跳至主要內容

文章

顯示從 5月, 2010 起發佈的文章

SugarFree...念慈菴

閉關一天,趕稿的進度,算是超額完成,今天完成了6000多字,尚有5000多及一些後期工作,可望能趕及在書展時,跟大家見面,其實,不是全新的作品,只是專欄的結集,但決定多插些新資料,令讀者看得更方便啊!希望大家喜歡。 話時話,時間確實過多太快,轉眼間,原來失聲後伴隨的咳嗽已達第20天了,情況好像沒好轉,其實從小到大的肺功能也是較弱的,這亦是我這麼愛游泳的原因,若小時候沒有習泳,情況肯定更差。 唯有再尋秘方,戰友告訴我,念慈菴是不錯的,還記起上回的百日咳,也曾一試,今天,再跑去買枝看門口,怎料,念慈菴這個老品牌,也追上潮流,玩Sugar Free... 我比對過成份中的差異,只有一項是不同的,蜂蜜變了麥芽糖醇,又是Sugar Alcohol家族的天然代糖,那就太好了,減省了不必要的糖,希望下星期,頑固咳嗽可離我而去! 差點忘記,這一個真是要介紹給大家,超體貼的度身訂造枕頭一大個,由於近年,我的頸椎、腰椎等也出現嚴重事故,所以我非常注重枕頭及床褥的質素,畢竟,睡覺質素的好壞,嚴重影響整體健康啊! 這陣子留意過一家牌子,但沒減價時,就是太貴,所以這幾天一田減價,我立刻飛去,你看... 她們會根據你的頸椎的情況(即場量度的),告訴你那個大小的枕頭才對,當然,請不要怕羞,一定要試,試過你會明白,枕頭的高低嚴重影響睡眠質素,今天我開著turbo,稿件超額完成,也多得它。當然,這方面,我不是專家,只是用家角度,有興趣或剛巧要換個枕頭的話,可以看一看這網頁,但不懂日語的,就用google 翻譯吧! http://www.lofty.co.jp/kisokoza/index.html 我這個是中碼的,85折後好似$710 我也要好好睡一睡了。

完美主義...係無得醫架!

總係覺得,昨晚那張臨急臨忙影嘅相,好難接受,所以,今日再影一次!係咪差好遠呢呢呢呢..... 再一次證明,同一件事,只要你花多一點心意,效果完成不一樣!我而家一面寫,見倒張相,都好想再食,吖!係呀!你哋有無人知,這個黃詩詩出品的三絲炒竽絲,有幾多卡路里呢?估下先啦! 話時話,近期愈來愈愛下廚,仲好鍾意同食物影相,但係我就有一個煩惱,次次煮咗咁多嘢之後,又唔可以食哂,都唔知點搞!好啦!瞓喇!明天24小時閉關趕稿!要叉足電。 答案:115Kcal,係咪超低卡又飽肚,一邊睇波一邊食,正~~

我的減肥餐

你一定會說:又減,仲有咩減? 由於今個週末有生日飯的關係,所以明天就是要吃得清淡一點,順道教教大家怎樣做一個減肥餐。這個,是否跟上館子吃的差不多呢?有點像韓國菜中的炒粉絲,看清楚一點,他其實是這期大流行的竽絲吧! 再說多一次他的背景,好讓新來的朋友知多一點。 竽絲是一種植物的莖部位置的東西,當上減磅流行食物之一就是因為他高纖而且沒什麼熱量的,這次用的一包就只是20Kcal,即上圖份量,平日慣常見的是一扎扎的,一次可用14扎吧!熱量只有很少很少,不用計也罷!但由於高纖,不能多吃,因某部份朋友吃得過多(多於14扎)會出現腸胃不舒服的,而且平日常吃的話,也要伴隨少許米飯,以免熱量不足! 以我明天的午餐為例,這盒是送飯的,還有2/3碗飯,飯桶總要吃飯! 好些朋友煮這個時,就是放入水,烚下烚下,沒味道的,我愛的卻是炒,先用1/2茶匙油,加入蒜泥,再加入配料,這次用了蟹柳4條、瘦肉絲40克、冬菇2隻(剛才在sogo想多找些菇煮,可惜什麼也沒有,幸好有些乾冬菇存貨,最後加竽絲,當然要調味啦!一湯匙美極(約1000毫克鈉質),平日我必加指天椒,但由於咳嗽仍未痊癒(而且今天偷吃了譚仔),所以下次才加吧!不要忘記多吃2碗菜,這樣才算均衡。 哈!這個是什麼,我在鄉下買回來的玩具,很有用的,做食譜時是不錯的綠葉!

