營養師黃凱詩的生活點滴

2011年3月31日星期四

限量版薯仔片

我打算在這裡發一次尋薯仔片的啟事!為何?

上面這包薯仔片,是戰友送給同事們的,我們試過後,十分好吃,比任何一個品牌更好,可惜...

我們往附近的超市找尋它的踪影,都是失望而回,戰友告訴我們,她只在屯門的taste見過,所以我想借助大家的力量,幫我找一找它的踪影,好讓需要零食的戰友可以找倒它!你知啦!又好食又健康的小食,真不知往那裡找!

如何健康?當然要符合低脂的要求啦!1包才是3克,可以接受,脂肪熱量佔整體的30﹪,最重要係,食成包才是1份五穀+半份脂肪,一次過可以食哂,咁咪唔駛食一半又要收埋囉!而佢嘅鈉,算係可以接受了,只是一日建議量的9﹪!如果你想問我有無D無咁多鈉,有!但你唔會食囉!因為係完全無味,好似食紙皮咁!

記住喇!搵倒佢就在這裡或Facebook告知大家啦!謝~

2011年3月27日星期日

一小時的傑作

要泡製一餐健康餐,過程唔係好複雜,最緊要好味簡單同快就OK哂!但等食嘅時候係最痛苦嘅,所以最緊要係有D嘢塞住佢哋把口先,所以一定要有一個唔需要煮嘅前菜,今日這個是混合了吞拿魚、大蘑菇同沙律菜的柚子味沙律!

要好快咁煮一餐,事前的安排同計劃都好重要,因為有D菜式要用多D時間煮,所以要做先,有D食物呢!凍咗少少就無咁好食,所以Timing都係重要學問。

首先當然係同食物沖白白先啦!咁啱又係你呀阿菇!由於個沙律會落大蘑菇,所以夾咗佢先!

這個東西,很久很久之前都介紹過,佢係超級好用囉,放好佢,夾佢阿菇,5分鍾,禮成!

我最鍾意用佢煮魚柳,加黑胡椒,少許鹽,一夾,又食得,真係話都無咁快,仲要外皮脆卜卜,超正!不過這一味是最尾出場的,熱騰騰,更好味!

除咗前菜之外,今天煮的第一味是這個我最愛的薯仔洋蔥紅蘿蔔炆肉片,因為佢係用最長時間的,差不多30分鐘!你千奇唔好以為好複雜,簡單到死,切好D薯仔同紅蘿蔔先,記住想出尼見得吓人,佢哋大細最好差唔多。

當然仲有切半個洋蔥同3兩瘦肉啦!瘦肉就要用少少豉油醃好,跟住我會用白鑊爆吓薯仔同紅蘿蔔先,之後就大埋材料放入煲,再加半碗水同1湯匙豉油,炆佢30分鐘,有無留意我無用油呢!其實真係可以唔駛~

攪掂!!
其他唔駛教啦!當俾咗Idea大家,知明晚食咩啦!

睇吓有好多碟菜架,咁先叫均衡嘛!仲有呀!仲要食飯架!

8點開始煮,9點有得食,算係咁啦!

2011年3月24日星期四

踏出第一步


改變的初期,往往令人難以適應,但若果這改變,最終的受益人是自己的話,這改變就變得很重要。

不知大家近日有否看過一則新聞,內容大約講述有關大家樂的糖包縮皮,由初時的11克減至現時的4.7克,但卻有人在網上炮轟他們縮皮,當然對方的回應卻是因應少甜的大氣候而作的措施,又或是因環保不想浪費,無論你相信與否,此舉最終的受益者絕非只有那家餐廳,還有我們的健康,還有我們的地球先生呢?糖包份量減少了,我們便更靈活地按自己的需要用糖,試想想,你們平日是否經常便用1包半糖,而有半包是浪費了嗎?我記得很久很久以前到日本時,已發現毗方的糖包特別少的,大約只有3克,其實這改變已經遲了。

砂糖,不竟是一種我們不必要進食的東西,他大概可說是大家舌頭的安慰劑,沒有他,不會死的,只要有進食五穀類食物,糖/醣對身體的供應量也會足夠,我們不必要吃這麼多糖吧!

