營養師黃凱詩的生活點滴

2009年5月30日星期六

儲得1個得1個


又有多10個喇!好多謝來自五湖四海的朋友、素未謀面的讀者、積極減磅的戰友,你們的同心協力,換熊仔行動可謂邁進一大步,成功超越40大關,距離100個帶睡衣熊返屋企的日子不遠。

點解揀睡衣熊,好簡單,因為見佢換哂睡衣,提醒自己唔好做咁夜嘛!上個禮拜,有位戰友同我講,見倒旺角有睡衣熊賣,佢問我會唔會買,我當然要多謝佢幫我留意啦!但係我話:『有D事,係享受那個過程,結果當然重要,但若果沒有過程,那結果就唔寶貴喇!』係咪有d玄...

好似儲印花嘅過程,你會知道,有人睇我個專欄先上到我個Blog,先知道我儲印花,作為一個專欄作者,希望透過那個小框框,將自己的經驗,所見所聞同大家分享,希望大家能輕鬆學習營養,有健康嘅人生。知道有讀者支持自己,是榮幸的,亦十分感激。

近日工作真的有點忙,或許是夏天,人人趕著同大肚腩講再見;又有很多講座,仲要趕新書吧!但大家放心,我個人除了多嘴,鍾意講野外,寫作是我另一興趣,只要有人睇,我一定會繼續努力,寫更多或者令你會心微笑的文章,無論如何,萬分感激。更多謝多年來,曾以電郵、書信、小賀卡及禮物支持我(唔住)嘅讀者朋友。
儲得1個得1個...是印花,也是讀者... :)

大大粒多菜少肉餃子


係咪成日聽到我係專欄透露,我有個亞姨,成日整大大粒多菜少肉餃子比我食呢?
今日又有得食,同餃子影咗張沙龍,俾大家睇吓等你哋流口水。

其實而家坊間都有好多地方有餃子或水餃食,但問題係,好多時裡面有大大塊肥肉呢?令原本健康嘅水餃即時減分,除咗這個問題,好多時淨菜嘅餃都暗藏肥基因,因為d菜係經過油炒嘅,所以大家要小心。
講返亞姨d餃子先,我剛才加咗d水,等佢濕濕地,再放入微波爐叮,成間公司,頓時被一陣冬菇味籠罩,材料中,除了冬菇、木耳、仲有香甜娃娃菜同少才瘦肉啦!今個週末,自己試吓啦!

2009年5月27日星期三

偷可樂的Moo


你哋睇吓隻傻毛,鬼鬼祟係度做咩呢?唔通有老鼠!

非也!原來佢想飲可樂,好彩佢同主人一樣,都揀coke light啫!


唉!但係有無發覺,唔見咗肥milo,講起佢我就頭痛,我幫人減肥減咗10年,都未試過會頭痛,都唔知點幫佢,佢日又食夜又食,我食飯,佢又豎起條尾喵你兩聲,開餐時又好似餓貓咁!唉!激死!

星期天的戰利品


上星期日,北上買畫,收穫豐富,最開心係,最終俾我買到這幾張波波樹畫。

點解話最終,原來有段古,話說深圳布吉這條大芬油畫村,已經去過N咁多次,每次都想為屋企同公司,買D畫裝飾下,但係每當我睇中D我最鍾意嘅又有屋又有樹嘅畫,我都想帶回家,但係D同事1號同朋友2號就成日話我D畫好低能,又無藝術細胞,所以嚴禁我影響公司形象,無辦法啦!我個人低低哋,揀嘅野係Lee個taste!

今次,我打算唔理人哋,堅決買咗幅畫,下星期你哋會係我間房見倒佢!

2009年5月22日星期五

例行超市日戰利品


好耐無寫Blog喇,係咪等到頸都長哂呢?頭先有個戰友打電話俾我:『你幾時先寫blog呀?朝朝click上去,都見到隻死老鼠,嚇親人呀!』

無辦法啦!新Office七國咁亂,晚晚都做到12點,所以就偷懶咗幾日。

今日係銅鑼灣,得閒d,就去咗citysuper巡視,俾我發現減肥都食得嘅美味米,仲要好抵食,1杯先係1份五穀+1份脂肪,同事甘美一知道,就箭步充公咗1杯(有圖為証),1包有6杯(佢話),都係25大元咋!

又開壇講學--再教你減超級大肚腩


衝破200場喇!好開心,有咁多人參加,亦都同好多讀者有近距離接觸,萬分感激,錯過咗的朋友,6月的日程已經準備好,打電話比甘美小姐,即是李小姐2891 0920留個位啦!