おでん(關東煮)

遊日期間,晚上跑到便利店是每位港人的指定動作,沒辦法啦! 香港朋友就是夜鬼一名,總不想早早就臥在床上吧! 每次,我都愛買些關東煮回酒店,嘗嘗這東瀛風味。有讀者問:關東煮肥嗎?實不能一概而論,因關東煮由很多食物組成,而且不同縣市也有不同風味,最重要是關東煮的資料,也是日語的,所以我只可告訴你我所知的。 我慣常買的,均是我肯定了是低卡的配料,例如我愛的蘿蔔及竽絲,上圖白色類似粉絲的就是了,根據日本營養部的數據資料顯示,100克的只有6Kcal,而當中的纖維量已有2.9克,所以我愛建議減磅戰友,將她加入食物當中,是有效的填飽方法。上圖的金黃色東西,很明顯,就是炸物,例如是炸魚捲、豆腐等,當然是高脂肪的。還有一種是健康的,就是海帶捲了,圖中:即上次遊日期間,相信是售罄吧! 這本書,是上上上上年回鄉期間帶回來的,很有用,因為日本朋友常吃的食物之營養資料,也可以在這裡找到,有興趣的話,下次返我鄉下時,到書店找找,食物名稱是有英語的。

明晚約定你7時正

明天,又是減肚腩講座的日子,金美小姐話我知, 仲有15個名額 。如果大家明晚有時間,又或者好似我咁,臨時俾人放飛機,就快D打電話俾金美,留個靚位啦~~2891 0920 26/5(三) 佐敦柯士甸道童軍中心1030室 時間 7:15-8:45PM 1/6 (二) 銅鑼灣-- 已經滿了 3/6 (四) 荃灣大河道72號荃灣大會堂展覽館 (荃灣廣場側) 7:15-8:45PM-- 尚有10多個名額 費用: 一顆渴望夏天來臨前,瘦身成功的心 P.S.早D到,即約7點,仲可以測試下自己有幾份件肥膏

