香煎聖子

昨天是父親節，看過今天的專欄，大家也知道我跟妹妹煮了一份愛心餐給他啦！而我兩隻愛貓，就獲得老板娘送的一對基圍蝦。

戰友成日讚我叻，點解可以煮咁多嘢！其實唔係我叻囉！只要你有心就行，因為煮東西給家人是很安全的，無論味道怎樣，他們都會話好食，所以都不妨試下。我第一次做包給我爸爸，硬如石頭，佢都竟然話好食，你就明白煮愛心餐給家人是零難度啦！

今次就教大家做一個最簡單的香煎蟶子皇。

材料當然有蟶子皇啦！如果佢肉厚的話，你就在煮之前𠝹開兩刀，得佢平均地熟。我教大家這個是西洋日式煮法，講完大家就明白，當然先叫檔主劏咗蟶子先，回家再洗一次。

然後，用七味粉調味，怕辣就唔好加咁多，再落少少黑胡椒就可以。要手腳快，平時如果蒸，檔主會叫你蒸3分鐘好喇！不要過久，因為時間掌握與美味與否有莫大關係。

加完調味的樣子。

之後燒熱鑊，想香D用牛油，如果唔係加普通食油就可以，健康飲食呀！1茶匙好喇！

首先煎肉那面1分鐘，然後反轉多煎1分鐘，就可以上碟，係咪好簡單呢！但真係要快手，我都係煮咗好多次先令佢口感控制得咁好。

製成品，有機會試下啦！