2009年5月18日星期一

大功告成


今日打算同大家輕鬆吓,講個笑話俾大家聽。

話說係剛過去的週末,公司搬屋,星期六,收拾行裝收到11點,都唔知點解間Office咁多嘢,一路執,一路又翻閱下減磅戰友寄俾我d卡同小禮物,最終執咗4大箱行李,所以咪攪咁耐囉!


星期日一早,約好搬運公司,D師傅又準時又專業,話都無咁快,就將一箱二箱行李,放入架綠色車,最後一件行李,就係我個側櫃,師傅將佢包完保鮮紙後,就推出尼,點知...我哋一行3個人同一位好好人又好專業嘅搬屋師傅,望住個櫃,一齊驚叫:『老鼠呀!』點解夾死咗都無血????個師傅仲鬼馬,話搬咁多次Office,都無見過老鼠!!!!你哋知唔知,今日講番俾大家聽,仲有d驚,跟住我就俾d好同事話,撞鬼你咩,放隻老鼠係公司!我影低咗張相同大家分享。




2009年5月17日星期日

黑糯米與糙米

睇完巾幗臬雄,不如多了解下我地每一日都放入口嘅米嘅營養吖。常見的米種中,我們稱之為白米及糯米,外表靚靚仔仔的,其實是一眾稱之為精製過的米,這精製過程中,便將營養價值最豐富的米糠及胚芽部份毫無保留地除去,因此精製米的纖維、維他命B、礦物質及原花青素便流走了。
因此,想吃一碗更有營的米,連米糠的糙米或黑糙米是更理想的選擇啊!但需注意,糙米及黑糯米含脂肪較高 (一碗白米 – 0.4克脂肪﹔1碗糙米含4.0克脂肪) 因此他的保質期較短,唔好大量入貨啊!

2009年5月15日星期五

印花召集


豈有此理,要成60個印花先換到1隻蚊型熊仔,$50x60,嘩!$3000,點買呀!你哋睇吓我張form就知,你哋知啦!我食又唔食得咁多,邊到有咁多印花啫,我好鍾意嘅雨衣熊同睡衣熊,好似同我距離越來越遠囉!

尚營坊仔仔好靚仔呀!


昨晚放工,掛住尚營坊仔仔,於是閃咗去尖咀搵佢,一上到10樓就見倒佢:『嘩!好靚仔喎!』俾你哋睇吓喇!入到裡面,designer魚小姐d設計都唔錯,最鍾意我個門口,有個隱隱約約嘅logo,但係最重要係活動範圍多咗,咁d減磅戰友就開心d,起碼sofa大咗,多d位坐。
下圖:我間房:)

上圖:你哋估唔估到lee度有幾多個尚營坊logo呢?

2009年5月12日星期二

肥死人咩


忍無可忍喇!實在太多人問我lee枝棒減肥食唔食得,所以我唯有揭開佢嘅真面目,以免大家誤墮增磅危機。

首先,睇吓佢個成份先,這個是目前香港標籤法的標準,食物生產商需要按照食物中,各個成份的比重,由多至少排列,我手上面枝士多啤梨棒上的成份是:大豆粉、葡萄乾、牛油、砂糖、蛋、士多啤梨乾等等......仲有椰子乾同朱古力囉,見倒這個排列,唔駛我講大家都知咩事啦!有大豆唔係就代表好健康,牛油竟然排第三,咪即係食牛油棒棒,my god!!

再睇吓日本官方網頁的營養資料,1條30克嘅棒棒,有133kcal,當中有61.2kcal是來自脂肪,即有約1茶匙半油,即有46%的熱量來自脂肪。另外,仲有23%熱量來自糖份囉!如果減磅戰友想攝取133kcal,我寧願叫佢食10粒士多啤梨+1個加拿蘋果+1個奇異果,都係133kcal,133kcal其實已經係2/3碗飯,即大半碗飯喇!如果你食完正餐再食佢,即是食多咗大半碗飯啦!

我們沒有忘記



鐘樓在2時28分,大地震的一刻停止了。

2008年5月12日下午2時28分,一場無情的天災,令數以萬計人民罹難,頹垣敗瓦的情景,震撼你我的心靈,一年過去了,苦難背後,他們努力地站起來,但此刻他們仍需大家持續的支援,讓我們伸出援手吧!



相片由好友提供,攝於512汶川大地震後6個月。

2009年5月11日星期一

忍咗好耐,講得喇!



忍忍忍....忍咗三個幾月,終於可以同大家講喇!