多樣化就是如此

各位哥哥姐姐,係咪好耐無見過我哋呢?你一定會問,點解我哋咁friend,坐埋一齊,好簡單,咪因為... 有冷氣涼囉!涼透後,就開戰... 望咩望,我瘦咗認唔倒我,仲望?咬你架! 如是者,佢哋每一日嘅運動,係包括怒目相向,及互相追逐。 Milo:主人?無端端做咩影我哋d食物俾大家睇呀?你D戰友唔知會以為你又係City baba發現新產品架~~全新上市,奧米加三高蛋白水浸三文魚啦、蝦肉啦、仲有吞拿魚,係咪好羨慕我哋呢?! Moo:你唔好玩啦! 主人一定係想借題發揮,所以先影我哋D食物啫,你唔好攪攪陣啦! Moo,你講得好啱,我的確想借題發揮,我記得有一次,我細妹曾經問過我,點解你d貓罐頭要梅花間竹咁放,我就同佢講,因為我唔想佢哋每日都食同樣的食物囉!有時係雞肉、有時係三文魚,每一種食物,都有唔同營養嘛,每一種都食,就唔會欠缺某一種營養素啦~另外,有時都會轉下牌子,以免某食物有問題的話,咪中哂!所以一早間住間住放,咪唔駛記住昨天吃了什麼。 另外,我仲想講,昨天我放了枝很好味的低卡糖漿上來,有一位戰友問,代糖有沒有問題呢?這個課題,多年來也說了很多遍,但我個人這麼長氣,就多說一次吧!任何東西,也有安全份量的,只要是正常使用份量,是沒有問題的,點先正常,我諗你食一片格格餅唔會用半杯糖漿啩!另外,如果你仔細留意,成份主要是水及sorbitol,當然仲有色素及apartame...(手上無糖漿,忘記了)而sorbitol是sugar alcohol,即從蔬果中抽取出來的東西,即天然啦! 同果隻哂駱駝同一family,唯一問題,就是多多多吃會肚谷谷同肚瀉吧! 世事,沒有十全十美的,平日的糖漿,一湯匙已有47kcal,現在這個,只是5kcal,對戰友來說,有這個代替品,已是天大的喜訊,比佢知道我失聲不能囉嗦還要開心,間中一用,沒有問題的,不用過份擔心好了。緊記食物多樣化還是最重要的。

不增磅的糖漿

講個秘密俾大家知吖,我剛剛,即係12點30分嘅時候,食咗個宵夜^^ 但係我食宵夜嘅原因,唔係因為我肚餓,完全係因為你哋!! (你哋教我架,次次戰友偷食,例如:食咗件芝士餅啦!就話唔關自己事,係同事買啦!又例如食咗粒朱古力就話粒朱古力叫你食佢等等~~) 點解?事關今日行Citysuper嘅時候,竟然見倒枝Sugar Free糖漿,於是,即刻帶佢返屋企啦! 大家都知道,我唔係太鍾意食甜品,但哈根大師同格格餅係例外,但食格格餅,又點可以無咗糖漿呢?所以今次點都殺佢! 但介紹俾大家嘅好嘢,又未試點介紹呢?唯有食完黃媽媽正菜,返到自己屋企,再食格格餅,試下個糖漿,一開...嘩!好香呀!老老實實,唔講唔知佢係無糖,不錯,值得推介,所以冒住夜瞓會有熊貓眼嘅危機,即刻寫Blog! (因為早D瞓同遲D瞓...都係有熊貓眼啦~我驚無咗對熊貓眼大家認唔倒我) 由於佢1/4杯只有20Kcal,所以如果你一日只用1-2湯匙就唔駛換算啦!係咪天大的喜訊呢? (Remark:低脂格格餅以前介紹過,都係Citysuper有售)

手打蕎麥麵體驗教室

自從兩星期前,在專欄介紹過曾到此地一遊後,收到很多電郵詢問前往方法,但由於近日忙於新書亦被失聲困擾,所以現在才在這裡回覆,久等,請見諒。 就由頭至尾介紹一下吧! 這個地方,距離新宿只是約45分鐘的時間,位於一個叫立石的地方。曾到過日本自遊行的朋友會問,有時候,知道那地方名也不知怎樣乘車,其實你只要知道出發地及目的地的漢字是什麼,再利用這個網站就可以了! http://transit.map.yahoo.co.jp/ 你只要按入出發駅及到達駅名,然後輸入日期及欲到達的時間,它便建議數條路線給你,最可愛的是,就連你轉車步行的步速是快或慢也可以選。以下是從新宿到立石最簡單的方法。 http://www.edotokyosoba.com/ 這個是教室的網頁,教室於星期二休息,上課時間分早上11時及下午3時,但需致電或Email預約的,我是離開香港前3天致電預約的,緊記要求懂英語的老師。 然後,print出這地圖,帶著它乘車便可以了。 到達立石駅,你會看倒兩邊樓梯,選右手面的,往下走再右轉... 應該看見這條商店街,再一直走,看到大街再轉右,整段路,只需約5分鐘,很是簡單。 這個就是門口了。 很整齊的教室... 設備齊全... 是很值得很難忘的旅程呢! 知不知怎麼有兩面呢?左手面,闊度均一是師傅做的,我切的又粗又幼吧! 希望大家喜歡啦!

