跳至主要內容

文章

顯示從 9月, 2009 起發佈的文章

本週假期好節目

今個星期有兩日假,攪到個個打工仔都烚下烚下,仲加埋日落夜落嘅雨,holiday mood超強,既然大家都無哂心機做嘢,仲喺返工時間上我個blog,等我同大家計劃下星期四喺屋企玩煮飯仔時候做d咩啦 ! (小心:老細出沒注意) 菠菜肉醬千層麵 (換算份量:1份五穀+3份肉+1份蔬菜+1份脂肪) 材料: 千層麵 1片 菠菜切碎1碗 番茄 1個 免治豬肉 40克 蒜蓉 1茶匙 低脂芝士 1片 金寶低脂蘑菇忌廉湯 1/3罐 蛋 1隻 油 1茶匙 鹽 1/3茶匙 醃料 (用於豬肉): 鹽 1/3茶匙 胡椒粉 1/3茶匙 豉油 1/2茶匙 做法: 1. 將蛋拌勻,下油炒熟雞蛋,用鑊鏟將蛋剁碎,放在飯盒的一邊。 2. 千層麵灼熟至焾身,瀝乾,切成小塊。 3. 菠菜洗淨,用1/3茶匙鹽及水灼熟,瀝乾,切碎,再加入蘑菇忌廉湯略煮,備用。 4. 番茄洗淨,切件再切碎。 5. 用醃料把免治豬肉醃好。 6. 燒熱鑊,下油炒熟豬肉,再加入番茄炒勻至番茄焾身,盛起,備用。 7. 低脂芝士切成4份。 8. 準備長形焗盤,噴少許油份,放入千層麵,放上芝士,再放上菠菜蓉,淋上肉醬汁,重複以上步驟3次。 9. 放入焗爐以150度焗20分鐘,焗至金黃色,放在飯盒另一邊,即成。 其實個菠菜蓉好食又健康,加件燒三文魚或者帶子伴入長通粉,上面再放片芝士焗5分鐘等佢慢慢流落去D通粉,超正。

佢先係主人

自從上個星期六加咗個搜尋功能之後,十個有九個戰友都同我講:你加咗個search engine,最方便係可以好快咁搵到米路仔同毛毛D相...唉!我都要重新估計下其實大家上我個Blog想睇D咩! 唔通大家想睇大細毛多過想睇我D文章... ... 既然係咁,就放多兩張相俾大家睇啦! 上面嘅毛毛,最鍾意霸咗成條走廊,好無儀態咁休息,米路仔呢,就最愛個洗手盆,成鬼人阻住我洗手,真係俾佢激死!

植物固醇

小時候,很喜歡吃牛油,大家聽到係咪好驚呢?當然唔係淨食啦!因為小時候久病纏身,唔可以食甜品,想食小食嘅時候就會食克力架,所以就塗牛油囉! 長大了,知道牛油膽固醇高,又有大量飽和脂肪,所以唯有轉食植物牛油,貪佢無膽固醇,讀營養後,知道原來植物牛油又有反式脂肪,所以唯有少食,但點解唔戒... 其實大家又唔駛怕得咁緊要,植物牛油愈硬,反式脂肪就越多,所以大家都可以用D較軟身的植物牛油嘅!如果我無記錯,有一期消委會化驗過市面上嘅牛油中,花嘜嘅反式脂肪含量係最低,根據健康建議,最好每日攝取少於2克反式脂肪啦! 但今日就想同大家講下,哩種含有植物固醇 (Plant Sterol) 的植物牛油,佢係咩?好多年前,佢係外國已經好出名喇!多達140個研究証實,每天攝取2克植物固醇,可將總膽固醇及壞膽固醇減低10%,而且並唔影響好膽固醇的水平添! 除咗哩種牛油以外,天然食物有無植物固醇呢?有...係有,但係個量好少,好似牛油果咁,1個就有0.13克植物固醇,要食到2克,未減到膽固醇都肥死啦! 所以如果你想用哩種牛油,最好用來代替平日用開嘅牛油,而且由於同樣係脂肪,所以最好揀light那一種,千奇唔好諗住用得愈多愈好,要記得控制膽固醇除咗可用2克植物固醇外,減低膽固醇、反式脂肪同飽和脂肪外,低脂飲食習慣及多進食高水溶性纖維同樣重要。 減緊磅嘅朋友,1湯匙light spread 可代替為1份脂肪。

網誌新功能...睇得更暢快

為咗方便大家係我個blog搵到心頭好,剛加入咗網誌搜尋功能,你只需要在搜尋器打入關鍵字,唔駛30秒,想要嘅資料就會飛出哩,舉個例,例如你想搵有關反式脂肪的文章,就輸入反式脂肪,係我個網誌度有關反式脂肪的文章就會出現喇! 希望大家有用啦!