告訴你們一個秘密,我有一個儲糖的習慣,怎麼養成呢?很簡單,有時候經常叫外賣,飲品總有附上糖的,兩包用不完又不想浪費便儲下來,時間久了,我的家是不需往買糖的。

糖包份量少了,健康便踏進一大步。

2011年3月22日星期二

活學營養及體重管理課程

課程今日開始報名喇!我們只接受電話留位最多一天,即是說你今天致電留位,明天便要到尚營坊兩間分店繳交學費及報名,如有任何查詢,請致電29920148甄小姐!

2011年3月21日星期一

我可以做的,就只有這些...

天災面前,我們無分彼此,再沒有什麼日本人、中國人、美國人...世界大同。

2011年3月11日,一場9級大地震,震散了無數家園,無情的海嘯摧毀多個城鎮,死傷無數;身在遠方的你,可以做的不多,這次義賣,希望能盡一點點力吧!給災民送上溫暖及支持,日本『奸爸爹』,重新振作,堅強面對,你們一定做得到!就讓我們分享這份愛。

尚營坊將於3月21日至3月31日期間,將我的所有著作作義賣籌款,收取的所有款項,將不扣取任何成本,全數透過香港紅十字會捐助日本地震災民,而我黃詩詩更會將活動期間售出書籍的全部版稅捐出。

活動地點除了尚營坊兩間分店外,於3月份餘下4場(21/3, 23/3, 28/3及30/3)『識飲識食減肚腩』的場地內亦會同步進行,希望大家伸出援手,謹代表災民多謝大家。

以減省行政工作,所有書籍的售價統一為HKD50,但我們是不設找續的,希望大家體諒!
4部著作分別為以營補營、吃出形態、瘦得有營及愈食愈Fit

尚營坊銅鑼灣分店地址:銅鑼灣謝斐道482號信諾環球保險中心1201室(地下鐵銅鑼灣站C出口步行1分鐘即達)
尚營坊尖沙咀分店地址;九龍尖沙咀堪富利士道 8 號格蘭中心 1005-6 室 (港鐵尖沙咀站A2出口步行一分鐘即達)
我們的開放時間為:早上11:30﹣晚上8:00 (週一至週五)早上11:00﹣下午4:30(週六)

感激!多謝!

2011年3月20日星期日

會走的﹣奶茶

點解要放這張相在這裡?有咩特別!對你哋尼講,可能無,但我每次諗番起或者見倒張相,我都會笑死咗!

話說這幾個星期,都拍緊一連6集『食得有營』嘅節目,上面見到這張相,係當日最後一個鏡位,唔知係咪因為拍咗整整一日,太累了,但那種累很奇怪,是很突然的,粒電好奇怪咁,不停閃,閃咗幾秒,部機仲要熄埋,最後一段,竟然NG咗唔知幾多次(都唔想數),跟住唯有同工作人員傾吓偈輕鬆一下,好喇!試多次啦!

好Hyper,講得不知幾好,點知,最後最後一個動作,就係要拿起枱上面那杯奶茶(你睇吓張相就見倒),要懶Enjoy咁飲咗佢,但係就係喺這一個時候,唔知手抽筋定係太想快D收工,我竟然將成杯奶茶倒到一地都係,全間茶餐廳嘅人協同所有工作人員都笑倒噴哂嘢咁,當然包括相中全程望住我嘅尼位綠衫哥哥,哈哈,幾開心吖,我經常都會帶唔少開心俾我身邊嘅人!但係你哋就開心,跟住我再拍都唔知幾大壓力,仲要忍住唔笑!好!不如咁,等我爭取吓要番這段放在這裡俾大家睇,真係包好笑!不過好彩無攪到成身都係!

