營養師黃凱詩的生活點滴

2010年3月31日星期三

燈塔


這一星期,前前後後有多位戰友完成計劃,我的感覺,有點怪怪的。

入行超越十一個年頭,這種感覺,應可說是十嘗八九,但總是有點不捨,每次當戰友完成計劃,應該是值得高興的,因為她們已趕走脂肪,尋回健康,但是那種親密的關係,就像完了,老實說,那種感覺,就是忐忑。

今日,這種感覺再次湧上來,我告訴她:這是每後一天的會面了,要學會Keep fit!說罷,她定神望著我,不發一言,但我知道她心中確實有點不捨,畢竟,我倆一同經歷了一場人生的重大改變,曾經在減磅路上分擔扶持,戰友經常告訴我,見你的時間比家人還要多,你所知的秘密,連男朋友也不知,那種關係,的確是非一般的,但是,老土點仍要說,天下無不散之筵席,人生就是充滿離離合合的,一件事的終結,或許是另一階段的開始。

經常有剛開始減磅的戰友這樣問我:減磅後體重會否回升,你當然會以為我定必會答:不會!但我可以告訴你,這個世界沒有減完不再胖起來的減肥方法,會否復胖,問題在於你!前期工作(即減磅過程的速度,我已為你控制得最好,確保減去的是脂肪,可令復胖的機會減少了),問題是,減磅完成後,你減磅過程學會的,你是否銘記在心,懂得管理好自己,所以Keep fit就是另一個階段的開始。

兩星期前,在公司營養師例會中,同事分享了一件事,他告訴我們,在渣打馬拉松的當日,他在公仔箱看見她的舊戰友,她正在接受訪問,講述跑得辛苦嗎等等...她在鏡頭前說:已習慣了,跑步是一種享受,鏡頭前的她,10年後,依舊保持著昔日的窈窕身型,這位同事告訴大家,幫戰友減掉體重,最大的喜悅,不是那堆冷冷的減磅成績,而是過程中大家所學到的,對方是否能受用終身。

完成了計劃,只代表另一個階段的開始,你仍可在這裡瀏覽、留言,有時候我在面子簿中,看到有些已完成計劃的舊戰友在留言給我,我是多麼高興呢!Keep in touch,有時間的話,我會安排多些活動,讓大家能重聚,保重!

送上我最愛的燈塔,因為燈塔永遠就在指引正確的路。

2010年3月30日星期二

茶煲

唔好誤會,我唔係話大家係茶煲...trouble,我只係想講吓,尼班村民,如果你唔係好明我講咩,好簡單,因為你係80後囉,上個禮拜,行經7仔...嘩! 成村人出哂嚟,我...當然都係喺天神村大啦!見倒佢哋,都幾有親切感。但係有樣嘢唔係好記得,個茶煲係邊個屋企呢?有無人可以話我知?

講開個茶煲,剛才為咗攞印花,去咗7仔買咗佢哋,近日都同好多新戰友傾過偈,發現原來好多朋友都唔知忌廉有zero版,而且佢仲有一個新成員,係蘋果味,好唔好飲?我剛才為咗同一個正準備考試嘅戰友打氣,送咗枝俾佢,佢係我面即刻飲,都讚佢好飲。

介紹得,當然唔只咁少啦! 上幾個月都介紹過,不過多咗個青寧味,個樣好清新啫,而且在market place/citysuper都搵到佢,口渴時又多個選擇啦!
我仲想講多一樣嘢!多謝哂大家對我個專欄、個blog同facebook fans page的支持,fans page人數已超越500了,之前提過,會有一個有獎活動,送出部測肪機,我決定個遊戲會係4月12日同大家一齊玩,公平d嘛!我知有好多戰友去咗旅行,所以4月12日前,你成功登入nutsdiary facebook fans page的朋友,都有機會得獎,總之,緊貼住這個營養師手記,就隨時都有驚喜。

Share

大毛按摩師

Pillow pillow! 你係咪好攰呢?幫你按摩吖!
而家都唔知邊個先係主人,我都好攰,又唔見你幫我按摩,不過算啦!你都一邊按一邊瞓,我諗你頭先跑完步,踢完波都攰喇!

2010年3月29日星期一

六星級食府

要數最值得推介的食府,非這家莫屬...

介紹吓啲六星級菜式先,有是日例湯,青紅蘿蔔菜乾煲瘦肉,另外,當然唔少得黃詩詩最愛的滑滑蒸肉餅啦!