月餅節倒數...8日

『減緊磅係咪唔食得月餅呀?』戰友1號問。 我笑笑口話:『唔緊要啦!你食啦!』戰友1號瞪大雙眼,驟眼睇對眼仲大過我,佢話:『吓!真係食得???!!!』我打趣說:『這不是你希望聽到嘅答案嗎?』 臨近節日,我經常被戰友問及同類問題,情人節就問朱古力食唔食得啦! 端午節就問粽食唔食得,其實大家都好清楚我嘅答案係咩,但係總想睇下有無意外收穫,所以我就打算俾D surprise 大家囉! 1個正常嘅雙黃白蓮蓉月餅,約有870卡,當中的糖份達13茶匙而脂肪就有9茶匙咁多,又甜又肥,如果今年中秋又正減緊磅嘅朋友,都係食1/8個應下節算喇! 我知道大家一定會問:『咁冰皮呢?會唔會好D!』都好D嘅,少少啦! 1個約190克的冰皮月餅,大約有550卡,有7茶匙油同8茶匙糖架,要食就1/4個啦! 吓!一年得一個中秋節喎!食咁少咋! 唉!紫哥話:『人生有好多個中秋節,只係今年中秋因為減緊肥,食少D啫,以後仲可以食嘛!』 預祝大家中秋節快樂!

減磅換來的喜悅

Hi Hi ! 大家好,好耐無同大家傾偈喇! 有無掛住我呢? 你哋減磅成績點呀?不如我講吓自己嘅情況俾大家知啦! 主人噙日捉咗我上磅,原來我輕咗0.5磅,我都唔知幾開心,即刻喵咗主人幾下,仲擦下擦下主人隻腳,最緊要係用我個可鄰樣凝望咗主人兩分鐘,佢就抵受唔住引誘,俾咗兩粒三文魚粒粒俾我食喇,你哋話我叻唔叻呢? 好多貓同人都想知我點減肥,唉!咪多得我個營養師主人囉! 佢話真正嘅減肥,係要減脂肪先算減到,控制飲食,主要係唔想身體間能量銀行太多儲備,做運動就幫手用下囤積嘅$$(即係脂肪),所以就要雙管齊下,少一樣都唔得架!所以主人日日都迫我跑步,點解用個迫字,因為主人成日攞住包零食引誘我,我咁為食就被迫跟住佢跑囉,點知跑到死死下都無得食! 唔緊要啦!我知道主人都係鍚我,唔想見到我有病先減磅,你哋都係呀!主人成日囉唆又長氣,都係想大家快D改善體重,有個健健康康嘅身體啫! 減肥過程只係短暫的,成功過後換來的喜悅及健康就陪住你啦! 大家努力呀!

凍奶茶走糖多奶

噚日做完個新書發佈會,就飛入廸廸尼同朋友慶祝生日,今朝仲同D廸廸尼朋友一齊食早餐,即刻好似細咗廿年,跟住當然就去老鼠樂園玩下啦! 玩咗半日,成個人變咗水人,唯有早D離開個奇妙樂園,返去個現實世界,第二站就去咗醫肚。個Friend話想去茶餐廳,一坐低,佢就急不及待叫:『凍奶茶走糖多奶!』我問佢:『又話減肥?』佢就答我:『咪走咗糖囉!』 剛剛睇完林海峰,喺個show裡面佢話想買架單車,但就見到單車寫住:『全新二手!』又話全新又係二手,啫係點???情況就好似我個Friend咁,叫凍奶茶走甜,好明顯想減肥唔想咁甜啦! 但係又多奶,即係點呢?咪仲肥,就好似大家叫菜心走油加腩汁一樣囉! 所以想減磅嘅朋友,千奇唔好睇少D飲品,今日就準備咗D咖啡飲品嘅熱量俾大家參考! 連鎖咖啡店熱飲中杯12安士計算 Lattte (W.Milk)-180kcal Latte (Skimmilk)-100kcal Cappuccino (W.Milk)-110kcal Cappuccino (Skimmilk)-60kcal Mocha (w/cream)-290kcal Mocha (w/o cream)-230kcal 我同米老鼠合照,係咪細咗20年呢?

