營養師黃凱詩的生活點滴

2009年8月31日星期一

你真係好鬼甜呀!

由於以前間小學係不設小食部,所以小息嘅時候,唯一嘅娛樂,就係飛去架汽水機,噤包檸檬茶飲,總係覺得,無咗包飲品好似成身都唔舒服。

人大咗,對紙包飲品開始無咩興趣,但取而代之,就係茶餐廳茶冰鎮檸茶,戰友成日話,我都唔想飲架,但係跟餐有得送,如果唔要咪蝕咗,最多我叫檸茶少甜啦!問題就出現喇,『少甜』,係一個比較性詞彙,如果你咁唔好彩,冲你杯靚茶位哥哥仔,平日無甜不歡,飲奶茶都要落3茶匙糖的話,2茶匙糖的奶茶,已經叫少甜。所以,如果真係要控制體重,最好都係戒幾個月啦!
為咗來年的標籤製制度,好多飲品近日都換咗新裝,仲加咗個營養標籤,一加咗次後,就現哂形,於是廠商就被迫推出一D所謂少甜的新產品,但係又係咪代表好OK呢!去片...
這是一包『正常』嘅檸檬茶,睇下有幾甜先,100ml有10.6克糖,即是兩茶匙,1包250ml的,就有26.5克糖,嘩!5茶匙糖,唔係啩!
這是『少甜』的,好!睇下少咗幾多先,100ml 有7.9克糖,即係250ml有19.75克糖,即是4茶匙,唔係嘛,飲杯絲襪奶茶都唔會落4茶匙糖啦!

唉!有無d好d架,有,睇下最後一個標籤先...

100ml有0.2克糖,ok哂! 根據營養標籤聲稱的要求,每100ml含有少於5克糖,先可以叫自己做低糖飲品囉!
註:相片質素咁差,因為我用手機偷影,請見諒。

2009年8月29日星期六

營養師的私房菜

芋絲有幾神奇,相信好多朋友都知,佢高纖勁飽肚,但係有D朋友,一見倒佢個樣就...白雪雪、無聞無味,點食呀!

為咗令大家食得開心D,就公開我嘅私房菜食譜啦!你一定對芋絲另眼相看。

準備好材料先,當然要有1包芋絲 (一扎扎就要拆開佢) 或者你可以買麵條狀的,如圖:


跟住,就要齊備大量雜菌,又係我D friend...切好佢,準備做熱窩上的小菇。

最重要嘅材料其實係蒜頭,要大量,咁先可以令炒雜菌又香又美味。


所有材料準備好後,燒紅鑊,落1茶匙油、1/2湯匙美極,想辣辣地,就加隻新鮮辣椒,想再好味d,可以切二兩瘦肉絲,個餐就好balance喇!

熱窩上的芋絲,話咁快,得咗!

2009年8月28日星期五

靚仔毛沙龍

我係咪好識擺甫士!
玩到攰嘅樣

我阿哥都好靚仔,不過細膽d囉!


今日唔知點解,主人突然有時間同我玩,仲同我哋影沙龍,都影得我哋幾靚仔架。唉!主人又話幫我同阿哥出本寫真集,都唔知幾時會夢景成真,我淨係見佢成日同d食物影相,我諗d食物應該會出寫真先過我哋兩隻毛囉!

2009年8月25日星期二

好開心嘅飯盒


人都係鍾意睇D靚嘢...我唔係自己讚自己,不過你哋睇下D飯盒就會明!

今日整完D飯盒,都好開心。俾D心血結晶大家欣賞下啦!有時攝影技術高,真係可以呃到人,哈哈,你睇下攝影師哥哥幾細心,幫我哋揀緊我玩具襯下個飯盒。





係咪好吸引呢?我要準備講座喇,遲D再講!

扮攝影師


今日好鬼忙呀!TVB週刊剛剛同我昨晚漏夜(所謂漏夜,即是做到凌晨1點囉,今日又變咗國寶!)整嘅大作影完相,而家要準備出發去電台,今晚就係講座喇!我都算係咁啦!都俾D相大家先睹為快,等多一陣啦!去完電台就俾D靚靚飯盒大家睇下!

睇住我俾人偷影我扮攝影師嘅相先啦!

