跳至主要內容

文章

顯示從 1月, 2010 起發佈的文章

有朋自遠方來

有朋自遠方來,吖!都不是太遠,4個小時航程的日本吧!真係興奮,點解?因為又可以俾我扮美食專家,帶這位剛成功完成減磅計劃的戰友,周圍去覓食!這天,她想一試西菜,就帶她到我最愛的一個Hea點,吃個午餐+下午菜,吃了一份絲薄0.02mm pizza...唔係,應該係超薄先啱! 另外,當然唔少得沙律啦! 講開pizza,經常有戰友問:點解減磅進行中,唔建議食pizza呢? 主要原因,係佢用了很多芝士吧!而那些芝士更是全脂的,1/6個12吋的正常厚度pizza,已經有260卡,即等同吃了1 1/3碗反,所以都唔係好抵,暫時唔好食住喇! 但係,我又點會咁衰,引誘完你哋又話唔食得住,見明天是星期日,就自己做吧! 首先去買個嘉頓的pita bread做餅低,跟住幫個pita bread 油滿tomato paste即番茄膏,跟住放自己愛的材料,我就鍾意放切片新鮮蘑菇、火雞絲同車厘茄仔,當然唔係成粒放啦,要切半,唔駛講啦!最後就係加切好幼條的低脂芝士,我愛洒上黑胡椒及少許香草,做出來的是米芝蓮3星水準架! 放入焗爐一陣就ok!講起都想食,如果我明天真係做的話就影個步驟俾大家睇啦!而家用少少想像力+dd烹飪細胞做住先啦! 死火,講開食有d肚餓添,下次都係唔好咁夜寫講食物嘅post喇!

米路仔的生日餐

噚日,即係2月28日,係米路仔生日,見佢生日,就準備一份自助餐俾佢 (話時話,貓貓日日都食自助餐啦~),揀咗佢最鍾意的大蝦同巴西頂級雞柳,即是上圖! 由於要影俾大家睇,我影相時候Moo喵喵嘈,但係好奇怪,當時只有Moo係度喵,竟然唔見咗為食貓Milo,當我四周圍搵佢之際,我就見倒佢... ...自己急不及待走入廚房,成大件雞肉咬,你哋自己睇喇!真係笑倒我標哂眼水! 你哋話係咪俾佢激死先!!同場仲加影milo招財貓一隻,見唔見倒佢個為食樣! Milo Happy Birthday~~

集齊一套未?

這幾天,很多人談論起這一套多啦A夢 (唔好扮細啦! 我細細個時,佢明明叫叮噹?!) 星期日,細佬打電話俾我,叫我去街嘅時候留意下,仲有無一套出售,我行咗幾間麥當當,全部人都答我賣哂! 咁無辦法啦! 唯有幫佢係度呼籲下,如果有人見倒佢嘅蹤影,就話我知啦! 講開集齊一套嘅問題(又在借題發揮),唔知大家都集齊我一套三本嘅著作未呢? 如果未,就暫時要等下喇!因為前日出版社話我知,第三本,即是 竟然然然然然然缺貨,現在加印中,所以欠一本嘅朋友,就等多一個星期啦! 但若果你已經集齊一套三本,就恭喜哂,獎你兩張2月10日(星期三)係銅鑼灣中央圖書館的 talk show嘅門票,係咪好體貼呢?Hehehehe.....Anyways,多謝大家的支持啦! 講俾大家知我今日去咗邊度tea,咪就係去咗佢屋企囉! 今日飲咗佢,都唔錯,一杯走糖的skimmed milk latte~Yummy!! 唔講喇!米路仔生日,準備咗自助餐俾佢!Bye Bye!