4月就有得睇喇!唔知大家再睇倒尼段會唔會再想像倒我當時嘅無奈又尷尬的情況呢?仲有兩集要拍,希望會再好過上一次啦!但下次的難度好高,希望做倒啦!

2011年3月16日星期三

在Office做焗通粉


10分鐘可以做咩!如果10分鐘可以完成一個自家製的焗通粉,你會唔會嘗試吓親自下廚呢?

準備好材料先,有茄汁焗豆、芝士、 雞肉(想快就揀吞拿魚啦)、快熟通粉、辣椒仔

...吖!仲有,要有1個碗、焗爐或微波爐先得!
好多朋友經常話,食罐頭無益,但茄汁焗豆,絕對係勁有益的罐頭,因為豆豆有好豐富水溶性纖維架,話佢係最好味嘅水溶性纖維,你一定會贊成。
首先,將快熟通粉倒入大碗加水及1/3包湯粉放入微波爐叮,跟住倒咗D水,再將茄汁豆及吞拿魚/烚好的鮮雞肉放在通粉面,頭頂放芝士拿去焗或叮,3分鐘就食得,食得辣的話,再加辣椒仔,正倒爆~

唔係淨係雞嘜先食得,享記果D都OK,一般尼講,200克=2份五穀+1份肉類,其實用半罐做這個焗通粉就OK,如果唔係太多,就變茄汁湯通粉喇! 不過再想健康D,可以揀雞嘜LIGHT版,無講糖及鹽都會少D。

識飲識食的時間到了!

話咁快就過咗半個月喇!都唔記得將我3月個免費講座嘅日程表俾大家睇!

由於3月比較長的關係(其實咪多咗一日!),所以這個月是安排了5場講座,第一場8/3已完成了,21/3及23/3都有兩場,但實在多謝哂大家捧場,因為都已經滿了,尚餘月尾的兩場,都仲有幾多位架,睇吓有無時間啦!

28/3(一)銅鑼灣中央圖書館地下1號活動室 下午7:15﹣8:45
30/3(三)佐敦柯士甸道童軍中心1030室下午7:15﹣8:45

留座電話:28910920

到時見啦!

2011年3月14日星期一

無糖豆漿


放張無糖豆漿個樣上尼先!這幾個星期,大家都唔知係咪約好咁,好多戰友都同我講好意飲豆漿,但大部份唔係超甜就係低糖,想搵無糖都好困難,好啦!今日唧少少時間同大家介紹吓!

市面上最方便購買的豆漿當然係維他純豆漿啦!但個人認為佢無咩豆味囉!但你用佢做麥皮個湯底都可以,因為麥皮自己有好香麥味,都可以接受,但淨飲就差D囉!

如果要淨飲我會揀兩種牌子的沖劑,第一種係大排檔牌子(有無糖的),不過我買咗本來想影相俾大家睇,但轉頭就俾個戰友搵咗家陣渣都無得淨,所以我只有另一牌子的相,就是上面那個了!其實佢都有黑豆漿架,都唔錯!

值得一提,有朋友問我點解去星星Coffee Shop飲SoyMilk Latte無落糖都好似甜咁,其實主要原因係,一般coffee shop用的都是有糖的豆漿囉!所以小心中招,仲有仲有,鈣寶寶都好甜架,減肥就唔好用佢做早餐呀!講住咁多先,我要去做節目喇!

2011年3月8日星期二

撳機之解說(Part 2)

好喇!我哋再進入第二部份的解說~

第三條解說~
第三條就是我以為好簡單但又係最多人錯的,因為我以為我在不同媒體說過這麼多次大家應該會識答,點知都係墮入咗個陷井,答咗紅酒。

若果要知邊種酒熱量高D,最主要要知道酒精含量有多少,你只要記住酒精含量愈高,熱量愈高,所將若果飲同等份量,醇度較低的啤酒是最低卡的,而伏特加則是最高熱量的!

