營養師黃凱詩的生活點滴

2009年8月17日星期一

唔會漏的350卡三文治


一盆好靚的露絲瑪莉葉(rosemary leaves)--攝於新加玻(我自己影架...)

有時都好怕食三文治,最煩惱係...你咬一口,D餡料就一路漏,斯文人細細口咬就無所謂,但好似我咁大大口就慘啦!有一半會係地下囉!

所以我好鍾意教人食比得包,因為你只需要將自己鍾意嘅食物,『釀』哂入去,就OK哂,而且而家越來越多超市有比得包賣,都好方便啦!連由細食到大嘅麵包老大哥嘉頓都有出,方便哂!

今日教大家煮減肥餐,都係一個好飽嘅午餐,好...準備好材料先,當然唔少得主角比得包啦!英文名叫Pita,餡料有黃椒同紅椒各半,蘑菇--即是我個friend4粒,雞肉2兩,調味料就主要係全天然的主角,露絲瑪莉葉(rosemary leave),當然要1/3茶匙鹽同1茶匙油啦!

我個friend蘑菇小姐...同我青梅竹馬(哈哈!)
大細毛...我隻愛貓都超級鍾意的開心雞肉
維他命C仲高過奇異果的紅黃椒
我用咗1茶匙好平民化的花生油快炒,可以加少少水


將雞柳切絲醃好,黃椒同紅椒切絲,蘑菇切片,將所有材料加1茶匙油快炒,記住D彩椒最後先落,如果唔係維生素C就會流失。有多士爐或焗爐就叮叮個比得包,會好食好多,跟住打開比得包個口『釀』哂D料入去,千奇唔好好似我咁貪心,你哋睇下就明...多到漏!


我習慣加D沙律醬,記住用低脂,1湯匙就足夠,好容易做,試下啦!

7 則留言:

匿名 說...

我要試呀! 即刻印出黎比傭人姐姐照跟!(當然要寫番英文比佢啦!) 明天lunch有著落!!!唔洗成日諗食什麼唔肥又好食, 最緊要健康嘛!

匿名 說...

你真係越來越抵錫!照顧周到,為咗大家,寫到咁夜,今日仲要講講座架!

匿名 說...

有試過買露絲瑪莉葉回家種, 唔知點解很快就死了, 真失敗!!!!!

匿名 說...

正!又一個健康食譜!又有好嘢食!

匿名 說...

真係好想識吓你囉,但係又唔需要減肥--唉!

chang 說...

其實係咪所有疏果一加熱就會流失晒d營養架啦, 咁可唔可以生食架。

匿名 說...

我今日一睇完個專欄,食飯時間去超市買定材料,見到有個女仔又買我d食物,唔知佢係咪又係你d fans呢!