街市變圖書館

而家食緊飯,突然想同大家講個爛gag!! 今日銅鑼灣分店好多人來來往往,平日大家有說有笑,熱鬧到成個街市咁,不時仲有個格價專員,即是金美同大家講下街市行情,超市優惠情報等等,但係今日大大個金美坐喺度,都靜到蚊飛過都聽到,知唔知點解呢! 金美失咗聲!! 對佢這個大癲大肺嘅人哩講,我相信佢今日都好慘,但對於其他同事哩講,今日好似係圖書館一樣,工作效率都快咗10x... 今日嘅金美,突然變得溫柔! 講吓笑啫,希望佢快D開返聲啦!

糖的替身

上幾個禮拜,經常同大家講糖嘅問題,減磅時候,用少D糖,係因為可以慳返D熱量,食D營養價值高又飽肚嘅食物,但問題係,一D甜都無,得唔得架! 其實人可唔可以唔用糖呢? 當然可以啦!因為當我哋食咗D五穀類食物,例如麵包或者係米線咁,我哋消化工廠D工人(即係消化酶)就會運作,將D結構較為複雜嘅碳水化合物拆散,變做糖,咁樣身體就可以有糖用喇! 唉!一D甜頭都無好唔習慣啫! 唔緊要哩個世界仲有代糖! 講開代糖,大家即刻諗到:『致癌喎!安唔安全架!』其實好多權威嘅組織,例如:美國食物及藥物管理局及世界衛生組織,都對代糖有做安全測試,每一種代糖都有一個好嚴格的安全指標,只要唔係唔正常咁用,係無問題架,但係咩叫『唔正常』,一陣再講! 大部份人造代糖,都有一種特性,就係好甜,即是係重量上睇,用好少已經可相等於2茶匙糖的甜度,例如最常見的阿斯巴甜(Aspartame),1克的份量已經相等於200克糖,所以雖然這種糖都提供熱量,但由於用好好好少已經甜,所以熱量都係微不足道。這種代糖的國際標碼係E951,大家認住佢啦! 但係佢有個唔好處,唔可以直接加熱同D味總係怪怪的,我就唔太鍾意! 市面的代糖牌子如:Equal, palsweet及slimup都係用阿斯巴甜的! 我就比較鍾意用(Sucrulose) E955做的Splenda,因為d味無咁怪之餘,佢可以加熱,所以用來焗蛋糕都得,1包Splenda 有6毫克 Sucrulose,佢甜度仲高,係糖嘅600倍!!! 好喇! 講吓咩叫做唔正常咁用代糖!其實任何一種食物,都有一個安全使用量,就算大家認為好健康嘅清水,一日飲得太多都會飲死人,好耐好耐以前,就有一個人,一日飲咗20L水死亡,所以大家只要留意安全使用量,唔需太擔心代糖唔安全。 就用Splenda做例子啦! 安全用量係每人每日每公斤體重5毫克,而1包Splenda就有6毫克,即是如果1個50公斤的成年人,一日食成41包先叫過量,41包...點用呀!你話如果用咁多係咪唔正常喇! 而阿斯巴甜的安全用量係每人每日每公斤體重50毫克,而1包就有38毫克,咁即係上限用幾多呢?自己試下計啦! 唔好再戴有色眼鏡睇代糖喇! 大家都係正常人嘛:)

am730專欄網上版

個風都算係咁啦!大家有半天假期,既然大家未返工,就睇下報紙啦! 我一直都覺得am730份網上報紙好好睇,好user friendly,click入下面條link就可以欣賞到一份好有心製作嘅報紙喇! http://www.am730.com.hk/old_issue/issue/2009/200909/20090915/default1.html?startpage =

期待...