但係點解D人成日都話什麼啤酒肚呢?原因好簡單,因為飲啤酒可以飲好多,而飲紅酒一般只飲少許,所以錯覺上咪以為飲紅酒無咁肥囉!但係我可以話俾大家知如果你鍾意一枝一枝飲,一樣會變紅酒肥囉!

第四條解說~
其實又係一條無得解但又好易答嘅問題,因為答案清楚寫在我的書《吃出形態》中,唉!有時間就要溫吓書,這條問題只要查書先知答案𠺢,就算你問我我都唔會即刻答倒你啦!你問我邊種含單元不飽和脂肪最多我就答倒你。不過咁啦!都提多次,咩嘢油的熱量是一樣的,唔好諗住橄欖油有多D單元不飽和脂肪就用多D呀!

第五條解說~
又是無得解的,唯有記啦!營養師成日都會俾人問,食多咗嘢幾時先變做脂肪,我哋成日都會答,如果你在一段時間內額外攝取3500卡,就會增加1磅,你千奇唔好諗3500卡咁多,無咁易肥,我計條數俾大家睇你就會明。大家都好鍾意食雞蛋仔吖,一底有幾多卡?390大卡,將3500除以390,答案係9,即是說,若你每日在正餐外,都額外比需要多食1底雞蛋仔的話,9日就會增加1磅,即是一個月增3.3磅,磅數是積少成多的,那麼一年就肥差不多40磅,問你驚未,最大問題是,你哋唔係淨食雞蛋仔囉!

好啦!大家嘅營養知識又踏進一大步喇!我見大家都咁有興趣玩,我就決定短期內再玩一次啦!你哋話好唔好呢????

2011年3月7日星期一

撳機之解說(Part 1)

上星期四個遊戲係咪好好玩呢?遊戲背後,其實都係想糾正大家一些營養的誤解,唔好墮入陷井啫~

由於我知部份的網誌讀者是沒有上Facebook的,所以讓我再將問題及答案再說一遍吧!當日問了5條問題,問題及正確答案如下:

1) 以100克(未熟)計算,以下哪種食物所含膽固醇量最高?
A)鵪鶉蛋 B) 鮑魚 C) 墨魚 D) 豬腰

2) 以下哪種食物的升糖指數最高?
A)海綿蛋糕 B) 全麥包C) 即食麵 D) 70% 黑朱古力

3) 哪一種酒的熱量最低?
A)伏特加 B) 紅酒 C) 啤酒 D)日本清酒

4) 以下哪一種食油的單元不飽和脂肪最少?
A)芥花籽油 B) 花生油 C) 豬油 D) 粟米油

5)要減去一磅體重,需減多少卡路里?
A)3500 B) 2500 C)4000 D) 1500

第一題的解說~

其實有D答案是不可能解說的,因為是Fact,好似第一條就係明顯的無得解問題,答案點解係鵪鶉蛋,鬼叫佢輕咩,咁100克,咪好多粒囉,1粒成76毫克膽固醇架,而100克就有11粒,所以個答案咪咁囉!但係大家要記住,咁嘅結果,唔係代表佢真係好高膽固醇,只係份量問題,同埋亦想告知大家一個事實,有時用100克去表示唔同食物嘅營養素時,係唔係好合用架,因為食物的水份會好影響重量,而且都好視乎你確實的進食份量。


第二題的解說~

寫這個題目時,我都知佢應該係較難答的,畢竟升糖指數(GI Index)都係一個比較新的terms,而且我選這條問題係知道大家對這個字眼仲有好多誤解。

好啦!講少少先啦!升糖指數是用來計算一種含有碳水化合物的食物,於進入身體後,對血糖上升的反應,升糖指數愈高,即反映該食物瞬間提升血糖,葡萄糖就是GI﹣100的食物了。

但係好多朋友都誤解,低GI就代表健康,這是大錯特錯架,因為食物當中的其他成份,例如脂肪則會令升糖指數下降,所以有很多高脂肪食物的GI都是低/中GI食物,問題的答案其實都好清𥇦架,因為蛋糕有牛油、黑朱古力就一定有油啦、即食麵就唔駛講,所以答案咪麥包囉!不過唔代表麥包唔好架,佢嘅GI就比白麵包低啦!