不要吝嗇...讚賞

有時候,能為其他人帶來歡笑,是幸福的! 今天,好不容易才騰空1個多小時,閃去中醫館覆診又找推拿師鬆一鬆,一見到中醫,她是這個開場白:幹嗎今天竟然有時間來看我,還做推拿?我於是說:沒辦法啦!你說我要做個乖乖的病人吧!要不然我的百日咳不會好!她當然點點頭啦! 接著,當她全神貫注地研究我的藥方之際,我對她說: 你真是很犀利,上星期五,我突然感到很不舒服,連同事也說我成隻病貓的樣子,但看完你之後,飲了兩劑茶,人就像叉了電一樣,老虎也打死幾隻,同事立即問我你的中醫叫什麼名! 老實說,我是說得誇張了,但中醫聽罷,會心微笑,連眼睛上的魚尾紋也看得清楚~一句說話,可以逗人高興,使人快樂,是這麼的簡單,但你又有否發現,平日的你,多了怨氣,少了讚美,人往往吝嗇讚美的說話,嘗試欣賞別人,其實很簡單。 讓我說個親身經驗吧!前幾天,一位減磅新丁拿了我的餐單,那天她很是著急,因為她發現,我給了她份量很大的餐單,於是希望我減少份量,我立即告訴她,不打緊,就跟著餐單吃,必定可以瘦下去,一星期後,她回來了,瘦了兩磅,她告訴我,你很犀利呀,我的細碼衫就靠你了!雖然入行已十一個年頭,這些簡單的說話,已叫我開心了好幾天!!!哈哈哈!人與人之間,很需要這些正能量吧! 我是一個頗喜歡逗人歡喜的人,我懂得想些東西令自己開心的,例如,明知杯中藥超苦,我就決定同朋友到咖啡廳,拿個咖啡杯用來剩藥,感覺是不是更好呢?我有一句格言,人是會唔開心亦會失落的動物,但我絕不容許這種感覺維持多於一天呢!試試吧! 這個星期要繼續食苦口良藥,唯有找甜品送藥,無論你需唔需要飲苦茶,推介這超級抵又甜又好味的韓國士多啤梨,好正架,唔信,你睇下喇...無哂! 佢唔止好食,仲要勁低於,一粒約有3卡,1份水果,食15粒都得啦! 係咪好靚呢?唔係D士多啤梨,係我張相呀!

你今日睇咗未?

我唔係只想問有無睇我個專欄,其實係想話俾大家知am730已經有iPhone Apps喇! 快D去Apps Store 免費下載啦! 各位iPhone迷以後就可以用個iPhone睇一份咁精彩、咁用心辦報嘅報紙喇!

宣傳技巧

係咪好soft呢?我唔係講D朱古力呀!我講嘅係上一個Post的Selling Technique,軟銷嘛! 原先真係諗住唔會係個Blog講答案,以免個講座無人聽,不過咁,我知有D朋友晚晚8點幾9點先放工,都無可能聽倒個講座,所以都係講少少啦! 簡單來說,要知道黑朱古力嘅熱量,你一定要知佢點做出來,喂!但係你哋食咗佢咁多年,你哋又無理由唔知佢用咩做啫!又玩自己呃自己? 朱古力嘅主要成份,係可可油啦!當然仲有糖,比例多少,就要視乎各個品牌有少許出入,而黑朱古力,就係減糖走奶的朱古力吧!但相對可可油又多了,減完又加,仲要多咗油,所以同有牛奶同多咗糖的牛奶朱古力咪變成差唔多咁高熱量囉! 成日聽人講,話咩朱古力有可可多酚,什麼抗氧化又對心臟好,係!係有可可多酚,抗氧化又的確對血管健康,但係仲有十萬九千七種食物有抗氧化營養素又比朱古力健康呢?朱古力的脂肪有58%都係飽和脂肪,脂肪佔熱量約64%,又肥又甜仲叫健康,有可可多酚就係對心臟好嘅說法,係大家想放朱古力入口嘅藉口啫,仲係朱古力生產商的廣告銷售策略吧! 俾D數字你睇啦!(100克計)(嗱!個別生產商會有少少少許差異) 85%黑朱古力 598Kcal (脂肪42.6克+糖份24克) 70%黑朱古力 579Kcal (脂肪38.3克+糖份36.7克) 牛奶朱古力 535Kcal (脂肪29.6克+糖份51.9克) 唉!又話講少少如今講咗咁多,咁攪法!明天講座無人聽點算??!! :)係呀!明天有講座呀!!!記唔記得呀!!!!!!!!!!!!!!!!!!!