多得巨爵,今日突然多咗時間用,上咗YOU TUBE,搵咗條好正嘅片俾大家睇,CLICK 右面第一條片就可以先睹為快,睇下最新嘅Michael jackson's this is it trailer,對於我哩個fans,真係好期待10月28日入戲院欣賞佢嘅最後演出!

瑜伽減肥!

8號波,悶悶地係屋企有咩好做,不如好似Moo Moo咁,做下瑜伽放鬆吓。 哩幾年,這種運動都好流行,無辦法啦! 香港人個個都係壓力煲,唔放鬆下,真係好快爆煲,所以我都好鼓勵朋友去玩下瑜伽,玩完之後,即刻全身鬆哂! 但係好多朋友都對這種運動有d誤解,經常都覺得瑜伽可以達到減肥功效。 未講瑜伽之前,我想同大家溫習下先,其實運動可以分為三大類別,第一類是伸展運動,即是我哋經常講嘅拉筋動作,主要用來放鬆肌肉,亦可視為做帶氧性運動前的熱身,有效減低乳酸積聚的情況同放鬆肌肉,而瑜伽就屬於哩一類;第二類是肌肉鍛鍊運動,簡單d哩講,就係單一用重量鍛鍊某部份肌肉的動作,仰臥起坐就係其中之一;第三種就係帶氧性運動,即是用全身大肌肉進行的運動,而且要達到燃燒脂肪嘅目的,就要持續20分鐘以上,而進行後必須有喘氣感覺的,才能減去脂肪,勝任真正減肥的運動。 唔係啩,做完瑜伽,一身都係汗! 又是老問題,出汗唔代表燃燒脂肪架,試諗下攝氏32度高溫,棟篤企係條街都成身汗啦! 唔通又叫燃燒脂肪咩! 但係我見d瑜伽導師好鬼fit 喎! 其實導師一定會好注重健康嘅,佢哋除咗做瑜伽之外,仲會好注意自己的飲食,同時佢哋都會做帶氧運動架! 就舉一個貼身嘅例子啦! 即係我囉,有d讀者成日問我,點解你咁fit,其實無捷徑架,我一個禮拜最少都游3日水,有多d時間仲會打下波同做gym,點解咁勤力,鬼叫我為食咩! 所以要唔想有個大肚腩就要對症下藥同坐言起行喇! Moo moo語錄: 主人講得好啱,你見我咁fit,係因為我除咗做瑜伽之外,仲有同主人踢波同追住d老鼠玩,大家努力啦!米路仔都係兩個禮拜減咗0.4磅喇!加油啦大家!

10月份的講座

唉!今日俾個風攪到一頭煙,天文台D預告又15/16,黃昏前『考慮』掛唔掛8號波,即係點先,有D嘢需要預先準備嘛!而家俾個風攪到企咗係度,激死! 我諗今日大家應該無哂Mood,無mood嘅原因,唔係因為打風,而係放工先有『機會』掛8號波,既然大家悶悶哋,未聽講座嘅朋友,不如計劃下下個月的講座啦! 22/9 (二) 7:15-8:45pm 佐敦柯士甸道童軍中心1114室 8/10 (四) 7:15-8:45pm 銅鑼灣中央圖書館地下1號活動室 13/10(二) 7:15-8:45pm 佐敦柯士甸道童軍中心1030室 都係打俾金小姐留位2891 0920 最新消息:今晚於童軍中心之講座取消,順延到下星期一同一地點但是1114室!

唔想再做甜品奴隸...我有妙計

芝士餅肥,好多人都知,但係肥成點?!本來想聽日話比大家知,順道教大家一個戒甜品的妙法,但係編輯小姐剛剛打俾我,話我知明天稿擠,專欄順延一天,我諗要避一避無端端打到哩嘅彩雲啩!...睇住張靚相先啦! 當望梅止渴啦!