嘩!睇倒都想食,講個秘密俾大家聽,個肉餅...甜架,點解?一陣再講。

當然唔只咁少啦!
一尾清蒸海上鮮,還有...日本花菇,點解佢走咗出嚟!

應該係這個才對!
冬菇煮白菜仔,最後一道菜係...

西西里紫洋蔥香煎西冷,Wow! 仲回味緊!

咁正嘅菜,六星級的享受,當然係黃媽媽私房菜啦!所以個肉餅咪甜囉! (賣口乖係我強項,哈!黃阿媽會睇我個BLOG^^)

但大家有無發覺好豐富呢?原因之一,為咗正考緊A-Level嘅小細佬而設的,要同佢加油嘛!回家真好!

屋企,永遠是我們的避風塘,大風大浪時,就駛入去啦!

2010年3月27日星期六

測肪機一大部

前幾日講過,我正在熱烈呼籲大家登入Facebook Nutdiary的Fans Page,點解?因為如果我嘅Fans人數到500嘅時候,我就會送出測肪機一大部,但係只限Fans page的粉絲們咋!所以...仲等!登入個blog右手面的facebook badge就ok!

徇衆要求,Fans們好想知個測肪機嘅模樣,好!就影俾大家睇!

全自動限定版日本直送脂肪體重量度器一大個,係咪好靚呢?

hahahahahahahaha,我愈來愈發覺,原來我真係傻架!

聰明人應該睇倒,佢... ...只係我其中一個玩具,我又點會咁好將我的珍藏品送出去呢?唔信?!俾個scale大家睇吓!

其實係這一部先啱!名牌子嚟架! Tanita係第一部研製的脂肪機,大部份醫療機構都用佢,所以要送俾大家,當然要送最好的,佢成$470架。老老實實喇! 提多一次,知道自己脂肪比例好緊要,有D朋友,只得130磅,但Check完脂肪先知脂肪率達38%(女士標準是20-27%),仲有,講多樣嘢俾大家知,脂肪機好似薯片咁,要放係暗涼地方,以免影響壽命同準確性。


有無得試用?都有! 好簡單,報名參加我個免費的減肚腩show!來多一次日期同時間:

8/4 (四) 7:15-8:45pm 銅鑼灣中央圖書館地下1號活動室
13/4 (二) 7:15-8:45pm 佐敦柯士甸道童軍中心1114室
20/4 (二) 7:15-8:45pm 銅鑼灣中央圖書館地下1號活動室
24/4 (六) 2:45-4:30pm 佐敦柯士甸道童軍中心1030室

2891 0920報名先得架!



Share

一粒未平,一粒又起

我估你哋一定唔知我講咩?我講我啲暗瘡呀!都唔係好明,近排唔知攪咩,真係一粒未平一粒又起咁囉!唔通真係壓力問題,無理由吖!不過都好,原來仲young~

打開個雪櫃,搵啲抗氧化營養素食吓先,原來仲有存貨--極品蕎麥麵~我記得有一次返鄉下,喺supermarket買過,返到香港試下啦!好鬼好味,好彩,sogo有得賣,仲記唔記得呀!蕎麥麵有一種抗氧化營養素叫蘆丁,吖!唔知啲日本人皮膚咁好,係咪因為成日食蕎麥麵呢?仲有呀!佢纖維素比烏冬高,所以比較飽肚!

2010年3月25日星期四

仲唔快啲登記


幾個鐘頭前,同大家講完啲咁嚴肅嘅話題,都係轉個輕鬆少少嘅題目先。

講之前,要聽一個故仔,話說件事發生喺10多年前,當年我正是一名大學生,由於每日的工作就是上堂、上LAB、食TEA同瞓覺,幾年游手好閒的生活令我的體重由105磅激增至130磅,點知某一日,教授話下星期個LAB要自己親身做個BIA LAB,即係要用一部非常精密的脂肪機度吓大家嘅脂肪,果時我即刻諗:『死啦!我平日著衫識得遮遮掩掩,如今要度脂肪,豈不是成班同學都知我咁肥!』咁點算呢?得一個禮拜,要減肥都減唔切啦! `

跟住,教授再提醒同學仔,叫我哋下次上LAB 之前,記住唔好飲太多水,因為會影響度出來的結果,佢話會比真實嘅低,我靈機一觸,於是,當日上LAB前,我鯨吞1枝500ml水先上LAB,量度出來...27%,剛好是指標中的上限,都叫正常啦!自此之後,我決心減肥,而家,當然好成功啦!