嘩!點解無餸架?

噚晚,同個朋友去食晚飯,剛剛叫完餸,另一個朋友打俾我,話想一齊食飯,我個人咁Nice,當然叫佢過嚟陪下佢,都係加多雙筷啫! 點知佢一嚟度,就投訴,話無餸點食飯?我就即刻話,又有超美味海鮮湯,仲有多個上湯雜菌煮娃娃菜,點樣無餸呀?你睇下喇! 個湯裡面,有蟹、4隻大蝦、好多蜆、最重要係有豆味十足的豆腐,兩個人,夠啦!咪眼闊肚窄先得架,浪費就唔好啦!叫多碗靚仔,咪ok囉! 人都係要學習下了解自己的進食份量,畢竟,人大了,新陳代謝也慢下來,最重要是,近日的失聲及持續咳嗽令我已兩星期沒運動了,減低進食份量,便顯得更重要呢?希望大家明白啦! 最後為了塞住佢把口,我們多叫了半隻霸王雞,但拿了一半回家呢!

眼不見肥膏,就是健康嗎?

駛唔駛又拿這張相來嚇人呀?你一定會這樣說。 相信大家應該記得,上次那張茶餐廳蒸肉餅沙龍照,是由我一位茶餐廳東主戰友提供的,但我post完之後,佢竟然同我講:上次果張唔夠清楚,俾過一張你啦!所以,就post多一次上來,反正,我今日又見倒戰友誤食這個爆肥蒸飯,所以為咗大家嘅磅數著想,都是post多一次。 很多時候,我哋都會依賴肉眼去分辨食物的肥膩程度,例如,我經常聽倒戰友話,個炒飯好乾身架,應該唔肥,但其實,也是很高脂肪的。 又好似這個肉餅為例,蒸熟之後,驟眼望,好似好平均的啡色,沒有脂肪咁,但事實又是如何呢? 我都好鍾意食肉餅架,細細個,親自下廚的第一道菜也就是梅菜蒸肉餅,媽咪知我鍾意食,基本上隔個星期也會做,但係就千萬不要買超市做好的碎肉。但有戰友會話,用瘦肉不好吃呢?其實只要加入約一湯匙原粒燕麥,讓蒸煮時,吸水後脹大,肉餅同樣咁腍,當然要加冬菇及馬蹄啦!就會香好多,下個星期,不妨試下啦! 後話:多謝戰友二號冒住茶餐廳肉餅飯無人問津的危險,送來這張"肉照"

黃詩詩的減肚腩Talk Show

很久很久沒有放talk show時間表上來了,以下是下兩星期的日程,有興趣的話,就通知我的右手金美小姐留個位吧! 電話: 2891 0920 住在新界西的朋友,這是第一場在荃灣舉行的talk show,那天有時間的話,入場交流一下啦! 26/5(三) 7:15-8:45PM 佐敦柯士甸道童軍中心1030室 1/6 (二) 7:15-8:45PM銅鑼灣中央圖書館地下1號活動室 3/6 (四) 7:15-8:45PM 荃灣大河道72號荃灣大會堂展覽館 (荃灣廣場側)

感激

謹代表青海玉樹災民多謝大家,較早前的義賣書籍活動,為災民共籌得港幣7,100,多謝大家的慷慨解囊,善款將透過紅十字會,捐助當地,作災後重建用途,再一次,多謝。

終極大挑戰--鎖定今晚10點半

為咗表示我的謝意,昨晚曾宣佈今晚將會有個終極遊戲大挑戰,送出我的第二個由日本直送的微波爐豬蓋,今晚個遊戲將會好好好玩,想玩?好簡單... 今晚10點半前,登入我Facebook的專頁,click一click讚好or LIKE,就可以加入Fans群,準時10點半,就可以參加!