2009年8月24日星期一

好好好番茄嘅通粉

好悶呀!唔係譚仔、翠華就係牛肉湯檬,有時候日日出去食Lunch都幾頭痛。

今日心血來潮,諗住介紹好同事去一個新竇食lunch,於是佢就跟住我行喇!
簡直係一步一驚心...
行咗三條街,我帶佢入咗一座大廈裡面,佢望咗兩望:『嘩!你帶我去咩地方呀?!個環境咁恐怖嘅!好似重慶大廈咁!』跟住我哋掟咗個靚彎,佢就越來越驚:『你有無記錯架,真係有好嘢食?』其實佢擔心都正常嘅,大家睇下就明,以個環境去評估,感覺上,隨時都有強哥(即小強)同超級大鼠歡迎你啫,唔駛驚,又真係無見到,但做定心理準備會好D!
個環境睇尼,真係有d嚇人...

行咗10步之後,就見到間冰室,我叫咗個番茄牛肉通粉,大家睇下,真係好鬼茄囉,好好食架,仲要好有營養,仲記唔記得,如果想攞到番茄D茄紅素,要整爛D番茄,等D茄紅素係細胞裡面流出尼先得,而且仲要煮熟,有少少油先幫助吸收。



有時後巷都有好嘢食,唔好以『貌』取店喇!

2009年8月23日星期日

兩毛惡鬥--爭連卡佛地盤篇

每一晚,兩隻毛定時定候都會惡鬥一番,前晚就上演咗一幕--爭連卡佛地盤篇。

話說佢哋為咗爭個連卡佛紅盒子竟然大打出手,欲知誰勝誰負,慢慢睇啦!

圖一
大毛:哈哈!主人真係好,又買新玩具俾我玩,貓就最鍾意盒,個盒好舒服呀!都有成尺架,今晚瞓係度先!喂!米路仔,你望咩呀!個新屋企係我架!

細毛:望下啫,咁自私架,一齊瞓都得啦!我都瘦咗少少啦!

圖二


大毛:左一拳,右一拳,問你驚未,我唔發火你以為我咁好蝦!

細毛:好彩我瘦咗少少身手敏捷啫,我閃閃閃,睇你點打我!

圖三

細毛:啤咩呀!

大毛:你估我唔識啤,我隻眼點都大過你!

圖四


細毛:好叻咩,唔同你玩,你自己坐到夠囉,我搵主人同我玩,佢今晚咁早返屋企,啃係諗住同我跑步。

2009年8月20日星期四

唔記得走牛油


今朝好滿足,一早起身去咗一間有日本Cafe Feel 嘅餐廳食早餐...唉!無辦法啦!好耐無回鄉,想感受下和風啫。


食咩好呢?睇下個menu,有三文治,嘩!仲有我鍾意嘅三文魚,好!就叫lee個:『唔該三文魚三文治烘底!』跟住就周圍望下,影下相順便準備下一陣嘅雜誌訪問,5分鐘後,個樣好似好美味嘅包包就送到,一打開,弊!真失察,竟然唔記得走牛油,無辦法啦,我應該有quota嘅!

有時候落單真係要打醒12分精神,好似去粉麵店咁,想食菜同牛丸米線,我要記住好多嘢,首先菜心走油啦、跟住牛丸米線唔該煮腍d同全走,即是走蒜同蔥(心想上覺得d蔥好污糟),你哋話係咪喇!講都唔係緊要,最慘有時仲送你一對『白眼』,所以我好欣賞日本間叫一蘭嘅拉麵店,因為人哋真係可以為你做一碗度身訂造嘅麵。

唔講喇,記者等緊...bye!

2009年8月19日星期三

減緊肥都食自助餐


前日,講座完咗之後,你哋估我去咗邊呢?

答案係,去咗食自助餐...那天是得力助手車厘子同金美嘅生日派對,上星期問金美想食咩,佢即刻就話:『生日飯?緊係食自助餐啦!』後來我諗咗一秒,以金美嘅性格,即是唔蝕底同慳得一蚊得一蛟嘅優點,係人都估到佢會揀自助餐啦!仲問...

但係唔知大家有無發現一件事,你個金美同事好似減緊肥,仲食自助餐?!

其實減磅計劃進行時,有好多戰友都有大大小小嘅應酬活動,只要唔係出現得太頻密,營養師應該可以幫你急救嘅,當然食嘅時候唔可以咁狂啦!

我食咗D咩,老實講我個人唔太好自助餐,又或者係因為我個胃比正常人細,去食自助餐,實比人話蝕哂底囉!想唔想知有幾唔底呢?好!嘗試記下個飲食日記先!

兩碗自選靚粥、5隻凍蝦、1隻生蠔、1碗沙律同雜果、1個自己做的格格餅同最重要嘅1球哈根大師雪糕...係咁多 (唔係啩,食粥?!)