知唔知我講咗咁耐故仔想同大家講咩呢?其實想話俾大家知,脂肪機會好容易受身體的水份改變影響測試結果,例如一早起身啦、女仕行經前或進行中、剛飲完大杯水、做完運動都影響準確度,仲有記住知道自己脂肪比例好重要架,一般人只以為知道體重就OK,所以一定要check 脂肪,點樣知,好簡單啫,報我個講座~~講座前我隻左右手會幫大家度,另外仲有一個辦法!

你只要登入Facebook,即是個blog右手面個link,成為我嘅fans,當我個fans page人數突破500人時,我會私人送出一大部脂肪機(只有fans page 嘅朋友先參加得幸福大抽獎,所以要成為fans囉),鼓勵吓大家要了解吓自己的脂肪比例,亦答謝大家對我的支持啦!

凡事體諒...將心比己

今朝,朋友知我噚晚去睇Eason,就好緊張咁問我:『佢把聲係咪好爛?D報紙寫到好差咁! 』我就同佢講: 『好正! 佢好落力!唔駛擔心!』

作為一位表演者,知道自己在表演前病倒,未能將自己最好的水準帶俾每一位觀眾,我深信,他比任何人更難受,別說因抱恙失準,其實只是一丁點唱差了、說漏了,觀眾或許完全察覺不到,但台上的他,定必責備自己,抱怨自己,為何總是錯了,表演後會不停自責、忟憎、失落,那種心情不是觀眾們可以明白的。

或許人只懂得看到別人的錯處,讓我們學懂體諒,將心比己,他是人,與你及我全無分別!

我最愛的反斗奇兵~~HOHO

未有Toys story I 之前,我已經經常發夢,全屋D熊、貓同熊貓會喺我瞓咗之後出尼玩,所以我超鍾意這套電影,佢都係令我經常長不大的原因,最重要係可以趕走所有負能量,將更多正能量帶俾大家,令大家每天笑一笑!

2010年3月23日星期二

夏天就到...


話時話...有時有啲嘢! 係要做好準備架,而家就話可以遮遮掩掩啫,夏天一到...點算!

快d留位聽尼4場講座,都可以趕及夏天減到20-30磅架! 仲等...打個電話去2891 0920,講低你高姓大名,就可以喇! 仲有提吓大家,鮮有出現嘅星期六場,將會喺24/4同大家見面,唔好話我唔提提大家,星期六,好早就爆!

8/4 (四) 7:15-8:45pm 銅鑼灣中央圖書館地下1號活動室
13/4 (二) 7:15-8:45pm 佐敦柯士甸道童軍中心1114室
20/4 (二) 7:15-8:45pm 銅鑼灣中央圖書館地下1號活動室
24/4 (六) 2:45-4:30pm 佐敦柯士甸道童軍中心1030室

留座電話2891 0920

塗一點點吧!

上回提到,戰友們在家準備食物時,總是烚下烚,例如有菜式如清水煮雞柳、白烚肉片煮三色椒等...以上菜式,變成香煎迷迭香雞柳及香草肉絲炒三色椒,不是較好嗎?另外,煮瘦肉是有一竅門的,將佢切成肉絲或肉粒,較肉片更好,畢竟瘦肉脂肪較少,還是有些缺憾,所以必要好好處理。


另外,就是要做三文治或吃小餐包的時候,什麼醬汁也沒有,吃一天,可以的,但再多一兩天,看到也怕怕呢?較簡單的,塗上1茶匙的植物牛油,也是可以的,好些朋友一定會說,不是嗎?植物牛油很可怕,有反式脂肪嘛...不要老是讚鑽牛角尖吧!較軟身的植物牛油,1湯匙才有0.1-0.2g反式脂肪,現在才是用1-2茶匙吧!不用太擔心,根據早前一份來自選擇月刊的報告,花嘜及美道美的,就是1湯匙=0.1x克反式脂肪吧! 好些朋友平日愛吃的牛角包,1個便含有1克反式脂肪呢!另外,個人認為,也不需要買些價錢更昂貴的低脂牛油產品,除非是必用上成湯匙植物牛油塗麵包吧!


另一個我較愛的選擇,就是今天要介紹的fat free cream cheese,2湯匙才有30卡,若果每次只塗少少的1-2茶匙,則不用換算了!
俾個背脊大家睇下啦!

2010年3月22日星期一

登陸咗尖咀喇...Wow!!

