營養師黃凱詩的生活點滴

2009年8月17日星期一

簽名的故事


剛才有位讀者上公司買書,於是我就幫佢本書簽咗個名,跟住車厘子同我講:『見你簽開名,不如簽埋lee疊啦!之前簽定嘅已經賣哂!』跟住我張枱就堆滿廿幾本書,我一邊簽名一邊問車厘子,簽咁多做咩,如果D朋友唔想要簽名,咪會話我畫花本書囉,車厘子無我咁好氣就走開咗!

簽開名,突然間想講一個關於簽名嘅故事俾大家知。

相信每個朋友細細個嘅時候都頑皮過,你哋見我大咗都古靈精怪都知細個嘅我都唔乖得去邊,話說有一次,搭校車返學校途中,突然諗起:『弊!本默書簿唔記得俾阿爸簽名,點算!』大家千奇唔好誤會我因為唔合格所以唔敢俾阿爸簽,個次係100分架,而係真係唔記得,於是我就決定:『阿爸個簽名都唔似簽名,好似寫名咁,我又有一手靚字,自己簽問題應該唔大,最多過咗關返屋企同阿爸講番!』

於是大筆一揮,我真係簽得好靚,個『黃』字嘅像真度達9成9,但係最不幸嘅事就係lee個時間出現,我竟然.....真係竟然簽咗『自己』個名,當時我有幾徬徨相信大家都估到,但係估唔到嘅係我竟然傻到刪咗簽錯咗嘅名再係隔離簽多一次阿爸個名,最低能嘅係返到學校嘅時候,仲要同miss講:『都唔知點解,我阿爸簽錯咗我個名,所以簽多一次先啱!』撞鬼咩,有人信先奇啦!自己都唔信,之後我有D咩遭遇,相信大家都估到啦!

而家諗返轉頭,我都笑到喊,大家睇個Blog嘅時候,未滿18歲嘅話記住要有家長指引呀!

16 則留言:

匿名 說...

哎呀! 你好可愛呀!(兒時)

匿名 說...

真係俾你笑死囉!

匿名 說...

比妳笑死! 都話開工時間唔睇妳個BLOG喇, 好彩"倒後鏡"望唔到人& 聽唔到老闆嘅腳步聲啫.

匿名 說...

咁啱嘅!我細個都成日幫的同學仔簽名
哈哈.........

匿名 說...

其實我諗你可以寫笑話:)

わたしは山今小姐 です 說...

難以想像你可以咁烏龍...=.=
期待明天可以再見你, kaka :)

阿yu

匿名 說...

少做壞事無要緊,
多啲練習就可以。
;^)

匿名 說...

咁都講得出,唔怪得大咗可以成為作家啦!

匿名 說...

哈哈 , 好搞笑呀你 :P
有無記缺點呀你 ?
我記得我細個成日都練我媽咪個簽名 ~ 哈哈 !
UMI :>

匿名 說...

我覺得你的戰友好幸福囉,你今日個專欄都好鬼搞笑啫!越來越喜歡你...hehe

匿名 說...

吓? 車厘子唔理你行開咗....我唔信啦! 佢好有禮貌架! 佢同你開玩笑唶~~

匿名 說...

"冇你咁好氣咁行開" or "借咗聾耳陳隻耳" 呢樣咁高嘅境界,只有我係咁對老闆啫, 我都冇傳授呢啲衰嘢比車厘子, 車厘子冇理由識得咁咁咁對妳! 我都唔唔唔信!!!

henry 說...

hahahha~!!
簽到手軟 ~!
P.S 其實我都試過同你一樣既經驗,
不過唔係默書一百分,係D衰野呢~!!
唉~!!!!

匿名 說...

哈哈!你好型呀!

winnie 說...

睇來呢單嘢係响小學時代發生嘅…

匿名 說...

你個簽名好似印出來咁,你一定成日練!