營養師手記

下個星期二，已是講座的第220場了，2年多前，沒有想過會有如此成績，實在要多謝各位嘅參與，仲要多謝數位減磅戰友的真摰分享，各位同事的努力及讀者朋友到場的支持。 以下是下個月的講座日程 A- 4/8 (二) 銅鑼灣中央圖書館地下1號活動室 7:15-8:45PM B- 12/8 (三) 佐敦柯士甸道童軍中心1030室 7:15-8:45PM C-17/8 (一) 銅鑼灣禮頓道33號601室 7:15-8:45PM 記住打電話報名，4/8講座只餘下10個位，Cammi金美個留座電話2891 0920

上星期收到一張幾得意嘅相，所以想同大家分享下。 夏日炎炎，相信大家會諗起不如嘆杯透心涼的雪糕啦！但係...好肥啫，半杯哈根大師雪糕(我最鍾意的士多啤梨味)都有成250卡，當中有3茶匙油同4.5茶匙糖，都唔可以成日食啦！我最多都係1個月食1次。 但係有D戰友就即刻諗起佢嘅遠房親戚，雪芭 (Sorbet)，佢話自己係減咗肥嘅雪糕，咁又係唔係ok呢？其實雪芭同雪糕的分別，在於當中嘅奶類成份，所以同等份量計算，熱量的確較低，但問題係，佢咪又係高糖，半杯有120卡，但糖份比雪糕更多，有約5.5茶匙，所以千奇唔好見到脫脂就開心定先，隨時肥咗都唔知咩事就唔底啦！ 俾個士多啤梨雪芭成份表俾大家睇下，Ingredients: Water, Strawberries, Sugar, Corn Syrup, Lemon Juice Concentrate, Pectin, Chokeberry Juice Concentrate, Elderberry Juice Concentrate, Natural Flavors

好眼瞓呀！唔好嘈啦！仲影，瞓覺都好影，主人你係咪傻傢！ milo的睡姿 moo moo 的睡姿 聽主人講，有d朋友經常都會失眠，其實作為貓貓，一日瞓成15個鐘，真係唔知失眠係點，但係主人話，飲d和暖嘅牛奶對失眠真係有d幫助，因為牛奶有種叫色胺酸嘅物質，可以幫助大腦製造血清素，情緒穩定d，就好瞓d啦！但係，瞓覺前2小時就要飲，如果唔係，好辛苦咁瞓咗，又要去洗手間就麻煩啦！ 仲耍記住睡前4小時唔好飲好剌激嘅飲品囉，即是d咖啡茶，如果唔係包你眼光光。 不過主人成日話，佢一定唔會瞓覺前寫稿，因為個腦會醒哂，咁我同阿哥就好慘，因為主人瞓唔著，就嘈醒我哋陪佢，好慘傢，貓貓最鍾意瞓覺。 講咗咁耐，唔記得話俾大家知，我同阿哥同d靚模爭，都有寫真集出，唔知大家睇咗未呢？好開心因為主人出書，都有預我哋一份。 我同大佬打交前，俾主人影到 早抖喇，即刻打開主人本書睇兩頁，包你即刻瞓zzz

有時候人都幾奇怪，特別係我囉，成日鍾意買D古怪嘢，相信大家都知我好喜歡這枝野菜生活(日本名)或(果蔬生活)香港名，但平日大家見個枝比較肥肥矮矮，但這枝有高挑嘅身型，咁就吸引咗我買喇！ 講番枝汁先啦，平日我哋成日見嘅，即280毫升，1枝可代替每天的1份蔬菜及1份水果，但係有兩件事大家要緊記，菜汁一般纖維份量不足，所以有便秘的朋友一定要緊記，另一件事係，蔬菜汁經常以紅蘿蔔或番茄製成，含豐富胡蘿蔔素，日日飲就有機會變成黃面婆，雖然唔會對身體造成影響，但都唔好睇啦！ 差D唔記得話俾大家知，我今晚放工後會去書展巡視，書展見啦！

唔知大家鍾唔鍾意食鰻魚飯呢？如果好鍾意的話，大家就要小心喇，點解??賣過關子先，因為我將會由每天開始，隔個月的每星期五，於免費區報take me home的健康版有新專欄登場，明天的文章就是關於鰻魚飯致肥的問題，千奇唔好錯過喇！

原來編輯小姐鍾意玩驚喜，剛剛話俾大家知，我個仔仔明天會送到公司，講完唔夠2個鍾，D書竟然係我面前閃過，唔知點解，見到佢順利出世真係令人興奮喇！暫時只係銅鑼灣有書咋。

