營養師黃凱詩的生活點滴

2009年4月30日星期四

低熱量牛油透視


聽講好多朋友仔都準備係這個難得的長假期燒烤喎!有D朋友仲同我投訴,話CitySuper個低脂牛油貨架空空如也,但就有一種好似牛油包裝的東西,但唔知點用。

其實上次介紹那枝噴噴牛油都要慳住用,除咗因為價錢貴之餘,如果用得多,佢都有熱量,所以如果燒烤,每包食物噴3下就算,可不用理會其熱量。

但是,上圖那種低脂植物牛油,有個light字的,用1湯匙大約有45卡,相等於1份脂肪,沒有Light字的,就肥少少,1湯匙相等於80卡,約2份脂肪。(平時d植物牛油,1湯匙有135卡)

但老實講,塗1片-2片麵包,1湯匙都好多,所以用普通軟身植物牛油,每朝早用1茶匙,都叫適量。

2009年4月29日星期三

貓大十八變



今日,係電腦大清洗日子,整理期間,搵到d好可愛嘅相同大家分享。

原來真係貓大十八變,以前,即家中愛貓5個月時個貓樣原本好cute...

milo當然無而家咁肥啦!個貓樣成個小朋友咁,Moo就老積d,唔知大家同唔同意呢!

2009年4月27日星期一

燒烤新寵--噴噴牛油


前日,係尚營坊的燒烤日,想唔想知我哋食咩呢?

雞翼、腸仔、牛丸當然唔少得啦!因為我哋都是年輕人嘛,不過份量只屬少量! (減磅戰友們,成功減磅後,這些食物,間中都可以食吓,但係唔好暴食囉)但又於D營養師同有位好同事正積極減肥,所以超多健康食物囉!例如雜菇、粟米、番薯、秋刀魚、燈籠椒、帶子、大蝦等等等等...


唔知大家有無留意我手上面包菇呢!仲有個枝黃色的物體呢!事緣我是超級菇王,所以我總共食咗5包牛油菇菇,係咪覺得好奇怪呢!落牛油...?!唔係嘛,又有膽固醇又有飽和脂肪,其實我早有預謀,帶咗枝私伙噴噴牛油,尼枝牛油就勁喇,個樣同D味都同普通牛油成個餅印咁,但最重要係.....佢無脂肪,真係難以置信,睇吓我食得咁開心就知啦!

影張大特寫俾你哋認吓喇!不過有D貴囉,成40幾蚊枝!

2009年4月25日星期六

好開心有新玩具玩


唔知近日係咪太忙,冷落咗隻愛貓一號,攪到大毛發脾氣投訴,佢點發脾氣,好簡單啫,四圍尿尿...於是,為咗氹番佢,唯有買D玩具啦!

所以今日一做完電台節目,就箭步趕去買咗條貓隧道同貓傢俬比兩隻嘢!你哋睇吓,佢哋幾開心。唉!佢就開心得過,我又要洗被又要洗床單!

2009年4月24日星期五

胃口佳,營養師有好介紹


唔知大家有無同感,成個禮拜悶悶熱熱,兼無咩胃口,見倒D熱騰騰嘅食物仲死,所以我今日搵咗救星--青紫蘇沙律汁。
佢絕對係春夏兩季的極品,特別係用來襯雜菜沙律,一流享受...最緊要係這種汁唔肥,甜甜酸酸,有d糖,但由於1湯匙先得14kcal,所以每次用2湯匙都可以啦!

曾經有戰友問,日本有隻沙律汁,有個bb logo食唔食得,其實那種沙律醬同傳統的,一樣咁肥,但其實佢有『減肥版』,減咗3/4脂肪,都唔錯,係邊度買,咪又係citysuper同sogo囉,價錢都可以接受,20-30元一枝!希望大家鐘意啦!

2009年4月23日星期四

好好味嘅...班戟


過多一個禮拜,又有Long Weekend喇!

有咩節目,不如自己係屋企玩吓煮飯仔,整個甜品嘆吓啦!我唔係講笑架,正在減肥嘅朋友都食得,但當然係材料選擇時,要講究吓。

不如睇吓d材料先啦!