苦口良藥

好苦好苦苦苦苦苦,中醫呀中醫,點解你D藥一次苦過一次,莫非真係苦口良藥?! 好! 今日想同大家玩個無獎問題遊戲,下面有三牌朱古力,你哋知唔知邊排肥D熱量高D呢?嗱!睇清楚喇!有高純度99%朱古力、85%中純度朱古力同普通苦度70%朱古力。 如果你答我黑朱古力係無牛奶朱古力咁肥,又或者你答我愈濃愈唔肥的話,就獎你明天去各大書局,買本 、 及 ,一套三本書喇! 但如果你買哂我三本書,都仲答錯,你就應該報個名,去聽 補一補習囉,個訂座電話係2891 0920,咁你就知道答案喇~哈哈哈哈! 個講座係下個星期一(25/1) 7:15-8:45pm 銅鑼灣禮頓道第一商業大廈601室!!!!!!!!!!!!!!!!! 唉!不過希望中醫D藥真係可以快少少令我好番啦! 如果唔係苦咗幾劑咪好唔抵!

東京搵食篇

你哋都得架喇!一個二個成日引誘我返鄉下,你哋問我去邊度食嘢,就介紹下啦! 這間壽司店不錯呢?但要等位,所以2點先食會好D... 不過留意營業時間,星期一至四中午14:45後好似休息,跟住晚上先開,週五至日就沒有中場休息時間! 這是它的網頁,該店舖在一個叫Mark City的商場內,East Mall 4/F 美登利壽司 www.sushinomidori.co.jp/shibuya.html 這間是我必到的拉麵店,叫一蘭,東京都內有多間分店,佢可以自己決定油份多少,記住拿English Menu,搵沒有油的,因為湯底豬骨煮已經好肥,所以不耍另加油了。見你哋去旅行,食一碗啦!返到尼香港先再努力啦!係呀...千奇記得一定要食隻蛋,建議追加多一隻,實在太好食喇! 這是涉谷店的地址,毗連 0101 JAM,位於地庫,其實池袋也有分店,但個人覺得涉谷那間較易搵!好啦!玩得開心D啦....各位!不過最好行多D,最好唔好肥咗見我啦! http://www.ichiran.co.jp/pc/hp/tenpo/tenpo/shibuya.html

不要以貌取...生果

睇下個桔...係咪好醜樣呢? 噚日,同朋友行超市,行過生果檔,我就指住D沙糖桔話:這個桔好好味又甜,不如買一盒,一人一半啦!佢竟然話:個樣咁乾,會唔會好酸架! 於是我就話,好多嘢唔係只看外表,好心你啦!成日話皮膚乾,又成日都唔食水果,一個橙有約86%水份架,個桔都唔知幾有內涵! 離開超市之後,我急不及待開咗個桔,佢食完之後,甜到入心,你哋都試下啦!!

咁又1個月喇!

好似噚日先倒數完咁,眨下眼,2010嘅第一個31日又就快過喇! 好緊湊嘅講座日程,已經過咗4場,又係時候預告下2月嘅節目表喇! 即是那一場『肚腩...非減不可』的免費講座! 不過咁,好似眼大睇過籠,原來1月最尾場唔記得Post,大大大大大大大件事喇! 好似得8個觀眾添! 咁又係大家發揮團結就是力量嘅時候喇! 知道點做啦! 如果唔係就唯有小班教學喇! 25/1 (一) 銅鑼灣禮頓道33-35號第一商業大廈601室 好啦! 俾埋個2月節目表大家先... 3/2 (三) 佐敦柯士甸道童軍中心1030室 10/2 (三) 銅鑼灣中央圖書館地下一號活動室 26/2 (五) 佐敦柯士甸道童軍中心1030室內 全部場次只設夜場 7:15-8:45pm,講座前15分鐘設免費度脂肪時段,有時間早D到! 報名電話2891 0920 ,金小姐洽!

飲勝...

