跳至主要內容

文章

顯示從 7月, 2010 起發佈的文章

變咗身...

上星期,講座完咗之後,有位朋友話,我之前介紹過嘅一款調味料已經無得賣,我心諗:唔係啩! 又無得賣?! 於是,我見今日有少少時間,就去搵下啦! 去到貨架,望咗一陣,啊!原來佢變咗身,換咗包裝,唔怪得大家就認唔出佢啦! 其實這個傢伙真係好鬼百搭,用來醃什麼也可以,點解?因為這個多用途調料用10多種香草混合一齊,所以同很多肉食都好Match,最重要係Salt Free的性格,啱哂注重健康的大家啦! 大約$32一枝,我今日係market place買的。

全天然Lip gloss...

我經常同D戰友講,如果要食切雞/豉油雞,無論你係食飯、食米粉,定係食米線,唔該真係要叫個廚師幫你分開上D切雞同粉粉麵麵囉! 有相為證,真係好鬼油,隻大肥雞嘅油就俾D五穀吸哂油,食完包你仲靚過塗咗chanel lip gloss呀!

8月份的時間表

我成日都話,光陰...唔只似箭,簡直像炮彈,轉眼間,又8月喇! 如果你哋D朋友仔有需要,就帶佢嚟啦! 這個是已經舉行到第28場的《肚腩...非減不可》免費講座,舉行時間全部一樣7:15-8:45PM! 3/8(二) 銅鑼灣中央圖書館地下1號活動室 5/8(四) 佐敦柯士甸道童軍中心1030室 9/8(一) 佐敦柯士甸道童軍中心1030室 18/8(三) 銅鑼灣中央圖書館地下1號活動室 24/8(二) 佐敦柯士甸道童軍中心1030室 31/8(二) 銅鑼灣中央圖書館地下1號活動室 留座電話: 2891 0920 (金小姐)

咩叫多同少呢?

有時候,多同少嘅定義,真係好難界定,即係好似你去茶餐廳,同個侍應哥哥講『凍檸茶少甜』,隨時去到你面前杯茶,仲甜過你上次無叫少甜果杯?! 面對住這個對大家尼講,滿佈外星字體嘅營養標籤,你又知唔知,每一個成份中,點先係多同少呢?用兩個簡單D嘅例子解釋下先啦! 在這個標籤入面,最左手面果行,就係講如果你食咗尼個麵,佔據你每人每日需要的營養素嘅百分之幾?睇下鈉質啦! 根據中國營養素需求量,每日鈉質要2000毫克,這個麵1個有1492毫克鈉質,咪即係1492/2000 = 75% 即是已攝取一日所需的75%囉! 咁你話多唔多?! 其實這個已是每容易睇,因此無論你高矮肥瘦,每天攝取上限都你2000毫克,但對於脂肪、飽和脂肪等等,唔同人係完全唔同架,而這個常見的百分比要求,是根據一個每天需要2000Kcal的人士要比較的,所以如果你一日唔係需要2000kcal的話,真係只作參考用囉! 其他營養素的每天建議量點睇,遲D再同大家講,慢慢消化下這個Post先啦! 驚大家消化不良呀!

很營養的晚飯

今晚完成講座後,很想吃這個東西,於是,就吃這個吧! 材料簡單非常,一眼見哂啦! 薯仔、紅蘿蔔、肉片,仲有一種材料大家應該見唔倒,佢係紫洋蔥,特別香甜,抗氧化能力高,仲有花青素,包你靚哂! 其實真係好易做,醃好肉片先啦!用咗d豉油調味,跟住加1茶匙油落煲,接住放已經切好的所有材料,再加半杯水,收細火煮20分鐘,主要等薯仔蘿蔔腍到你想要的程度就ok哂! 我係飯桶就緊係加咗飯啦!真係好好味又易做,明天試下啦!

小心湯作怪 (續湯水篇)

講件真人真事俾大家知,上星期日,返屋企食飯,當然有阿媽靚湯坐鎮啦! 唔知點解,唔知係咪我倆母女心靈相通,佢果晚竟然係煲粉葛湯,哈!有無咁啱先,我個專欄份稿就星期六寫嘅,寫完就即刻有得飲。好彩我有quota...因為昨天在專欄提過,用植物根莖食物熬湯,湯水含有碳水化合物架! 點知飲飲吓!發覺有d浮油,我當然問下啦!阿媽就話,已經用豬腱,無用豬骨。但無理由...真係有油喎!於是,出廚房睇,點知俾我見倒有件腳趾半飄浮,你話係咪俾阿媽激死吖! 在營養學角度,湯水中,營養素不是太多,但視乎湯料,有機會含有碳水化合物及脂肪等,若然有蜜棗紅棗調味,仲有羅漢果的話,就更甜,即含有糖份了。 所以戰友們,湯水容易令你增磅不自知,所以緊記告訴營養師,要不然,就會大大影響營養師安排餐單時的判斷了。