花絮ssssssssssss

人,總是這樣的,永遠也要失去過,才會懂得珍惜。 想說的,是失聲後,我更珍惜與大家談天說地的時間。而且,我更覺得,原來神是這樣愛錫我的。人的力量...的確,是有限的,回想5月6日那天,早上起來,就是古古怪怪,聲有輕微沙啞,開會後,決定找中醫,可是太遲了,情況開始差下去,但是,晚上是講座,怎麼辦,別無他法,硬著頭皮也要說下去,7時正,講座準備好,情況愈不樂觀,我唯有...祈禱,好不容易,爛聲下,說完了,內心充滿感謝,但當日,老實說,表現得不太好,但算了吧,能夠完成,心滿意足。但最奇怪的是,60分鐘的講座說完以後,我竟然丁點音也發不出,連後來觀眾上前問問題,也不能說下去。 最奇怪的是,剛好在9日至14日期間,是沒有安排講座的,我的情況更是急轉直下,到5月15日,是新城電台邀請的工作坊,是我開聲後第二天,當日狀態已回復8成,但另一個擔心又開始,因為昨天及今天均有講座,剛康復的我...可以嗎? 完成了,真的完成了,這幾天的日程,是近3年來最緊密的,4天3場講座,還有今天替ATV錄了4集的 節目,這4天,沒停留在公司多於1小時,所以大家也見我沒有更新網誌吧! 幸好,今天這位主持人雪湄真的不錯,對於我這個有鏡頭恐懼症的人來說,她令我沒這麼緊張吧! 還要讚一讚電視台的化妝哥哥,真利害,無論是迷你瘡定或是巨型瘡,又或是我的陳年熊貓眼也沒有了,今日於講座期間,竟然有人讚我靚女,簡直是史無前例。 我覺得電視台錄影,最複雜是,那幾部攝影機就在閃來閃去,真不知看著那一部才對,我想:我還是喜歡在講座中與大家開懷地笑吧! 星期一晚,做電台節目時,告訴大家我會放這張相片在這裡,嗱!我是說真的,沒有嚇大家,茶餐廳的蒸肉餅就是這樣子,多於一半都是肥膏,千萬別以為蒸就是最好,材料也是十分重要的。好啦!真的累了,其實還有很多東西想說,遲一點吧!我這樣愛說話愛寫作的人,忍不到一兩天的。

黃詩詩解籤(二)之『如果我是生產商』

有時候無咩胃口,諗住用茄汁豆塗飯,可以剌激食慾啦!於是去超市掃貨,拿起個罐頭,反轉個背脊睇,嘩! 唔係啩! 營養師說這家牌子是健康選擇,幹嗎標籤寫上100克(整罐是230克的)已有熱量349『kcal』呢?一個菠蘿包也是360kcal,那麼吃一罐豈不是攝取803『kcal』。 有時都唔係好明白,營養標籤本來已是頗複雜的東西,幹嗎香港政府在立法時,又將簡單事情複雜化呢?何出此言? 將推行的營養標籤法,能量的單位是可以以千卡(kcal)或千焦耳(kj)表示,他們是兩個完全不同的單位,即是體重可以磅及公斤表示類同,但問題係,全香港,我相信有99.99999%的市民,都已慣常用卡路里去表示熱量單位的時候,又為何又容許多一個千焦耳呢?難道又想大家動動腦筋,做下心算麼? 唉...所以大家唯有記住1kcal = 4.2 kj,即是你下次見倒kj的時候,就要計一計,如上圖349/4.2是什麼了,所以以上圖的茄汁豆為例,100克應有83kcal,明白啦! 但係老老實實喇!就算政府俾生產商用兩種唔同的方法表示能量,『如果我是生產商!』,我都唔會咁傻用個大D嘅數字嚇D消費者架,你睇下下面兩個吞拿魚嘅標籤就會明。 上面那個,100克有100kcal,下面的,100克有466kj,消費者瞬間望過去,就會買上面個牌子囉! 見倒466喎,仲唔掉頭走咩! 下個星期再講!