其實你可以當GI係另一個反映食物某一種特質的數字,我哋平日所講的低脂高纖飲食習慣仍然是最重要的,千奇咪以為即食麵是中GI食物(GI=55)就係好呀過(GI=70)的麥包呀!

另外都提下大家,食物的成熟程度同煮食時間長短都影響GI,愈熟GI愈高,愈稔GI亦愈高!
講住咁多看,怕大家一次學咁多會消化不良呀:)

2011年3月3日星期四

撳機題目

準備好未!1…2…3 開始!
遊戲方法好簡單,你需要回答以下5條問題,順次序寫出答案,例如1B,2C…等等,最快答中的朋友就可以撳走部機,依FACEBOOK的時間順序為準!一人答一次咋!

1) 以100克(未熟)計算,以下哪種食物所含膽固醇量最高?
A) 鵪鶉蛋 B) 鮑魚 C) 墨魚 D) 豬腰

2) 以下哪種食物的升糖指數最高?
A) 海綿蛋糕 B) 全麥包C) 即食麵 D) 70% 黑朱古力

3) 哪一種酒的熱量最低?
A) 伏特加 B) 紅酒 C) 啤酒 D)日本清酒

4) 以下哪一種食油的單元不飽和脂肪最少?
A) 芥花籽油 B) 花生油 C) 豬油 D) 粟米油

5) 要減去一磅體重,需減多少卡路里?
A) 3500 B) 2500 C)4000 D) 1500

想玩就去FACEBOOK登入再答!加油呀!

2011年3月2日星期三

休閒故事一則

事發地點:金馬倫道加拿芬道交界,恒生銀行門口

事發時間:下午4時45分

故事主人翁:C君

有一日,C君好不容易才處理好些私人事務。他左手拿著支票,右手拿著信件,準備將信件放入郵箱,將支票放入設置於銀行內的投入箱,當他一切也準備好時,他不斷提醒自己,左手的東西要放Drop box,右手的就放郵箱好了。當走近郵箱時,不知什麼原因,左手的東西很自然的放進郵箱去,當他的手一鬆,支票便溜進郵箱,他突然醒過來,對著節郵箱說:『哎呀!唔係俾你架?!』可是一切已太遲了。

C君望著手上未投下的信件,想了一會,怎麼可能會有這事情發生呢?他立即致電郵局,他告訴郵局哥哥事發經過,他笑住問了一句:『點解你會將支票放進郵箱呢?』

C君回答:『我都想知點解?情況就好像你將骯髒的襪子掉進馬桶一樣吧!』

各位朋友,奉勸大家,要是你神不守舍,就別同時安排寄信及Dropbox了。又或者,銀行門口就不要放個郵筒吧!

現時那兩張支票仍是下落不明呢?

2011年3月1日星期二

仲有3日咋!登記咗未?

仲記唔記得,今個星期四晚,我同大家有個『撳機』約會呢?

遊戲方法十分簡單,你唔需要有now,只需要有部上到網嘅機,而且已『讚好』或『like』咗我的facebook專頁你就可以參加,點like,好簡單,睇住...

你click入nutsdiary, 按『讚好』或『like』跟住登入你自己的account就可以了!
『撳機』遊戲將會於今個星期四(3/3)晚上9時30分開始,我會一次過出5條問題,最快答中哂5條問題的朋友可以撳走這部測肪機喇!問題全是營養知識,全部都是我曾經於我的書籍、網誌及專欄教過大家的,今次係歡迎所有facebook的fans參加的,所以曾參加過遊戲又得過獎的都可以參加,尚營坊同事除外呀!!!haha! 未登記就快喇! 仲有幾日咋!

可能有朋友問,果部咩機尼架?佢係一部全天候肥膏探測儀,一企上去,你身體有幾多肥膏就一目了然,係咪好勁呢?

快D登記,就有機會帶佢返屋企喇!