這兩天,逛了超市,有咩收穫? 我記得幾個月前去日本嘅時候,係涉谷街頭,有人派咗1包Lipon蘋果菜包俾我,我返到香港先試,原來好香好好飲,一直都想知香港有無得賣,今晚行又一城間taste,俾我找到另一品牌的蘋果茶,返屋企後即刻試,一樣咁香,都唔錯啦! 有d朋友好怕飲清水,不妨加個茶包試試! 這枝CC lemon係減肥zero版,新產品喎,點可以唔介紹俾大家呢?暫時只見佢係吉之島出沒,其實今時今日減磅戰友的選擇已比從前多,有咁好嘅配套,就要加油努力瘦身啦!

等咗幾個月喇...終於等倒!!

一個人可以有很多減壓的方法,我的選擇,多的是呢? 要發洩麼?我會選擇寫出來,上星期大家也見識過,若時間多,打壁球,真的不錯,出一身汗,什麼也忘記了,天公造美,多跑3公里,同樣可以;但看書,是我最愛的方法,特別是她的書,要放鬆,當然不能找村上春村吧!他的書,不是這時候看的,所以高木直子的,就是讓我放得很鬆的佳作。 半年前,到一家日本書店,已知她出了新書,可是未有中文譯本,昨天,打過書釘,給找倒了,我是她的超級Fans,看她的書,讓我回到一個童真的世界,八卦地看一看她的簡介,原來她的年紀與我相約,總覺得她想的與我的十分相似,這是我愛讀她作品的原因。 減壓方法有很多種,要減壓,才會健康,天天活在壓力煲,人會變得沒方向,腦袋也像是死了一樣,如何放鬆,是需要學習的,我學了3年,現在上了大學了,要是你未學懂,2010年就開始吧!

多謝你...我會做回自己

這個星期,我就像在極速成長!我學會...保護自己,免受傷害。 這7天內,曾試過失望、忿怒、氣餒,心裡有著很多的懷疑,事情讓我認識到人性是什麼一回事,曾經有數分鐘,我相信人性是醜惡的,對任何人也失去信心,但最後袮讓我明白,原來上天,真的在看,多謝你給我的指引,我會做回自己,繼續做一個好人。 戰友們、讀者們、朋友仔,除了衪,你們是我的正能量的來源,你們給我每一句的留言,簡單的一句問候,就像為我加油、充電,曾為我充電的,還有這杯可愛的咖啡。 我愛咖啡,相信很多朋友也知,有些戰友說:不要多飲,咖啡不太健康。說實話,多飲,真的不好,但若果是每天不多於2杯,他倒是人動力的來源。咖啡會令人失眠?對於大部份人而言,或許是,曾看過一份報告,說咖啡因令人清醒,約4小時,所以睡前4小時,不想眼光光,就不要飲了。但我,是蠻可愛的動物,我一飲咖啡,就睡過去,比沒有飲的,睡得更好!或許是我愛的是Latte,即鮮奶+咖啡,鮮奶含色胺酸,令人放鬆心情,容易入睡!即是就,我愛的latte中,色胺酸打敗咖啡因吧!所以一飲即睡! 又有人說,咖啡因影響鈣吸收,但所謂影響,只是影響約1湯匙奶的鈣吸收吧!所以如期戒咖啡,不如多攝取高鈣食物呢! 這家咖啡真的不錯,是放鬆心情的好地方,有緣的話,咖啡店見! 尖沙咀麼地道67號半島中心地下G36號舖(星期日是休息的)

有營的日本手信

你哋就好啦! 咁多戰友去日本旅行,既然大家咁開心,就介紹大家買一種非常健康又好味嘅手信啦! 這是它的網頁,有好多款,這個是我認為最好食嘅,點解?咪又係日本人嘅衰嘢囉! 期間限定產品。 http://www.bankaku.co.jp/online/tenmari.php 另一種就細細塊,上次我買俾D戰友當手信的,都好好味,1包有好多塊,最好用尼當零食。 http://www.bankaku.co.jp/online/sakusaku_nikki.php 睇完之後,記住...買俾關心你嘅人喇~~很多百貨公司的食品部都有售,成田同羽田都有得賣! 我平時會在新宿高島屋及新宿伊勢丹買嘅!