黃詩詩解籤(一)

等了又等,是黃詩詩教大家解籤的時候了。 來得這個網誌,已代表你是一個有營人啦! 竟然咁有營,就當然要識睇這個7月推行的營養標籤法的常識,以免下次有人問你1+7是什麼,你回答對方係8,那就醜死怪啦! 嗱~慢慢來,每次講少少,由淺入深,有我係度,包你7月前一定識用。 但未開始之前,想同大家講一樣嘢,營養標籤的出現,有時是不鼓勵大家左計右計,因為這樣是十分複雜的,最簡單的方法,是拿起兩種同類型的產品,例如大家都係餅,大家同樣係100克,就比較下兩種產品的脂肪及糖份,當然愈少愈好啦! 這樣做是最簡單的。 不過我知大家求知慾強,所以我會講得詳細少少! 以上這個就是標準的香港營養標籤,7月所推行的營養標籤中,食物的營養資料需以每100克或好似上圖咁,以每一食用份量表示。 其實,這種標示方法,有好有唔好啦! 大家都係用100克,比較嘅時候咪方便囉,但係想睇返自己食嘅有幾多熱量就非常麻煩,相反,以每一份表示時,要做比較時就困難D,因為有時每次食用份量係3片,有時又4片咁! 好...今日想同大家講,1+7其實就好似上圖咁,有能量、碳水化合物、糖、總脂肪、飽和脂肪、反式脂肪、蛋白質及鈉質喇! 以前原先有纖維同膽固醇架,最終都係無咗囉! 唔緊要啦! 按部就班!

從東京帶給大家的手信

曾經同大家提過,我係東京買左個好Cute嘅豬蓋俾大家,但係個問題係,豬蓋得一個,即是又係玩遊戲嘅時間。 不過,都係介紹下個豬蓋先,這是一個微波爐蓋,即是大家可以環保d,唔駛次次用保鮮紙,但這個蓋最特別的地方是,隻豬可以好順暢咁,係叮嘅過程透氣,當然你要確保豬鼻暢通啦! 點玩遊戲,好簡單,同以往一樣,你先要登入我的Facebook Fans Page,當Fans人數到700時,我就會公佈今次遊戲嘅玩法喇! 仲唔快d去登入我個facebook!

永遠的孩子

這是我媽媽的母親節小禮物,但是第一個用家,其實係我... 今日食過午飯,便到Citysuper及一田買菜,"諗住"親自下廚,做一頓美味母親節大餐給媽媽。 買咗蟹啦! 牛排...當然仲有正菜同菇啦! 好喇! 開始煮,這味是我的招牌健康菜,最重要係可以用吓個新煲! 好容易煮,不過遲d先教大家,跟住,我就削個薯仔同紅蘿蔔嘅片喇! 相對於阿媽嚟講,我嘅表現當然係雞手鴨腳啦! 於是佢就話:等我整喇! 呵呵! 都話啦! 孩子在阿媽心目中,永遠就是孩子,什麼也不懂得做,無論佢已經係30、40定50都好,孩子就是永遠的長不大,於是最終,所謂的親自下廚,就只有這一煲了... 其他菜,我就是旁邊的二廚或試食高手,仲有油鹽糖的監督,以免又是高鹽高糖高脂低纖嘛! 所以我永遠都覺得,媽媽是最偉大的,媽媽...我愛你! 其實送你一個煲是我的鬼主意,這樣便經常有美味佳餚吧! 好! 介紹下今日菜式先! 這個是紐西蘭睡蟹,我有份睇...時間架,蒸了25分鐘! 這個是洋蔥汁美國安格斯西冷,D洋蔥、紅蘿蔔等配菜是我切的。 這個很明顯是的Order的,第二最愛的西洋菜湯。 為爸爸而設的海上鮮,我又有份睇時間架,不過...過咗1分鐘時,所以腍咗! 菇菇煮菠菜,我有份...食架! 祝天下母親,永遠健康快樂! remarks:其實我是故意的雞手鴨腳...呵呵!!!因為我樂於做永遠的孩子。

