營養師黃凱詩的生活點滴

2009年1月30日星期五

祝大家步步高陞


這個牛年,第一次同大家見面,當然要同大家拜個年先啦!最重要嘅當然要身體健康啦!但係要達成這個新年願望,首要任務當然是各位戰友減肥成功啦!(我都話我有嚴重職業病,無得救)

仲有3日,漫長的新年假期又完結了,大家準備好未呢!準備咩?!緊係修定身,把握這兩天上班日子,乖乖地跟我早早同大家安排嘅急救餐啦!否則,下星期回來尚營坊拜年時,輕則重1-2磅,但嚴重的話,3磅都不在話下,到時,可能急救無效。

除咗我同大家拜年外,仲有我兩隻愛貓,milo同Elmo,milo剛剛過了他的一歲生日,但最慘係佢生日都要食藥,年廿九,真俾佢嚇死,無端端有血尿,於是同佢睇醫生,仲照咗x-ray同ultrasound,好彩唔係嚴重病患,只係膀胱炎,食咗6日藥,而家生猛返,但係佢主人我就唔見咗$1300,不過唔緊要,最重要係milo康復,不過,我就要迫佢減肥,希望佢長大後健健康康。

唉!我諗我係工作狂,竟然好想返工,快d星期一啦!唔知大家會重咗幾多呢?

唔記得同大家講,我發現,當大家知道公司初八才啟市時,任何一位減磅戰友比我哋任何一位營養師還要高興呢!

2009年1月22日星期四

年廿八腸臟血管洗邋遢



明天便是一年一度洗邋遢的日門子了,大家做好熱身未呢?點解要做熱身,原因好簡單,因為大部份香港人都少做運動,肌肉力量差,若要長時間做抹窗、拖地等動作,肌肉容易受傷,所以緊記先做伸展動作。睇下D伸展運動的圖片先!

除左屋企要洗邋遢外,有無諗過,你條積滿肥膏的血管同遺留很多宿便的腸臟也要洗邋遢呢?點洗,一定唔係用通渠佬啦!今日打算同大家分享吓兩種『去污高手』,水溶性纖維 (soluble fiber) 同非水溶性纖維 (insoluble fiber)。

可能你會認為大家都好清楚這兩種『去污高手』,但其實很多朋友也有誤解,認為這兩種物質是一樣的。在外表而言,水溶性纖維是可溶於水的,而且含水溶性纖維的食物吸水後常給你一種啫哩狀淋身粉粉的口感,情況如同你吃紅豆及蘋果肉的感覺。相反,非水溶性纖維是不能溶於水的,它的質感比較粗糙,就好像你吃糙米飯的感覺。

就功能而言,它們迥然不同,前者水溶性纖維能令血液中的壞膽固醇(LDL)下降,保持心臟健康,另外,更可減低血糖上升的速度;但後者卻是腸臟的清道夫,將食物的體積加大,減低廢物停留於腸臟的時間,可減低便秘、痔瘡及大腸癌的機會。所以兩者的工作岡位是完全不同的,但是很多食物中,均含有兩種纖維,只是它們的比例不同吧!例如:1碗糙米飯,便含有3.2克非水溶性纖維,但水溶性纖維只有0.2克。




以下的纖維成份比較表,希望可幫倒大家啦!( )的數字是非水溶性纖維的份量

蘋果1個(中)1.0 (2.8)
蘋果汁1杯0.1(0.1)
香蕉1隻(中)0.7(2.1)
西柚半個(中)1.2(0.3)
奇異果1個(中)0.6(2.0)
橙1個(中)1.8(1.3)
梨1個(中)2.2(1.8)
士多啤梨1/2杯0.5(1.3)
西蘭花1/2杯1.4(1.4)
粟米1/2杯0.3(1.7)
豌豆(青豆)1/2杯1.3(3.1)
薯仔 (連皮)1個(中)1.2(1.7)
番薯1個(中)1.3(2.2)
焗豆1/2杯2.1(4.2)
黃豆1/2杯2.4(3.0)
白麵包1片0.3(0.3)
麥包1片0.3(1.6)
白飯1碗0.2(0.4)
糙米飯1碗0.2(3.2)
燕麥糠1湯匙0.4(0.5)
麥片1/2杯0.9(1.1)
亞麻籽1湯匙0.8(0.7)

2009年1月20日星期二

情同手足的Moo Moo

Moo Moo 語錄
星期一早上9點

喵喵!主人,今日咁早就返工喇!
你囉住個袋去邊呀?點解帶走Milo呀?唔好啦!雖然我平日成日蝦佢,但係我其實好錫佢,嗚嗚...