編輯小姐送來的喜訊：『你的仔仔明天會送到尚營坊喇！唔駛入書展迫，仲唔駛等書展後！』實在太好了，明天就可以見到喇！

公司本減肥天書，正進行史無前例的大改革，所以成間公司，都滿佈食物，我哋每一日就同D食物磅重，再Check下佢哋D熱量，所以無意之中，我哋發現咗一種快捷的午餐選擇，好好食傢。 睇下這盒烏冬先，原先覺得白雪雪，一D都唔吸引，但係再加吞拿魚、調味料豉油同辣椒油之後，再左撈右撈，簡直滋味無窮，但最重要係方便嘛！仲可以減到D磅，而且亦好適合D炎熱天氣，一舉幾得。 講下個製作方法先，材料有烏冬1個(3份五穀)、吞拿魚70克(小罐)、辣椒油1茶匙、豉油1茶匙，當然之後要食番個菜先叫均衡啦！ 第一步，開咗個烏冬之後，放入食物盒，加水放入微波爐叮1.5分鐘，之後將D水流走，放入吞拿魚及調味料，再不停地左撈右撈，就可以喇！

這幾個晚上，都陶醉於他的精彩演出，第一次感受到，什麼是如痴如醉，但是...這一切或許真的太遲了。 今日寫Blog，主要想介紹這個演唱會實在太太太太太太棒了，這星期我已經睇咗第二次喇！ 唉！早d出世咪好囉，畢竟我都係Y世代年輕人，無辦法啦！唯有睇DVD重溫啦！

仲記唔記今日篇文章中有兩個重點呢？同大家重溫下先！ 減磅要減得開心，係屋企煮飯嘅時候，唔好只係烚下烚下，可以用D香料煮，因為香料鹽份低熱量極低，較早之前我都介紹過一枝百搭香草啦，好多戰友都讚不絕口。 另外，記唔記得雞肉去皮前後的熱量相差幾多呢？161千卡及119千卡，分別好大呀！ 溫習完之後，就要動手做咖喱雞，買定D材料先： 脫脂雞湯500毫升；脫脂奶125毫升；洋蔥1個；新薯3個；去皮雞脾肉160克；番茄1個 當然仲要準備調味料啦！ 咖喱粉2湯匙；黃薑粉少許；辣椒粉少許；醃雞肉(1茶匙咖喱粉+1/3茶匙鹽+少許多用途調味香草)；生粉2茶匙 好啦！可以開始喇！ 1. 半個洋菇切碎，另一半切角；連皮薯仔先切件，再出水； 2. 番茄去皮切碎，將雞肉用醃料醃好； 3. 為了令食物的脂肪量減少，可先用焗爐焗熟雞肉，15分鐘180度，如下圖； 4. 將洋蔥碎用極少油炒香，收慢火再加咖喱粉、辣椒粉及黃薑粉；(小心咖喱粉燒焦呀！) 5. 再將切角的洋蔥炒香； 6. 將番茄、(4)及(5)的材料及薯仔加入雞湯；細火煮20分鐘； 7. 最後將焗雞肉加入，慢火多煮20分鐘； 8. 再加奶及生粉多煮5分鐘即成。 記住唔好煮咁多飯，減磅戰友唔想鹽份過高積水，就用2-3湯匙汁好喇！畢竟雞湯也有鹽。 慢慢享受啦！係呀！仲要多謝金美男友拍的指導呢！

一連兩日，出席了tvb週刊嘅活動，同小朋友一齊煮飯仔，原來而家嘅小朋友好醒目，小小年紀齊入廚房，我相信小朋友的啟蒙老師一定係日藉廚師cooking mama! 他們的菜色營養價值都唔錯，拍得住營養師嘅出品，顏色配搭都好好，煮飯俾小朋友，色彩係重要一環，小朋友覺得吸引，自然會愛上啦！其實飲食習慣真係要由細到大培養，家長更應以身作則，曾經幫過一個小朋友減肥，勸了很多次都日日食零食，後來佢靜靜同我講，話媽咪食完飯都攞住包薯片啦，唉！唔通話佢唔好學媽咪咩！ 雖然假期都要工作，但今日工作得好開心，俾d花絮大家睇啦！

有部份讀者同我講，唔想去書展迫，又想買書，點算？ 你可以上我公司訂，但可能要書展後才有書，下星期六前優先訂購，仲有優惠，無論如何，都想藉這次機會，多謝多年來支持我的讀者朋友，來年我會寫更多書籍及食譜，希望大家會鍾意啦！ 另外，更多謝那40多位朋友的留言，實是令我又驚又喜，一時間簡直唔知點反應，你哋都知我慢熱啦！你哋每個留言，每一個電郵，我都會細閱，但請恕我未能一一回覆，但時間容許的話，我必定回應。 當了10年營養師，最大的喜悅，就是能認識素未謀面的你們，與你們一同踏上健康的路，共勉之...