尚營坊嘅新店,尖沙咀分店,將會係5月18日(星期一)同大家見面,所以這幾個月忙到七彩,你知啦!裝修D嘢超煩,最慘係我個人完全無Design嘅sense,最彩我公司有個好professional嘅designer魚小姐,同我d design sense好我少少嘅同事,先可以將我煩惱的程度減到最低,你哋睇吓,D design 圖幾 pro,收到都唔知點睇!

係咪好想知係邊呢?一定係最方便嘅地方啦!係港鐵尖沙咀站A2出口同尖東站N2出口,出咗地面之後,徒步1分鐘 (尖沙咀站)/2分鐘 (尖東站)就到,係咪好方便呢!


上圖:尖沙咀站A2出口一出,右手面係中信嘉華銀行,一直行15步就到
上圖:如果係新界人,搭港鐵東鐵線尖東站落車,就係N2出口,沿河內道右轉出加拿芬道,就會見倒堪富利士道轉角位。

上圖:大廈正門

這間九龍旗艦店提供更寬敞更舒適的環境俾每一位尚營坊的會員,希望大家鍾意啦!

個地址係尖沙咀堪富利士道8號格蘭中心1005-06室,唔知點去,睇下D相就清楚哂啦!

而家裝修仍在進行中,大家睇下啦!

好夏天的低熱量小食


晴朗的天氣,已陪伴著香港人有一星期了,夏天好像悄悄的來到,係時候準備好消暑小食,但大部份清涼小食都是高熱量高糖份,想減磅的朋友點算好呢?

今日想介紹一個大大杯鴛鴦雜果泡冰,材料十分簡單,要準備一罐無糖涼粉、1客無糖豆腐花、1杯新鮮雜果、1/2杯脫脂奶同1包代糖粉就可以了。如果有小型泡冰機就更好啦!加D碎冰,嘩,好清涼呀!

不過如果懶得整,又有好介紹啦!上星期係Sogo超級市場小食部,竟然俾我搵到無糖魔芋,將佢做成小粒,加份生果,都好吸引呀!

有緣的話,會遇見的

昨天,完成咗新城財經台的『健康塑身‧關節輕鬆』活動後,就去咗機場睇飛機,點知俾我遇到佢,都唔知幾開心,俾你哋欣賞吓。

其實做咗飛機迷好耐,自己都唔知幾時,但當然唔係tvb做衝上雲霄嘅時候啦!每一次搭飛機,都會買隻模型機,屋企都有50幾架,有d飛機上面嘅圖案,好吸引,有d係那個國家的特式圖案,所以唔係架架一樣,我最鍾意係降落,架飛機好型。



但係要數最鍾愛嘅機,一定係ANA為咗紀念中國航線10週年而繪畫的熊貓飛機,好Cute,但係我就未曾與他碰面,因為只得一隻,上次我細佬就係去高雄期間與佢相遇,幾有緣,希望下次返回鄉時,熊貓仔可以帶我去日本啦!

2009年5月10日星期日

母の日快樂

各位偉大的媽咪,母親節快樂,送上小小禮物,希望大家鍾意!

今日有咩節目呢?我就訂咗位同媽咪食自助餐,所以剛剛食完碗三色湯通粉,清吓腸胃,留返D配額晚餐食囉!相信你哋都同我一樣啦!

但記住食完今餐,聽日就要休息吓喇叭!

2009年5月9日星期六

便秘點算好


Milo 語錄:

未試過便秘都唔知原來便秘咁辛苦,你知啦!我咁鍾意食,食咗咁多嘢落肚又出唔返,個肚谷住谷住都唔知幾辛苦,攪到我成日悶悶不樂,主人同我踢波我都唔想瞅佢,起初主人都唔知我咩事,只係見我好似無平日咁活潑啫!後來我見到主人幫我清理個廁所,佢就即刻知我便秘喇!其實我初時都覺得好奇怪,我同阿哥用同一個廁所,點解佢知係我便秘唔係阿哥呢?大家知唔知點解呢?俾3秒大家估吓!

好簡單啫,因為我無咩手尾囉,平時d貓,去完便便之後,會好乾淨咁,用隻腳仔踏吓d沙,掩埋d便便,但係我係『特別』嘅貓,懶做尼個動作,所以主人望吓d便便,就知係邊個嘅!

講返我便秘嘅問題先,好彩我有個係營養師嘅主人,佢見我便唔出,就俾咗d南瓜同紅蘿蔔俾我食,今日都唔知幾暢快,簡直係一身鬆哂!

主人話有時d減磅戰友便便唔出,都有絕招,除咗奇異果同木瓜外,最掂係一種叫全麥維的東西,不過好似唔係咁易入口,所以都係咩八寶都用完之後先用佢!