千奇百趣之神奇腰封

正所為舊患未癒,新傷來襲... 這幾天,由於要照顧患病中的小毛,經常需提取重物,所以纖腰...又再傷上加傷。見過脊醫,建議我還是借助腰封的幫助,好好支撐那條容易受傷的纖腰,用了一整天,便有這個體會。 今天,穿著這腰封到九龍塘吃午餐,奇怪地,人稱飯桶的我,竟然在吃過大半碗飯後,已覺飽飽的,飽得令我什麼也吃不下,簡直是神奇。可是你們千萬別問我這個腰封在那裡買,因為我不是在鼓勵大家這樣做,而是我想告訴大家,如果你正減磅,又要赴約吃自助餐的話,我強烈建議你還是穿一條窄小的牛仔褲應約,這樣更有助控制食慾呢?我曾聽說有些人穿孕婦服吃自助餐呢?為何...不需問吧! 另外,成功減磅的朋友,千萬不要買橡筋褲呀!因為這樣只會鼓勵你吃更多而不自知。

報左名未呀?

優先留位的期限,至今日咋! 你報咗名未?明天便會對外公佈了! 唔想再墮入標籤陷阱,就報名啦!

看標籤,學減肥

昨晚,在電台跟大家說過每日建議量的參考計法,相信大部份朋友仍是朦查查的。 上圖右手面的紅框框,就是市民大眾可以用的參考建議量之百分比,用個簡單d嘅營養素舉個例先,不如睇下鈉質啦! 成年人每日的鈉質建議量,是2000毫克,以這個餅乾中,進食100克餅乾的話,所攝入的鈉,是每天建議的32%了。自己計啦! 633/200 x 100% = 31.65% 其實,這個標籤仲有很多地方我們可以留意的,減肥戰友又有咩要特別注意呢? 想 看標籤,學減肥 的話,你可以參加由我黃詩詩主講的看標籤,學減肥的 免費講座 ,以下是舉行時間及日期,只辦兩場,有興趣的話,快d報名,我預留了一半位置給我的番薯們,星期四就會公開俾其他朋友報名,所以...快啦! 講座日期 26/7(一) 19:15-8:45PM 佐敦柯士甸道童軍中心1030室 29/7(四) 19:15-8:45PM 銅鑼灣中央圖書館地下1號活動室 優先撲飛熱線: 2891 0920 金小姐

優先訂票...延至明天公佈

好啦! 俾多一日時間未登記參加活動的朋友,我個免費『限定活動』的公佈時間將順延至明天,大家快d登入my facebook fans page啦^^明天就會公佈參加詳情。 (查實係咁啱,今天同事也忙,唔想加重她們的工作壓力吧!)

拜拜肉...唔該拜拜!

這組肌肉,較少使用,容易變得鬆弛,到減磅中期時,建議先用430毫升盛滿水的水樽進行,組數為12-15次,先進行2組。 但緊記,進行時需配合呼吸,用力時呼氣,放鬆時吸氣,另外手臂至手肘位置要固定,不要左右搖擺,否則效果減半。

仲有3日...

仍記得幾天前,我曾告訴大家將會有一個『Fans限定』的優惠嗎?距離截止的日期,仲有3日咋!星期一晚,我便會公佈活動的參加詳情,而若果你已成為我的番薯,你便可以獲得是次活動之優先訂票喇! 登記方法: http://www.facebook.com/pages/Nutsdiary/168200145689 接住個like鍵,再登入你個面書的account就可以了。 好喇! 快手d,我就要準備我個多小時後嘅減肚腩show^^

我已選低糖產品了!