兩個禮拜前,同朋友去旺角樂園食牛丸嘅時候,我一路食一路自言自語咁話:『如果尖沙咁有得食就好喇!咁就唔駛冒住中鏹水彈嘅危險去食好味牛丸啦!』

點知事隔兩週,竟然見倒佢係我眼前出現,你睇下...尖沙咀厚福街也,最重要係佢個下午茶餐好鬼抵囉! 20蚊又平又好食,邊度搵先!

戰友們,唔駛我講應該知點揀啦!

食完牛丸米線,返到公司,無聊同個office影咗張Snapshot,俾我發現咗一樣嘢!原來我個人都算好專一,我鍾意嘅嘢,原來都係...熊...貓...仲有熊貓,不如考下大家眼力,相中有幾多隻熊...貓...同熊貓呢?


講開又講,為咗D熊...這個多禮拜,經常在這個店出沒,這張相攝於上星期五,凌晨1點嘅時候,瞓唔著行咗兩個圈,買咗本雜誌抽咗個25分,各位,如果你去這家便利店買報紙雜誌,記住要幸運大抽獎,抽完獎記住我正回收那個熊熊貼紙呀!

2010年3月20日星期六

測試報告

口味嘅嘢!老實講,都真係好因人而矣,例如竟然有人話我知全麥維好好食咁,話時話,哩件產品,除非戰友有好嚴重嘅便便問題,否則我鮮有介紹俾人。

講開口味嘅問題,近排有好多戰友問,點解我咁鍾意食天使麵、幼烏冬等,其實好簡單,就算食飯,我都鍾意食較腍嘅飯,即係軟飯啦! 所以較幼的麵條,會容易煮腍,就係咁簡單。

我這個烏冬怪,近日四圍出動,前日就去咗Sogo,揀咗兩款...

唔知大家睇唔睇到呢?係咪好幼呢?


不過『一麵還有一麵幼』! 再睇多張...


又超又極細,即係激幼啦! 不過咁,雖然佢夠哂幼,但係感覺奇奇怪怪的,好似食緊上海麵,但係明明食緊個烏冬,都唔知咩感覺。


所以第一個出場嘅烏冬,就係除之前介紹的『真打』烏冬外,另一個黃詩詩推介,煮俾大家睇下喇! 都好幼架!


仲有呀! 想同大家講,我屋企常備指天椒,睇下! 咁咪可以食辣又唔怕肥啦!


好! 第二個測試報告,今次找來『味之天使』車厘子,你睇下佢好認真咁幫大家試味! 但個結果好出人意表,車厘子話車厘子係最難食架,三個字...藥水味,而最好食係mandarin and apricot,佢哋都係我今日的早餐。



我一個人都食咗好多個,hohohoho....

2010年3月18日星期四

食邊個好呢?

各位朋友,自從噚日發現咗新乳酪之後,忍唔住買哂唔同味返嚟! 攪到D選擇障礙又發作,你估下我揀咗邊個呢?

無題

唔知點解今日好多嘢都想講,但個頭腦有D混亂,所以都係用無題開始...

近日經常發覺戰友買錯咗D低脂高糖乳酪做早餐,所以都係同大家溫個習先,好喇!上面有好多種顏色但同一個牌子的乳酪,應該點揀呢?我講Yoplait呀...俾3分鐘大家記下?

記緊嘅時候,介紹隻幾好味嘅新產品俾大家先,牌子叫muller-light,我喺market place買的,都是少咗糖的產品,同時當然係減咗肥啦!有4隻味道嘅,有機會就試下啦!特別係唔飲得奶嘅戰友,另外若果你成日便秘或者腸胃唔好,都可以試吓。

好喇!知唔知揀邊隻yoplait先係低糖低脂呀!咪就係左手面藍色果隻...咪唔食得囉,Hahahahaha太多糖喇! 只係減咗肥啫,咁中間隻橙色呢?佢咪減肥前囉,是全脂的乳酪,所以要認住綠色的,才是適合戰友的乳酪呀!講完!

跟住想同大家轉個話題,今日有一個好熟嘅朋友問我做機可唔可以減肥,我就同佢講,佢只係將D脂肪推來推去,令你覺得局部瘦咗,簡單來說,可用這個道具解釋,這個是減肥前的肥肚腩...

跟住,推呀推呀,話都無咁快,得咗,睇吓,有哂腰,咁你哋明白做機減唔減倒脂肪啦!