總之而家無哂事,好彩有主人啫!你話我幾幸福...喵喵

2009年5月8日星期五

方便食材推介


營養廚房又有好介紹,今期介紹三文魚。

相信大家都知三文魚有好優質嘅奧米加三脂肪酸,但係有D朋友又唔食得生冷野,又唔會買塊三文魚返屋企煎,咁點算呢?

有辦法,開罐頭囉!個罐頭都好好味,成個食哂,都有6份肉,所以一次唔好食哂!

美國心臟協會話,每星期兩至三次,每次約2-3兩深海魚啦!

2009年5月7日星期四

細佬間餐廳

死啦!唔知係咪年紀越來越大,同D年輕人有代溝,前晚返屋企食飯,阿妹同細佬都對住個電腦目瞪口呆,原來佢哋玩緊Facebook 個restaurant city,阿妹問細佬:『個廁所四周圍都係尿,仲咩唔洗!』細佬回應:『唔夠人用,d 侍應好忙,去咗洗廁所,就無人服侍d客!』哈!好似好好玩!

2009年5月5日星期二

最窩心的母親節禮物


原來好多人同我一樣,又怕肥又鐘意食香口野,於是乎,上次介紹完個烤爐後,公司D爐被搶購一空,今日返咗貨喇!同佢影咗張相,俾大家睇吓,新款式又纖巧又靚仔,最重要係今次有個刷子送,清潔就方便得多。

我最鍾意用來做烤魚,洒上少少黑胡椒,超正,用佢做烤雞排,加D蒜片加D香草,頂瓜瓜,我更鍾意將個黃椒切開,放進烤爐,嘩!仲唔流口水。

不過佢有個弱點,唔好用來整牛排,因為會變牛肉乾囉!

個人認為個小爐具最好用來做母親節禮物,個建議係咪唔錯呢!下次有好介紹再同大家講!

2009年5月3日星期日

春天的食物--春筍(たけのこご飯)


不時不食,春天不是葉菜的當造季節,所以近日行經街市,我的心頭好變成瓜瓜菇菇,另外,當然有今日介紹過的竹筍啦!

點解會介紹竹筍,無他,除咗因為是春天當造的食物外,最主要嘅原因,是上次到訪日本朋友家時,那碗竹筍香菇蒸飯,我依然回味。

日本朋友很愛竹筍,也愛將食物加入白飯中,增添營養外,亦令一碗平凡的『靚仔』更具吸引力。情況就好像我曾建議大家將少量粟米加入白飯的道理類同,以增加纖維量。

這個竹筍香菇蒸飯,作法十分簡單,你需要先買個靚竹筍,去掉外皮後切片,再預先浸好3隻花菇,切小片,將所有材料連米加入飯煲,20分鐘就ok。但有時我比較懶,去日式超市買d去了片的,切片就ok。

另一味係青椒春筍炒牛柳絲,食譜如下:
牛柳絲120克
青椒半個
春筍半個
蒜1瓣
鹽、糖、生粉、水及胡椒粉調味
油2茶匙

1. 牛肉切絲,調味;
2. 再將青椒切幼條,春筍切片;
3. 燒熱鑊,加油爆香蒜,先加春筍及青椒略炒;
4. 隨後加入牛柳絲,加獻汁即成。

送你一個平安包


去年,一位朋友,送我一個平安包飾物,希望我平平安安,健健康康,今年我決定借花敬佛,希望大家在甲型H1N1流感的威脅下,能平平安安,疫情早日遠離全球。

除了勤洗手,注意個人衛生外,增強免疫系統都是方法之一,含豐富維他命A的食物,可增強上呼吸系統的抗病能力,所以我今日又食咗芒果又飲咗甘筍汁。

希望大家鍾意我送俾大家嘅平安包啦!

2009年5月1日星期五

新買的煮飯仔


今次去日本的戰利品之一,當然包括我最鍾意的煮飯仔啦!

所以,落機之後,我一定箭步飛去那間東急手個廚具部,你知啦!D日本人都古靈精怪,咩產品都有,同我個性格好似,於是我左行右行,就揀咗佢兩個...

右面個熊仔盒用來做D唔會漏嘅三文治,左面嘅係一把好出名嘅陶瓷刀,其實把刀係我其中一個減磅戰友介紹,佢話唔好睇少把刀成把玩具刀咁,佢好利,用來切肉好好,你知啦!成日準備TVB個專欄D食物,做得精緻D吸引D嘛!佢話香港都有得賣,但貴好多倍,於是我買了兩把,一把自己用,另一把大D就送俾媽咪。

個三文治盒就未用,下個禮拜用完做三文治帶返工就影張相俾大家睇啦!好喇!Long weekend大家好好享受同休息吓,再見。