田園風味餐廳

近排，好多戰友諗住過大海放鬆下，就問我有咩好嘢食？

哈哈！你哋無聽錯，係有咩好好味嘅食物，千奇唔好以為營養師介紹嘅食物，只係烚下烚下，我經常講，減肥唔應該係一個人的終身事業，有時都可以食多一D，放鬆一下，我講計劃完成之後呀？

每次去澳門，我一定會長途跋涉去黑沙這間餐廳，貪佢食物好食之餘，仲好有田園風味，次次都會叫燒沙甸魚、燒雞同沙律，你哋自己睇，係咪流哂口水呢？

條沙甸魚簡直係極品，又滑又香，我班Friend本來好多嘴，講嘢唔停得口，但係一食條魚，大家都靜哂，好簡單啫，想專心享受條魚，咁先尊重條營養價值咁高(高鈣、高奧米加三)嘅魚仔嘛。

另外，就係好新鮮嘅沙律，不過大家記記記記記住，千奇唔好好似我個Friend咁，以為橄欖油唔肥，猛咁落...如果唔係都肥得幾無辜。

其實仲叫咗隻雞，但太香太好味，所以待侍應一送到，大家掛住食唔俾我影囉，但係食肉之前，一定要嘆佢個大大個豬仔包。

仲有提醒大家，佢嘅空調好正，係全天然自然有機田園風，怕熱嘅朋友，黃昏先去啦！間小店叫法蘭度葡國餐廳。

今次介紹嘅食物，減磅戰友都食得，係咪想即刻book船飛呢？