點知我個Friend原來係問我做跑步...機減唔減倒肥,鬼咩!咁就唔係做機叫做運動啦!激鬼死!
唔講喇!你哋睇吓moo moo都瞓咗喇! good night!

2010年3月17日星期三

唔好再烚烚下喇!

死啦! 唔知係咪我嘅表達能力有D咩問題,連日來,我經常俾人問:營養師呀?食烏冬係咪可以減肥?真係唔知係咪上個禮拜係個專欄度表達得唔清楚,定係大家見我成日好鬼鍾意食烏冬,又見我咁Fit,所以以為食烏冬可以減肥呢?好啦好啦! 講清楚多一次,這個世界,仍未有食物可以直接幫大家減肥,只係有D食物,俾到同一個飽肚感我哋,但係A比B低熱量,所以A咪可以令我哋攝取少D熱量又唔肚餓囉!

其實唔只係烏冬,上面幅圖嘅通粉都係熱量低的五穀食物,吖!係喇! 見倒D通粉,大家會諗住點煮呢? ...烚囉! 唉! 戰友呀戰友?可唔可以唔好再烚呀?這個通粉仲有其他煮法啫!好,同上面D Hello mimi 變身先,睇下...
係咪好靚呢?用低脂蘑菇湯加雞肉同粟米粒粒煮架! 唔係烚,好好多啦!好再睇多一個...

佢都係一個我最鍾意的有記鮑魚麵,其實阿爸話壽桃牌都好好食,唔緊要啦!都是低熱量的五穀選擇,又點煮好呢?又烚呀?唔係啩!
係就係烚咗先,慢慢睇落去啦!



煮軟咗之後,炒麵呀!講清楚D,係鴛鴦炒麵,你唔會好似我咁有閒情逸緻做鴛鴦炒麵,咁咪唔好咁貪心,炒一個麵都得啫,你有1茶匙油嘛!


這是辣椒蜆肉炒鴛鴦麵呀!嗱!唔好再成日烚下烚下喇! 減磅,也可以多姿多采架!

2010年3月15日星期一

凡事...是有兩面的

今日,是星期天,原本是假期,但卻要工作! 朋友知道了,對我說:假期也要工作,真慘!

聽罷,想了一會,慘嗎?我倒覺得,多高與,能寓工作於娛樂,是多麼幸福呢?而且,我總認為,當做一件事前,一開始你就認定是慘,那就一定不高興了,何不努力地工作,開心地做,凡事總有兩面的!

星期天令我最興奮的,是可以吃到這一個麵,芫茜皮蛋桂花魚米線,實在太令人回味! 其實這個麵十分簡單的,自己也可以做,芫茜是一種又香又好味亦熱量十分十分低的香料,加少許鮮魚片就可以了。
點解今天要工作呢? 其實也不是什麼工作呢?只是要準備好食物,明天TVB週刊要影專欄的相片吧! 當然,食譜的照片,就要賣個關子了,明天再介紹,但這個是私伙,明天的午餐!
你估我要做什麼呢?
是一份全包宴吧! 還記得我正在減肥嗎? 仲減? 我知道你一定這樣問,沒辦法,夏天快到,要更Fit吧! 所以明天打算吃得簡單一點! 可能有朋友話,咁慘?又挨麵包,嗱嗱嗱! 剛剛才講過,凡事也有兩面吧! 你只要花少許心思,三文治也可以吸引的,你看看這片烚蛋先啦! (唔好睇我個樣,因為你一定會話個眼袋好大,無辦法啦! 瞓得少,不過算,本身又唔係靚~)
這不是一般烚蛋,是七成熟的溏心蛋,放入三文治,與平日吃的大有不同呀! 影唔倒添! 下一張好似有佢出現! 再扮吓嘢放入張錫箔紙裡,感覺好味好多,明天就放佢入多士爐,諗起都想食!!全包宴都可以好開心架!
這個又是什麼呢? 你估下,個麵得25kcal咋 (唔計隻蛋) !!
我知我成日講笑,但今次講真,因為佢係一個笱篛麵,佢係芋絲尼! 即係熱量超低的,是新產品,在莎莎買的,又是日本人的玩意啦! 今日食過都唔錯,但好貴囉,成33蚊一包架,真係食芋絲好過,仲有呀!熱量太低唔好成日食,最好加D菜同肉啦!
這個味較好食,酸酸的,唔錯!不過都係一個字啦,貴! 我前幾日介紹嘅真打烏冬都你$4.5一個啫! 係呀! 上幾篇介紹的烏冬,沙田同尖沙咀Citysuper的凍櫃有售,45蚊包有10個~
瞓喇!明天有講座,再唔瞓,個腦空白一片就弊喇!