俾張相大家睇下,間酒店餐廳有得自製格格餅,那天我兼職做小廚師,佢哋d靚靚格格餅全部都係我泡製。

2009年8月17日星期一

簽名的故事


剛才有位讀者上公司買書,於是我就幫佢本書簽咗個名,跟住車厘子同我講:『見你簽開名,不如簽埋lee疊啦!之前簽定嘅已經賣哂!』跟住我張枱就堆滿廿幾本書,我一邊簽名一邊問車厘子,簽咁多做咩,如果D朋友唔想要簽名,咪會話我畫花本書囉,車厘子無我咁好氣就走開咗!

簽開名,突然間想講一個關於簽名嘅故事俾大家知。

相信每個朋友細細個嘅時候都頑皮過,你哋見我大咗都古靈精怪都知細個嘅我都唔乖得去邊,話說有一次,搭校車返學校途中,突然諗起:『弊!本默書簿唔記得俾阿爸簽名,點算!』大家千奇唔好誤會我因為唔合格所以唔敢俾阿爸簽,個次係100分架,而係真係唔記得,於是我就決定:『阿爸個簽名都唔似簽名,好似寫名咁,我又有一手靚字,自己簽問題應該唔大,最多過咗關返屋企同阿爸講番!』

於是大筆一揮,我真係簽得好靚,個『黃』字嘅像真度達9成9,但係最不幸嘅事就係lee個時間出現,我竟然.....真係竟然簽咗『自己』個名,當時我有幾徬徨相信大家都估到,但係估唔到嘅係我竟然傻到刪咗簽錯咗嘅名再係隔離簽多一次阿爸個名,最低能嘅係返到學校嘅時候,仲要同miss講:『都唔知點解,我阿爸簽錯咗我個名,所以簽多一次先啱!』撞鬼咩,有人信先奇啦!自己都唔信,之後我有D咩遭遇,相信大家都估到啦!

而家諗返轉頭,我都笑到喊,大家睇個Blog嘅時候,未滿18歲嘅話記住要有家長指引呀!

唔會漏的350卡三文治


一盆好靚的露絲瑪莉葉(rosemary leaves)--攝於新加玻(我自己影架...)

有時都好怕食三文治,最煩惱係...你咬一口,D餡料就一路漏,斯文人細細口咬就無所謂,但好似我咁大大口就慘啦!有一半會係地下囉!

所以我好鍾意教人食比得包,因為你只需要將自己鍾意嘅食物,『釀』哂入去,就OK哂,而且而家越來越多超市有比得包賣,都好方便啦!連由細食到大嘅麵包老大哥嘉頓都有出,方便哂!

今日教大家煮減肥餐,都係一個好飽嘅午餐,好...準備好材料先,當然唔少得主角比得包啦!英文名叫Pita,餡料有黃椒同紅椒各半,蘑菇--即是我個friend4粒,雞肉2兩,調味料就主要係全天然的主角,露絲瑪莉葉(rosemary leave),當然要1/3茶匙鹽同1茶匙油啦!

我個friend蘑菇小姐...同我青梅竹馬(哈哈!)
大細毛...我隻愛貓都超級鍾意的開心雞肉
維他命C仲高過奇異果的紅黃椒
我用咗1茶匙好平民化的花生油快炒,可以加少少水


將雞柳切絲醃好,黃椒同紅椒切絲,蘑菇切片,將所有材料加1茶匙油快炒,記住D彩椒最後先落,如果唔係維生素C就會流失。有多士爐或焗爐就叮叮個比得包,會好食好多,跟住打開比得包個口『釀』哂D料入去,千奇唔好好似我咁貪心,你哋睇下就明...多到漏!


我習慣加D沙律醬,記住用低脂,1湯匙就足夠,好容易做,試下啦!

2009年8月14日星期五

香脆可口的Nacho

我好鍾意食Nacho,經常都諗,如果有無咁肥嘅款式就好啦!

點知,有時D嘢諗下諗下就會成真,戰友話360有焗製的Nacho,今次發達喇,仲唔食餐飽...

對於一眾減磅戰友而言,點樣換算呢?10片相等1份五穀啦。

註:上面3句說話,有一個錯處,唔知大家可唔可以搵出來呢?

答案:就算食物製作時用低脂的方法,但食嘅時候都要有限量咁食,食餐飽會好危險架!