材料:
芒果 1個 (近排d芒果當造)
奇異果 1個(便便唔暢通就揀啦)
油 1-2茶匙(用來煎班戟)

班戟粉材料:
麵粉 12湯匙
脫脂奶 1⅓杯
水 1/2杯
雞蛋 3隻
代糖 6茶匙 (建議用splenda)
幼鹽 1/4茶匙

忌廉材料
:(keep fit先加,減肥就少用喇!)
低脂忌廉 300毫升
淡忌廉 200毫升
代糖 4茶匙
白糖 4茶匙

1. 做cream當然要用打蛋器啦!

2. 班戟的材料混合後,可用平底易潔鑊少油煎。

3. 份量可以做約6片大大的。

4. 食法有很多種,可加新鮮雜果,酸乳酪又得。

2009年4月21日星期二

番薯車


香港的番薯車大家就見得多,原來日本都有,佢哋D番薯好鬼甜,仲色彩好鮮艷,係食物世界裡面,大部份色彩較鮮艷的食物,營養價值都會高D,番茄係其中一種,番薯當然都係啦!愈深色就愈好!

紫心番薯,就有原花青素,黃心的,就有胡蘿蔔素,大家都咁健康,係營養素唔同啫!我就好鐘意食番薯喇,唔知你又鐘唔鐘意呢!

2009年4月20日星期一

5月的約會

講座完畢後,經常有參加者問:『你幾時有講座呀?』老實講,我有時會唔記得,所以真係非常抱歉。知識大家的支持,及大家對健康的追求,作為營養師,其實都好安慰。

為咗等大家早d安排時間,我決定係個Blog定期話俾大家知講座的時間表,咁樣就避免咗係廣告出咗之後報唔倒啦!

留座電話是2891 0920,找我個靚女同事cammi李小姐留個位啦!

一個人住的簡便營養餐

放咗工,又肚餓,食咩好呢?通常我習慣星期日買定多d材料,放工返屋企就可以下廚,既健康又方便。

朋友成日話,煮飯好鬼煩,其實只要你做足準備,安排時間,就可以有美味嘅一餐了。睇下我個放工後時序就知。

通常,9時多回到家,一返屋企,兩隻大小毛聽倒開門聲,例必係門口歡迎我,跟住放低個袋,換上便服,就第一時間衝入廚房,準備晚餐,一打開廚房門,為食嘅小貓milo就箭步飛入廚房,睇下有無嘢食,但通常佢都係失望而回。要準備晚餐,首先,當然是洗米煮飯,按著rapid rice cook 的鍵,按著就是將豬肉切碎再用糖、豉油、胡椒粉醃好,由於時間關係,再將預先浸好的冬菇切片,有時鐘意食菜飯,就切定d白菜仔囉。當所有嘢切好之際,d飯應該收咗d水,打開電飯煲,放d材料入去,等佢再煮。

這個時候,就去洗白白,可省點時間,沖完涼後,一煲香噴噴嘅蒸飯就完成,再將我秘製的蔥花及指天椒豉油用來調味,超正。整個過程30分鐘內完成,都好方便。
黑椒烤魚柳伴糙米飯

除咗這味肉碎香菇菜飯外,有時我會用下圖的烤爐煮肉,再配以糙米飯,都唔錯架!這個爐,可以將肉類中的部份脂肪趕走,而且又有香口的感覺,我最鐘意用來煮魚柳同雞,煮魚只需用黑胡椒調味,雞就用我枝百搭多用途調味料,無鹽,好健康。

時間多少少,就用飯煲煮冬瓜粒湯飯,準備好所有材料,全部一齊放入飯煲,加多d水,按長少少時間的煮粥仔程式,就有湯飯食,材料如下:


飯煲冬瓜粒湯飯


材料:
2/3杯米
1 1/2碗切粒冬瓜
1/2碗香菇及草菇
3兩肉粒
少許夜香花
少許薑

有時濕濕熱熱的天氣,無咩胃口,我就鍾意煮番茄豆腐肉片湯飯,酸溜溜的,都唔錯呀!

飯煲番茄豆腐肉片/魚片湯飯

材料:
2/3杯米
番茄1個 (小件)
豆腐1磚 (切粒)
肉片2兩/鯇魚片
少許薑、鹽及胡椒粉

好簡單啫,今晚就買定d材料試下啦!

2009年4月19日星期日

大細毛的寫真集


去咗日本8日,可憐的大細毛係屋企悶悶不樂,大毛,即Elmo貓性憂鬱,每次我去旅行,佢就自然減磅,今次仲衰,我返屋企第一晚,佢仲尿尿投訴,攪到我間房張小地毯濕淋淋,俾佢激死,不過今次無鬧佢,佢都係想我多注意佢啫!