有線電視時事寬頻之<營養標籤看不懂>

有興趣的朋友,登入這裡便可以了! http://cablenews.i-cable.com/webapps/program/broadband.php 日後,我會將節目放上來這裡或Facebook! 因為陸續有來... 慢慢睇啦! 個路人伯伯好攪笑,1+7是什麼...咪8囉! 既然大家都唔係好識用個營養標籤,我就係我個blog度,每星期教大家少少啦! 一齊用標籤學營養,你哋話好唔好呢! 不過我都想藉這個機會,多謝我這位戰友一號Dora小姐嘅幫忙,令個節目可以順利拍攝啦!

黃詩詩帶你行超市

想唔想知營養標籤應該點用呢?相信好多朋友都唔識睇,之後嘅時間,我會續一同大家研究,總之,黐住我啦! 今晚,可以叫做前奏,因為較早前錄影的有線節目,時事寬頻之《營養標籤看不懂》將會於今晚晚上8:30於有線電視第8台播出,留意收看啦! 節目播出後,我會放上這裡或facebook,總之stay tuned@ 俾D硬照大家睇先!

今天靜得很!

是日,丁點音也發不出,還是好好的休息吧!但...說不出話來,那感覺頗恐怖!!!

假期就是充實的...

很多年前開始,總覺得每一次的日本旅行,總要將一些特別的回憶帶回來,假期才會充實。 曾到過全日空的飛機工場、還有採摘士多啤梨、到農場揸牛奶等... 今次來到這兒做麵,是日本人愛的蕎麥麵。位於東京的,距離新宿只有30-45分鐘的車程。 我個樣是不是很認真呢?不過小心切手指呀!把刀利過屋企果把千萬倍! 係咪切得好靚呢?不過...睇清楚D,係是日老師神谷老師的作品,我的,有時幼過天使麵,有時粗過烏冬咁啫,所以都係唔好睇! 好! 另一個地方...自修室內,撞鬼咩你,去日本溫習?佢哋食麵呀!這家店是我的最愛,因為我實在太愛辣了,但點解介紹過仲講呀!全因為佢哋新分店開了在新宿內,住新宿的朋友有福了,不用去池袋或涉谷食! 就是這個拉麵~ 在Lumine EST附近的,上網先地址吧! 總之新宿站東南口及東口徒步5分鐘! 來到吃甜品的地方,你猜我選了那個甜甜圈? 看了我個網誌不足一星期的朋友應該知道我是不愛甜食的,所以我竟然選了這碗麵,出奇地好食,這個TRIP,吃了3大碗。 行行吓街,最搞笑,就是遇上了這3隻小狗,不過我諗係個主人想佢帶超多D囉! 今次去旅行,又買咗另類手信,D戰友成日話D日本手信,成日甜爺爺,其實有些又有代表性又健康呢!這個蘿蔔,很很很是美味的,買到行李超磅! 但最大件事係,旅行到第6日,即倒數兩天,相信是感冒來襲,又發熱又發冷,仲要喉嚨痛,於是跑到藥店,見倒這個公仔,相信沒錯了,回來才看醫生吧! 唔知大家有無發現,經常都是放假才會病的,不打緊吧!就來個徹徹底底的休息,可是今天已變成變聲+走音,今日好勉強的完成講座,但之後,即現在吧!慘變失聲,希望明天會更好啦!