噴噴油...都會肥

想買油,買咩油呢?如果有D油食咗唔會肥就最好喇! 於是,行到貨架,見到枝又高貴身型又好嘅橄欖油就覺得,發達喇,食咗你仲唔瘦,聽完講座後,你會知道,這一切都錯了,任何一種油,熱量也是相約的,1茶匙,都是45卡。 唔係喎,營養C,上個禮拜,行高貴超市時,見到一枝噴噴油,佢個身份証 (即係背脊個營養標籤,咩成份,都係零,仲唔俾我搵到佢,發達喇,唔信你睇下... 睇咗1分鍾,覺得唔對路,再睇下個配料表,主要成份係芥花籽油同卵磷脂,無理由無熱量,再睇下個Severing size,1/4秒...我開始明白,問題係邊,我畢竟唔識化驗,無辦法知真實的熱量資料,所以我決定上佢外國嘅網頁查探。 查詢美國食物標籤的指引(NLEA),若每1個使用份量 ,即Serving size,中之脂肪少於0.5克,可在有關標籤標示為"0",根據該公司的網頁資料,每一份(即按1/4秒)的食油,有0.3克脂肪,即是話你突然手抽筋,按住1秒,就有1.2克脂肪,即10.8卡的熱量了。 所以大家千奇唔好抱住佢無熱量的心態一路噤,隨時用多咗都唔知。雖然有個標籤陷阱,但其實枝油的確可以幫你用少好多油,竅門係佢個噴嘴,可以噴一下就令d油好平均咁分佈係個鑊囉!為咗幫大家試下佢嘅威力,我今朝用咗佢煎蛋,噴一下就係1/4秒,所以每一次最多噴4下,即係有1.2克脂肪,少過1茶匙油(1茶匙油有5克脂肪)。 不過記住噴咗先開火,如果唔係就真係會噴火架。

《瘦得有營》心得分享

係時間要幫個仔仔做返D宣傳喇! 如果唔係以後我冷落佢就唔係幾好啦! 所以出版社同Metro Book書局就幫我攪咗倨個分享會,有興趣的朋友,可以打poster上的電話或上尼個網址: http://www.etpress.com.hk/etpress/event.do?id=9 登記就ok!到時見啦!

又係食綠寶石的季節

佢返尼喇! 噚日講座完左之後,去咗食板仔壽司,食左4碟,飽左7成,諗住食個飯後果,行去生果檔,就俾我見返佢— 綠寶石 ,話見返佢既原因係,佢好鬼高竇,每年只係中秋前後出現,我就即刻忍唔住買左兩粒,咁鐘意食,點解買兩粒咁少,鬼咩,銅鑼灣d野貴過人,1粒你估幾多錢……大拿拿18蚊粒,咁貴,食住兩粒頂住先啦! 有緣的話,大家都試下,不過最好認住隻恐龍仔,經驗話我知有隻恐龍仔就係信心指標,甜d囉! (本來這篇Blog係噚晚漏夜寫,點知個網絡down咗...攪到今朝先post,激死!)

極速瘦身的後遺症

唉!有鏡頭恐懼症的我,最怕就係對住佢--鏡頭 記者朋友俾我睇下坊間流行的減肥餐單資料 剛剛做了一個有線電視新聞台嘅訪問,講咩呢? 外電報導,英國有一位女士,太過急進,11個星期減去44磅,最週平均減4磅,每天進食的熱量只有500多卡,最後因減磅奪去生命。 其實經常提醒大家,雖然肥胖帶來的後選症真的很多亦很長遠,但一個過急的減肥方法其實更危險呢?長期食得太少,輕則頭暈眼花、引致脫髮或賀爾蒙失調,但若情況持續,身體在缺乏糖份貯備下,過量消耗體內蛋白質及脂肪提供糖份,會引致酮酸中毒,對健康造成長遠影響。要健康瘦身,一星期減去1-2磅就最理想啦! 減磅戰友們努力呢!

想一夜黑髮,有咩方法!!

一見到這兩碗黑芝麻同白芝麻,大家會諗起咩呢? 唔通係白芝麻嘩嘩...黑芝麻嘩嘩嘩,這個遊戲!! 定係一系列甜品呢?芝麻湯丸、芝麻糊... 經常都聽到朋友講,鍾意將芝麻粉加入去D麥皮食,因為會香D好味D,另一個原因係,覺得D黑芝麻黑得咁靚,抱住以形補型嘅心態,食咗佢,就可以擁有烏黑秀髮,事實又係咪咁呢? 哈哈哈!賣個關子先,聽日早D起身,攞份am730就開估啦!