2010年3月13日星期六

轉行?!

今日,只係可以用一個字形容...趕!
一早如常返咗銅鑼灣office,跟住見過幾個戰友就飛咗去電台,接住食咗一個快飯,又閃返去銅鑼灣office,但係仲未夠,因為最終仲返咗尖沙咀office,又見咗兩個戰友,一日就是如此!!簡單d尼講,我無處不在,大家小心,我隨時會出現架!
不過今日唔係想同大家講趕...同唔趕嘅問題,我係想講這幾天發生嘅奇怪的事!
話說這幾天收到好多朋友嘅查詢,包括係email啦,又或者戰友親自問我等等啦! 其中一位戰友問:我諗咗好耐都唔知點,成日心思思?!咁我當然了解下係咪減磅過程有咩困難啦! 點知佢竟然問:我諗咗好鬼耐,唔知買唔買你果把刀?! 有幾利? 因為佢個樣好似玩具!!幾利?點講俾你知呀?於是我俾個傷口佢睇,佢睇完之後就話:都真係幾利喎!你話係咪激死! 收到嘅email,subject都係查詢,內文都係講把刀,唔知仲以為我轉咗行賣刀?!
好啦!既然大家都想知,就講多d啦! 把陶瓷刀我係日本嘅東急手買的,約500多元港幣,其實上次去台灣間台隆手創館都有,價錢差不多,但當然日本的就更多選擇啦,而上星期去沙田一田百貨,見佢做promo,好似600多元有嘢送,老實講,真係幾貴,但睇下你點用啦! 好似我咁,成日要同食物影相,食物個樣好緊要,所以咪要切靚d囉!扮下嘢都要啦! 但話時話,千奇唔好以為用咗尼把刀切嘅食物可以保留多d營養呀!真係有人咁問過我架!不過講真,所有用過把刀嘅戰友都同我講,把刀俾你果種暢快感覺,係形容唔倒架!


俾條link你自己translate啦! google有網頁translation function架!

http://www.kyocera.co.jp/prdct/fc_consumer/kitchen/knife.html

2010年3月11日星期四

訂咗飛未!!

通常老人家就係有D長氣,我想講唔知大家訂咗飛未呢?唔好誤會,我唔係講Eason個Concert,我想講我個講座啫!

想聽,但係未得閒聽嘅朋友,唔駛去城市售票網訂飛架! 你只需要打2891 0920,用你個大名同個電話登記,就可以換倒一大張由黃詩詩主講嘅《肚腩...非減不可》,睇吓下面嘅日子得唔得閒啦!費用係...全免架!

日期及: 15/3(一) 及 23/3(二)
時間:晚上7:15-8:45
地點:15/3銅鑼灣禮頓道33-35號第一商業大廈601室
23/3佐敦柯士甸道童軍中心1030室
留座電話:2891 0920 (金小姐)

你唔得閒唔緊要,你只要通知你身邊最少5個你最愛錫最關心嘅朋友,話佢知有哩個講座,你今年就會減肥成功,如果唔係...哈哈哈...自己諗吓會點啦!!!

2010年3月10日星期三

三文魚魚...我要食!!

由於噚日試完把利刀,發覺佢切肉(我話我D肉)都切得幾齊口之後,我今日就買咗一塊三文魚再測試下佢嘅威力,將件大約90克嘅三文魚柳切開小件。可能有D朋友話,好好一件三文魚做咩切開佢,哈哈!梗係有原因啦! 細嚿D Ling 去煎,用1/2茶匙油,四面都會脆卜卜,再洒上香草,好鬼正架!

有幾正,睇下佢個貓樣就知啦!知唔知咩叫貓視眈眈...每次煎親三文魚佢哋都會呱呱叫!


這是我今天的晚餐,好簡單架!剛才放工,去咗對面惠康買咗件特價$20嘅三文魚柳,炒咗蘑菇兼煮咗天使麵,個雪櫃仲有噚晚剩返嘅車厘茄,又一餐!

講開三文魚,仲有包零食想介紹俾大家,佢係抽乾水嘅超高奧米加三的三文魚粒粒! 吖! 弊! 大家唔好開心住,我想介紹俾...各位貓奴們,這包三文魚粒粒,我兩隻小魔怪愛到死,值得一試,我講D貓咪呀!