天災無情,人間有愛

我們,成長於幸福的土地上,未嘗天災;但在此時此刻,毗方的他,家園盡毀。天災雖無情,但我深信,人間總有愛! 紅十字會網上捐款 https://donation.redcross.org.hk/onlinedonation/user_donation.asp 或者你可以將捐款直接存入以下香港紅十字會戶口「香港紅十字會賑災及發展專戶」: 匯豐銀行 002-205490-006 詳細資料請瀏覽紅十字會網頁 http://www.redcross.org.hk/tc/disasterrelief_prepard/appeal_update_detail.html?year=2010&id=671

嘩!好鬼體貼!

話時話,仲有一個月零10幾日,練咗跑未? 這個馬拉松福袋,係咪好窩心呢?話說我有班朋友仔,報咗馬拉松,上上個星期,佢哋約埋一齊,去練跑?你錯喇!係買鞋,仲要有成個福袋送!個袋都好體貼架,有埋止痛貼,講真如果有熱身又有Cool Down的話,乳酸就會好容易帶走,咁就唔會痛啦!仲有呀!練習都好重要,因為練習下,肌肉就可以貯存多d肌醣,耐力就會好d,即係好似金霸王電芯咁,用得耐d。 哈哈!見D Friend買得咁開心,我都買咗新波鞋,你哋睇下大細毛幾開心! 我對新鞋仔係咪好靚仔呢?

充實的一天

噚晚咪話俾大家知做了八道菜,這就是成果,上面用錫箔紙包著的,是番茄肉醬焗薯,除了小朋友外,大朋友都可用來作減肥餐吧!但當然要用瘦牛肉啦!傻仔...吖!係薯仔,是減磅伴侶,特別係天天街外用膳的你,可幫助去水吧!薯仔的鉀質也高呢?簡單的做法,可加入茄汁豆豆,酸酸甜甜的,是不錯的午餐。 做小朋友的菜式,顏色配搭是很重要,攝影師要影張靘相,更要用些玩具作綠葉,這是難不倒我的,我整個office也是玩具,你看!這兩架小火車也是攝影師在我房間偷的! 見唔見到我在偷影著他們呢?攝影機也讚我的新玩具很cool... ... 今天是講座的第三場,在這裡也要多謝首兩場觀眾給我的反應(即是無反應),能助我加插/減某些內容,今天的講座,好多了,最起碼沒有漏任何一張slide!感覺也好,大家反應也熱烈,連不該笑的,也無故笑了! 講座後,逛了萬寜,有個開心大發現,今年的農曆新年,大家的全盒有新住客了,就係隻駱駝xylitol,仲要係獨立包裝,好!明天要與我會面的戰友,送你每人一粒,預祝明天減磅成功!

偷食...原來也很飽

今晚,沒有正式的晚飯,但現在的感覺還是飽飽的!為何?很簡單,這種進食方法叫做...偷食! 哈哈! 不知大家曾否試過呢?邊吃邊煮,感覺蠻好!但戰友們,請緊記,試味也是進食的一種,應當毫無保留地,填於飲食日記中,否則,嚴重影響營養師的判斷呢! 一個晚上,做了8道菜,幸好兩位好同事+一位好朋友相助,否則通宵也未能完成。上面那份肥貓三文治,樣子不錯吧!若有人做這份愛心三文治給你,相信天天 也會甜在心頭。 做菜的味道重要外,整色整水也不能缺,所以這三種顏色必定在菜餚中,它也是我的摯愛。 做這個時絕對是重拾童真,我愛車車,小時候那輪日本車仔,好像叫RunAbout...是我愛的卡通車仔icon。看我的傑作,是用米飯做成pizza底的,再加少許七味粉及芝麻,放在熱騰騰的鑊上煎,金黃色的,很美味,比傳統的pizza更香! 這個是製成品,若果你是小朋友,也愛這個嗎? 偷食的除我以外,還有佢... 細心點望,他必定已偷食了,你看他的小嘴,濕濕的,肯定是偷食完未抹嘴,所以若你下次見營養師前,偷吃了哈根大師雪糕,緊記抹嘴,我對這家雪糕店的味道太熟悉了,我一聞便知道! 真的夜了,已是03:40,明天是第三場講座,希望比先前兩場更好!

又多一個選擇...會唔會又有障礙呢?