營養師與貓

好耐無同佢哋兩兄弟影合照,今日就影咗一輯,揀咗兩張俾大家睇下係唔係物似主人形先! 我要同大細毛玩喇!大家都早D休息啦!好好享受明天的假期,星期一一齊再努力啦!

Keep Fit Vs Weight loss

好多想減肥嘅朋友都會問一個問題:成功減磅之後,仲可唔可以食甜品同食雞翼呢? 其實這個是一個很好的問題,如果以後都要戒口,咩都唔可以食,人生仲邊有樂趣呢!減磅階段,是一個短暫調整期,由於這段時間,營養師需在預定的時間將多出來的體重減去,但同時又要確保營養素足夠,所以迫於無耐,要將一D營養價值欠奉同熱量高的食物暫別,才可控制熱量攝取,所以當調整期已過,一D大家覺得好美味的食物,依然可以間中去享受。 舉個更簡單的例子,好似我咁,我經常會同大家講,我好鍾意食哈根大師雪糕,又會食吓雞翼,這些食物,都係減肥敵人,但如果你只係間中食下,平日都有運動習慣,體重都可以keep住 我就習慣星期六會放鬆一下,平日就乖乖地,但係如果你的體重仲未係標準,就要同自己約法三章,俾1個目標自己,係減磅階段,就真係要戒口,咁樣距離成功就會近好多 人生真係有好多個十年,只係用幾個月調整下自己嘅體重,回復標準體重後,健康就會跟住你啦 有相為証,今日同朋友去食串燒放鬆下,我都話我好為食啦!你哋話係咪呢! 當你未決定減肥,你會覺得,這條路好似好漫長咁,但當成功之後,你目睹一件一件衫開始唔啱著,回頭再望,你就會覺得這個短暫的減肥過程,是微不足道,努力加油,減肥路途上,仍有你的營養師,這個blog同我D唔知會唔會令大家開心D嘅文章陪伴大家,過程不是孤單的! 今日突然有感而發!

好好味的格格餅

點解無update個blog,因為太忙,希望大家體諒啦! 但其實我每日都有周圍做探子,搵d好嘢俾大家食架,前幾日準備tvb d 食譜,行去citysuper買嘢,見到佢我就忍唔住買,平時d格格餅,會用全脂奶同加好多糖,但係這個格格餅,就合乎低糖低脂的要求,最方便嘅係可以放係多士爐叮,我鍾意加生果同乳酪食,我個讀緊小學六年級嘅表弟都唔知幾鍾意,減磅戰友都食得,1塊=1份五穀,lee個週末,酷熱天氣警告,加冰凍水果,絕對係一流甜品,yummy:)

減肥都可以食薯餅

『唔係啩,減肥仲食薯餅,將『薯餅』這兩隻字寫係個減肥飲食日記上面,黃小姐肯定囉囉嗦嗦...』戰友annie對住車厘子講,我偷聽倒。 唔好成日講到我咁得人驚先得架,其實我個人和藹可親又平易近人,只不過有時過份緊張大家嘅減肥進度啫!所以咁囉嗦! 今日又係D食物影大合照嘅日子,所以特別揀咗1個我最鍾意嘅食譜同大家分享,佢就係薯仔餅喇! 材料十分簡單,有薯仔1個、洋蔥半個、雞蛋1隻、生粉2茶匙、火腿1片;調味有1/2茶匙鹽同胡椒粉。 薯仔去皮後要刨絲、洋蔥切半再切碎、火腿切幼條、雞蛋打勻;再加入調味料,跟住用1茶匙油落鑊煎香,食嘅時記住食D菜先夠Balance!

減肚腩瘦下身講座日程

係咪仲未聽lee個講座呢?如果仲未book,就快d搵金美小姐留位啦!個電話係2891 0920! 2/9 (三)7:15pm- 8:45pm銅鑼灣堅拿道西26號德昌電機發展管理中心2樓7室 (鵝頸橋側) 10/9 (四)7:15pm- 8:45pm佐敦柯士甸道童軍中心1030室 15/9 (二)7:15pm- 8:45pm銅鑼灣中央圖書館地下1號活動室