相信大家對低糖這個產品,不會感到陌生,很多戰友更會視這個聲稱為免死金牌,以為低糖就是健康。 根據香港的營養標籤法,流質飲品中,每100毫升中,若糖份不多於5克,即1茶匙糖,均可稱為低糖,可是這個聲稱,就未必適合戰友收看喇!點解?大家試想想,1盒250毫升的豆奶,若果真係低糖,即是含有最多12.5克糖,即係2茶匙多d啦! 舉多一個例,現時市面上有很多扮健康嘅糖水飲品,大部份都係500毫升的,如果係低糖產品,都有25克糖,即5茶匙糖,熱量是100kcal,減磅期間,100kcal可以換來大約半碗米粉+1個加拿蘋果,或者1隻地捫香蕉,所以我哋會建議戰友省回這些熱量,換些飽足感更高的東西。 美國心臟協會曾經建議過,男性之糖份最高攝入量是9茶匙糖,而女性就是6茶匙,這樣計算,飲一枝500毫升低糖的飲品,已大約是攝取的上限了。但若果你已減磅成功,間中飲些低糖飲品,還是可以的。

戴眼識餅

多咗個營養標籤,對大家來說,是更方便或是更頭痛呢?個人認為,有當然更好啦!因為大家可以知道放咗d咩落口嘛!點解個標籤咁緊要,玩完這個遊戲大家就知。 以前,大家在餐與餐之間想充飢,諗住健康d,會揀咩餅,我相信大部份朋友會話,梳打餅囉!味啖啖,好健康吖! 好喇!今日準備咗5款餅俾大家揀,唔知大家從佢嘅營養資料,知唔知佢係咩餅呢? 不過估之前,同大家溫吓書先,仲記唔記得我講過可以點揀健康餅呢? 首先,100克的熱量最好少於430卡啦!跟住脂肪就最好少於14克,糖份低過10克,鈉質呢?少於700毫克啦!好...去相... 1號候選餅仔: 熱量:446卡;脂肪13.2克;糖份0.6克;鈉質633毫克,佢勉強可以過關啦! 佢糖份少,應該係咸餅乾啦! 2號候選餅仔: 熱量:535卡;脂肪:30克;糖份:8克;鈉質:490毫克,脂肪咁多,你係咩餅呀?肥死人咩!? 3號候選餅仔: 熱量:483kcal;脂肪:24.4克;糖份:30克;鈉質:420毫克,嘩!你都過唔倒關啦!又肥又甜...不過咁,無2號仔咁肥囉! 4號候選餅仔: 熱量:521kcal;脂肪:29.2克;糖份27.8克;鈉質:150毫克...你好似同2號仔一樣咁肥啫!不過你就仲比2號仔甜...你應該都係甜餅囉! 5號餅仔: 熱量430kcal;脂肪:11.6克;糖份:3.2克;鈉質:660毫克。你都算最合格喇! 各位朋友,估唔估倒佢哋係咩餅呢?我知道你哋無可能估到,不過...我諗你點都估唔到,2號仔竟然係一盒...梳打餅啫!佢嘅脂肪量,竟然比3號仔嘅朱古力曲奇高,仲要同4號仔嘅藍色曲奇餅一樣咁多脂肪,你話死唔死! 好啦!開估...5號仔係佢... 佢就係1號仔! 好肥嘅梳打餅係邊個,大家去超市睇下啦!佢個盒係藍白色的,所以選梳打餅都要小心格脂肪呀!如果唔係,肥咗都唔知咩事~~

優先訂飛?!

早幾天,已經想跟大家說,說什麼?總之有嘢玩啦,仲要係exclusive... 為咗答謝大家對這個營養師手記的支持,我準備了一個活動給大家,作為我的番薯,你哋係可以優先訂飛,但未成為Facebook fans 的朋友,快快把握這一個星期,成為fans,因為過後就未必有得參加喇!個活動是先到先得的,留意住啦! 但若果你未成為我的facebook fans,就登入以下個網頁,click個like字,再登入自己的facebook account就可以了。 http://www.facebook.com/pages/Nutsdiary/168200145689 手快有,手慢無呀!!!!!!!!!!!!!快啦!

點解變咗花面貓?!

營養標籤推行咗1日,有無遇過古怪事呢? 其實如果細心D嘅朋友,應該喺好耐好耐以前,都見過上面張相嘅慘況,吓!點解個招紙好地地,會俾人畫花哂架?!咁會唔會有咩問題呢? 原因有兩個,第一個係,由於現時營養標籤法例,是有小量轄免制度的,若該商品年銷少於3萬件的話,可申請豁免營養標籤,可是若該商品付有營養聲稱,便不可獲得豁免,所以由於以上產品豁免了營養標籤,所以他便不可以有Light/Fat Free等聲稱了。但個人覺得,你都塗得靚仔d吖,咁嘅樣,都幾嚇人架,仲有呀仲有呀!你個營養標籤豁免個貼紙,可唔可以唔好遮住人哋國家個營養標籤先,而家我咩都睇唔倒,好煩。 好! 塗黑營養聲稱嘅另一個原因,係各處鄉村各處例,若果某種外國產品,太多人買,唔可以申請小量豁免,但佢個聲稱又唔合乎香港的要求,咪唯有塗黑佢囉!