唉!今日好悶呀!得番我一個,平時都有Milo同我玩,Milo平日好鐘意坐係廚房,所以我行去廚房等佢,但係等咗一日,都唔見佢,佢係咪嬲咗我呢!佢係咪離家出走!


星期一晚上8點

我有無眼花呀!點解個袋有D嘢郁!原來係Milo,你返尼喇,你去咗邊呀?點解有d醫院味嘅!你唔舒服呀?咪住,等我睇清楚d,原來主人帶咗你去靚仔醫生診所做絕育手術,嚇死我喇,仲以為以後無人同我玩!


喂!做咩唔出聲呀!你仲痛定唔開心呀!其實都正常嘅,有d唔開心,但只要你諗吓,主人咁做,都係想減低我哋d病,佢都係為我哋好。


你休息吓,明天就無事喇!

2009年1月10日星期六

瘦身火鍋餐


好凍呀!今晚食咩好!腦海即是泛起火鍋的影像,你係咪同我一樣諗法,但又怕肥呢?

唔緊要,只要你常備一個『鴛鴦湯鍋』,瘦身也可如常享用邊爐餐,但當然要留意食物的選材啦!

想知點解鴛鴦湯鍋可以瘦身,星期一就早d起身,攞份am730就知喇!但身為我嘅忠實讀者,先就可以先睹為快,知道吓d火鍋食物嘅熱量啦!有*記號的是超肥的食物,小心小心!相片中,是我的減肥火鍋餐。



中蝦5隻 = 60kcal
豆腐1磚 = 70kcal
芋絲7扎 = 68kcal
唐生菜(熟)1碗 = 20kcal
冬菇1碗 = 28kcal
山根球6個 = 570kcal*
炸魚蛋5粒 = 115kcal*
墨魚丸5粒 = 90kcal
白魚蛋5粒 = 55kcal
牛丸5粒 = 60kcal
蝦丸5粒 = 77kcal
豬肉丸5粒 = 90kcal*
粉絲1碗 = 210kcal
烏冬1碗 = 140kcal
鯇魚片(100g) = 108kcal
肥牛肉(2両半) = 250kcal*
瘦牛肉(2両半) = 106kcal
牛脷(2両半) = 196kcal*
豬大腸(100g) = 196kcal*
鱔片(100g) = 152kcal*
Oyster 1隻(大) = 30kcal
粟米(1/2條) = 65kcal

2009年1月9日星期五

甜品王佳音



發達喇!減肥都可以食木糠布甸、雜果克戟、薑汁撞奶、仲有忌廉蘑菇湯...

原因好簡單,因為有『低脂忌廉』嘅出現啦!

點樣整,哈哈!賣個關子先,遲D話你哋知,得閒上個網誌睇吓啦!

2009年1月8日星期四

減肥常識問題遊戲


今日,午飯時間,開了一個午餐會議,揀咗一間食上海菜的地方,都唔錯,對減磅的朋友而言,又有健康的選擇,所以打算同大家分享下啦!但分享之餘,都常考吓大家,睇吓大家識唔識揀!

首先,叫咗一客燻蛋,仲有我最鐘意的嫩雞煨麵,之後再追加一客馬蘭頭及蒸饅頭。睇吓D相先!




想問吓大家,以上各種食物,那一項是正減肥時,應避免的食物呢?點解呢?

2009年1月6日星期二

股神Milo


識睇書嘅貓見過未呢?仲要是兩岸三地的財經刊物,好彩佢無錢,如果唔係就大鑊喇!

幾時同佢建立睇書嘅習慣?無辦法啦!以前嗜好係食同瞓,而家比我迫佢減肥,所以唯有學睇書啦!