講座日程

下兩星期的講座日程如下:

17/8(一) 7:15-8:45pm 銅鑼灣禮頓道33號第一商業大廈301室
25/8(二)7:15-8:45pm 佐敦柯士甸道童軍中心1030室

要報名架,電話係2891 0920找金小姐,而且較早前曾希望買到新書《瘦得有營》的簽名本,亦可到會場購買,我已準備了5-10本。

2009年8月13日星期四

彈彈牛丸

唔知大家有無食過這間彈彈牛丸呢?真係好好味架,但係食過時候要小心D,因為太彈,我個朋友試過,扮斯文細細口咬,點知一咬就飛咗係我面前,好彩我身手夠敏捷避開咗,如果唔係就中榴『蛋』!

地址係邊都唔識講,係一個街市裡面,入口係尖沙咀海防道。

講座花絮



今日又完成一場講座,每一次都好興奮好開心,或者這是一個最直接接觸大家的時刻吧!

曾經有位戰友問:『你有咁多工作要兼顧,好似好辛苦咁,但係又覺得你忙得好開心!』我對這一番話,諗咗幾分鐘,其實雖然忙,但我真係好開心,最少有咁多朋友支持,一切都值得。

朋友這樣說過,點解我好似有好多時間咁,我記得讀書年代,曾經有位好老師同我講過,如果你每一日睡上8小時的話,若然你活到60歲,你就瞓咗20年,聽到這個數字,我即刻嚇咗一跳,瞓咗20年,唔係咁浪費啩,於是自從那天開始,我每晚只係瞓6小時,無辦法啦!個人天資又唔係聰穎,別人用上3小時完成1份工作,我就唯有勤力少少,用多幾倍時間,瞓少D,多出來的時間好好用架。

今日同事幫我影咗D花絮,同大家分享下啦!我要開工喇,good night!

2009年8月11日星期二

遲到好過無到


除咗保育問題,仲想講吓老本行,營養...

其實係好多方面,香港都慢幾拍...想講嘅當然係對營養飲食嘅觸覺啦!

唔知大家有無發覺,想健康D,買健康D嘅食物,有時都幾困難,例如想買D減肥都食得嘅乳酪,都唔知幾困難,淨係得兩個牌子,係新加玻就俾我發現有家庭裝囉,抵好多。另外,仲有低脂無糖同原味,唔知某年某月會唔會係香港見到佢呢?

想提下大家,買乳酪嘅時候,唔好淨係睇到有個『輕盈』『低...』『X營』就以為好健康,一定要睇下成份中有無糖,仲要低脂,如果唔係食一盒乳酪同時食多4茶匙半糖就唔抵啦!

好彩下年D食物有營養標籤啫,如果唔係就仲遲。
死喇!掛住寫Blog,編輯打到尼催稿...唔講喇,俾人通緝要自首喇!

如何保護舊文化



每次去旅行,都好鍾意影D建築物,特別係D屋仔,我認為一張相,一副畫,如果有間屋,成張相都會warm哂。

今次又有屋仔相嘅收穫喇!這幾張攝於加東區,那是土生華人聚居的地方,d屋色彩繽紛。

這個地方係叫小印度,好多印度人架,我記得細個時候玩IQ題,經常有人問我:『星期日邊度最多菲律賓人?』當時10歲嘅我懶叻咁即刻答:『皇后像廣場囉!』那是唔知幾娘!如果新加玻都有類似的IQ題,個問題會係:『星期六日,邊度最多印度人囉!』


這張相,就係一個遊客區克拉碼頭影,那天剛剛是新加玻國慶,有得現場看煙花。



其實,外國人都好鍾意睇好有香港同中國特色嘅建築物,但係政府就唔重視去保護,唉!希望唔好再有建築物犧牲啦!

充電完畢


算係咁啦!今朝見完銅鑼灣D戰友,跟住做完個雜誌訪問,就即刻寫Blog喇!

這5天去咗新加玻,在當地工作了兩天,再玩咗兩天,都算叉足電啦!哈哈!D電應該夠用一個月嘅...

去得新加玻,又係飛機迷,點都要搭下這隻超級巨鳥A380啦,雖然佢晚機去早機返!人人都話要減肥,但係架機就真係肥咗囉,D位又闊超級靜,總之一流嘅藍天之旅,最重要係,仲有佢...


一心諗住有士多啤梨味,my favorite...點知靚女空姐話,we only have cookie and cream...真係好甜,我lee個人肉甜味測試系統顯示,一定甜過strawberry味。

另外,知道有d朋友無睇較早前文章中的comment,那個無糖無脂肪的gelato我試咗一口,芒果同士多啤梨都唔錯,減磅戰友都可以食,但係其他口味就唔好喇,但係記住扣1份生果囉!
今日準備咗好多嘢同大家分享,但係而家要食飯先,遲D再講!