自家製麵包

 近幾個月都很喜歡做麵包，其中一個原因，當然是因為搬屋之後就多咗這個成員，若果唔用吓佢，好似對唔住個麵包機咁，所以，我屋企就每晚都變咗深夜食堂咁，這個食堂是沒有餐牌的，但若果我有材料又懂得做的話，我都會為你做的～～

就係咁，屋企人、朋友、同事的麵包，都由我...個麵包機一手包辦。

我的早餐：濃香咖啡＋白葡萄麥包

另一個自己做包的原因係，話說個多月前，我去咗日本旅行，但旅行前，竟然無將之前在超市買的麵包吃光，餘下一片，但奇怪嘅係，果塊神奇麵包，在10天之後，竟然一點點發霉也沒有，麵包加了什麼，我相信大家都好清楚。

不過，大家又唔好咁驚住，我並不是否定哂防腐劑的存在價值，畢竟，如果無咗佢，所有食物都會好快壞，咁除非大家都歸園田居，否則咩都無得你食，但係，又係咪真係要落咁多呢？？所以，對於某些食物，我又可以得閒自己做吓，我都會盡力令吃進肚的，健康營養一點，這是我對食物的一絲絲要求。但有時候，沒時間自己做的話，就當同自己防腐一下，咩都要平衡一下嘛。

除咗我，而家都好多人鍾意做麵包，但我就從好多朋友呀、戰友呀果度發現，好些人以為自己做麵包就一定健康，便忽略咗好多東西。例如好似我今日在專欄所講，千奇唔好狂加油，有D麵包機的食譜，會教大家做極軟滑麵包，但做一磅麵包當中，竟然要加成35克的脂肪，係，咁係好香好滑，但如果你將一磅麵包切8片，即是每一片有4.3克脂肪，咪太肥囉！如果你又要落合桃又要加芝麻的話，就油上加油。

自己做的白葡萄全麥包

當然，仲要小心你嘅進食份量，因為自己做包，如果你控制酵母控制得唔好，佢發酵不足會變得好實密度好高，但係你見倒佢咁細塊就以為可以食多D食多D，咁就真係肥多D架喇！所以，你必須知道麵粉的換算方法，即是你個食譜每做一片包，的熱量及碳水化合物有幾多。 

講到這一步，要詳細講會好複離，我就試下用個簡單D嘅方法令大家容易理解。

20克麵粉＝1份五穀類食物，所以250克的麵粉做出來的包，就有12.5份，如果個包切8片，就即是每塊提供1份半的五穀類食物啦！

咁一個成年人，一餐又應該食幾多份五穀呢？女的大約3﹣4份，男的就4﹣6份，但當然個別人仕需要係要視乎體重身高及飲食習慣的，如果你有營養師幫你減緊肥，佢就應該有個餐單俾你，你聽佢話，就可以了。

爸爸話要食合桃同提子包，咁我就加哂入去，不過我靜靜加咗全麥粉

唔好問我用邊部麵包機比較好，一來我唔想幫任何產品賣廣告，二來我都只係用過一個，你平日有睇我網誌的，我相信大家都知咩牌子，在我而言，那部機可以咁方便幫我做到個包，我就覺得佢可以，當然，價錢唔同功能一定會有差別的，我朋友買過一部500﹣800元的，一樣做到好好味的麵包，好味與否，我個人認為是在乎食譜及材料的使用。

就分享下我個全麥包食譜。

材料：
250克高筋麵粉（如果做全麥的，就200克高筋麵粉及50克麥粉）
180克清水
15克糖
4克鹽
4克酵母
16克牛油

希望大家都同我一樣，享受做健康營養食物的樂趣。