各人所需的公仔份量,我哋就一枝箭咁飛落去。

好...有D新朋友可能唔認識佢,佢叫金美,係我隻右手,左手車厘車病倒了,所以準佢留在公司等...由於成公司都係未長大的80前,所以一共要買七隻,我哋研究咗一陣,買18蚊換1隻,咁要7隻?! 點食呀!?

講你都唔信,當我哋研究緊點買卡路里會最低之際,唔知點解,金美竟然用咗佢D美色同鮮有的溫柔,氹掂個經理哥哥俾佢用一杯ZERO可樂同1大個漢堡包嘅價錢,就換哂果7隻,簡直就係千奇百趣。師奶金正點數,仲要睇下D公仔有無變形,好鬼稱職...尼方面囉...呵呵呵!


睇下我就知大家有幾滿足...

講開尼間餐廳,我細細個果陣都唔知呃咗幾多個包食,點解?好簡單...你只要行去店員哥哥面前,用9秒9嘅速度講...
雙層牛肉巨無霸;醬汁洋蔥夾青瓜;芝士生菜加芝麻;人人食過笑哈哈...就可以有包食,我噚晚都係講座表演過一次啦! 不過改咗最後一句;應該係人人食過...肥死啦!
戰友呀戰友,千奇唔好貪平,用20蚊會換來920卡,未計個餐杯飲品架,但仲有嘢送,賞你差唔多10茶匙油呀!10茶匙油喎,夠你3日用啦!
仲有,佢推廣期間,我哋一班營養師高度戒備,唔好打算係個飲食日記寫3片芝麻包+2片牛肉+少許洋蔥+幾片青瓜+1片芝士+幾塊生菜呀,暫時唔好食住啦!無哂肚腩仔,減肥成功後先食仲得!
戰友們,作戰中,加油呀!

2010年4月8日星期四

磅...

千奇唔好以為我有強迫症,係都要D貓貓去磅重,我只係想做一個負責任的主人,近排唔知點解,經常有戰友攞住D貓糧呀、貓罐頭咁,問我點揀,我想話人我就攪得掂,但貓呢?學習中,所以我就只好同大家分享下湊佢哋兩隻嘢嘅心得。

第一樣我哋要注意嘅,當然係體重問題啦!人同貓咪一樣,過重當然就有好多問題,所以我先咁緊張佢兩兄弟的體重,但由於貓的重量只係8-12磅左右,所以唔需要成日磅,我通常只係一個月先同佢哋磅一次。

但人就唔同D,磅數變化較大,如果正減肥,一個星期磅1-2次就可以了,但如果Keep Fit的話,1星期或兩星期磅一次就可以。我經常叮囑戰友們,唔好日磅夜磅,有D朋友仲要一日早午晚各一次,食藥咩?!磅得太多,數字既沒有指向性,又會增加壓力,何苦呢!

講開個磅,唔知大家登記咗玩有獎遊戲未呢?如果未,仲有時間,入我個Facebook Fans Page就可以了,截止日期同玩遊戲的日期係4月12日,有個測肪機送架!

瞓喇!明晚又有講座喇!叉足電,明天努力!

2010年4月7日星期三

原來我真係飯桶

有無掛住我呢?(唔知醜,得鬼閒掛住你?!)

算!都係一個開場白啫!唔準偷睇下面嘅相,睇上面尼張,知唔知我去咗邊呢?老實講,喺個地鐵站走出尼果陣,都估唔到這是一深圳街角,我不是一個常到內地的小伙子,所以有這感覺,應該不太奇吧?

但係再睇清楚D,又有蔗汁車仔...

仲有拿著Balance的番薯阿姐,應該是百份百的深圳街頭了,這兩天,就是住在會展中心附近,總覺得這區域算是商業區啩,應該安全D。

講開完全這個問題,1天前剛回來的時候,在面子簿留了個言,說什麼極度驚慌48小時,何出此言呢?原因相信大家也估到,深圳這地方集合著五湖四海的人,簡單來說,就是雜,加上多位朋友在高度戒備下,不是皮包給刺穿了,就是銀包在一秒內不翼而飛,所以一踏入落馬洲關口,我便提起十二分精神,最恐怖的是,本打算到周圍拍一拍照,與大家分享一番,行過街頭,就聽到一位好像是穿著護衛的阿叔關心地告訴我,相機這東西很貴重,不要拿出來,這兒治安不太好,吓!相機放在包包裡怎照相呢?他這一個叮囑,弄得我在整個旅途上,除了在飯店照相外,就只有樓上3張是在街外拍的,所以你說是不是極度驚慌,老實說,治安對於旅遊的心情,真有莫大影響。幸好,這次北上,有4位猛男相伴,添了幾份安全感,否則,我必定不會像這次般,大顆兒打的四處覓食。
這次到深圳,主要是為了這隻蟹!事先聲明,這隻蟹很很很肥的,完成計劃後,才去吃吧! 相反作為我這些Keep Fit一族,選肥膩食物的話,必要選好吃的,這樣quota就不是胡亂地用了。這個叫香辣蟹,它不只激辛辣,還要是超香的,在科學館站中信城市廣場後面街即南園路,名為傳統香辣蟹,其他食物的水準也是不錯的。

藉著這個菜想提醒大家,什麼水煮的東西...不是水煮的呀?實在太太太多戰友中了計,影張大特寫俾大家睇下!

這個是我頗欣賞的菜式,同行猛男說,這個是點給我的,因為較健康...就對了一半,沒錯,木耳熱量低而且含有豐富纖維,但是不能少看煮法,但既然已在放假前預留quota,就不管了,所以吃了很多呢! 戰友們記著,Keep fit就是如此,你總不能永遠在減肥mode吧!


要數最欣賞的,就是這個青筍絲,很早很早之前,我也說過它是我的摯愛,但香港人總是少吃的,但它是很爽甜的,好...下次買回來做個黃詩詩私房菜再教大家做!


整個行程中,朋友們試這個試那個,還有宵夜及甜品。

我們多行幾步後,朋友A說:不如食甜品,唉! 120秒前才吃過超肥晚餐,又吃甜品?

朋友選了薑汁撞奶,很可愛喔! 3元有得食仲有表演,店員先拿薑汁出來,再在你面前加入冷暖度適中的牛奶...


1分鐘後,就是這樣子了。好精彩呢?係喇,你估我選了什麼呢?木瓜雪耳?!錯...


我這個選擇,所有朋友給我嚇呆,因為我選了煲仔牛肉粥,那一夜,他們不是說我傻就是說不是否痴線的,人人吃甜品你竟然食粥? 大佬呀!成晚叫咗10多碟菜,只有兩味是青菜,我這個飯桶吃過這麼多食物,也好像未飽肚的,再一次做了實驗,沒有五穀的一餐是不飽肚的,倒會令你吃得更多,所以我才叫了這碗粥吧!食畢後,感覺良好。

還有還有這個終極辣辣串燒,位於向西村一處,最可愛的是那些青菜竟然能穿起來燒,我選了冬菇、九(唔識打)菜、當然仲有雞翼啦!

你估我肥了多少?竟然只有1磅...原因很簡單,人在極度驚慌下,長期處於壓力的Alert Mode,想肥都幾難呀!