忙咗本書成個禮拜，除咗還稿債俾am730同tvb，仲有去電台做節目之外，其他活動都被迫暫停(當然同戰友的約會除外啦！)，所以而家d堆積嘅工作都要慢慢清。 今個星期六、日，就要出席tvb係將軍澳東港城嘅健康生活嘉年華活動，去做咩？唔知係咪優差呢？因為去食嘢囉...親子有營入廚樂的評判。所以而家要做好準備，要對稿...好彩有戰友送來的窩心水蜜桃及青森蘋果啫，yummy~ 準備本書期間，除咗冷落咗愛貓1號同2號之外，好同事們都俾我冷落，所以而家正努力準備同事們隔個月一次的regular training，咁大家先可以互相支持，所以戰友的成績就會更好。想唔想知我冷落大細毛嘅時候，佢哋點娛樂自己呢？睇下張相，大毛竟然自己睇書，佢都幾專心架，真係有幾分似我！ 今日寫blog最主要想同大家講吓本新書，一如以往，每一年我會將過去一年的專欄結集，本書除咗有專欄中的文章，仲多咗D卡路里資料同食譜，靜靜話俾大家知，裡面仲有我對好受歡迎的愛貓！所以由於版權問題，恕我未能上載每星期的文章到網誌，但大家可以去am個網睇網上版。另外，有很多讀者問，係邊間出版社出，當然係同我合作咗三年的經濟日報出版社啦！編輯大人給我一張Coupon，俾大家睇下有無用，佢話黑白都ok。

好耐無同大家交流下喇！所以今日打算同大家玩個魔術，首先睇下這張相先... 一見到個麵，你會諗咩呢？即食麵都食得？個麵咁細，係咪呃俾人呢？起初，我都有這些問號， 於是，我就諗：『試下無妨啦！』再聽食物環境中心話，反轉背面再睇睇個營養標籤，大家睇下先，知唔知點睇呢？ 首先望下個卡路里，唉！絕對係寫錯位要回收，個卡路里應該寫右手面，但係我計算過，卡路里的確係202千卡，但係各位戰友千奇唔好睇漏眼，絕對...係絕對唔可以只係睇卡路里，同時需多睇脂肪量，睇見係0g，就放心喇。咁戰友們要減肥需換算份量跟餐單，又可以食幾多呢？ 又要計下，通常1份五穀類食物提供15克碳水化合物及2克蛋白質，但由於太複雜，只用碳水化合物計算，就即是約3份五穀啦！不過食嘅時候要小心d鹽，因為湯包含有鹽，約有1450毫克，所以唔好落咁多喇！3分鐘之後... 就變咗咁大碗，係咪好似變魔術呢？但係要提下大家，營養標籤法例，下年7月先全面推行，現時未有法例管制，不過我自己試過，可信性都幾高，佢個招牌叫大城小廚，暫時只見到7仔有得賣。

本書完成喇！真係想叫出尼，編輯話本書今晚會送入產房，應該可以趕得到下個星期係書展同大家見面，連日來，多謝大家忍受日日睇個blog淨係見到我，明天會寫番個blog (因為今日講完講座，太疲倦了)，但無論如何，真係好感激大家送上無限的祝福、美食、湯水，仲有熊仔，我一定會繼續努力，將更多營養知識帶俾大家，再一次，由衷的，感謝。

忙住對稿，俾人偷影都唔知添！唉！今晚都唔知幾點走得，無辦法啦！編輯小姐好似催命鬼咁，星期一仲要自己上尼攞稿，本新書趕住書展同大家見面嘛！唔講喇！週末玩得開心D啦！

肚谷谷，坐廁所坐咗足15分鐘，條腸一D動力都無，可以點? 大家第一時間就會諗到；飲8杯水啦！食多D生果，特別係奇異果、木瓜同連皮的蘋果或者梨咪得囉！但係都唔得咁點算呢！ 部份戰友應該聽我介紹過，萬試萬寧的方法--食全麥維(All-bran)包你條腸路路暢通，但係...lee種食物，唔係人人都接受到，因為都幾...唉！都好難形容，自己感受下啦！唔可以唔話俾大家知，45克，即是約1碗竟然有12克纖維咁多，咁你哋知點解一食就暢通哂啦！ 近日同事介紹下，發現有一個較好的食法，就係放入咖啡入面，有少少炭燒咖啡味，但係切記放入去咖啡後，等d全麥維未腍之際，就要食，咁會較好。

