營養師手記

今日天鵝突襲香港，適逢講座，起初都有少少擔心，但幸好天公造美，9點40分先掛起8號風球，相信參加者應安全回家。 講座後，都要醫肚，成班同事，去食壽司，我哋今日都打算食得健康D，所以只叫了魚生壽司，但係食完之後，侍應竟然送咗一張Coupon俾我哋，我一望就笑咗出尼，送串燒豬頸肉一客，唔係卦，上個星期先講完豬頸肉肥到嚇死你，攪到成餐突然肥哂！ 仲記唔記得呢？這個豬面頰下面的垂肉，100克即兩隻半麻雀大小，已有600多卡，仲肥過麥兜個肚腩，同等份量的瘦肉只有約128卡咋！ 最後都要講多一聲多謝，多謝今日出席講座的朋友。

近排，好多戰友諗住過大海放鬆下，就問我有咩好嘢食？ 哈哈！你哋無聽錯，係有咩好好味嘅食物，千奇唔好以為營養師介紹嘅食物，只係烚下烚下，我經常講，減肥唔應該係一個人的終身事業，有時都可以食多一D，放鬆一下，我講計劃完成之後呀？ 每次去澳門，我一定會長途跋涉去黑沙這間餐廳，貪佢食物好食之餘，仲好有田園風味，次次都會叫燒沙甸魚、燒雞同沙律，你哋自己睇，係咪流哂口水呢？ 條沙甸魚簡直係極品，又滑又香，我班Friend本來好多嘴，講嘢唔停得口，但係一食條魚，大家都靜哂，好簡單啫，想專心享受條魚，咁先尊重條營養價值咁高(高鈣、高奧米加三)嘅魚仔嘛。 另外，就係好新鮮嘅沙律，不過大家記記記記記住，千奇唔好好似我個Friend咁，以為橄欖油唔肥，猛咁落...如果唔係都肥得幾無辜。 其實仲叫咗隻雞，但太香太好味，所以待侍應一送到，大家掛住食唔俾我影囉，但係食肉之前，一定要嘆佢個大大個豬仔包。 仲有提醒大家，佢嘅空調好正，係全天然自然有機田園風，怕熱嘅朋友，黃昏先去啦！間小店叫法蘭度葡國餐廳。 今次介紹嘅食物，減磅戰友都食得，係咪想即刻book船飛呢？

見大家今日無專欄睇，就寫下Blog啦！ 今日打算同大家上數學堂，等大家唔會跌入陷阱，不過大家睇下個標籤先！ 一睇落去，戰友就話差d嚇死，點解！？一包有627『卡』，咁高熱量都話低脂，稍安無躁，因為大家要小心個單位，英國人習慣用kj即是千焦耳，我們平日習慣用的叫千卡，即kcalories，1kcal =4.18kj，所以睇第二行先正確。 點解介紹包薯片，因為所有朋友都話好味d，無他嘅，因為咸d囉！1包37.5克嘅薯片，相等2份五穀，一般大百佳即taste有售！

不經不覺，到電台同各位聽眾朋友分享健康瘦身心得已有年半的時間，都無同大家介紹下我兩位合作無間的好拍檔，今次等我帶佢哋上我個Blog先！ 前面就當然係好鍾意飲摩斯漢堡個綠茶鮮奶的蔡展煇啦！後面正努力對住電腦嘅就係美思啦！ 有d讀者問我個節目幾時播出，好啦清楚d話你知啦，逢星期五晚上9時-9時30分，新城知訊台，聽節目之前，記住攞定枝筆寫低個食譜。

下個星期二，已是講座的第220場了，2年多前，沒有想過會有如此成績，實在要多謝各位嘅參與，仲要多謝數位減磅戰友的真摰分享，各位同事的努力及讀者朋友到場的支持。 以下是下個月的講座日程 A- 4/8 (二) 銅鑼灣中央圖書館地下1號活動室 7:15-8:45PM B- 12/8 (三) 佐敦柯士甸道童軍中心1030室 7:15-8:45PM C-17/8 (一) 銅鑼灣禮頓道33號601室 7:15-8:45PM 記住打電話報名，4/8講座只餘下10個位，Cammi金美個留座電話2891 0920

上星期收到一張幾得意嘅相，所以想同大家分享下。 夏日炎炎，相信大家會諗起不如嘆杯透心涼的雪糕啦！但係...好肥啫，半杯哈根大師雪糕(我最鍾意的士多啤梨味)都有成250卡，當中有3茶匙油同4.5茶匙糖，都唔可以成日食啦！我最多都係1個月食1次。 但係有D戰友就即刻諗起佢嘅遠房親戚，雪芭 (Sorbet)，佢話自己係減咗肥嘅雪糕，咁又係唔係ok呢？其實雪芭同雪糕的分別，在於當中嘅奶類成份，所以同等份量計算，熱量的確較低，但問題係，佢咪又係高糖，半杯有120卡，但糖份比雪糕更多，有約5.5茶匙，所以千奇唔好見到脫脂就開心定先，隨時肥咗都唔知咩事就唔底啦！ 俾個士多啤梨雪芭成份表俾大家睇下，Ingredients: Water, Strawberries, Sugar, Corn Syrup, Lemon Juice Concentrate, Pectin, Chokeberry Juice Concentrate, Elderberry Juice Concentrate, Natural Flavors

好眼瞓呀！唔好嘈啦！仲影，瞓覺都好影，主人你係咪傻傢！ milo的睡姿 moo moo 的睡姿 聽主人講，有d朋友經常都會失眠，其實作為貓貓，一日瞓成15個鐘，真係唔知失眠係點，但係主人話，飲d和暖嘅牛奶對失眠真係有d幫助，因為牛奶有種叫色胺酸嘅物質，可以幫助大腦製造血清素，情緒穩定d，就好瞓d啦！但係，瞓覺前2小時就要飲，如果唔係，好辛苦咁瞓咗，又要去洗手間就麻煩啦！ 仲耍記住睡前4小時唔好飲好剌激嘅飲品囉，即是d咖啡茶，如果唔係包你眼光光。 不過主人成日話，佢一定唔會瞓覺前寫稿，因為個腦會醒哂，咁我同阿哥就好慘，因為主人瞓唔著，就嘈醒我哋陪佢，好慘傢，貓貓最鍾意瞓覺。 講咗咁耐，唔記得話俾大家知，我同阿哥同d靚模爭，都有寫真集出，唔知大家睇咗未呢？好開心因為主人出書，都有預我哋一份。 我同大佬打交前，俾主人影到 早抖喇，即刻打開主人本書睇兩頁，包你即刻瞓zzz