哈哈!又完成了一場講座,由於個講座仲係beta版,所以近日都努力於講座中,開了無數的會,練過無數次,希望大家聽畢後真係有所得著啦! 已經唔記得有無介紹過佢,左面那枝是新上市的,加了檸檬味,很清新啊!如今想攝取更多維他命又有多個選擇啦!但這幾天我多飲右手面那枝,因為檸檬酸酸的,怕刺激喉嚨吧!話時話,算算手指12月21日到現在,已經是23日,即係我已經咳咗足足23日,究竟這個可惡的23日咳幾時好呀!

原諒別人,放過自己...唔係咁簡單

其實,今日好忙,完全無可能在寫Blog,但係實在想寫... 我現在的心情,唔知點形容,係失望、氣憤,定係...真係唔知!我只係知道咩叫做俾個良心你當狗肺,只係知道咩叫做打完齋唔要和尚!點解人人都係利字當頭,點解永遠都要你攞哂著數! 起初我毫無條件答應,俾個心你,將我嘅經驗同你分享,係毫無保留同你分享,換來的是什麼????做咗咁多年人,點解仲要咁天真,唔通我真係要妥協。 1個月前,我曾經因為另一件事而忿怒,有一位戰友的媽媽,知我愛看書,借了本『原諒別人,放過自己』給我,我明白...完全明白,但未學懂呢?又或者,我現在不是忿怒,而是不明白自己為何仍這般天真呢!竟然為了這事,流了一滴淚...

爆咗喇...唔該哂!

知唔知我影咩?咪係你哋囉! 今個禮拜兩個講座都爆哂喇! 唔該哂大家幫我迫爆佢,咁開心嘅場面,一定要留住這一刻啦! 如果你都想尼我主持的減肚腩party,當然仲有機會啦! 今個月仲有兩個,記低個時間同日期喇! 18/1(星期一) 佐敦柯士甸道童軍中心1030室 25/1(星期一) 銅鑼灣禮頓道33-35號第一商業大廈601室 時間就係晚上7:15-8:45PM,留個位就要打尼個電話2891 0920金小姐洽

週日遊記10012010

唉!噚晚發咗個惡夢,攪到晨咁早起咗身,一於決定去做魚,游來游去,都唔知幾爽! 跟住,個Friend心血來潮話想去中環行下,鬼咁心急,好似催命鬼咁,攪到我唔記得帶玩具出街,咁靚嘅景無咗個玩具,真係浪費,唯有用住個傻瓜機啦! 你估下我望咩望得咁入神,咪流浪貓囉嗦! 其實我每一次去旅行,都好鍾意去街市,因為街市係最可以睇到毗方人民生活嘅地方,中環,或許有較多外國人,所以竟然有寫英文的價錢牌,特別可愛! 影完一陣相,當然要去hea啦!叉好電為busy week 做好準備,這次叉電的地方,就係文華東方嘅cafe,杯咖啡同個包包超好味,係我嘅摰愛,有時候簡單一份Bread and Coffee,已經好滿足。 邊個偷影我...好啦!一次過兩個Post,應該飽哂啦!記住去facebook玩遊戲,有禮物架!

有無掛住我...兩隻愛貓呢?

我都唔知幾體貼,知道你哋會掛住Milo同Moo,所以今日決定搵佢哋兩隻嘢同大家say句Hi囉! Moo: helloooooo...俾我霸倒喇! milo囉,成日霸住個basket,佢惡到一腳申放我,所以我見佢去咗便便,冷不提防就霸住咗! Moo: 知唔知我大大眼望住d咩!咪惡霸技安milo囉! 你哋睇下佢吖,bear住我,話時話,佢好似肥到成個波咁,主人尼喇~細佬,你快d去廁所啦!又要上磅喇!放低d便便都好,可以輕成磅架! 主人今日好開心,因為細佬係冬天一D都無肥到,我哋同人唔同,人係冬天會著多件衫保暖,但貓貓唔會,所以我哋會食多少少嘢,所以為咗細佬,主人日日都同我哋做好耐運動,你哋睇下,有圖為証,Milo最愛這隻草蜢,跑得好勁架! 係呀...主人話提下大家,有獎遊戲好快就有得玩,會送出主人自己做的大細毛月曆,叫大家留意住佢個面子簿喎!