今朝親身感受到酷熱天氣下的香港，因為我差點變烘濃麵包! 發燒達35度，除左提醒大家地球先生已經大發雷霆外，仲話俾大家知香港嘅夏天已經到喇！昨晚，講座後同同事食飯之後，仲去咗嘆冰凍甜品，對於減磅戰友尼講，甜品好似同佢哋暫時無緣，但原來除咗自製外，現在有D甜品店，都有適合減磅戰友的選擇。 這裡有種選擇，分別是西瓜涼粉、鮮雜果涼粉及鮮雜果豆腐花，我幫大家問過，你可以柯打不加糖漿的，如果要少少甜，就自備代糖粉，哈哈！我問完一大堆問題後，咩都無叫，自己都覺得唔好意思，就叫咗杯西瓜汁囉！

實不相瞞，起初改食糙米時，都幾抗拒，不竟由細到大，碗飯都是白雪雪的，入口應有軟綿綿的感覺，但食糙米的質感，完全兩樣。後來我千揀萬揀，俾我搵到這個牌子，佢真係唔錯，比較容易接受，所以既然有讀者問我食邊個牌子，就話俾大家聽啦！我係360買，或者Marketplace等... 不忘提提大家，若洗米時候，發現d米甩色，只是因為水溶性的花青素(anthocyanins)作怪，它是抗氧化營養素，可保護血管，這是糙米高纖、礦物質豐富的另一好處。

剛放了5天的悠長假期(對我來說)，沒有回鄉(日本)，皆因毗方的匯率太高了，今次選擇了過大海影相，睇碟聽歌兼睇書，順道陪陪大小毛。 這幾天選來的DVD都是MJ的經典作品，他懾人的聲線，就算不是他的歌迷，也會聽得如痴如醉，聽歌的同時，亦瀏覽過外國網站，看看這位天才橫溢的歌手之深路歷程，他的一生，可以用傳奇去形容，他的才華是天賦的，但不能抹殺他背後的努力。 前天，出席過母校的畢業分享活動，同學們問：『怎樣才會成功？怎樣才能找到一份好工！』我反問：『你們認為怎樣才是一份好工？』他們異口同聲說：『人工高、假期多，還要不用OT的，就是好工！』我答：『剛出來工作，最重要是唔蝕底，別人晚上呼呼大睡，你倒要把握這些時間，汲取別人的經驗，因為你沒有的，是經驗，多看書，不只行內的知識，任何事物，你均要抱著諸事八卦的心態，工作時，別人的要求是100分，你便要幹150分，看來好像壓力沉重，但沒有壓力的，是不能茁莊成長的。』 共勉之-

正積極減磅又想食薯片，可以點算？ 方法一：買包低脂薯片 方法二：自己整啦！唔識，《營養廚房》教你 買低脂薯片有咩要留意，大家可以跟住以下標準去揀，首先最緊要睇下脂肪含量，一般薯片，每次食用份量約為1oz (28克)，而這28克內，最好含少於5g脂肪，即一茶匙油份，千奇唔好依賴包裝上寫上的x0% less fat，因為這只代表比一般大牌子的脂肪含量少，不一定是低脂的。 另一件事，就要睇下用d咩油，當然最好就愈少反式脂肪愈好，試下睇成份中，有無起酥油、部份氫化植物油等字眼，如果有，就即是含有反式脂肪啦！ 最後就係要留意會唔會好咸，以每人每日2400毫克鈉質計算，每好一次攝取少於５％啦！即是少於120mg就最好啦，畢竟薯片都只係小食。 有多Ｄ時間又有心機玩煮飯仔，就跟住以下程序做。 １．買個靚薯仔先，最好就係新薯或日本薯仔，因為較爽口，適合做薯片； ２．然後用把較鋒利的靚刀，薄切薯仔，最緊要唔好去皮，留多Ｄ纖維； ３．跟住再用紙弄乾水份，再洒上黑胡椒及少少少少海鹽； ４．燒熱鑊，加非常少油，跟住俾Ｄ心機慢慢烘，得咗！ ５．約１５分鍾就可以了，咁就最健康啦！看看這幾片熱鍋上的薯片，睇倒都想食！ 聽完《營養廚房》後，記得明天買齊材料，一齊做自家製薯片啦！