我記得上之我帶咗Milo去絕育,Moo係屋企又係鬱鬱不歡咁,次次我一推個行李喼出尼,佢就開始唔開心,所以大毛真係感情豐富!

另一隻細毛,即Milo,就懶理,佢一向樂天,細毛心諗:『主人都係去日本買d好嘢俾我食啫,佢好快就返!』佢哋兩個嘅性格,完全相反。

有相為証,攝於主人出走日本的時候,細心欣賞啦!有機會的話,我會同佢哋出本書,唔知有無人買呢!:)





2009年4月18日星期六

浮於滾油的水泡










每次到日本,我都好鍾意參加她們的見學,即參觀活動。

上次去喜多方,就參觀咗製麵工場,今次除了去咗全日空的維修工場,仲參觀咗Donut的製作過程,所以諗住同大家分享吓。

點解選donut工廠,唉!咪要住我個friend把口囉!佢成日同我爭辯,話d donut 係焗,唔係炸,於是我安排行程個陣,加抽了這個見學。

第一部份,當然是分麵粉造成donut形狀,接著就是發酵,跟住個donut說要游水,唔係,應該係游『油』,原來係炸完一邊再一邊,有相為証。第二步,就要加糖漿了,即經過一個糖漿瀑布,最後緊係要等佢凍啦!


又甜又肥!我個friend愈睇愈驚,但係最大件事係,參觀完佢每日送一個,我咬了一口,救命呀,成手油,勁甜,最後我衰衰咁,throw it away!



其實這個方法唔錯,你慢慢了解一種食物的製作方法,你就會明d高脂肪食物有幾肥!

2009年4月17日星期五

與鐵鳥的近距離接觸







這個旅程,最令我印象深刻的,應是4月13日的全日空飛機維持工廠的『見學』,即參觀之旅。


那天,預約了10-11:30的參觀活動,首先,工作人員先講解ANA的機種,及睇咗一段好精彩的片段,是整隻鐵鳥的出生過程,雖然整個介紹是以日語進行的,但都好好睇,好新鮮。


第二部份,就是最精采的,到工場參觀,唔知大家有無睇一套由木村主演的日劇叫Good Luck呢?這個工場,就是真實的拍攝場地了,未試過咁近距離睇飛機,真令人興奮。影咗相同大家分享。

這種體驗,好難得,同我一樣鐘意飛機的朋友,下次去東京掃貸之餘,留少少時間,去羽田空港體驗吓啦!

健康的自助早餐



今次到東京,選了一間較舒服及方便的酒店,間酒店有幾方便,新宿站南口一出,過條大馬路,正行轉左就到,我就用左3分鐘就見倒間酒店。間酒店外觀都唔錯,個package包了每天的自助早餐,千奇唔好以為自助就大食,去到外地,當然要留d配額食d地道食物,所以我就選了以下這堆食物。對個早餐有咩comment,唔錯啦!但沒什麼驚喜囉!


但係這間酒店,真是超超超超強力推薦,因為實在太太......方便,若果你要掃貨,買到一袋二袋,都可以箭部3分鐘放返酒店。

如果你鐘意到東京近郊周圍行,新宿車站應該可以幫到你。所以又係行3分鐘就到囉!

間酒店叫Sunroute Plaza Shinjuku,有機會就試下啦!

2009年4月11日星期六

東京的美食


大件事,食咗好多,唔緊要啦!食完先減,這句說話係唔係好熟呢!這兩日,同班好友周圍行,帶大家食咗好多地道美食,大家異口同聲講咗這句說話。


老實講,去得旅行,就要周圍試下d美食,每種食物食少少,暫時唔緊要,但返到香港就要多努力運動了。


D屋企人同朋友,都等緊我D手信,昨天行超市,買咗盒超好食嘅番茄,打算帶返香港俾媽咪試下,真係正到爆,連D從來唔鍾意食番茄的朋友都愛上佢,有機會的話,真係要試吓。


昨天去咗我好掛住的江之島,天氣好到不得了,我仲探咗上次隻流浪貓,佢就好啦!係江之島海產這般豐富的地方,食到肥肥白白,有相為正,大家比較吓上年11月我同佢影張相就知。